Proverbios 15 - Biblia Dc en Mixe de Quetzaltepec

¹ Ko ja'ay oy tsuj y'ëëw'ëtsoy kyajpx'ëtsoy, yë'ëpaat yë äkë tyajxeemy; e ko ja'ay y'ëtsoy, ni'ikyë yë äkë tyajmëjtä'äky.

² Yë wijyjyä'äytyëjkëty yë'ë kyajpxtëp wijyajtën; e yë tsuuja'ayëty yë'ë kyajpxtëp tsuu'at.

³ Yë Dios, tää yajpaaty oy tyimmaajëty, y'ijxyp oyjyä'äy ets ëxëëk ja'ay.

⁴ Yë oypyë aaw ayuk, jëtu'un yajjuuky'äty jeky tä tu'uk mëj kepy jeky jyuuky'ätyën; yë ëxëëk ayuk je'eyë yajmony yajtuky.

⁵ Yë tsuuja'ay ka'ap tkupëky ko tyeety kyajpxwijyë; e mëti'ipë kyupëjkpyën kajpxwijën wijyajtën yajnikëxë'kpy.

⁶ Mëjwiin këjää jap winë yajpaaty ma oyjyä'äy jyëën tyëjkën; e ma ëxëëk ja'ayën ka'ap nimaa tuk'oy'äty mëti'ipë jyapaty jya'ijxypyën.

⁷ Yë wijyjyä'äytyëjk yajye'eywya'kxtëp yë wijyajtën ko myëtya'aktë, e yë ëxëëkja'aytyëjk tii y'ëkyajwa'kxtëp ijxtëm myäytyën tyajtën.

⁸ Yë Dios ka'ap nijënu'un t'oy'ixy ko yë ëxëëk ja'ay tyäky yë wintsë'kën, e ko yë wa'ats ja'ay aaw ayuk myo'oyë kyupëjkpy yë'ë.

⁹ Dios ka'ap nijënu'un t'oy'ixy wi'ix yë ëxëëkja'aytyëjk y'ëtë'ëtstën y'ëna'antën; e tsyojkpy mëti'ipë mëtëy juukyajtpën.

¹⁰ Mëti'ipë ja'ay oynyë'ë oytyu'u y'ëxmajtsypyën, yë'ë mëët wyimpity näywyop näkya'atsë. Pën y'ëxëëkja'ap ko tii yajtukumëtoy, kë'ëm nyäyaj'ooky nyäyajtëkoyë.

¹¹ Yë Dios nyija'ap jëna'a jyää'aty o'kën tëko'oyën; ets jëna'a o'kpë nyaaxtëkë. Paatykyëjxm näjyëtu'un wa'ats nnijawë yë naaxwiinyëtë ja'ay jyot wyinma'any.

¹² Ja'ay mëti'ipë nämyëjkäjxëpën ka'ap tsojkën'aty kajpxwijën, ets ka'ap t'a'ixë yajpaatëty ma wijyjyä'äytyëjkën.

¹³ Jot winma'any jotkujkpë, wiinkëjxm jëjpkëjxm yaj'ixy jotkujk; jot winma'any pa'am mëëtpë, wiinkëjxm jëjpkëjxm yaj'ixy mon tuk.

¹⁴ Jot winma'any wijypyë, wijyajtën y'ixtääpy, e yë tsuuja'aytyëjk yë'ë kuxëp tsuu'at.

¹⁵ Mëti'ipë ja'ay mon tuk yajpatpën, ëxëëk nyäjyawëty winjëpom; e mëti'ipë ja'ay akujk jotkujk näjya'awëyëpën, jëtu'un xëmë winjëpom nyäjyawëty xëëw yowë tuunëp.

¹⁶ Yë ëyoopëja'ay ni'ik tsyowpaaty ko yë Dios yë'ë tmëjpëjktä'äky; e këtii ko ja'ay kyumeenyëty ets mon tuk yajpaaty.

