Nehemías 8 - Biblia Dc en Mixe de Quetzaltepec

Ma ja ënä'ämën tëyajtën yajtukwinkukajpxëtën ja mayjyä'äy

¹ Ënet ja ja'ay ye'eymyujktaaytyë jam tëjk'ëkë'ëm ma ja tëjk'aaw yajpaatyën ma nëë nyikoompetyën ets t'ënëmaaytyë ja yaj'ijxpëjkpë Esdras ets tmëminëty ja noky ma myinyën këxja'ay ja ënä'ämën kutujkënën mëti'ipë ja Moisés jyääyën, mëti'ipë ja Wintsën tyukniyajkëyën ja Israel ja'ayëty.

² Ma ja mëmajkpo'opë tyu'uk'anyën, jää ojts ja teety Esdras tmëminy ja noky ma jap myinyën kuja'ay ja ënä'ämën kutujkënën ets tukwinkukajpxëy ja ja'ay mëti'ipë ënety jam të nyiye'eypyetyën naaxwiinyëtë ja'ay to'oxytyëjk mëti'ipë kujk yajxon myääynyëtën tyajnëtën;

³ jopyëp tyajtso'ontäky tukwinkukajpxë ja ja'ay ya'atë ja noky ets jëtu'un tyimkujky xyëëwëy, jam tëjk'ëkë'ëm ma ja nëë nyikoompetyën. Tu'kë'ëyë ja mayjyä'äy je'eyë amonyë myäy'itë jä'ä myëtoow'ijtëp wi'ix ja tëyajtën jam yajkäjpxyën.

⁴ Ja yaj'ijxpëjkpë Esdras jam ojts kyuwa'akë ma tu'uk kepyën tënaaypyäjn, mëti'ipë yë'ë të tyimyajtuktsätsën. Tam ënety näjyëtu'un pya'atänëty a'oytsyow yë Matatías, Semá, Anías, Urías, Hilquías ets yu Maaseías. Tam ënety näjyëtu'un pya'atänëty y'anajny'äämpy yë Pedaías, Misael, Malquías, Hasum, Hasbadana, Zacarías ets Mesulam.

⁵ Ënet ja Esdras ojts ja noky tkëëywyä'kxy, jam këjxm kyuwa'këy tam ja mayjyä'äy t'ixtë; ets ja ja'ay wya'akë'ktaaytyë.

⁶ Ënet ja Esdras tyëjkëy ëëpë xoontakpë tyajnaxy ja kukkajpxën ja'awëkyëtakkën ma ja Wintsënën, mëti'ipë Tios'ajtpën, mëti'ipë maaytyääyëpën winë, ets ja ja'ay y'ëtsoowtaaytyë ets xyajjë'ktaaytyë: Jëtu'un, jëtu'un, Tääts nyäkyoxtënaaytyakëtë ets t'ëwtajtë ja Wintsën.

⁷ Ja Leví ja'ayëty mëti'ipë xyëëwajtëpën Josué, Paní, Serebías, Jamín, Acub, Sabtai, Hodías, Maaseías, Quelitá, Azarías, Jozabad, Hanán ets Pelaia jä'ä tyukwinmëtyaktëp ja naax kajpn wi'ix ja ënä'ämën tëyajtën yajja'akyukëja'anyën ets mayjyä'äy je'eyë tmëtoow'itë ets aak tënaaytyëp,

⁸ yë'ë ojts tkajpxtë ja noky ma ja ënä'äm tëyajtën myinyën ets nän yë'ë kyajpxwa'atstëp ets ja ja'ay yajxon tja'akyukëtëty.

⁹ Ko ja ja'ay tmëtoow'ijtë ja ënä'ämën ets tja'akyujkëtyë wi'ixjaty y'ënä'änyën tä tyëjkëtyë jëëpyë yaxpë, ko jëtu'un t'ijxy ja yajkutujkpë Nehemías ets ja yaj'ijxpëjkpë Esdras ënät t'ënëmaaytyë ja naax kajpn ko këtii myontëty tyuktëty jä'ä ko ja xëëw po'o jä'ä ënety ja Wintsën të yajtuknipëjktaakë ets jää yajmëjjaw yajaantyjyawëty.

