Nehemías 9 - Biblia Dc en Mixe de Quetzaltepec

Ma ja Esdras t'amëtoyën ja pokynyimä'kxën

¹ Kom i'px majktaxk xëëw, jä'ä po'o tyu'ukmujktaaytyë ja Israel ja'ayëty ets y'ayuu'ata'antë; jä'ä ijty tëëyëp ja'ay tuntë wa'ats ja wyääy kyopk tyaj'ujtsta'atë mëët ja naaxway ets nyätyukxojxta'ajëtë ja wit tujkxy nikëëts ixkëëts,

² ets tpuwa'ktutaaytyë ja jëpyo'kxyjyä'äyëty, wya'akë'ktaaytyë ni'amukë ets y'ënantë ko tëë ënety ja nëë poky tjantytyuntë ets näjyëtu'un ja y'ap y'okëty.

³ Tëkëëk yaxp jëtu'un tsyënaaytyë jam ma ënety yajpaatën, jä'ä ko jëtu'un ojts pyo'oxy ma ja noky yajkajpxtaayën, ma myinyën kuja'ay ja Wintsën, Wintsën, ja y'ënä'ämën tyiy'ajtënën, tëkëëk yaxp ojts tmaaywyatstë ja pyokyëty, ets ja tyuuntëko'oy kyajpxtëko'oyënëty ets jëtu'un t'ëwtajtë ja Wintsën.

⁴ Kom ok ja Leví ja'ayëty tä ja Josuéjën, Binuy, Cadmiel, Sebanías, Buní, Serebías, Paní ets Quenani pyäjtë jam kepykyëjxm ma ënety jam të yajni''ixëtën ets tyëjkëtë mëk kajpxtaktpë ja Wintsën mëti'ipë Teety'ajt Koonk'ajtpën jä'ä myëkajpxtëp;

⁵ ets y'ënantë ja Leví ja'ayëty mëti'ipë xyëëwajtëpën Josué, Cadmiel, Binuy, Hasabnías, Serebías, Hodías, Sebanías ets Petahías: Pëtë'kta'atë ni'ämukëty ets win'ëw winya'axtë ja mWintsënëty xëmë. Kënu'kxy, mëjjawë mëpaat yë'ë nyäxy, ets mëpaat'ajtp yajwin'ëy yajwinyä'äxy yë kyënu'kxy mëj xëëw.

⁶ Ets ja Esdras y'ënäny: Mijts Wintsën ni pën jëtu'un mkamëpaatëtëty tä mijtsën. Jä'ä ko mijts ojts ja tsajp xyajkojy ets mëti'ipë jam waanëkëjxyën ets tëkokyë ja nyimëtsa'a; mijts ojts xyajkojy ja naaxwiinyëtë ets mëti'ipë jää yajpatpën, mijts ja juukymyejy të xyajkojy ets tëkokyë mëti'ipë jap yajpatëpën. Mijts näjyëtu'un myajjuuky'ajtääpy oy tyimtiijëty mëti'ipë juukyajtënmëëtën. Paatykyëjxm m'ëwtatëtë ja mëtsa'a jampë tsajpkëjxm yajpaatën.

⁷ Mijts Wintsën, mijts mwin'ijx ja Abram, mijts myajpëtsëëm jam Ur, ma ja Caldeo ja'ay tsyëënëtën ets xyajxëëwpejty Abraham.

⁸ M'ijx ko mijts ënety mtimtyuk'ijxpäjtëp, paaty tyuuny ja käjpxytyu'unën mëët yë'ë: Ko xy'ënëmaay ko yë'ë nëjkx ja y'u'unk y'ok xymyo'oy ja nyaaxëty ma tsyëënëtën ja Canaán ja'ayëty, Hit ja'ayëty, Amor ja'ayëty, Ferez ja'ayëty, Jebús ja'ayëty ets gergeseos ja'ayëty; e tëëjës ja m'aaw m'ayuk xjyäntykyuuytyuny jä'ä ko mijts mpatuunpy ja mëti'ipë mnikäjpxypën.

⁹ Mijts wa'ats xy'ijxy xynyija'awëy wi'ix ënety jap Egiptë y'ëyowtën ëëts ja n'ap n'okëty ets mnija'awëy näjyëtu'un ko jyiiytyë yaxtë jam nëë'ëkë'ëm ma yajtijyën Tsapts nëëpë'am.

