Proverbios 17 - Biblia Dc en Mixe de Quetzaltepec

¹ Jaak'oy ko ja'ay kääky tsyë'ëts tkay ets jotkujk nyäjyawëty, këtiinëm ko ja'ay xëmë xyëëwtuny ets tsiptuump jyuuky'äty.

² Tu'uk yë mëtuunpë wijypyë tsojk wintsën nyaxëty ma tu'uk ja u'unkën mëti'ipë ka'ap nyitëkëtyën y'u'unk'atëty; ets nëjkxëp tpëky ja kyuma'ayën jëtu'un tä jeexyë y'u'unkëtyën.

³ Yë pu'ts pujxn ets poop pujxn yë'ë mëët yë jëën yaj'ijxmatsy; e yë jot winma'any yë'ë Dios nyija'ap wi'ix yajpaaty.

⁴ Yë ëxëëkja'aytyëjk ets mëti'ipë je'eyë win'ë'ëntëpën, janty'oy tmëtowtë yë ëxëëk aaw ëxëëk ayuk.

⁵ Pën nyëxikpy tyukxikpy yë ëyoopëja'ay, yë'ë myëtëkoopy mëti'ipë winë yajkojën; mëti'ipë tyukxoontäkpyën ko tyuuntëkoy ka'ap jëtu'unyë nyinaxa'any, koonëm tkumëtowëty.

⁶ Yë mëjja'aytyëjk yë'ë tyukmëjnajxtëp yë y'ok'u'unk y'ok'ëna'k; yë u'unk ëna'k yë'ë tyukmëjnajxtëp tyeety tyaak.

⁷ Yë ja'ay mëti'ipë tsuu poj ja'ay'ajtpën, ka'ap oy nyäjyawëty ko oy xyony y'ity; e yë ja'ay mëti'ipë wiinkutsë'ëkë ijtpën, ka'ap oy nyäjyawëty ko wyin'ëëny.

⁸ Ja'ay mëti'ipë nyimeenypyijkpyën ka'apë myëtëyëtyën, jëtu'un nyäjyawëty nëkooyë yowë tii tpatnë t'ijxnë ajotkumonë ets nëkooyë yowë jyuukyajtën y'o'oyënë.

⁹ Mëti'ipë ja'ay ka'ap tmëjpëjktä'äkyën ko yajmëtëkoy, tsojkën ja'awën yajmëjnajxyp; e mëti'ipë ja'ay xëmë jyä'ämyejtsypyën ko pën myëtëkoyë, ni'ikyë tyajkëjääjë jotmay.

¹⁰ Mëti'ipë ja'ay ja'akyujkëpën y'oyjya'ap ko tii yajtuk'ënëëmë ko tii oy tkatuny; e mëti'ipë ja'ay ka'ap jyä'äkyukën oy jënu'un yajwopëty, ka'ap jyä'äkyukë.

¹¹ Yë ëxëëk ja'ay yi'iyë y'ixtääpy ma tsyiptunëtyën, koonëm tpaaty mëti'ipë ëxëëk tuunëpën.

¹² Nikë oy ko muum osë npatmëty këtiinëm yë tsuuja'ay ka'apë jyä'äkyukën.

¹³ Kajëna'a yë ëxëëkpë kyajëwa'akëty ma ja'ay ja tyëjkën mëti'ipë ëxëëk yajwinpijtypën ja oypyë.

¹⁴ Tä nëë kyomyën, jëtu'un yë tsip yaj'ixy ko tsyo'ontä'äky; e oy wyimpëtsëmy ko yajkuke'eky ets këtii ko ja'ay tsyiptëkë.

¹⁵ Ko yajpokymye'kxy yë tuuntëkooypyë ets yajtëytyuny ka'apë pyokymyëëtëtyën; tääpë mäjtskpëky mëti'ipë Dios ka'ap nijënu'un t'oyjyawën.

¹⁶ Yë tsuuja'ay, oy jënu'un yë wit meeny tjamëëtëty ets tjajuya'anëty yë wijyajtën, ka'ap tjëkyepy jä'ä ko ka'ap jyä'äkyukë.

¹⁷ Tu'uk yë jëëky mëku'uk xëmë tsyoky jyawë; jëtu'un nyäxy tä mëkä'äxën ko myëku'uk mon tuk yajpaaty.

¹⁸ Yë tsuuja'ay, nyikëpäjtutyp yë myëtëjk, ok tmëmony tmëtuky.

¹⁹ Mëti'ipë yajjoot'anpëjkpën, je'eyë tsyiptuna'any. Mëti'ipë tii ajotkumonë tyuunpyën, ëxëëk nyäyajjatyë.

²⁰ Kajëna'a ja ëxëëk jot ëxëëk winma'anymyëët oypyë kyanämyäyë, mëti'ipë etykyajpxpën ëyo'ontum nyäyajka'aja'anyë.

²¹ Ko u'unkteety yë y'u'unk y'ëna'k ka'ap nijënu'un jyä'äkyukë, je'eyë yajmony yajtukyë; ko tu'uk yë u'unkteety tmëët'aty yë y'u'unk mëti'ipë tsuujën, ka'ap jyotkujk'ajtënëty.

²² Mëk tsooy yë'ë ko ja'ay jotkujk nyäjyawëty; e ko ja'ay mon tuk nyäjyawëty, tim këjxtääpy tjawë yë jyot myëjaaw.

²³ Yë ëxëëk ja'ay nyimeenypyijkpy ame'tsyë ka'apë myëtëyëtyën, ets jëtu'un tninaxy ja tëyajtën.

²⁴ Yë wijyajtën myëmääpy myëtäjpy tpaata'any wijyjyä'äy, e yë tsuuja'ay ka'ap tmëmay tmëtajy tii pyatäämpy.

²⁵ Yë u'unk ëna'k mëti'ipë tsuujën, je'eyë tyaak tyeety tyajjoot'anpëky ets tyajmony tyajtuky.

²⁶ Ka'ap y'oyëty ko ja'ay nyajmeenyajkmëty mëti'ipë ka'ap nitii poky tunyën, ets ko yajwopy yajka'atsy mëti'ipë tsuj yajxon juukyajtpën.

²⁷ Yë wijyjyä'äytyëjk wäänjaty kyajpxtë, ets këpetyjyä'äytyëjk mä'kxtujktëp yë'ëjëty.

²⁸ Yë'ëpaat yë tsuuja'ay wijy nyäxy ets këpety ko amonyë y'ity ets ka'ap kyäjpxy.