Proverbios 21 - Biblia Dc en Mixe de Quetzaltepec

¹ Yë jyot wyinma'any yë yajkutujkpë, jëtu'un tyu'uye'ey tä tu'uk yë mëjnëëjën, jä'ä ko Wintsën kë'ëm yajtu'uye'epy ijxtëm tsokyën.

² Yë naaxwiinyëtë ja'ay aak'oy t'ixy tëkokyë mëti'ipë tyuunpy kyäjpxypën; e Dios yë'ë patëp t'ixëty pën oy ja ja'ay ja jot winma'any tmëëtëty.

³ Tun ja nipaye'eyën oypyë ets mëtëypyë, yë'ë jëtu'un yë Dios ni'ik tyukjotkëtäkpy këtiinëm yë wintsë'kën.

⁴ Ja nëë'ix pa'at'ix, ja mëj'ajtën këjxm'ajtën ets nämyëjjaw näjyääntyjyawë, aak poky yë'ë.

⁵ Ko yë ja'ay tii yajxon tuknipëjktaakë, oy wyimpëtsë'ëm jyëjpëtsë'ëmxëty. Ja'ay mëti'ipë janty ajotkumonë tii tyunäämpyën, kë'ëm nyäyajkujo'opyë.

⁶ Ja wit meeny mëti'ipë yajpatpën mëët yë win'ë'ënën, ka'ap jeky y'ity ma ja'ayëtyën mëti'ipë o'kën y'ijxtaaytyëpën.

⁷ Yë ëxëëkja'aytyëjk kë'ëm nyäyajkutëkoya'anëtë ko je'eyë tsyiptuntë, mëët ko ka'ap tsoktë ja oypyë nipaye'eyën.

⁸ Mëti'ipë tyuunpyën yë ëxëëk ja'ay ka'ap y'oyëty ets ka'ap tyukjotkujk'ajnëty; mëti'ipë yë oyjyä'äy tyuunpyën wa'ats yë'ë ets jyëkyejpy yajtukjotkujk'atëty.

⁹ Ni'ik jotkujk yë ja'ay yajpaaty mëti'ipë tëjknëkëjxy juukyajtpën; këtiinëm ko ja'ay tëkoty jyuuky'äty mëët ja to'oxytyëjk mëti'ipë je'eyë mëët xëmë tsyiptunyën.

¹⁰ Yë ëxëëk ja'ay yi'iyë myääpy tyäjpy wi'ix winë ëxëëk tunëtyën; ja jyiiky myëku'uk nijënu'un oy tka'ixy.

¹¹ Ko yaj'awijtsë'ëky yë ja'ay mëti'ipë ëxëëk ja'ay'ajtpën, jää yë tsuuja'ay winë tjaty, e yë wijyjyä'äy je'eyë winë yajtukmëmëtyä'äky tääts tjaty.

¹² Yë juuky Dios, wa'ats t'ixy yë jyëën tyëjk yë ëxëëk ja'ay, ets xit ko'ow tyajjaty yë ëxëëkja'aytyëjk.

¹³ Mëti'ipë ja'ay ka'ap tja'akyukën ko yë ëyoopëja'ay myënu'kxtä'äkyë, ka'ap näjyëtu'un pën pyutëkëtëty ko ja näypyutëkë tjayajmëyatëty.

¹⁴ Ko ja'ay tyäky tu'uk yë näynyamo'ojë mëët tu'uk yë oyjyot oywyinma'any, yë'ëpaat yë tsip tyajxeemy tëëyëpë tsyo'ontaknën.

¹⁵ Ko mëtëy tii yajnipaye'ey, yë'ë wa'ats ja'aytyëjk xoontaktëp; e yë ja'ayëty mëti'ipë ëxëëk ëtëtstëp ënantëpën, xit ko'ow jyata'antë.

¹⁶ Mëti'ipë ja'ay ka'ap yajxon winë tunyën jap jya'ta'any o'kpë itkujky.

¹⁷ Mëti'ipë ja'ay yi'iyë tsyojkën'ajtypyën yë tsooy mëti'ipë pa'akxu'kpën ets je'eyë y'uuka'any myu'uka'anyë jam jyëjpkëxa'any ëyo'ontum.

¹⁸ Yë ëxëëk ja'ay mëti'ipë ka'ap mëtëy jyuuky'ätyën ets ëxëëk jyä'äy'äty, yë'ë nëjkx ëxëëk jyäty kyëpety jëtu'un tä jeexyë ëxëëk jyatën kyëpätën yë wa'ats ja'ayëty.

¹⁹ Wä'än jëtää jaak'oy yë ja'ay muum jyuuky'atëty të'ëts'itum ets këtii ko jyuuky'atëty mëët tu'uk ja to'oxytyëjk mëti'ipë ëxëëk ja'ay'ajtpën.

²⁰ Ma jyëën tyëjkën yë ixpëkyjyä'äy jap'ajtp ja wit meeny mëj këjää ets ja oyjyätypë ja tsooy mëti'ipë pa'akxu'kpën. E yë ja'ay mëti'ipë tsuujën yajtuuntääpy poj'am winë mëti'ipë yiin wäänë myëët'ajtypyën.

²¹ Mëti'ipë y'ixtääpyën ja tëy'ajtën ets mëtëypyë, pyätyp ja juuky'ajtën ets mëj'ajtën.

²² Yë ja'ay mëti'ipë wijyën nyija'ap wi'ix tu'uk yë naax kajpn tnitëkëtyën ets tyajkutëkoyëty, oy jënu'un yë naax kajpn këwent'aty, jya'ity, ets jya'itë jam yë jotmëkja'aytyëjk.

²³ Mëti'ipë ja'ay wyiin y'aaw kyëwent'ajtypyën, ko tii t'ëy tkäjpxy, nijëna'a ëxëëk kyajjat kyakëpätëty.

²⁴ Nämyëja'aw näjyääntyja'awëpë, ets ëxëëk ja'ay ka'oyjyä'äy yajtijy mëti'ipë mëj këjxm ja'ay'ajtpën.

²⁵ Yë nuuxpë ja'ay mëpaatëp y'ooky ko tii tjatsojkën'aty, jä'ä ko kyë'ë ka'ap tii tuna'any;

²⁶ ko xyëënaxy jyatsojkpy tii. Yë wa'ats ja'ay yäjkpy winë ko tii tmëët'aty ets ka'ap tukwintuk'ooky.

²⁷ Dios ëxëëk t'ixy ko ëxëëkja'aytyëjk tii tyoxtë. Jä'ä ko ka'ap tii ëmuumtu'ukjot tyaktë.

²⁸ Yë ja'ay mëti'ipë ënaanpën ko tëë tii t'ixy ets ka'ap jyëtu'unëty, nëjkxëp y'atëkoy. Mëti'ipë ja'ay tyukjajtypyën wi'ix winë yajxon tmëtoowkukëty, tyukjajtyp wi'ix y'ëtsoowinpitëtyën.

²⁹ Yë ëxëëk ja'ay jëtu'un kë'ëm nyäjyawëty oy yowë winë tuny, yë oyjyä'äy wa'ats nijawë ko oy winë tuny.

³⁰ Ma Tiosën ka'ap nimëti'ipë wijyajtën tsyowpaaty, yë'ëpaat ka'ap tsyowpaaty yë këpetyajtën ets ja ma'ayën tajën.

³¹ Yë ja'ay ko nyëjkxa'any tsiptuunpë jëyëjp tnipëjktaakë yë kwaay; e yë Dios yë'ë y'ëwatsyp ko ja'ay myëtä'äky tsipjoty.