Proverbios 1 - Biblia Dc en Mixe de Quetzaltepec

Wi'ix tsyoowpaatyën yë aaw ayuk yu'utsypë ets tsipë

¹ Ya'atë jëtu'un ojts tkäjpxy yë Salomón, yë David yë myaank, mëti'ipë jam ënä'ämën ma ja Israel ja'ayëty ja kyajpnëtyën,

² ets yë'ë twinma'any'äty: tnikajpxa'any tnimëtya'aka'any ja wijyajtën kujk'ajtën ets ja tu'uwinwo'ow tu'uwinwijtsën, ets yajnijawëty wi'ix mëpaat yaja'akyukën ja aaw ayuk mëti'ipë tsipëtyën ets mëj këjää ja winma'any tmëëtëty,

³ yajpaatëty jëtu'un ja tu'uwinwo'ow tu'uwinwijtsën, ja wijyajtën, tëyajtën, jaanty'ajtën ets ja tu'knaxajtën,

⁴ ets ja ëna'ktëjkëty ja nija'awën tpaatëty, mëti'ipë ka'ap yajxon tii tuntën, ets yajmo'otëty ja winma'any ets yajxon myäytyëty tyajtëty.

⁵ Pën këpetyën ets wijyën, y'amëtoow'ijtyp yë jëtu'unpë ets pyaat'ëtëtyp ni'ikyë nija'awën ets ja winma'any,

⁶ ets yajja'akyukëty ja käjpxy mëtyä'äky, jot winma'any ets ja aaw ayuk mëti'ipë kyajpxtëpën ja wijyjyä'äytyëjkëty.

⁷ Yë wijyajtën yë'ë mëët tsyo'ontä'äky ko nwinkutsë'këmëty yë Dios. Yë tsuuja'aytyëjk ka'ap tuntë këwentë yë wijyajtën ets nätyu'uwinwow nätyu'uwinwitsë.

Näy'ëëwij näkyajpxwijë ma ëna'ktëjkëtyën

⁸ U'unk maay, ijxkuk ja'akyukë mëti'ipë mteety mtukni''ijxëyëpën, ets këtii xyjyä'äytyëkoyëty mëti'ipë mtaak të mtuk'ijxpëkyën,

⁹ Jëtu'un xymyëët'atëty tä jeexyë tii janty'oy myajkëxë'ëkyën, tä tu'uk yë nantsëmën ëkë kujänën.

¹⁰ Pën m'ijxyp ko yë pokyjyä'äytyëjk je'eyë nëkoo mwin'ëëna'any mwinxaja'anyë, këtii xy'ëwa'atsëty, u'unk maay.

¹¹ Wä'änxyëp m'ënë'ëmxëtëty: Pamiintëk ëëtsëty, ets nyajpë'o'kmëty muum yë ja'ay ajotkumonë ko n'aye'eyëmëty.

¹² Ajotkumonë nyaj'o'kmëty mëti'ipë oy juuky'ajtëpën, jëtu'un tä yë o'kën tëko'oyën janty ku'uxyë nyäjyawëtyën ko pën jap kyä'äy o'kpëjutjoty.

¹³ Mëj këjää yë wit meeny npatmëty n'ijxmëty, ets njëën'ajtëm ntëjk'ajtëm nyaj'ujtsmëty mëët ja tony meetsy.

¹⁴ Min mëët ëëtsëty ets xypyëjkwa'kxëty mëti'ipë mpatypyën, ets näjyëtu'un myajmoopyëty ja wit meeny mëti'ipë ni'ëmukë yajä'ä'ajtpën.

¹⁵ E mijts u'unk maay, këtii xypyanëjkxëty. Timnäjyëpëkët ma jëtu'unpë ëxëëk në'ë ëxëëk tu'ujën mëti'ipë yë'ëjëty pyanëjkxtëpën,

¹⁶ jä'ä ko janty näjyotkëjxëtëp ets ëxëëkpë tuntëty. Janty poj'am timtyunankojtë winë, ets ja ne'pny jä'ä tyimtäman tyimjä'ätsantëp.

¹⁷ Jä'äxë ko oy jeexyë pën yë myëku'uk yë y'o'ktakn yu'utsypë muum tjani''ijxëyëpë. Ka'ap tyëkoy'atëty tu'ukën yë joon mëti'ipë y'ixëpën.