¹⁰ Ets ja Esdras y'ënëmaayëtë: Nëjkx mkaytyë m'uuktë akujk jotkujk, uuktë pëktë mpa'aknëëjëty, wowtë witstë mëti'ipë ka'ap tii të tnipëjktaakën ma jyëën tyëjkën jä'ä tyampë xëëw tëë yajtuknipëjktaakë ets Wintsën tjä'ä'atëty. Këtiimës yë mmontë mtuktë jä'ä ko ja Wintsën ja jyotkujk'ajtën yë'ë nwa'anëm tsoktakn.

¹¹ Näyjyëtu'un ja Leví ja'ayëty ojts ja mayjyä'äy t'ënëmaaytyë ets y'ëmontëty këtiipë nëkoo jyë'ëtëty ya'axtëty jä'ä ko tääpë ja xëëw tëë ënety tuknipëjktaakëtë ets yë'ë ja Dios tjä'ä'atëty.

¹² Ënet ja ja'ay tyëjkëtyääytyë kääpyë ukpë ets tpëjkwa'kxtaaytyë ja jyi'kxyëty pyikyëty tiijaty ënety të tyaj'oyëtën ets tuuntën ja mëj xëëw, jä'ä ko ojts tja'akyukëtë mëti'ipë ënety të yajtukwinkukajpxëtën.

Ma yajnixëëwtunyën ja tëjk ujtsxo'omy

¹³ Komjëpom myujktë ja mëjja'aytyëjk, teetytyëjkëty ets Leví ja'ayëty ets t'ixpëka'antë mëët ja yaj'ijxpëjkpë Esdras ja aaw ayuk mëti'ipë ja ënä'ämën tëyajtën nyimëtyäkpyën,

¹⁴ ets jap tpatë ko ojtstëm tëëyëp yë Wintsën tuk'ëne'emy yë Moisés ets Israel ja'ayëty tsyëënëtëty ma tu'uk tëjkën mëti'ipë ujtsxo'omyën ko koo xyëëwtuntëty winjëmëjt ma ja mëwëxtujkpë ja po'o y'änyën.

¹⁵ Ënet tni'ënä'ämëtyë kajpn'apëtsëmy ko wä'än t'ixta'atë ja aay ujts mëjjatyëtypë, tä tëëxyën ets kum'aayën jä'äts ja tyëjk tyuknixo'omtëp ets jap y'itëty ets tuntëty jëtu'un tä jap myinyën kuja'ay ma ja ënä'ämën tëyajtënën.

¹⁶ Kajpnkajpn ets näjyëtu'un ma ja Jerusalén kajpnën ja'ay tmaynyitso'ontë ja y'ujts'aay kyepy'ääy ets tmëja'ajtë, tam mëti'ipë y'oytyuunën ja tyëjkxo'omy tyëjkëjxm, tyëjkpë'aay, tyëjkwinm ets ojts tyaj'oyëtë jam tsajptëjk'ëkë'ëm, ma nyitëjk'aawën ja tëjk ma nëë tyaj'itën ets ma ja nyitëjk'aawën ja Efraín ja tyëjk.

¹⁷ Tëkokyë ja ja'ayëty mëti'ipë ojts yaj'ëxwoptën je'eyëp ko tëë jatëkok ja nyaax kyajpn ënety tpaatë, ojts ja tyëjkxo'omy t'oytyuunta'atë ets jap y'ijtë jä'ä ko maju'unëm ja Josué, yë Nun myaank jyuuky'ätyën ka'ap ënety pën jëtu'un të t'ëktuunë. Jä'ä xëëw ijtëpën yajxon xyëëwtuuntë.

¹⁸ Wëxtujk xëëw xyëëwtuuntë; tyajtso'ontaktë mëtu'kxëëw ets tyajëjpkëjxtë ma wyëxtujk xëëwpetyën, winjëpom ja Esdras ijty ja ja'ay tukwinkukajpxë ja ënä'ämën tëyajtën mëti'ipë Wintsën jyä'ä'ajtypyën; kom tuktujk xëëw jää ojts ye'eymyujkta'atë ja ja'ayëty ets tu'uk ja mëj xëëw tyaj'apatëtyë jëtu'un tä ënety tyu'unën'atyën.