¹⁷ Ni'ik tsyowpaaty ko ja'ay aay ujts tukkay mëët yë tsojkën ja'awën, ets këtii ko ja'ay tsu'utsy tukkay mëët yë tsip äkë.

¹⁸ Mëti'ipë ja'ay ka'ap myä'kxtukyën tsip je'eyë y'ixtääpy, e mëti'ipë ja'ay mä'kxtujkpën, yajxe'empy yë tsip.

¹⁹ Ja'ay mëti'ipë nuuxën äpnyjyot tu'u t'ixy; e yë ja'ay mëti'ipë oy winë tyuunpyën, mëjwiin ëwaatsë tu'u t'ixy.

²⁰ Yë u'unk ëna'k wijypyë, akujk jotkujk yë tyeety tyaak tpëjktä'äky; e mëti'ipë tsuujën, ka'ap yë tyeety tyaak tsoky.

²¹ Yë tsuuja'ay tyukxoontäkpy ko tsyuujëty; e wijyjyä'äy, kë'ëm tyaj'oyë ma winë oy të tkatunyën.

²² Ko ka'ap ja'ay tii yajxon tnëtëy tyajtëy, ka'ap oytyuunk pyëtsimy, yë tuunk oy wyimpëtsëmy ko kanaak yë ëëwij kajpxwijpë.

²³ Jotkujk ko oypyë kajpx'ëtso'owën yajpaaty, ets ni'ik ko jää ma myëyätyën.

²⁴ Yë juukyajtën anëkëjxytsyow yë nyitu'u pya'tëkë ets yajnitsokp ja wijyjyä'äy këtiipë jap kya'ajëty o'këntujp.

²⁵ Yë Dios jyijtë'kpy yë jyëën tyëjk yë ja'ay mëti'ipë amëj akëjxm ja'ay'ajtpën, e ma ku'ookytyo'oxy tsyëënën ta'tspëky tyëjk tyaj'ijtë.

²⁶ Yë Wintsën ka'ap t'oy'ixy mëti'ipë yë ëxëëkja'aytyëjk jyamaay jyatajtëpën; yë'ë y'oyjya'ap aaw ayuk ka'apë tmëëtëtyën ëxëëk'at.

²⁷ Mëti'ipë ja'ay ëxëëk y'atsokyën, yë'ëpaat jyëën tyëjk tyajtëkoy; e mëti'ipë ja'ay ka'ap tii t'ixk'atyën, nikë jotkujk jyuuky'äty.

²⁸ Yë oy'jyä'äy, jëyëjp tmëmay tmëtajy wi'ix y'ëtsowa'anyën; e yë ëxëëk ja'ay nëkooyë tnajtsmatsë ëxëëk ayuk.

²⁹ Yë Dios, myëjëkämkekpy yë ëxëëkja'aytyëjk; e myëtoow'ijtyp ko yë wa'ats ja'aytyëjk Dios mëkajpxtë.

³⁰ Ko ja'ay oy wyintë'kxy yäjkpy jotkujk'ajtën; ko pën tmëminy oy aaw oy ayuk yajjotmëkmëjkp yë'ë.

³¹ Mëti'ipë ja'ay kyupëjkpyën ja näy'ojë mëti'ipë oy yajjuuky'ajtpën, nëjkxëp jam yajpaaty ma wijyjyä'äytyëjkën.

³² Mëti'ipë ja'ay ka'ap tkupëkyën ja näjyëjpwijtswinpijtën, kë'ëm nyäy'ëxëëktunyë; mëti'ipë kyupëjkpyën ko tii yajtuk'ënëëmë, ni'ikyë tpaaty yë ijxpëjkën.

³³ Ko yë Dios yajmëjpëjktä'äky yë'ë tukpatp wijyajtën; ko ja'ay mëj'äämpy nyaxa'anëty jëyëjp mëpaat yu'unk naxym nyäxy.