Nehemías 6 - Biblia Dc en Mixe de Quetzaltepec

Ma ja Nehemías yajnikäjpxytyunën

¹ Ko ja Sambalat, Tobías, Guésem, ja arapyë ja'ay ets ja wiinkëtypë ja mëtsiptëjk tnija'awëtyë ko tëë ënety yajkoj'o'oyëtyä'äy ja mëjpotsy mëti'ipë kajpn nya'ëwtijtypyën ets ko ka'ap ënety nimaa najxtakn ëwa'ats të yaj'ëxmatsy, oy ënety yi'iyë jyaak tëkoy'ätynyëm ja tëjk'aaw muumëty,

² ënät ojts xynyikäjpxykyäxëtës yë Sambalat ets Guésem, y'ëna'antë koos näpyaatëtëty muum kajpntuuy ma ja joyjotmën ma txëëwatyën Onó. Je'eyëp ko yë'ëjëty jä'ätën ënety të tjatuknipëjktaakëtë ets jeexyë xy'ëxëëktuntës.

³ Ënätës ja ayuk ntuknikejxy koos mëj tuunkës ënety jap të nixajë ko ka'ap tjëkyapä'äny nëjkxëtyës ma yë'ë xyjyayaxtsowtënës, jä'ä ko pën njëjpwa'ktutypyës ja tuunk jëtu'unyë ja wyë'ëma'any.

⁴ Tax'ok xyjyanikajpxëtyës e ëjts jëtu'unyëmës ojts xëmë n'ëtsoy.

⁵ Ënätës ojts ja Sambalat tu'uk ja tyuunpë xytyimtuknikexy näjyä'ä ayuk tyukmëmiin tä ënety të y'ëk'ënaanpën ma ja mëmajktaxk'okpë ënety të xyjyakäjpxynyikäxtënës, ja noky jëtu'unyë ëwa'ats tkejyxy,

⁶ tyaa tyaj'ëna'any: Jëtu'un yajmëtoy'äty ja'ay kyajpxtë myëtya'aktë ets näjyëtu'un Guésem y'ënä'äny, ko mijts ets jutië ja'ayëty mnipëtë'ëkantëpëk yë kuttujkën, paatyëk ja mpotyëty të xykyojts'oyëtë mëti'ipë ja mnaax mkajpnëty kyuwäänpyën. Näyjyëtu'un tnikäjpxy tnimëtya'aktë ko mijtsëk mtëkëjaanp yajkutujkpë,

⁷ ko tëëjëk ja ja'ay xytyuknipëjktaaynyë ja tuunk ets jä'ä y'itëty ayuk akajpxpë mëti'ipë Wintsën myëtuuntëpën mëti'ipë ënät mnikajpxpätëtëpën ënä'ämpë yajkutujkpë jam Jerusalén ets ja käjpxy y'ëna'anëty ko jam Judá tam tyam ja yajjutujkënë. Ya'atë jëtu'unpë ayuk tsojk yajkutujkpë Artajerjes tnijawëty, paaty yam n'ënëëmë nikë tsojk ntimkyajpx ntimmyëtyakëm wiinxë jëjpxë.

⁸ Ënätës n'ëtsoowinpijty ko tääpë ayuk jyëtityën këtii tmëpëktëty jä'ä ko ka'ap tyiyëty, nëkoopë jëtu'un myäy tyäjy.

⁹ Yë'ëjëty jä'äjëtën ojts tjawinma'any'atë ets jeexyë xy'ëtsë'ëkëtës ets jeexyë ja tuunk yaj'ëxmatsy ets jeexyë ka'ap wyintu'upëky; e ëëtsëty ni'ikyënëmës ja ojts amëjaaw ntuuntsoontë.

