Nehemías 2 - Biblia Dc en Mixe de Quetzaltepec

Ma ja Artajerjes t'ëwa'atsyën ja tu'u'aaw ets ja Nehemías nyëjkxëty jam Jerusalén

¹ Tëkok, ma ënety nisán po'o y'änyën, ma y'i'px jëmëjtpetyën ma ja yajkutujkpë Artajerjes ënety tyunyën, uukyës ënety ja n'apëjkëp, koos ojts xy'ijxpaaty moonp tujkpës ënety,

² ënätës xy'ënëmaay: Namoomp natujkp n'ixyës myajpaaty. ¿Tiijën mjajtëp mkëpäjtëp? Kajts yowë mpëkyë m'ixyë, jam ënät tiijotmay xymyëëtëty. Ënet ja mëktsë'ëkë xytyuktëjkëyës koos jëtu'un nmëtooy ja yajkutujkpë y'ënä'äny,

³ tääjës n'ëtsooy ja yajkutujkpë: Mëjwintsën, ma njuuky'ätyën xëmë. ¿Wi'ixëtën ëjts nkamon nkatukëtyës, koos nijawë'aty maas ja n'ap n'ok nyaaxtëjkëtyën axit ako'owë jam je'eyë të yajtuuntaaynyë ets ja naax kajpn ja nyitëjk'aaw jëna'ajëp ja mëtsiptëjk tnino'ktaaynyëtë?

⁴ ¿Tii mtsojkpy ntunëtyës mëët mijts? Ënätës ja Wintsën tsajpjotmëpë ja winma'any n'amëtooy etsës n'ëtsowëty ja yajtë'ëwën,

⁵ tääjës ja yajkutujkpë n'ëtsooy: Pën yë Yajkutujkpë y'a'ijxëp ets pën xy'oyjya'apës, nmëtaja'anyës jam Judá, jam ma kajpnën ma jam y'itën naaxnitajy ja n'aptëjkës ets jatëkok nkoj'oyëtyës.

⁶ Ja yajkutujkpë, tam ënety ja tyo'oxytyëjk pya'a u'unyëty, xy'ëtsooyës: ¿Jeky nëjkx m'ita'anyën? ¿Jëna'a jatëkok mwinpitëty? Tääjës ntuk'ëwa'anëy jëna'a jatëkok nwinpita'anyën, tääts tkupëjky ets t'ëwatsy ja në'ë'aaw ntu'u'aawës.

⁷ Ojtsës näjyëtu'un n'ënëëmë, pën ka'ap wi'ix tmëtoy tu'ukës jeexyë xymyo'oy noky ma tnijayëtyën ja ënä'ämpëtëjkëty mëti'ipë jam yajkutujktëpën Éufrates ninaxy, etsës xy'ëwatsëtëty yë në'ë aaw ntu'u'aaw koonëmës jam nja'tëty Judá;

⁸ ëpëky wiinkpë ja noky mëti'ipë ja Asaf yajtuknijayëpën, mëti'ipë kyëwent'ajtypyën ja yukjot kepyjyot mëti'ipë yajkutujkpë nyitënääpyën, ma yaj'ënëëmëtyën: ko wä'än xymyo'oyës ja kepy mëti'ipë ja tsajptëjk ja nyitëjk'aaw yajtuk'oytyunëpën ets mëti'ipë ja kajpnpa'a ja nyitëjk'aaw näjyëtu'un yajtuk'oytyunëpën ets näjyëtu'un maas ëjts ntsëënëja'anyën. E ja yajkutujkpë ojtsës xymyo'oy jä'ä ko yë'ë ënety ja Wintsën mëët ja pyutëjkën nmëtä'äkyës.

⁹ Koos jam njajty ma ja yajkutujkpëtëjkën jampë y'ënä'ämtën Éufrates ënätës ja noky nmooytyääytyë, ëpëky ja yajkutujkpë ojts xytyukpakexyës ja tsiptuunpëtëjkëty këwaaykyijxypyë jyëtitën yë'ë tu'uwinye'etyëp ja tsiptuunpë wintsënëty.

¹⁰ E ko tnija'awëy, yë Sambalat, jampë Horón kyukajpnëtyën ets ja Tobías tu'uk wintsën mëti'ipë Amón ja'ayën, wiink tja'awëtyë ko tu'uk ja'ay jya'ajtpë mëti'ipë ënety pyutëkëjäämpyën ja Israel kajpn.

