Proverbios 16 - Biblia Dc en Mixe de Quetzaltepec

¹ Yë ja'ay myëmääpy myëtäjpy ko tii tuknipëjktaakë, e ko winë wyintu'upëjknë, yë'ë Dios yajwintu'upëjkpy.

² Yë ja'ay jëtu'un nyäjyawëty aak'oy winë tuny, Dios yë'ë y'ijxtääpy wi'ixjaty ja'ay tii tunyën.

³ Tëkokyë mëti'ipë mtuunpyën, yë'ë Dios tukë'ëtëjkëtya'a ets oy wyimpëtsëm jyëjpëtsëmëty mëti'ipë mmääpy mtäjpyën.

⁴ Ko Dios tii winë të tyajkojy, tam yë winma'any tiikyëjxm ko të tyajkojyën; Yë'ëpaat yë ëxëëk ja'ay paatykyëjxm jyääjëty jä'ä ko jää yajtëytyuna'any ko ënety ja poky yajnipaye'ey.

⁵ Yë Dios ka'ap t'oy'ixy yë ja'ay mëti'ipë amëj akëjxm ja'ay'ajtpën; wäänë y'ita'any ets yajtëytyunëty.

⁶ Mëët yë tsojkën ja'awën ets tëyajtën yajnime'kxy yë poky; ënät yë ëxëëkpë yajmëjëkämke'eky pën yajmëjpëjktakp yë Dios.

⁷ Ko Dios t'oy'ixy ko yë ja'ay oypyëtsëëmp yë tyu'unën kyajpxën, yë'ëpaat yë myëtsip mëët nyämyë'oypyikyë.

⁸ Jaakni'ik tsyowpaaty ko winë nayiin nawään npatmëty n'ijxmëty mëët ja oypyë ja tu'unën kajpxën, ets këtiinëm ko may'äämpy winë npatmëty mëët ja ëxëëkpë ja tu'unën kajpxën.

⁹ Yë naaxwiinyëtë ja'ay yë'ë jëtu'un patëp winë tuknipëjktaakëty, e ma winë tyu'uwitsanën, yë Dios jää patënëp.

¹⁰ Ko tu'uk yë mëj ënä'ämpë kyäjpxy, yë Dios yajkajpxëp; e ko ënät pën tëytyuny, ka'ap nanëkokyëjxm tëytyuny.

¹¹ Ma winë yaj'atëëynyäxyën ets ma winë yajkijpxyën, yë Dios patëp t'ixëty pën oy ja kijpxën tyu'uye'ey. Tëkokyë mëti'ipë yajtëëpy yajkijpxpën, aak Dios të tpëjktä'äky.

¹² Yë yajkutujkpëtëjk ka'ap oy t'ixtë ko yë ja'ay ëxëëk y'ëti'itsy y'ënä'äny, tu'uk yë kutujktakn ënät oy yajpaaty pën jam'ajtp nänyipaye'eyë.

¹³ Yë yajkutujkpëtëjk oy tsoktë ko yë ja'ay kyäjpxy myëtyä'äky mëët yë näwyinkutsë'ëkë ets tëyajtën.

¹⁴ Ko tu'uk yë yajkutujkpë jyoot'anpëky, o'kën y'awäämpy; yi'iyë wijyjyä'äy mayëtëp tyajxäämëty ja yajkutujkpë ja y'äkë.

¹⁵ Ko yë yajkutujkpë jotkujk nyäjyawëty juukyajtën y'akäjpxyp; ets ko tii tkupëky jëtu'un tä yoots nëma'ajën ko tyu'uy pyojy.

¹⁶ Jaakni'ik y'oyëty ko wijyajtën yajmëët'aty këtiinëm yë pu'ts pujxn. Jaakni'ik y'oyëty ko tii yajja'akyukë këtiinëm yë poop pujxn.

¹⁷ Mëti'ipë jëtu'un yë wa'ats ja'aytyëjk yajxon timyajtuk'ënä'ämtëpën, yë'ë ko tmëjëkäm'atëty yë ëxëëkajtën. Ko yajxon yajkëwent'aty ma winë yajtuny yajkäjpxyën, kë'ëm ënety nnäkyëwent'ajtëmë.

