Proverbios 23 - Biblia Dc en Mixe de Quetzaltepec

- 6 -

¹ Ko tu'uk yë ja'ay mwowëtëty kääpyë ukpë mëti'ipë mëj'äämpy ijtpën, mëmay mëtaj jëyëjp pën wyintuuy myajpaaty.

² Oyxyëp yajxon mjajanty yu'ookyë, kumä'kxë yë myuu.

³ Këtii xy'atsokëty yë kyä'äyën y'ukën mëti'ipë xu'kx yaj'ijxpën y'oytyunyëty, jä'ä ko wä'änxyëp je'eyë mtukwin'ëënyë.

- 7 -

⁴ Këtii nëkoo ajotkumonë mnämyëjaaw'ixëtëty ets kumeenyjyä'äy mnäyaj'awinpita'anëtëty. Ixmatsmës yë'ë, këtii yi'iyë xymyëmay xymyëtajy.

⁵ Pën jap yë mjot mwinma'any mja'akyukëp yë'ë ko kumeeny'ajtk nëkoopë yë'ë, yë wit meeny poj'am yë kyixy, jëtu'un tä yë witsn kyääkjëtityën tu'ktsojkyë.

- 8 -

⁶ Këtii mnëjkxëty kääpyë ma ja'ayën mëti'ipë wintukën, këtii xy'atsokëty oypyë jyi'kxy pyiky,

⁷ jä'ä ko yë jë'kxy pëky mëti'ipë yäjkpyën jëtu'un tä jeexyë waay jap të y'aka'ajën tojkxjoty mëti'ipë yo'kjä'pxpën.

⁸ E oy ënety tii të xyjyajë'kxy m'ëëtsëp jatëkok, e nimaa kyatuna'any oy ënety janty'oy janty tsuj të mxony të m'ity.

- 9 -

⁹ Këtii xytyatsk mmëkajpxëty yë tsuuja'ay, jä'ä ko je'eyë tukxi'ika'any ja mwijy aaw mwijy ayuk.

- 10 -

¹⁰ Këtii xyajtëkatsëty yë tsëpa'an mëti'ipë të tpëjkta'aktën yë m'aptëjk, ni yë'ë xykyapëjkëty yë nyaax kyam yë ku'ooky u'unk,

¹¹ jä'ä ko yë'ëjëty myëët'ajtëp yë yajnitsokpë, mëti'ipë winë tyuunpyën mëët yë mëk'ajtën, mëti'ipë nëjkx ëxëëk mtunyën ma ënety yajniwaantu'utën.

- 11 -

¹² Yajtun ja mjot mwinma'any ets mkopk mtatsk ma winë myajtukni''ixën ets myajtuk'ëwaanën.

- 12 -

¹³ Këtii jëtu'unyë xynya'ixëty ja ëna'ktëjk ko tii tëkatsy tunëty; ka'ap yë'ëkyëjxm tyim'ookëty ko mäjtsk tëkëëk kë'ë yaj'ëxmëju'pxëty.

¹⁴ Ko yajtuk'awijtstu'utëty ja ëxëëkpë, jam ënety xyajpëtsëmy o'kënjëjp'am.

- 13 -

¹⁵ U'unk maay, ko ënety ja wijyajtën të xypyääty, ni pën jëtu'un jotkujk kyanäjyawëtëty tääjës ëjtsën.

¹⁶ Jotkujkës näjyawëtëty koos ënety nmëtoy mkäjpxy mmëtyä'äky jëtu'un ijxtëm pyäätyën.

- 14 -

¹⁷ Këtii xy'ëxëëk ixëty yë pokyjyä'äytyëjk; nikë yë'ë xëmë Dios yajmëjnax;

¹⁸ jëtu'un oy tsuj ja mjot mwinma'any wyimpëtsëm jyëjpëtsëmëty, ets xypyaatëty mëti'ipë m'a'ijxy mjëjp'ijxypyën.

