Proverbios 24 - Biblia Dc en Mixe de Quetzaltepec

¹ Këtii xy'ëxëëk'ixëty yë ëxëëkja'aytyëjk; ets këtii xywyinmayëty jam myajpaata'anëty ma yë'ëjëtyën.

² Jä'ä ko yë'ëjëty yi'iyë myëmaay myëtajtëp wi'ix ëxëëk y'ëtë'ëts y'ëna'antëtyën, ets yi'iyë xëmë kyajpxtëp myëtyaktëp wi'ix winë tëkatsy tuntëtyën.

- 20 -

³ Yë'ë mëët yë jëën tëjk oy yajkojy yë wijyajtën, ets mëët yë këpetyajtën yajkojtso'ontä'äky yë y'ëjx.

⁴ Mëët yë nija'awën ets ixpëkyajtën ujts yë jëën tëjk yajpaaty mëët winëjaty mëti'ipë tsowën ets mëti'ipë yajtukjotkëtakpën.

- 21 -

⁵ Jaakni'ik yë ja'ay tukmëjpëtsëmy yë wijyajtën ets këtiinëm ko ja'ay kyumëjaawëty ets myëkëty, ni'ik tsyowpaaty ko ja'ay wyijyëty ets këtiinëm ko ja'ay myëkëty.

⁶ Jëtu'un ko yë tsip yajniwinmayë, jëyëjp yë ja'ay yajxon tmëmay tmëtajy; e ko pën myëtä'äky jam tsipjotm, paatykyëjxm myëtä'äky jä'ä ko nyimay'atë mëti'ipë najts'ë'ëw najtskajpxëtëpën.

- 22 -

⁷ Yë ja'ay mëti'ipë tsuujën ka'ap tnijawë wi'ix y'ëna'anëtyën ko jam jyä'ty ma kutujktaknën, jä'ä ko wijyajtën ka'ap yajpaaty ma yë'ëjën.

- 23 -

⁸ Mëti'ipë ja'ay yi'iyë myääpy tyäjpyën wi'ix yë jyiiky myëku'uk tyajtsëtyut tyajwintëkoyëtyën, aak nimëtyakëp ja'ay muum ko jëtu'un jyä'äy'äty.

⁹ Yë tsuuja'ay yi'iyë myääpy tyäjpy wi'ix pyokytyunëtyën. Ka'ap pën mëët oy nyäjyawëty yë ja'ay mëti'ipë ëxëëk ëtëtsp ënaanpën.

- 24 -

¹⁰ Pën mijts poj'am xymyëkjawë ko ëxëëk mjaty mkëpety, wäänë ja jot mëjaaw xymyëëtëty.

- 25 -

¹¹ Yajtso'ok ja ja'ay mëti'ipë tëë nyitukën ets y'ookëty; Yajtso'ok ja ja'ay mëti'ipë ëtsë'ëkëtuuy yajpatpën ets o'kënjëjp'am y'ijnë.

¹² Jä'ä ko oy mja'ënaanpëty ko ka'ap xynyijawë; ja Dios mëti'ipë winë y'ijxypyën ets nyipaye'epyën winë, wa'ats ja t'ixy tnijawë ets tyukëpäjta'ajäämpy ja ja'ay nitu'ukjaty wi'ixjaty tii të tunyën.

- 26 -

¹³ U'unk maay, jë'kx yë jompya'ak; jawë wi'ix xu'kx jyawën.

¹⁴ Jëtu'un janty pa'akwijtsnë jyawë yë wijyajtën ets nija'awën. Ko xypyaatëty, aak'oy nëjkx winë mwinpëtsë'ëm mjëjp pëtsë'ëmxëty, mëti'ipë ënety mëmääpy mëtäjpyën xypyata'any, nëjkxëp xypyääty ets nijëna'a nëjkx kyakutëkoy.

- 27 -

¹⁵ Nijëna'a ja ëxëëk winma'any xykyapaatëty ma ja'ayën mëti'ipë oy tsuj juukyajtpën, këtii ëxëëk m'ëtë'ëts m'ëna'anëty ma jyëën tyëjkën.

