Proverbios 14 - Biblia Dc en Mixe de Quetzaltepec

¹ Yë to'oxytyëjk wijypyë kyojpy yë tyëjk; yë to'oxytyëjk tsuupë kë'ëm tyajma'aty yë jyëën tyëjk.

² Mëti'ipë ja'ay oy winë tyuunpyën wyinkutsë'këp yë Dios; e mëti'ipë tëkatsy winë tyuunpyën, jëkäm jëxkë'ëm Dios tpëjktä'äky.

³ Ma tsuuja'ay tii tkäjpxyën jam yajmëtoy ko nyämyëjjawëty; e ma tii tkäjpxyën yë wijyä'äy jam yajmëtoy wi'ix nyäkyuwa'anyën.

⁴ Pën ka'ap yë tsajpkaa, ka'ap tjëkyepy yë tsajpmok yajniyu'ujëty; yë tsajpkaa yë'ë myëjaaw yajtuunpy ets may yë tsajpmok yajniyu'ujë.

⁵ Ja ja'ay mëti'ipë tii të t'ixyën mëtëy tii tnimëtyä'äky; e mëti'ipë ka'ap tii të t'ixyën yë'ë antakp.

⁶ Ja'ay mëti'ipë nämyëjkäjxëpën y ja wijyajtën tja'ixta'ay ka'ap tpaaty; yë wijyjyä'äy ka'ap tsip tjawë yë ijxpëjkën.

⁷ Timnäjyëpëkët ma tsuuja'ayën, jä'ä ko ma yë'ë tii tnimëtyä'äkyën ka'ap jam tii xypyaatëty.

⁸ Yë wijyajtën yë'ë wijyjyä'äy tyukja'akyujkëp ma tii tunyën; e yë tsuuja'ay yë'ë nätyukwin'ë'ënëp ko tsyuujëty.

⁹ Yë tsuuja'aytyëjk kë'ëm nyätyukxi'ikëtë ko tii tuuntëkoytyë; e ma oyjyä'äytyëjkëtyën yë'ë myëmaay myëtajtëp wi'ix tii oy tuntëtyën.

¹⁰ Yë jot winma'any nyija'ap ko ëxëëk jyäty kyëpety; ko jyotkujk'aty ka'ap tjëkyepy tpëjkwa'kxëty pën mëët.

¹¹ Yë ëxëëkja'aytyëjk jyëën tyëjkëty nëjkxëp kyutëkoy; e oyjyä'äytyëjkëty jyëën tyëjkëty ni'ikyë kyëjääjëja'any.

¹² Tää yë në'ë tu'u mëti'ipë oy yaj'ijxpën; e jam ma jyëjpkëjxnën okën jam.

¹³ Yë'ëpaat ko ja'ay xyi'iky atoonp joot'ëjx ma jyëjpkëxyën yë xoontakën yä'äxy y'awinpity.

¹⁴ Yë tsuuja'ay jotkujk nyäjyawëty ko tsyuujëty; e yë wijyjyä'äy yë'ë yajjotkujk'ajtëp ko wyijyëty.

¹⁵ Yë tsuuja'ay aak myëpëjktääpy wi'ix pën y'ënä'änyën; e yë wijyjyä'äy mëk timy'ixy maa nyäxy tyëkën.

¹⁶ Yë wijyjyä'äy tsyë'këp yë ëxëëkpë paaty ënätyë jam jyëwä'äky ma tii ëxëëk t'ixyën; e yë tsuuja'ay ka'ap tii tmëjpëjktä'äky.

¹⁷ Mëti'ipë ja'ay ka'ap myä'kxtukyën, nëkooyë pën tnipëtë'ëky; mëti'ipë jëyëjp winë myëmääpy myëtäjpyën, ka'ap tii ajotkumonë tuny.

¹⁸ Yë tsuuja'ayëty, yë'ë kyuma'ayën'ajtëp tsuu'at; e yë wijyjyä'ätyëjkëty yë'ë mëët jyuuky'atë winma'any.

¹⁹ Yë ëxëëkja'aytyëjk winta'ak naaxkow jam jya'ta'antë ma oyjyä'äytyëjkëtyën. Yë ëxëëkja'aytyëjkëty nëjkxëp jam nyu'kxta'aktë ma wa'ats ja'aytyëjk tsyëënëtën.