¹⁰ Mëjwiin këjää ojts ja mëj'ajtën xyaj'ixyë ets mëjwiin këjää winë xytyuuny ma ja yajkutujkpë ënety yajkutukyën, wa'ats t'ijxtaay tnija'awëtyääytyë ja tyuunpëtëjkëty ets ja wyintsëntëjkëty mëët ko ënety janty amëj akëjxm tyimnäyajnaxyë ets ko ënety o'ktëy ja Israel ja'ay timtyuny timy'ënëëmë. Jëtu'un'äämpy ja'ay mpëjktakë ijtëpën oy tyimmaajëty.

¹¹ Mäjtskpëky ojts xyajwa'kxtë ja mëjnëë ets nyajxtë wa'ats pëk; e ja myëtsiptëjkëty wa'ats xyajkiintaay jëtu'un tä mëjtsaa kyinyën këknëëjoty.

¹² Ets ojts xywyinye'ey mëët ja yoots nëma'a ko xyiiny'äjty e ko kyoots'ajty mëët ja jëën ets ja nyë'ë tyu'u t'ixtë ko ënety tyu'uye'eytyë.

¹³ Ko jam jyajtë ma ja tun kopk txëëwatyën Sinaí, jam xynyijënäjky ets mëët mkäjpxy mmëtyäky; ojts xymyo'oy ja aaw ayuk oypyë ets ja ijxpëjkën mëtëypyë ets ja ënä'äm ja kuttujkën mëti'ipë jaantyëtypë.

¹⁴ Ojts xytyukni''ixë ets tpo'kxtëty ja po'kxënxëëw, ojts xymyo'oy ja ënä'ämën tëyajtën ets ijxpëjkën mëtëypyë, mëti'ipë kyë'ëyajkën ja Moisés.

¹⁵ Mooyë näjyëtu'un tsajpkääky ets ku'uxyë kyäytyëty y'uuktëty ets nëë tsaajotypë pyëtsiimyën ets nyëëtëëtsë tyajmontëty. Ets ok xy'ënëmaay ko tniwäänta'atëty ja it naaxwiinyëtë ma ënety të xytyukwinwa'anëmën.

¹⁶ Je'eyëp koos ja n'apëty n'okëty amëj akëjxm ja ojts nyäyajnajxënëtë ets ja juun ja jyot wyinma'any tpëjktaktë, ja m'ënä'ämën mtëyajtën ka'ap ninu'un tmëjpëjktaktë.

¹⁷ Ka'ap tpatunantë ja m'ënä'ämën mtëyajtën ets ka'ap tja'amyäjtstë wi'ix ojts mëjwiin këjää tii xyjyatunyën mëët yë'ëjëty. Kumäjpxy yajxon nyäpyëjktakëtë kë'ëm ojts tnikajpxpätë tu'uk ja'ay mëti'ipë jatëkok jap Egiptë yajnëjkxëtëpën ets y'ëyowtëty myëtuntëty. E mijts, mëët ko mTios'aty, ko mpokymye'kxy, Wintsën mëti'ipë ëma'atjot myëët'ajtypyën ets pa'ëyoopën, mä'kxtujkpë ets tsojkpë ja'apë.

¹⁸ Oy kë'ëm tjatimyajkojtë ja y'awinaxëty pujxnëpë y'oytyunyëtyën mëët, jëtu'unpë kyëxë'ëkyën tä tsajpkaajën ets y'ënantë ko yë'ë të yajpëtsëmëtë jap Egiptë ets aakjä'ä tyuuntë mëti'ipë yajjoot'anpëjkpën,

¹⁹ mijts, ko tääjën ja m'ëma'atjot xy'ëkmëët'aty mëjwiin këjää, ka'ap jam jëtu'unyë xynyikäk të'ëts'itjotm. Ja yoots nëma'a mëti'ipë ënety winye'eyëtëpën xëëny ka'ap ojts tyajjëwä'äky ets näjyëtu'un ja jëën mëti'ipë ënety koots winye'eyëtëpën.

²⁰ Kë'ëm ojts xytyimmo'oy ja jot mëjaaw oypyë ets nyë'ëye'ey tyu'uye'eytyëty; nijëna'a ojts ja tsajpkääky kyatëkoy'äty ma y'aaw yä'änëtyën mëti'ipë tyijtëpën maná, xëmë tmooy ja nëë mëti'ipë y'uuktëpën pyëktëpën.

²¹ Wëxtyikxy jëmëjt ojts yajpaatë jam të'ëts'itum ets nitii kyatëkoy'ajtëtë: ja wyit tyujkxy ka'ap kyë'tstë ets ja kyë'ë tyekyëty nijëna'a kyakiixë'ky.