Ma yajnimay yajnitajën wi'ix ja mëjpotsy jatëkok yajkoj yajmä'kxëtyën

¹¹ Ënätës jam njajty Jerusalén. Kom tëkëëk maas ënety jam të nja'tyën,

¹² tsu'umës ojts tma'aypëti'iky, etsës ntso'ony mëët tu'uk mäjtsk nja'ayës, ni pënës nkatuk ëwaanë mëti'ipës ënety ja Wintsën të xytyuk'ëne'emyën ntunëtyës mëët yë Jerusalén. Yi'iyës ojts nyajnëjkxyës yë njëyujkës mëti'ipës ntukpo'kxypyën.

¹³ Jä'ä tsu'um ntso'onyës, jamës najxy matsow ja tëjk'aawën mëti'ipë nëjkxpën jam joyjyotm, ma ja nëëwooky yajtijyën Dragón etsës najxy ma ja nyitëjk'aawën pu'uxm ko'owtakn yajko'oyën, tääjës n'ijxtaay wa'ats wi'ixjaty ja naax kajpn ënety yajpaatyën, maajaty ënety potsy të jyity ets mëti'ipëjaty ënety ja tëjk'aaw të tyoy.

¹⁴ Tääjës jatëkok jamtsow najxë'ky ma ja nëë'awookën ets ma ja yajkutujkpë ja nyëë'atajë yajpaatyën; je'eyëp ko ja njëyujkës mëti'ipës ntuk'ënyääpyën ka'ap jam nyaxa'any.

¹⁵ Kootsnëm ënety koos jam jatëkok najxë'ky ma ja wokjotmën, koos n'ijxtaay jëtu'un ja kajpnapotsy, tääjës jatëkok nwinpijty ma ja tëjk'aawën mëti'ipë jamtsow nëjkxpën joyjyotm.

¹⁶ Ja yajkutujkpëtëjk ka'ap ënety nijawëtë maas ënety të nëjkxy ets ka'ap nijawëtë tiijësën ënety jam ntuunpy. Ka'ap ënety pën nëkooyë të ntuk'ëwaanës, tä ja jutië ja'ayëtyën; tä ja teetytyëjkëtyën, mëjja'aytyëjkën, wintsëntëjkëtyën ets ja'ayëty mëti'ipë ënety yaj'a'ijxëtëpën tyuna'antë ma ja naax kajpn yajkoj'oyëja'anyën.

¹⁷ Tääjës n'ënëmaaytyë: Miitsëty wa'ats xynyijawëtë ko ëëts'ajtëm tsip oy ja njuukyajtën'ajtëm yajpaaty, ixtë ja naax kajpn Jerusalén kajpn të nyajijtutaaynyë ets ja nyijëën'aaw nyitëjk'aaw tëë nyaaxmëto'oyëtyääynyë. Mintë ni'ëmukë ma ëjtsën, puwa'këtyëkës ets tsojk nkoj'o'oyëmë ja mëjpotsy mëti'ipë ja naax kajpn nyapots'ajtypyën këtiipë ëtsajtëm nëxi'iky tukxi'iky ntimwyë'ëmëty.

¹⁸ Koos ntukmëmëtyaktaaytyë wi'ix ënety ja Wintsën mëj këjää të xypyutëkësën ets wi'ix ënety ja yajkutujkpë janty'oy të xy'ëëw'ëtsoy xykyäjpx'ëtsoyësën, ënät y'ëtsoowtë: Wi'ix ko nkatuuntso'onëm, tsojk niwa'këm yë tuunk. Tääts jëtu'un xim yam nyäjyotkujkmooyëtë.

¹⁹ E ko tnija'awëtyë yë Sambalat jampë kyukajpnëtyën Horón, Tobías, mëti'ipë Amón ja'ayën ets ja Guésem mëti'ipë árabe ja'ayën, je'eyës ojts xynyëxi'ik xytyukxi'iktë ets ni'ikyënëmës ojts wiinkjaty xy'ënëëmëtë: ¿Tiitën miitsëty mtunantëp? ¿Ti wä'än jëtää mijts ja yajkutujkpë xypyuwa'ktu'uta'antë?

²⁰ E ëjts tyaajës n'ëtsooy: Yë Wintsën tsajpjotmëpë y'ityën yë'ëjës xypyutëkëtëp. Ëëtsëty maas yë'ë nmëtuntën, tuuntsoonantëpës yam, e miitsëty nitii xykyajatë xytyuntëty oy ets ka'ap mpaatëtë tii xytyuntëty Jerusalén.