²⁰ Yë ëyoopëja'ay, yë'ëpaat yë jyiiky myëku'uk y'ëxëëk'ixyë mëti'ipë oy mëët të nyäjyawëtyën; e tu'uk yë kumeenyjyä'äy nëkooyë nimay tmëët'ajnë mëti'ipë oyjya'awëyëpën.

²¹ Mëti'ipë ja'ay ka'ap yë jyiiky myëku'uk tunyën këwentë, poky tyuunpy; e jotkujk ja'ay yajpaaty mëti'ipë pya'ëyoopyën yë ëyoopëja'ay.

²² Mëti'ipë ëxëëk ëtëtstëp ënantëpën, tëë tyu'utëkoytyë. Mëti'ipë yë'ë y'ijxtaaytyëpën ja oypyë jot winma'any, myëët'ajtëp ja tsojkën ja'awën ets ja jaanty'ajtën.

²³ Tëkokyë mëti'ipë yajtuk'oy'ajtpën, nimëjaaw yajpaaty. Ko ja'ay je'eyë kyu'awakëty, ëyo'on nätyukpatëp.

²⁴ Yë wijyjyä'äy yë'ë yajmëjnajxëp yë wyijy'ajtën, e yë tsuuja'ay, yë tsyuuajtën.

²⁵ Mëti'ipë tëë winë t'ixyën ets mëtëy tnimëtyä'äky, yajtsokpy yë myëku'uk yë jyuukyajtën; e yë ja'ay mëti'ipë ka'ap tii të t'ixyën ets tëkatsy winë tnimëtyä'äky, yaj'o'kpy yë myëku'uk.

²⁶ Ko yë Dios nmëjpëjktakmëty, yäjkpy yë akujk'ajt jotkujk'ajtën, näjyëtu'un ma u'unk ëna'kën.

²⁷ Ko yë Dios yajmëjpëjktä'äky juukyajtën ënety yajpatp ets yë'ë ënety yajpatp ja nitsokën jam o'kënjëjp'am.

²⁸ Ko tu'uk yë ënä'ämpë yajkutuky ma ja'ay nyimayëtyën, mëj'äämpy nyäxy; e ko tu'uk ënä'ämpë yajkutuky ma ja'ay nyiwäänëtyën, o'ktëy jyäty.

²⁹ Ko yë ja'ay y'ëwxity myä'kxtuky, wijyajtën yajnikëxë'kpy; e ko yë ja'ay ka'ap myä'kxtuky, tsuu'at yajnikëxë'kpy.

³⁰ Ko yë ja'ay xeemy yë jyot wyinma'any, po'kxp yë jyot nyini'kx; e ko yë jyiiky myëku'uk t'ëxëëk'ixy, ka'ap nijënu'un yë jyot nyini'kx jyotkujk'aty.

³¹ Ja'ay mëti'ipë wyojpy kyä'tsypyën yë ëyoopëja'ay, Dios myëtëkoopy mëti'ipë të yajkojyën; e mëti'ipë pya'ëyoopyën yë ëyoopëja'ay, yajmëjnajxëp yë Dios.

³² Yë ëxëëk ja'ay kë'ëm ëxëëk nyätyunyë ko ëxëëk y'ëti'itsy y'ënä'äny; e yë ja'ay mëti'ipë tëy tëtä'äky winë tyuunpyën, yë'ë kuwanëp ma mëtëy tyu'uye'eyën.

³³ Yë wijyajtën jap tsyëënë ma jot winma'anyën mëti'ipë oy määpy tajpën; e ma tsuuja'aytyëjkën ka'ap jëtu'unpë yajnijawë.

³⁴ Ko jyam'aty ja oypyë ja nipaye'eyën ma naax kajpnën, mëj'äämpy jëtu'unpë naax kajpn nyäxy; e ko ka'ap jëtu'unpë jyam'aty tsëtyu'unmëët naax kajpn yajpaaty.

³⁵ Yë mëtuunpë mëti'ipë oy tuunpën wä'än yë wyintsën tsyokëtëty, e mëti'ipë ka'ap tukjatyën tyunëty tsojk wyintsën tyukjoot'anpëkëtëty.