¹⁸ Ko yë ja'ay nyämyëjaw nyäjyääntyjyawëty, jää jëtu'un tyu'utëkoy; ko yë ja'ay mëj këjxm jyä'äy'äty, jää kyujënäky.

¹⁹ Jaakni'ik y'oyëty ko yë ja'ay nyäpyëjktä'äkyë yu'unk naxym, jëtu'un tä yë ëyoopëja'ayën; ets këtiinëm ko kumeeny y'awinpitëty mëët ja ja'ayëty mëti'ipë je'eyë nämyëjja'awëtëpën.

²⁰ Pën winë yajxon tyuunpy, näjyëtu'un winë yajxon tyajwintu'upëky; jotkujk yë ja'ay yajpaaty mëti'ipë tyuk'ijxpejtypyën Dios.

²¹ Pën winë yajxon myëmääpy myëtäjpyën, jä'ä yajtijy wijyjyä'äy; yë oypyë tsujpë xo'onën ijtën, pojën yë ja'ay tja'akyukë.

²² Mëti'ipë ja'ay oy tsuj määpy tajpën, oyëty ja jot winma'any tyäky, e mëti'ipë ja ja'ay tsuujën, ¿tii winma'any oy y'ëkyakëp ma ja myëtsuutëjkën?

²³ Ja'ay mëti'ipë yajxon winë myëmääpy myëtäjpyën, yajxon winë t'ëy tkäjpxy; ets y'aaw y'ayuk poj'am yajjotuky.

²⁴ Ko ja'ay oy xyony y'ity, jëtu'un yajjawë tä uuxpa'akën. Tyimyajpa'akëtyääpy yowë jot winma'any, ets tyimyaj'ajä'ämëp yajjawë jot mëjaaw.

²⁵ Tää yë tu'u mëti'ipë tëy ja këxë'kpën, e jam ma jyëjpkëxyën o'kën jam.

²⁶ Mëët ko yuu'ookyë yë mëtuunpë ëyoopë, paaty tyuny ye'ey; ets ko kyäyä'äny, paaty tyuny.

²⁷ Yë ëxëëk ja'ay jëtu'un tä tu'uk yë tsijtkën ma tsajpkääky kyi'iyën mëti'ipë ujtsën mëët ja ëxëëkpë. Yë'ëpaat ko y'iy kyäjpxy no'kpëm yajjawë tä jëënyä'änkën.

²⁸ Yë ja'ay mëti'ipë ëxëëk yë jyot wyinma'anyën je'eyë xëmë jyänty tsyip'ixta'ay; yë ja'ay mëti'ipë pi'tskajpxpën, je'eyë myëku'uk tyajnämyëtsiptsoonyë.

²⁹ Yë ja'ay mëti'ipë ëxëëk ëtëtsp ënaanpën, nëkoo je'eyë yë myëku'uk twin'ëëny ets jam tnajtskäxë ma ja ëxëëkpë ja në'ë aaw tu'u'aawën.

³⁰ Je'eyë wyinme'eky ko pën wi'ix tuna'any; je'eyë nyäyä'äntsu'utyë ko tëë tyuuntëkoy.

³¹ Ko yë mëjja'aytyëjk wyääy yaj'ixtë poop, patëtëp ets yajwinkutsë'ëkëtëty; yë'ë mëti'ipë oy të jyuuky'atën.

³² Tsoowpatp ni'ik ëwxijt mä'kxtujkën, ets këtiinëm ko ja'ay jyotmëkëty. Tsoowpatp ni'ik ko ja'ay nyäy'awijtsë'ëkyë, ets këtiinëm ko ja'ay naax kajpn tmëmëtä'äky.

³³ Yë naaxwiinyëtë ja'ay yaj'ijxpëtsëëmëp wi'ix yë xyëëw jyuukyajtën myinyën, yë Wintsën yë'ë nyija'ap wi'ix të tuknipëjktaakë.