¹⁶ Yë'ë, oy jëna'ajëty ëxëëk jyäty kyëpety, jotkujkëp jatëkok; e yë ëxëëkja'aytyëjk pën tëë ja ëxëëkpë tyukja'tëtë, nijëna'a kya'ëkjotkujktaknëtëty.

- 28 -

¹⁷ Këtii xytyukxoonta'akëty ets ka'ap jää mxëëwtunëty ko ënety ja mmëtsip kyëtäy kyëpipy ets ëxëëk jyäty kyëpety,

¹⁸ jä'ä ko yë Dios ka'ap t'oyjyawëty ko jëtu'un t'ixëty, yë tsyip y'äkë nëjkxëp jam tjëëpëky ma yë'ëjën.

- 29 -

¹⁹ Këtii xytyukjoot'anpëkëty yë ëxëëkja'aytyëjkëty, ni xykya'ëxëëk'ixëty mëti'ipë tëkatsy yë jyot wyinma'anyën.

²⁰ Jä'ä ko yë'ëjëty ka'ap oy kyëxa'antë; Yë ëxëëk ja'ay jëtu'un pyitsa'any tä tu'uk kutë'kxnën.

- 30 -

²¹ U'unk maay, wiinkutsë'ëkë yë Dios ets yajkutujkpë. Këtii mye'eymyuk mnajxmukëty mëët yë ja'ay mëti'ipë mëtsip'ajtpën;

²² jä'ä ko yë'ëjëty wäänë oy y'itë ets ëxëëk jyata'an kyëpäta'antë, ni pën tkanijawë tii tëytyu'unën mo'ojanëtëp yë Dios mëti'ipë ënä'ämp yajkutujkpën.

Yaa wiinkpë myiny yë y'aaw y'ayukëty yë wijyjyä'äytyëjkëty.

²³ Ya'atë ojts näjyëtu'un tkajpxtë wijyjyä'äytyëjkëty. Ka'ap y'oyëty ko jam ma kutujktaknën win'ixy wiinkexy ja'ay yaj'oyjyawë.

²⁴ Ko pën y'ënä'äny ko ja pokyjyä'äy ka'ap tii poky tmëëtëty, pojkëp yë naax kajpn ets ka'ap naax kajpn tsyokyë.

²⁵ E ja mëti'ipë tyiytyuunpyën ja pokyjyä'äy, oy ja jyuuky'ata'any; ets may yë ja'ay y'oyjyawëty.

²⁶ Mëti'ipë ja'ay oy yajxon ëëw'ëtsoop kajpx'ëtsoopën, jëtu'un yë nyäxy tä jeexyë pën t'amëtsu'kxën.

²⁷ Yajwintu'upëk yë mju'uyën mkëpäjtën jam tu'u'am, yajtu'uye'ey yë mtuunk jam mkamjotm, ets ok yë mjëën mtëjk xykyojëty.

²⁸ Këtii ajotkumonë xynyi'apëtsëmëty yë mjëëky mmëku'uk ets këtii tii xynyikajpxëty mëti'ipë ka'ap myëtëyëtyën.

²⁹ Nijëna'a xykyawinmayëty xytyuunwinpitëty winë ets näjyëtu'un ja mmëku'uk xytyuna'anëty tä ënety ëxëëk të mtunyën.

³⁰ Tëës jam nnaxy ma nuux ja'ay yë kyamën, ets ma të nyi'ipy të kyojyën yë tsuuja'ay;

³¹ etsës të n'ixy ko jam kyamjotm äpny jam mayjyajtëp, ets ja tsaawääpy tëë kyëtaawtaaynyë.

³² Koos jëtu'un të n'ixy, täätsës të nmëmay të nmëtajy etsës të npaaty ja winma'any.

³³ Mijts tamës yë mmaapë mpo'kxpë ets mku'u'uy mkuwëjpxpë, je'eyë mnäkyë'ëmëkityë ets mki'itwinpity.

³⁴ Wäänë y'itëty ko xyjya'ijxnëty kajtëm tii xymyëëtëty, jëtu'un ja ëyo'on mtukmina'anyë tä tu'uk yë mä'tspën.