²² Yë'ë mtukë'ëpëjkëtyääytyë ja naax kajpn mëjjatyëtypë, jëtu'un xypyëjkwa'kxta'ay tä ja'ay kam tu'u tyajwä'kxyën, yë'ë jyä'ä'ajtë ja Hesbón kajpn ma yajkutukyën ja Sihón ets Basán ets ma yajkutujkyën yë Og.

²³ Nimay ja y'u'unk y'ëna'k xymooy tä mëtsa'ajën tsajpkëjxm yaj'ixyën, tääts jam xywoownëjkxtaay ma ja it naaxwiinyëtën mëti'ipë ënety ja y'aptëjk të xytyukwinwanën.

²⁴ Ënet yë'ëjëty jam jyajtë ets tnitsiptuuntë tääpë naaxwiinyëtë tääts tjä'äpëjktë ma txëëwatyën Canaán; yajxon ojts naxym xytyimpëjktä'äky tääpë ja'ayëty. Wä'än ënät tyam tnikäjpxy yë Israel ja'ay mëti'ipë ënety jam kunaax'ajt kukajpnajtëpën, näjyëtu'un ja y'ënä'ämpëty yajkutujkpëty.

²⁵ Ojts tjä'ä'atë may ja naax kajpn mëti'ipë ënety ta'tspëkyëtyën ets mëti'ipë myëët'ajtypyën ja naax kajpn oyëtypë ets jë'kxynyaaxpë, ja naax kajpn ma oyëtypë ja jëën tëjkën ujtsëty mëët ja jë'kxy pëky ets wit meeny, jam'ajtp ja nëë, jam'ajtp ja kam, aaykyam ujtskam ets jë'kxykyam; ets kyääytyë y'uktë koonëm kyuxëtë ets jyot tyiin'ak tyaj'ujtstë mëët ko ënety mijts ja m'oyjot m'oywyinma'any xymyëët'aty.

²⁶ Je'eyëp ko yë'ëjëty ojts mkäjpxykyutëjyë ets ni'ikyë ojts je'eyë mkäjpxykyumëtoownajxënë ets ka'ap n'ëktuunëtë këwentë ja m'ënä'ämën mtëyajtën. Ja mtuunpë ets ja mja'ay mëti'ipë ja m'aaw m'ayuk jyanikäjpxypën je'eyë tyaj'o'k tyajtëkooytyë jä'ä ko ënety tyukwinmëtowëtë ja nyëë pyokyëty, tääts jëtu'un'äämpy myajjoot'anpëjkë mëjwiin këjää.

²⁷ Paatykyëjxm ojts kyë'ëyajkënë ma ja myëtsipëtyën, mëti'ipë ëxëëk tuunëtën. Ok tja'ijxtë ko ëxëëk jyajnëtë kyëpäjnëtë, tä tpëjktsoowtë ja näpyutëkë ma mijtsën, e mijts mëët tu'uk mëjpa'ëyo'owën, ojts xymyëtoowë jam tsajpjotm ja jyi'iyënëty yaxënëty; ets xytyuknikejxy ja ja'ay mëti'ipë yaj'ëwaatsëpëtsëëmëtën ma ja myëtsiptëjkëtyën.

²⁸ E yë'ëjëty ko nyäjya'awëtyë tëë jatëkok jyotkujkë tääts jatëkok näjyëtu'un y'ëtëtstakojnëtëpë aak ëxëëk winë tuntë mijts mwintuuy; paatykyëjxm ojts xytyim'ijxmajtsnë ma myëtsipëtyën ets ëxëëk tyuunëtë. Tääts jatëkok tpëjktsoowkojnëtëpë ja näpyutëkë ma mijtsën, ma jap m'ityën tsajpjotm e mijts mëët ja m'oyjot m'oywyinma'any ënätyë jatëkok xypa'ëyoowkojnëpë, ets janaam jatsojk xyajpëtsëmy ëxëëktuuy.

²⁹ Mjanajts'ë'ëw mjanaskajpxëp ijty ets tpatuntëty ja m'ënä'äm mtëyajtën; e yë'ëjëty ijtëpën ja nyäyajnaxëtë paaty ja ka'ap timmyëmay timyëtajtë mijts ja m'ënä'ämën; këtii ijty mëj timjyawëtë ja m'aaw m'ayuk mëti'ipë juukyajtën yäjkpyën ma ja'ayëty mëti'ipë pyatuumpyën ja m'ënä'ämën; je'eyë xëmë kyäjpxykyumëtoownajxtë ets juun ja jyot wyinma'any tpëjktaktë.

