Nehemías 4 - Biblia Dc en Mixe de Quetzaltepec

Ma ja mëtsiptëjk je'eyë nyëxik tyukxiktën

¹ Ko ja Sambalat tnija'awëy, ko tëëjës ntuuntsoontë, ets ko ja potsy, ja kajpnapots ëëts jam nkoj'o'oyëtyëp, wiink tja'awëy, ets yajxon tyimjoot'anpëky, tääts tyëjkëy je'eyë nëxiik tukxikpë, ja jutië ja'ayëty jä'ä yajnëxik yajtukxiktëp.

² Ets t'ënëmaay ja myëku'uktëjkëty ets tsiptuunpëtëjkëty Samaria ja'ayëty: ¿Wi'ix tääjën tääpë jutië ja'ayëty tyimnäyjya'awëyëtë, jëtu'unts yaj'ijxnëtë yuu ookanëtëp yowënë? ¿Ëkë jä'ä tääjën myäytyë tyajtë ko yaj'ëxmatstëp ënät ets jatëkok ja Tyiosëty ja wyintsë'kën tmo'otëtyë? ¿Ëkë y'ëna'antë ko tu'kxëëyë je'eyë tyajwintu'upëjkta'atëty ja tyuunkëtyë? ¿Ëkë aak oyëty ja tsaa ënät t'ëkjuuta'antë ma tëë wyintooykyëtaktaaynyënë?

³ Tam ja Tobías ënety näjyëtu'un pya'u'unyëty ets ojts y'ënaanpë: Ixtë, ko xyijy yë pyotsyëty jam wintu'upëky t'oytyuntë, mëpaatëp jam tu'uk wax kyëxpujnë ets tyajëmaamkëta'akëty.

Ma ja Nehemías kyajpxtä'äkyën

⁴ Ënätës ja nTios'ajtëmë tmëkajpxtäky, etsës n'ënëmaay: Wintsën, Wintsën, ëkmëtoow'it wi'ixës ja ja'ay xynyëxi'ik xytyukxi'iktën. Ijxtëm tsoktë jeexyë ëëts njat nkëpätë wä'än yë'ë jëtu'un tjatë tkëpätë, yajkutuk ets myëtsiptëjk yajnëjkxëtë wiink naax wiink kajpn.

⁵ Këtii nijëna'a xypyokymyä'kxëty ets këtii nijëna'a xyjyä'äytyëkoyëty ijxtëm ëxëëk y'ëtë'ëtstën y'ëna'antën, jä'ä ko yë'ë mëj këjää jëtu'un tyëkoytyë ko t'akajpxtuktë ets ja naax kajpn ja pyoty yajkoj'oyëty.

Wi'ix ja mëtsip ojts tjä'ëtsu'uxya'axtën ja ja'ay

⁶ Ëëtsëty je'eyëmës ojts ntuun'ëtë'ëtstë, kujkwä'kxy nyujkpojtstës ja potsy. Janty winë aaw winëjot ja ja'ay jyänty tyuntë.

⁷ E ko ja Sambalat, Tobías, Árabe ja'ayëty, Amón ja'ayëty ets Asdod ja'ayëty tnija'awëtyë ko ja tuunk tam je'eyëm tyu'uye'ey ëti'ity ets ko ënety tëë ja yajpojts'o'oyëtyä'äy ja potsy maajaty ënety të pyijy të kyiitsyën mëti'ipë jamë Jerusalén, ënät yajxon jyänty jyoot'anpëjktë,

⁸ ënät tu'ukyë tkajpxmujktë wi'ix tnitëkëja'antë ja Jerusalén kajpn ets wi'ix ëxëëk y'ëk'ëtë'ëtsa'an y'ëna'ana'antën.

⁹ Ënet ëëts nmëpëjktsoowtë ja nTios'ajtëmë, ets yajpëjktäky ja këwent'ajtpë xëëny koots, y'ity jëtu'un ja näy'ijx'it näkyëwent'atë.

¹⁰ Tä ja Jutië ja'ayëty y'ënantë: Jëtu'unyë yaj'ijxnë jyot myëjaaw kyëjxnë mëti'ipë naax'ixtsëëmtëpën ko nëkooyë naaxtajy ets potsy'apu'uxk myäy'ajnë ets aak ëëtsajtëm ka'ap xymyä'äymyëty nkoj'apäjtä'ämyëty ya'atë mëjpotsy.

