Oseas 5 - Biblia Dc en Mixe de Quetzaltepec

Ma ja Israel kajpn yajtëytyuna'anyën.

¹ Miitsëty teetytyëjkëty mëtoow'itë ya'atë aaw ayuk; miitsëty Israel ja'ayëty winmëtowtë yajxon; ets miitsëty ja'ayëty ninu'un ja kuttujkën xypya'atyääk xypya'tkä'äxëtën ja'akyukëtë yajxon: ëjts ntunäämpyës ja nipaye'eyën ma ja nëë poky të xytyuntën, jä'ä ko miitsëty jëtu'un jam Mispá myajpaatë tä o'këntaknën yu'utsypë, tä tu'uk yë tejxypyën mëti'ipë yaj'anäjp yaj'atä'pxëpën jam ma Tabor kopkën,

² tä këk jutën jam Sitim joyjotmën, paaty ntëytyuna'antë.

³ Ëjts n'ixy'äjtypyës ets nija'apës yë Efraín. Yë Efraín jëtu'un ka'ap yë Dios të twintsë'ëkë tä tu'uk yë to'oxytyëjkën ka'apë twintsë'ëkën yë nyiye'etyëjk; Yë Israel tëë nyäyaj'ëxëëktëkëty.

⁴ Yë'ë ka'ap yajwinpityë ma Tiosën yë kajpn yë y'ëxëëktu'un y'ëxëëk kajpxën. Mëët ko jyot nyini'kx tooky tyäky ka'ap tyuk'ijxpaatyë yë Wintsën.

⁵ Ko yë Israel amëj akëjxm nyäjyawëty ni'ikyë nyäyaj'ëxëëkëkëty; yë Efraín je'eyë nyäyajkëtay nyäyajkëpipyë ko ëxëëk winë tuny tkäjpxy, jëtu'un tä yë'ëjën, yë'ëpaat yë Judá y'anäpëja'any.

⁶ Mëët yë kyupixyny yä'äy ets tsyajpkaato'oxy nëjkx t'ixta'atë yë Wintsën, ka'ap nëjkx tpaatë jä'ä ko tëë ënety tmëjëkämkä'äktë.

⁷ Tëë yë Wintsën tmëtëkoytyë, jä'ä ko tam yë y'u'unk tmëëtëty mëti'ipë wiinkteety tyeety'äjtypyën. Mëët ko ja pëjkën ukën të tkawinkutsë'ëkë, tu'kpo'o je'eyë nëjkx yë nyaax kyajpn kyam y'ëyo'onpata'ay.

Ma yajtëytyunyën yë Israel ets Judá

⁸ Yajxu'uxtë ja waj mëti'ipë tsip y'awäämpyën jam Guebeá ets ntëyxyuxnëty mëti'ipë tsip y'awäämpyën jam Ramá. Yaktë ja mëto'owën jam Bet-avén. Yajjotmaytyëkëtë ja Benjamín ja'ayëty.

⁹ Ëjts yam nikäjpxyp ma Israel ja'ayëtyën mëti'ipë kopkpëky tunan jatanëpën ma yë'ëjëtyën: Yë Efraín anë'ëk tëëtsë'ëk nëjkx y'awinpity ma ënety yajtëytyunyën.

¹⁰ Jëtu'un yë Wintsën y'ënä'äny: Yë Judá kyopktëjkëty jëtu'un tä tääpë ja'ayëtyën mëti'ipë tsëpa'an kë'ëm yajtëkäjtstëpën ets nyaax kyajpn tyajmëjwiinëtë. E ëjts nyajnikoompatäämpyës yam mëëtës yë ntsip n'äkë.

¹¹ Yë Efraín ëxëëk yajtuny, ka'ap yë myëk'ajtën yajwinkutsë'ëkë mëti'ipë ja paat'ajtëpën mëët ko yë'ë të tpanëjkxtëkë yë wiink tios.

¹² Ëjts jëtu'unës näyajnaxa'anyë tä waanyën jam Efraín, jëtu'un tä pu'utsën jam ma Judá kajpnën.

¹³ Ko yë Efraín nye'ixëtëty pëjkëp ijxëp ets Judá t'ijxpaatëty yë tsyëtyut, ënät nëjkx yë Efraín nyijkxy jam Asiria ets putëjkën t'amëtowëty ja Asiria yajkutujkpë, e yë'ë ka'ap nëjkx myäyë wi'ix yajtsokxëtëty ja pyu'uts ets ja tsyëtyut.

¹⁴ Tä yë kaa jyëyujk matsyën jëtu'unës yë Efraín ets Judá ntukja'ta'any; je'eyës piw nuuk ntuunta'aja'any etsës nëjkxankojnë; ëxëëkës ntuna'antë ets ka'ap nëjkx pën yaj'ëwaatsëpëtsëmyë.

¹⁵ Etsës jatëkok nwinpita'any maas n'ityën, koonëm yë pyoky kë'ëm tja'awëy'itëty ets xy'ixta'atëtyës. Jam ma ënety jë'ë ya'ax yajpaatën, jamës nëjkx xy'ixta'atë.