³⁰ Kanaak jëmëjt ojts xypyokymye'kxy ets xyjyajpa'ëyooy, mjatuk'ëwa'anëy mëët ja mmëkajtën m'oyajtën ets ja mkäjpxynyajxpëtëjk ets jeexyë ka'ap nëkoo nëë poky timpyanëkxtëkëtë mëët ja mtuunpë ets ja m'oyjot m'oywyinma'any; e yë'ëjëty ka'ap tim myëjpëjktaktë, paaty ojts xytyim'ijxmajtsnë ets ja myëtsip ojts yajnëjkxënëtë wiink naax wiink kajpn.

³¹ E mijts mëët ko xy'ëkmëët'aty ja pa'ëyo'ow najts'ëyo'owën ka'ap xytyimyajkutëkooy ets tu'ukyë xytyim'ijxmajtsy; tä xyajwinkëxë'ëky ko mijts oy mTios'aty ets mëët'ajtyp ja ëma'atjot.

³² Paaty ënät yam myaj'ënëëmë mijts Wintsën, ma myajTeety'äty myajTios'atyën, mëti'ipë mëjën, mëti'ipë maaytyääyëpën winë ets kutsë'ëkë; ma mijts xykyuuytyunyën ja m'aaw m'ayuk ets mtsojkën mja'awën, ja'atyëkoy ja nyëë pyokyëty ëëts ja n'ap n'okëty, ëëts ja nyajkutujkpëty, ja nkopktëjkëty, ja nteetyëjkëty ets ja nwinkajpxpëtëjkëty ets tëkokyë ja naax kajpn mëti'ipë ijty ënä'ämëtëpën Asiria ja'ayëty ets mëti'ipë tyampaatën.

³³ Mijts tëy nitii poky xykyamëëtëty oy ëëts wi'ix të njat të nkëpätë, jä'ä ko mijts aak mëtëy winë të xytyuny oy ëëts ëxëëk n'ëtë'ëtstë n'ëna'antë.

³⁴ Ëëts yë n'ënä'ämpëty nkutujkpëtëjkëty, nkopktëjkëty, nteetyëjkëty ets ja n'ap n'okëtyës ni pën tkakuuytyuuny oy ja m'ënä'ämën mtëyajtën oy xyjyatuk'ënëmaay ets xyjyatuk'ëwa'anëy.

³⁵ Ni'ikyënëm jam ma ja kyutujktaknëtyën, oy winë mëj këjää xyjyamooy, ja wit meeny, ja naax kam ma winë y'ity wyintëyën ma ja naax kajpnën mëti'ipë mtukë'ëtëkëyën ka'ap ojts mëjjawëty ets ka'ap ja y'ëxëëknë'ë y'ëxëëktu'u t'ëxmajtstë.

³⁶ E ijxtëm ënät ëëts tyam, je'eyë ëëts nmëtuun n'ëyoownëtë ma ja naax kajpnën mëti'ipës xyjyamooytyën ja n'ap n'okëtyës ets jeexyë akujk jotkujk kyäytyë y'uuktë mëti'ipë pyatëp y'ijxtëpën.

³⁷ Ko ja pëjktä'äky jyayajpëky mëjwiin këjää wiink ja'ay ja jyä'ä'ajtyp ets yë'ë yajkutujkpë jyi'kxyp pyijkpy, mëët koos ja nëë poky të ntuuntëkoytyë. Ëëtsëty ets mëët ja njëyujk ntsajpkaajëtyës je'eyë ëëts nëkoo ntyäty tyun ntyäty'ëyowtë wiink ja'ay tyukxoompy tyuk'ijtyp. Paatykyëjxm ëëts nkumon nkutukëtë ets një'ëtë nyäy'axtë.

Ma ja naax kajpn käjpxytyu'unën tu'uk tuntën ko tkuuytyuna'antë ja ënä'äm tëyajtën

³⁸ Mëët ya'atë kyëjxm, tyam ëëts yajxon nikajpxtë nokykyijxy ets wä'än yajxon tyajjaaypyäjta'ay, ets ja noky mëti'ipë ënät pëtë'ëkëpën yë'ë wyinkukaatsëtëp ets tsya'atëp ëëts yë nkopktëjkëty, Leví ja'ayëty ets teetytyëjkëty.