Proverbios 18 - Biblia Dc en Mixe de Quetzaltepec

¹ Ja'ay mëti'ipë atsojkpën, yi'iyë y'ixtääpy mëti'ipë tyuk'oy'atëpën, ka'ap jyä'äkyukë ko pën y'ëëwtë'ëy kyajpxtë'ëyë.

² Yë ja'ay winma'anytyukpë ka'ap tmëmay tmëtajy tii tjatëty; yi'iyë nätyukmëjja'awëyëp ko yiin wään tii tnijawë.

³ Yë tuuntëko'oyën yajtsëyuump yë'ë, mëti'ipë nämyëja'awëyëpën ka'ap pën kyumayë.

⁴ Yë naaxwiinyëtë ja'ay yë y'aaw y'ayuk, jëtu'un tä tu'uk yë komnëëjën, jëtu'un tä yë mëjnëë pyëyi'ikyën ets tä nëëjutën ma pyëtsimyën wijyajtën.

⁵ Ka'ap y'oyëty ko yë kutuunktëjk t'oyjyawëtë tëëpë tyuuntëkoyën jä'ä ko tsojk ka'ap tii yajxon tnipaye'eya'antëty ets yë'ë wa'ats ja'ay t'ëkyajpokytyëjkënëtëty.

⁶ Yë tsuuja'ay ko ka'ap tmajts'ity yë wyiin y'aaw, ëxëëk tmëjaty. Mëët ko ka'ap tukjaty wi'ix kyajpxëty myëtya'akëty yajxon muum yajwinkoxy.

⁷ Yë tsuuja'ay kyë'ëm aaw kyë'ëm ayuk ëxëëk nätyuktuunëp; mëët yë'ë ko ka'ap tmajts'ity ja y'aaw yä'än, jëtu'un tpaaty tä jeexyë nyätyukyo'kwitsëty yë tejpxy.

⁸ Yë pi'tskäjpxy jëtu'un yë'ë tä jë'kxy pëkyën pa'akpë ets ka'ap jyotkëtä'äky; e ko yajmëtoow'ity, jëtu'un yajmëtoy tim atëjk tim jotëjkëp yowë.

⁹ Yë ja'ay nuuxpë ets mëti'ipë je'eyë winë yajma'typën, jëëky mëku'ukën y'awinpity.

¹⁰ Yë Dios yë xyëëw, jëtu'un yë'ë tä tu'uk yë mëjpotsyën mëti'ipë mëk tënääpyën ma kyäktso'oktën ja'ayëty mëti'ipë juuky'ajtëp mëët yë tëyajtën.

¹¹ Yë kumeenyjyä'äy jëtu'un tjawë yë wyit myeeny tä tu'uk yë mëjpotsyën mëti'ipë naax kajpn kyuwäänpyën.

¹² Ko ja'ay nyämyëjjawëty jää nyäyajtëkoyë, e ko ja'ay yu'unk naxym nyäyaj'ityë, jää wyimpety.

¹³ Tsuuwinma'any ets tsëtyu'un yë'ë ko jëyëjp ja'ay y'ëtsoy, ets ka'ap tmëtoy wi'ix yaj'ënëëmën.

¹⁴ Tu'uk yë pa'amja'ay nikë wä'än jyaak pëtë'ëkëty ko yë jyot wyinma'any y'ëna'anëty ko pyëtë'ëka'any; e yë ja'ay mëti'ipë tëë jyot wyinma'any tyimkëxyën, ¿Wi'ix y'ëkpëtë'ëkëty?

¹⁵ Yë ixpëkyjyä'äytyëjk ets wijyjyä'äytyëjk pyatëp yë nija'awën mëti'ipë y'ijxtaaytyëpën.

¹⁶ Mëët tu'uk yë näynyamo'ojë, ëwatsp yë tëjk'aaw oymyaajëty, ets jajtp yë ja'ay mëët yë näynyamo'ojë jampaat ma mëj'äämpyë ja'ayëtyën.

¹⁷ Ko mëtu'uk ja'ay myiny ë'ëmpë ma kutujktaknën, jëtu'un yajmëtoy yë'ë yowë mëtëy kajpxp, e ko myiny ok mëti'ipë mëët të nyämyëtëkoyën tääts ka'ap ja y'ë'ënën y'ëktuunkojnë mëti'ipë ënety jëyëjp të myinyën.

¹⁸ Yë oypyë nipaye'eyën yajkëjx yë tsip, ko tyaj'oyë ja tsip tu'knax ma ja'ay kyanämyëkëxyën.

¹⁹ Ni'ik jyoot'anpëky yë mëkä'äx ko yajmëtëkoy, këtiinëm tu'uk yë kajpn mëti'ipë napotsyën. Yë tsiptu'un tsipkajpxën jëtu'un jyëjpmëtij jyëjpmëwa'akë tä yë pujxnën mëti'ipë këmoontëjk y'akämtuk'ajtypyën.

²⁰ Yë aaw ayuk yajjotkujkëp yë winma'any; jëtu'un tä ja'ay kyu'uxyën ko kyäy.

²¹ Yë aaw ayuk yaj'o'kp ëkë yajjuuky'ajtp yë'ë; mëti'ipë ja'ay ku'awakën ëxëëk jyäty kyëpety.

²² Ko ja'ay tpaaty yë tyo'oxytyëjk, mëj këjää jëtu'un winë të tpaaty. Yë'ë jëtu'un y'ëxajëp tu'uk mëj nämyëyatë mëti'ipë Dios yäjkpyën.

²³ Yë ëyoopëja'ay jëëytyakp nu'kxtakp ko kyäjpxy; e yë kumeenyjyä'äy, amëj akëjxm y'ëtsoy.

²⁴ Jëna'ajëty yë näy'oyjyawë pojën kyixy nyäxy, e tää jëëky mëku'uk mëti'ipë ni'ik tsojkpën këtiinëm tu'uk mëkä'äx.