¹¹ Ëëts ja nmëtsip tyaa ja ënety myäytyë tyajtë ko ka'ap yaj'ixëty wi'ix ëëts xy'ëkëty tyukja'tëty ajotkumonë ets xyaj'ook xyajtëkoytyëtyës këtiipë ja tuunk tyu'uye'eyëty.

¹² E ko ja jutië ja'ayëty mëti'ipë winkon tsënaaytyëpën xytyuk'ëwa'anëtyës ko ja mëtsip ënety xytyukja'ta'antës,

¹³ ënät n'ënëëmës ja mayjyä'äy ets t'awa'kta'atëty ja potsy jënu'un tyu'kja'ay'atën mëët ja pyujxnëty, kyu'umënëty ets ja tyi'pxnëty, maajaty ja patu'ujën, ma kyëjxmëtyën ets ma nyäxymyëtyën.

¹⁴ Koos n'ijxy ko tsë'këtyëp, ënätës n'ënëmaay ja yu'kya'kpëtëjkëty, ja yajkutujkpëtëjk ets ja mayjyä'äyëty: Këtii xytsyë'ëkëtëty. Ja'amyätstë ko Wintsën mëj ni'ik ets kutsë'ëkë, nitsiptuntë mjëëky mëku'ukëty, m'u'unkëty m'ëna'këty ets mkujëën mkutëjkëty.

¹⁵ Koos ja nmëtsiptëjk tnija'awëtyë ko jëjp'ixy ënety nyajpaatës ets ko tëë ja Wintsën tjijtma'ta'ay ja winma'any tä të tjanipëjktaakëtën, ënät jatëkok ntuuntëjkëtyës ets mpataaytyës nijä'äjaty ja ntuunkëtyës ma ja potsy n'akojëtënës.

¹⁶ Jä'ä xëëw nikujkwä'kxy ja ja'ay ënety tyuntë ets nikujkwä'kxy këwent'atë mëët ja kyu'umënëty, tyi'pxnëty ets pyujxnëty. Ja kopktëjkëty ni'ikyë ijty tjanty jyotmëkmo'otë ja Judá ja'ayëty ets y'itëty amëk jotmëk ets akujk jotkujk,

¹⁷ mëti'ipë ënety jam kyoj'o'oyëtëpën ja mëjpotsy. Ja mëti'ipë winë nyitsëëmtëpën, yajxon ja jam jyänty tyuntë, je'eyëp ko tu'kpa'a winë tnitsëmtë ets tu'kpa'a ja tyi'pxn kyu'umën tmajts'ity.

¹⁸ Ja ja'ayëty mëti'ipë pojtstëpën aaktam t'ëxwëën'atë ja tyiypyujxnëty ets maas ëjtsën tamës ënety xytyimpa'atänë ja mëti'ipë yajxu'uxäämpyën ja xuxn,

¹⁹ jä'ä ko tëëjës ënety ja yujkya'kpëtëjk n'ënëëmëtë ets ja yajkutujkpëtëjk ets ja mayjyä'äy: Mëj tuunk ya'atë oy ets këjäätuunk, e ëëtsajtëm winjëkämjatyëty ntu'unëmë.

²⁰ Paaty yam n'ënëëmëtë: Jam ma myajpaatën, ko xymyëtoowpaatëty ja xuxn xyu'uxy, ënätyë ëëts xypyuwa'akëtëty ets nTeety'ajt nKoon'ajtëm tëë tnijawë wi'ix xynyitsiptuna'anëmë ëëtsajtëmë.

²¹ E jëtu'unts jëtu'un, tyamën ja ëëts tu'kxëëwpaat yajxon njantyuntë, tyam nikujkwä'kxy ja ja'ay tmënax tmëtëkëtë ja tyujnëty pyujxnëty ets ja tyiypyujxnëty.

²² Ojts näjyëtu'un n'ënëëmës ja mayjyä'äy, ko ni'ëmukë, yë'ëpaat ja mëti'ipë putëjkëtyëpën jap kajpnjoty Jerusalén yajpaatëty ets jap mya'atëty tyajnaxtëty ja tsuu jap, je'eyëp ko këwent'aty, y'itëty, xëëny tääts tyuntëty.

²³ Ëjtspaatëty, mëët ja njëëky nmëku'ukës ets ja ja'ayëty mëti'ipës xypyutëjkëtyëpën ets mëti'ipë näjyëtu'un këwent'ajtëpën ma ëëts nyajpaatën, ja nwit ntujkyxyëtyës ka'apës ntimjyäntë ets ja nku'umënëtyës nti'pxnëtyës ka'apës n'ëxmatstë.