¹⁰ Ënätës ojts jam nëjkxy ma Semaías tyëjkën, yë Delaías myaank, Mehetabel yë y'ok'u'unk, tëë ënety jap tyëkoty nyäyajku'ëtukyë etsës xy'ënëmaay: Tsojk jap tsajptëkoty nye'eymyujkta'ayëmë, jap ma jap ja mëjtëkotën ets nyaj'ëtujkmëty ja tëjk'aaw jä'ä ko ya'atë tsu'umëk ja'ay myaj'ooka'anyë.

¹¹ E ëjts tyaajës n'ëtsooy: Ja'ay jëtu'unpë tä ëjtsën ka'ap tii tkuke'eky, wi'ix ko jap tsajptëkoty kyukääkëty pën tëë tnijawë ko ja'ay yaj'ooka'anyë. Ëjts, tyamës yajxon nyikäjpxy ko jap tsajptëkoty ka'apës jap ntëkëja'any.

¹² Ojtsës ënätyë n'ixy ko ka'ap ja jyä'äjëty yajkäjpxyë ja Wintsën, jä'ä paatyën ja jëtu'unpë winma'any tpatpë jä'ä tëëjëk ënety ja Sambalat ets ja Tobías myeeny mo'oyë etsës xy'ëtsë'ëkëty;

¹³ xëmë ja meeny ijty t'ëxajë ets jeexyë ntsë'ëkë ets jeexyë ja Wintsën nmëtëkoyës. Tääts jeexyë ja ja'ayëty y'ëwtë kyajpxtë wiinkjaty mëët ëëtsëty.

¹⁴ Wintsën ma mijts n'ëwtatyën: Mja'amyätsëp xëmë wi'ix ja Sambalat ets ja Tobías y'ëtë'ëtstë y'ëna'antën. Këtii näjyëtu'un xyjyä'äytyëkoyë ja to'oxytyëjk mëti'ipë y'akäjpxypën winë mëti'ipë xyëëwajtypyën Noadías ets wiinkëtypë käjpxynyajxpëtëjk mëti'ipës nëkoo të xyjya'ëtsë'ëkëja'antën.

¹⁵ Ja potsy jä'ä yajkoj'o'oyëtyääy ma y'ipxmëkoxk anyën ja Elul po'o ets wëxtyikxy majkmokx mäjtsk xëëw ojty nyituunkë.

¹⁶ Ja mëtsip ojts tnijawëtë ets ja naax kajpnëty mëti'ipë mëët ja näpyaatë y'ityën ma naax tsëpa'anën ojts tsyë'ëkëtë, ja myëj'ajt kyëjxm'ajtënëty jëtu'unyë ojts nyaaxkumo'onëtyä'äy tä aay kepy nyaaxkupu'utën, jä'ä ko nyija'awëtyë ko ya'atë tuunk yë'ë ënety mëët ja Wintsën ja pyutëjkën të wyintu'upëky.

¹⁷ Jä'ä xëëw jä'ä jëmëjt yë Tobías mëët yë wintsëntëjkëty ets kopktëjkëty jampë Judá yajpaatën oy ijty nyäyaj'itëtë ets xëmë ijty winë nyätyuknijawëtë,

¹⁸ mayjyä'äy ënety të t'ënëmaay ja Tobías ko oy tjawëja'antë, jä'ä ko ënety yë'ë tmëët'aty yë Secanías, mëti'ipë jutië ja'ayën, yë myaank yë Ará ets mëët ko ja Tobías ja myaank mëti'ipë xyëëwajtypyën Johanán ënety të pyiky mëët tu'uk ja nyëëx ja Mesulam, ja Berequías ja myaank.

¹⁹ Ets oy ijty mëti'ipë kyumayë ëjts nwintuuyës ets tyukmëmëtyä'äkyë ja ja'ay winë mëti'ipë nkäjpxy nmëtyäkpyën, e yë'ë janaam jatsojk ijty noky xytyuknikexyës ets nyätyijyë nëkoo xyjya'ëtsë'ëkëja'any.