Oseas 7 - Biblia Dc en Mixe de Quetzaltepec

¹ koos yë nnaax nkajpn, yë Efraín kajpn ets Samaria kajpn njäyajtso'oka'antë, ënätyë nyëë pyokyëty wyinkëjxm jyëjpkëjxm jyä'ty. Jä'ä ko aak antaktëp; mä'tstëp, tëjktëjkëtyëp ets në'ëjoty tu'ujoty muum ja'ay tmäätstë.

² Yë'ë ka'ap tmëmay tmëtajtë ko nja'amyejtsypës yë pyokyëty. Tyam kë'ëm nyätyu'u'ëtukëtë ko winë ëxëëk tuntë ets ko xëmë n'ixyës yë nyëë pyokyëty.

Wi'ix ja kutujkëntëjk tnimeenypyëktën winë ets myäätstë

³ Yë nnaax nkajpnës yajxoontaktëp ets yajjotkujk'ajtëp yë yajkutujkpë mëët ja wyin'ë'ënënëty ets ja y'ëxëëktu'un y'ëxëëk kajpxënëty.

⁴ Aak tëë tyajtëkooytya'atë ja wyintsë'kën ja pëjkën ukën; jëtu'un yë'ë tä jëëntooytyaknën ma tsajpkääky kyi'iyën, ko tëë y'aanpëky ka'ap yë tsajpkääky oytyuunpë nëkoo t'ëk jëën mooynyë, je'eyë jyitsy tij'o'knë ets tyajnimaanajxnë.

⁵ Ko ojts ja nkutujkpë'ajtëm yajtukujeny ja kyujän, ojts ja wintsëntëjk yajpa'ampätëtë tsatym nyëë mëti'ipë tëë nyimaanaxyën, jä'ä ko y'anëty. Ets të tputëkë ja mëti'ipë tukxik tuk'ëwë'këpën.

⁶ Tmëmay tmëtajy wi'ix tunëtyën, jëtu'un tä ja'ay tyaj'aanpëkyën yë jyëëntooytyakn ma tsajpkääky tyajkë'ëyën; tu'ktsu'um myä'äy mëti'ipë jëëntooytyakn yaj'aanpëjkpyën, e komjopy ja jëëntooytyakn tëë yajxon y'aanpëky.

⁷ Aakjëtu'un tyoytyë jyämtë jëëntooytyaknën mëti'ipë të tyajnitooytya'atën yë kyutujkpëtëjkëty. Tëkokyë yë kyutujkpëtëjkëty tëë tyëkooytya'atë ets nitu'uk kyayajpaaty mëti'ipës jeexyë xymyëkajpxpën.

Tëë ja naax kajpn t'ëxmatsy ja Tyios

⁸ Tëë yë Efraín nyäxyëpinyë mëët wiinkëtypë naax kajpn. Jëtu'un yë Efraín tä tu'uk yë tsajpkääkyën tu'kpa'apë je'eyë kyë'ëwëtyën.

⁹ Wiink ja'ay të pyëjkëty yë jyot myëjaaw ets ka'ap të tjawë. Yë'ëpaat yë kyuwaay të pyoopëtyä'äy ets ka'ap të t'ixy.

¹⁰ Yë y'amëj'ajt y'akëjxm'ajtën të yajnitukëty. Oy jyajëtu'unëty, yë'ëjëty ka'ap ojts jyootwinpitë, ka'ap ojts yë Wintsën t'ixta'atë.

¹¹ Yë Efraín jëtu'un tä tu'uk yë pakën tëëpë kyumu'ukyën, ka'apë wyijyëtyën: Y'amëtoopy yë näypyutëkë jap Egiptë ets nän y'amëtoopy yë näypyutëkë yë Asiria ja'ayëty.

¹² E ko ënety jam jyanëjkxtë, ntukujëpijpë'ëkäämpyës yë ntsaayës; etsës nyajkuka'anaxa'any joonën, jëtu'unyës nmajtsmujkta'aja'any mëët ko të pyok tyuntë.

¹³ Mon tuk yajpaatë ko të jyëwa'aktë maas ëjtsën. Kutëkoyantëp yë'ëjëty jä'ä ko të xykyäjpxy kumëtoownaxtës. Ëjts njatsojkpyës ets jeexyë nyajtso'oktës e yë'ëjëty je'eyë xynyi'äntaakëtës.

¹⁴ Oy janty mëk jyayajmëtoy xymyëkajpxtës ko jam yajpaatë wyiity myaapäjnkëjxm, yë'ëjëty ka'ap winë aaw winëjot xymyëkajpxtës. Ko t'amëtowa'antë yë tsajpmok ets tsatym nyëë tëëpë nyimaanaxyën, yajtsëtyujtëp yë nyini'kxëty ma wiink tiosën; tääts xykyäjpxy kumëtoownaxtës.

¹⁵ Ëjts ojtsës njayaj'ijxpëktë ets jyamëët'ajtë ja mëk'ajtën, e yë'ëjëty wiinkjaty ojts xynyimay xynyitajëtës.

¹⁶ Yë'ë ojts tninëjkxtë wiink tios, jëtu'un tä ti'pxnën ka'apë kyujkye'eyën, ka'apë jyä'tyën ma jyayajtukni''ixën. Mëët ko kyajpxtë myëtya'aktë amëj akëjxm, yë kyopktëjkëty kupuxy nëjkx y'o'kta'atë ets jap Egiptë je'eyë nëjkx yajnëxi'ik yajtukxi'iktë.