Nehemías 5 - Biblia Dc en Mixe de Quetzaltepec

Ma ja jotmay tpatën aak yë'ëjëty

¹ Jä'ä xëëw jä'ä jëmëjt ja naaxja'ay kajpn ja'ayëty pyëtë'ktë mëktä'äky, naaxwiinyëtë ja'ay to'oxytyëjk ets tnipëtë'ktë ja myëkunaax myëkukajpnëty jutië ja'ayëty,

² tam mëti'ipë ënety ënaanpën ko may ja y'u'unk y'ëna'këty, ko kopkpëky ja kääky uuky may t'ëxta'atëty këtiipë yuu'ooktëty;

³ tam wiinkpë mëti'ipë ënaanpën ko tëë ja kyam tyu'ujëty tkë'ëyajknëtë, tëë ja jyëën tyëjk ets nyaax kyamtëjk tkë'ëyajknëtë mëët ko ja jë'kxy pëky tukwinkupëktë,

⁴ wiinkpë y'ënä'äny ko may të nyu'kxnë jä'ä ko ja yajkutujkpë tjanty amëtoy ja ayajk ako'onën, may mëti'ipë tëë tnimeenykyo'onënyën ja nyaax kyajpn kyamtëjk. Tam wiinkpë mëti'ipë ënaanpën:

⁵ Jëtu'un tä ëëtsëtyën ets ja wiinkëtypë ja njëëky nmëku'ukëtyës tu'ukyë ëëtsëty; ja n'u'unk n'ëna'këtyës ka'ap ja tyëkatsy'ajtëpë mëët ja y'u'unk y'ëna'këty. E ëëtsëty yë'ëjës wiink nja'awëtyëp ko ja n'u'unk n'ëna'këtyës yä'äy'ëna'kpë to'oxy'ëna'kpë je'eyë myëtuun kyupëjknëtë. E ëëtsëty tiijës n'ëktuunta'aktëp kaka'atpën tii, ja nkam ntu'ujëtyës aak wiink ja'ay ja tyam jyä'ä'ajtaaynyëtëp.

⁶ Koos nmëtooy wi'ixjaty ënety ja ja'ay nyä'ämtën nyoktën ets wi'ixjaty ënety y'amay jyotmay tkajpxtën tmëtya'aktën ënätës ojts njoot'anpëky.

⁷ Koos yajxon tmëmaay nmëtajy, ënätës n'ënany ko janty tëy jëtää jëtu'un, tääjës ojts ntuk'ënëëmë ja yajkutujkpëtëjk ets ja kutuunktëjkëty wi'ix ko jëtu'un ja myëkunaax myëkukajpn timy tyuntë. Ojtsës ëpëky ntuknipëjktaakë tu'uk ja nätyu'ukmukë ets jam yajkajpx yajmëtya'akëty ja jotmay,

⁸ etsës n'ënëmaaytyë: Ëëtsëty oyës wi'ix të nmëwinjatë etsës të nyaj'ëwaatsë pëtsëmtë ja nmëku'uktëjkëtyës mëti'ipë ënety wiinkë'ëy wiink kajpn të yajmënëjkxnëtën tsumy matsy ets juy tooky; ¿e miitsëty tääts ënät ni'ikyë ja mjëëky mëku'uk xytyookan xyakanëtë ets ënät jatëkok ëëts nyaj'ëwaatsëpëtsëmtëtyësë? Amonyë ojts tyimwë'ëmta'atë ninu'un tkanijawëtë wi'ixëtën y'ëtsowtëty.

⁹ Etsës ojts njaaktimy'ënëëmëtë: tääpë xytyuntën ninu'un kya'oypëtsëma'any. Ni'ikyënëm jeexyë miits xywinkutsë'ëkëtë ja mTiosëty, këtiipë nëkoo xyajxi'ik xyaj ëwë'ëktëty ja ja'ay mëti'ipë ka'ap nmëkunaax'ajt nmëkajpn'ajtëmën.

¹⁰ Näyjyëtu'un ja njëëky nmëku'ukës, ja ntuunpës etsës, tëëjës nja'ay wit meeny ntuk'ënu'kxtë ets tëëjës nmo'otë tsajpmok mëti'ipë kyäytyëp y'uuktëpën; e paatykyëjxm yam jëtu'un ja aaw ayuk y'ënä'äny ko nikë tsojk nimä'kxëm tääpë nmëku'uk'ajtëm oy tkakëpätëty mëti'ipë të nmo'oyëmën.

¹¹ E paaty yam n'amëtow npëjktsowtë ets xymyo'otëty jatëkok ja mëku'uktëjkëty ja nyaax kyamtëjkëty, tä ja y'uvëkamëtyën, y'olivëkamëtyën ets ja jyëën tyëjkëty ets xynyimä'kxtëty ja nyu'kxyëty oy yë'ëjëty wit meeny, ëkë tsajpmok, tsatsym nyëë, ëkë on ëkë tiijaty pën të tmo'oyën ja myëku'uk.