¹⁸ Yë ja'ayëty jëtu'unpë tii tuntën, kë'ëm nyätyukni'oytyunëtë yë o'ktakn, ets jyuuky'ajtënëty ëtsë'ëkëtuuy tpëjkta'aktë.

¹⁹ Jëtu'un kyukëxëja'antë ja atsojkpë, ko tii t'atsoky yë'ë nätyukyaj'o'këp.

Ja näwyow näwyitsë ma ixpëkyajtën yajpaatyën

²⁰ Në'ëjoty tu'ujoty ets oymyaajëty, yë wijyajtën yajmëtoowëp yë y'aaw y'ayuk.

²¹ Y'ëëwä'kxyp kyajpxwä'kxyp yë y'aaw y'ayuk jëën ëkë'ëy tëjk ëkë'ëy, ets maajaty ja ja'ay nyaxtën tyëkëtën kajpnjotypë.

²² Miitsëty ëna'ktëjkëty mëti'ipë ka'ap oy tii xyjyatën xynyijawëtën, je'eyëpë mnëxi'iktën mtukxi'iktën ko mtsuu'atë, ¿Jëna'a jëtu'un xy'ëxmatsa'antë ja mtsuu winma'any, ets jëna'a jëtu'un ku'uxyë mnäjyawëja'anëtë ko je'eyë mnëxi'ik mtukxi'iktë, ets ka'ap xytyuntë këwentë ja nija'awën, ets jëna'a jëtu'un ja mjot mwinma'any wyijtëty kyäjtëty?

²³ Ja'aykyukëtë yajxon mëti'ipës yam nkajpxtëtäkpyën ets nmo'otëty ja nmëk'ajtën n'oyajtënës, e jëtu'unts yajxon xywyinjawëtëty mëti'ipës nwinma'any'äjtypyën.

²⁴ Tëë njamëkajpxtë ets tëë njamëjwow njamëjwitstë, e miitsëty ka'apës të xytyuntë këwentë.

²⁵ Jëtu'unyë nëkoo je'eyë të xynyakumëtoownaxtë yë n'aaw n'ayukës. N'ëëwijën nkajpxwijënës ets nijënu'un të xykyakupëktë ja n'ëëwtë'ëw nkajpxtë'ëwënës.

²⁶ Näyjyëtu'unës nëjkx jëna'a nxikpë ko ënety mpaatëtë ja ëyo'on jotmay. Nëjkxëp näjyëtu'un jëna'a ntukxiktëpë ko ënety jam m'ookanëtë mëët ja tsë'ëkë,

²⁷ ko ënety mniminëtë ja tsë'ëkë ets ja amay jotmay, ko ënety ka'ap tii xy'ëktukxoontaknëtë ma mpëkëtën m'ixëtën ets ko jëtu'un mnimiinëtëty ja ëyo'on jotmay tä tu'uk yë pojxujtykyën.

²⁸ Jääts nëjkx xyjyamëkajpxtës, e ëjts ka'apës jää n'ëtsowa'any. Nëjkxëpës xyjya'ixtaaynyëtë, e ka'apës nëjkx ma xypyaatë.

²⁹ Jä'ä ko ka'ap ja nija'awën xytsyojkën'atë ets ka'ap xymyëjpëjktaka'antë ja Wintsën.

³⁰ Ka'ap xy'ëxajëja'antë xykyupëka'antë ja n'ëëwij nkajpxwijënës ets m'ixtijtëp ja n'ëëwtë'ëw nkajpxtë'ëwënës.

³¹ Kë'ëm nëjkx jëna'a mnätyuktëytyunëtë ko winë ëxëëk xytyuntë xykyajpxtë. Nëjkxëp xyjyamëtsijpënëtë ja m'ëxëëkjot m'ëxëëk winma'any.

³² Yë ja'ayëty mëti'ipë ka'ap tii tjatën tnijawëtën, mëpaatëp y'ooktë ko ka'ap tii tmëwinma'anypyaatë, ets mëti'ipë tsuujëtyën kë'ëm ëxëëk nyätyunëtë ko ka'ap tii yajxon tmëmay tmëtajtë.

³³ E ja ja'ay mëti'ipës xy'ijxkujk xyjyä'äkyujkëpën, akujk jotkujk jyuuky'äty ets ka'ap tsyë'ëkëja'any oy tii tmëtowëty atsë'ëk ajawëpë.