- 15 -

¹⁹ U'unk maay, ja'akyukë ja aaw ayuk ets winë yajxon xyjyatëty. Yë'ë jëtu'un mëmay mëtajëp xëmë ja në'ë tu'u oypyë ets yë'ë xypyanëjkxëty.

²⁰ Këtii mëët mye'eymyuk mnajxmukëty yë ëmu'ukyë ja'ay, ni yë'ë mëët mkaye'eymyukëty mëti'ipë je'eyë tyäty kyaxën,

²¹ jä'ä ko mëti'ipë uktëp mukëtëpën ets mëti'ipë kaxëtyën, o'ktëy kyukëxëtë; ets nuuxtëjkëty këëts këëts ja wyit tjaakyajtuntë.

- 16 -

²² Ja'akyukë yë mteety yë y'aaw y'ayuk mëti'ipë të myajyeekyën. Këtii yë mtaak mtsi'tsk jëkäm jëxkë'ëm xypyëjkta'akëty ko ënety myëjja'ayënë.

²³ Juy këpät yë wijyajtën, ëëwtë'ëw kajpxtë'ëwën ets ja ja'aykyujkën ets këtii xytyookëty.

²⁴ Ja u'unkteety, mëti'ipë ja y'u'unk y'ëna'k wijyën, jyëkyejpy jotkujk nyäjyawëtëty ets nyätyukmëjjawëtëty.

²⁵ Paaty mijts, yë'ë mëmay mëtaj wi'ix mëpaat ja mteety mtaak jotkujk nyäjyawëtyën.

- 17 -

²⁶ U'unk maay, pëjkta'ak yë mjot mwinma'any ma ëjtsën, ets m'oy'ixëp mëti'ipës ntuuntäkpy nkajpxtäkpyën.

²⁷ Jä'ä ko yë wiink to'oxytyëjk ets ja mëti'ipë jyot nyini'kx tyo'kpyën, jëtu'un yë'ë tä tu'uk nëëjutën axu'utspë.

²⁸ Jëtu'un nyë'ëtän tyu'utänë tä tu'uk yë mä'tspën, ets may yë ye'etyëjktëjk tyajnë'ëtëkoy tyajtu'utëkoy.

- 18 -

²⁹ ¿Pën ëyoop jotëkoopy? ¿Pën ka'ap jyotkujk'aty? ¿Pën je'eyë xëmë tsiptuump ets ënät ok tmëkjawë? ¿Pën näjya'awëyëp tëë yowë tsyëtyujta'ay wyintëkooytyä'äy ets ka'ap pën wi'ix tyunyë? ¿Pën je'eyë wyiin tsapts yaj'ijxp?

³⁰ Yë'ë mëti'ipë je'eyë ukp mukëpën, janaam jatsojkpë t'ukmatsyën yë nëë mëti'ipë jempyëtsëmën, mëti'ipë mukpën.

³¹ Këtii xy'ixk'atëty yë nëë wi'ix oy kyëxë'ëkyën, tsaptspë kyëxë'ëkyën ets mëti'ipë atë'kxpën jap a'ukënjoty, janty këtiipë tsyipëtyën yaj'ix'uukë'ëkyën.

³² E jääts ko yaj'uktaaynyë jëtu'un yaj'ijxnë tëë yowë ja'ay tsyä'äny tsyu'utsyë ets mëk yowë pyëjkënë.

³³ Amäjtsk atëkëëk jää winë xy'ijxnëty, ka'apë nijëna'a xy'ixynyëmën; aakyë'ë mëmaay mëtajnëp tsipëtypë, ets xykyajpxnëty ka'apë ninu'un yaja'akyukën.

³⁴ Jëtu'un mnäjyawëtëty nëëwiinkëjxy yowë mkëniin'ëwtity ets jam yowë muum kepyjyëjp'am myajpaaty,

³⁵ ets m'ëna'ana'any: Tëës nyajkoxy nyajtsiiky ets ka'apës të njawë, tëëjës nyawopy ets ka'apës të n'ixy pënës të xywyopy, e koos nwijëty, jaak'uukaanpës yam.