¹² Tä y'ëtsoowtë ja mayjyä'äyëty: Oyës jëtu'un ntuntëty, tyam ëëts jatëkok tmooytya'atëty mëti'ipë të tnitooktën ets tyam ëëts n'ëna'antë ko ka'ap ja nu'kxy pën ntukmatsa'antës. Jëtu'un yam ëëts n'ëna'antë ko ntuna'antës jëtu'un tä yam xynyikäjpxyën. Ënet tmëjmëkajpxtaayës ja teetytyëjkëty ets ja ja'ay tnikajpxtëty yë'ë wyintuuyëty ko mëtëy y'ëna'antë.

¹³ Ojtsës ja nwit jam njeny etsës nwinxijty nwinkä'äy, täätsës n'ënëmaay ja mayjyä'äy: Jëtu'un ja ja'ay nëjkx yajwinxity yajwinkä'äy ja jyuukyajtën jam muum jëkäm mëti'ipë ënety ëxëëk ja jyiiky myëku'uk tyuunpyën mëti'ipë ka'ap tpatunyën ja y'aaw y'ayuk mëti'ipë tyam të xykyë'ëyaktën ets yajpëjkëtya'ajëty winë mëti'ipë jam myëët'ajtypyën. Tä ja mayjyä'äy y'ëtsoowtë: Oy jyëtu'un'atëty, tääts twin'ëëw twinyaxtë ja Wintsën. Ja naaxja'ay kajpn ja'ayëty ojts tkuuytyuntë ja y'aaw y'ayukëty,

Ma ja Nehemías ja y'oyjyot y'oywyinma'any tyajwinkëxë'ëkyën.

¹⁴ majkmäjtsk jëmëjt jëtu'un y'ijty, jää tsyo'ontäky ma ënety y'i'px jëmëjtpetyën ma ja Artajerjes yajkutukyën, maju'unëm ojts ja yajkutujkpë Artajerjes xypyëjktä'äkyënës yajkutujkpë ma Judá ja'ayëtyën ets maapaat y'i'pxmajkmäjtsk jëmëjtpejtyën ja kyutujkën ja Artajerjes, ëjts ets ja ja'ayëty mëti'ipës ënety mëët ntuunmukyën ka'apës ntukuyajktë ni pën ja'ay mëti'ipë ja patëtëpën jeexyë ja y'ayajk y'ako'onën tyaktën ma ëëts ënety nkutuunk'atën.

¹⁵ E ja yajkutujkpëtëjk mëti'ipë ënety jëyëjp të tyuntën je'eyë ijty xëmë ja naax kajpn tuk'atsiptë ja ayajk ako'onën, xëmë ja ja'ay ijty yaj'amëtowtë ja wit meeny këëkwëxtyikxy ja poop pujxn mëti'ipë ja yajkutujkpë nyikayëp nyi'uukëpën. E xëmë ijty winjëpom ja naax kajpn winë tjanty'amëtowtë ets tjantypyëjkëtë. Ëjts ka'apës jëtu'un ja naax kajpn ntuuny jä'ä ko ja Wintsën jä'äs ntsë'këp.

¹⁶ Ja tuunk mëti'ipës ënety xpyatpën ojtsës ja ntuny, ojtsës n'akojëtyä'äy ja naax kajpn ja kyajpn napots, nitiijës ojts ëjts nka'amëtoy, ka'apës maa ja naax kam mpëjky ntuuny. Ja ja'ayëty mëti'ipës xypyutëjkëtyën, aak ojts ja tyuunk oy tyaj'apatëtya'atë.

¹⁷ Jam maas ja nkaaypyäjn n'ukpäjnën nimay ja ja'ay ijty jam kyäytyë y'uuktë mëët ëjts, nimëko'pxën, nimëko'pxjakujkmën, jutië ja'ayëty ets mëti'ipë mëët ja yajkutujkpë tyuunmuktën, ëpëky yë jëën'ëyo'op tëjk'ëyo'opëty mëti'ipë wiink kajpn tso'ontëpën.

¹⁸ Ja ka'ayën ukën mëti'ipë xëmë winjëpom yajnipëjktakëpën, nkë'ëmmeenyës ja ijty tuunp, tu'uk ijty tsajpkaa y'ooky, tëtujk yë kupixyny ets tutk këtsey; ets winmajkxëëw ijty nxëëwtunyës ma ja nëë yaj'uukyën. Oy ijty jëtu'un winë y'ëktuny ëjts ka'apës ja naax kajpn ojts tii n'amëtoy mëti'ipës ënety xyjyapatpën maas nyajkutukyën, jä'ä ko ja naax kajpn kanaakpëky ënety ja jyotmay tmëët'atë ma ja wyit myeeny tyajtuntën.

¹⁹ Wintsën xyjyä'ämatsëpës xëmë, etsës oy njuuky'atëty, mëët ko oy ja naax kajpn të nmëtunyës.