Nehemías 13 - Biblia Dc en Mixe de Quetzaltepec

Ma ja Nehemías ja ënä'ämën kutujkën tyajkojtëkatsyën

¹ Jä'ä xëëw ojts yajkäjpxy ma ja mayjyä'äyën ja Moisés ja nyoky, jam yaj'ijxpaty ko yë Amón ja'ayëty ets Moab ja'ayëty ka'ap mëpaat tsyënaaymyuktë mëët yë nTios'ajtëmë yë nyaax kyajpnëty.

² Jä'ä ko yë'ëjëty ka'ap ojts tjëjpye'eytsyowtë yë Israel ja'ayëty mëët ja ka'ayën ukën ets ja jë'kxy pëky, nikyënëm ojts tmëjuytyë ja Balaam ets tpokëty, je'eyëp ko tääpë ja pojkën kënu'kxën ja ojts wyimpity.

³ E paaty ko tmëtoowtë jëtu'unpë ja aaw ayuk ënätyë ojts ëpëky timy pëjktaktaaykyojtë ja ja'ayëty mëti'ipë mëët tsyënaaymyuktën ja tääpë ja'ayëty.

⁴ Maanëm ënety ka'ap jëtu'unpë tyunyënëm jyätyënëm yë teety Eliasib yë'ë ijty y'ijx'ijtyp Kyëwent'ajtyp ja tëjk ma ja jë'kxy pëky yajnipëjkpetyën mëti'ipë jam yajmënëjkxpën ma ja tsajptëjkën. E yë Eliasib nämyëku'uk'ajtëp ijty mëët yë Tobías,

⁵ ojts tëjkmo'oy jap mëjtëkoty ya'atë Tobías, jap ma ënety ja jë'kxy pëky yajnipëjkpetyën, ja poom, ja apëjk atu'unën, ja tu'kpëkpyë mëti'ipë yajjëpëjkpën ko majkpëky yajpëjkwä'kxy tä ja tsajpmokën, ja uuky ets ja on, mëti'ipë yajmooytyëpën ja Leví ja'ayëty, ëëpë xuxpëty, ëëpë yaxpëty ets ja tëjkëwent'ajtpëty, ëpëky ja ayajk ako'onën mëti'ipë yajyajkpën kë'ëmwinma'any mëti'ipë yajmooytyëpën ja teetytyëjkëty.

⁶ Ko jëtu'un tyuunë jyajtë ëjts ka'apës ënety jam Jerusalén, jä'ä ko jamës ënety të nëjkx ma ja yajkutujkpë Artajerjes yajpaatyën, ma y'ipxmajk jëmëjtpetyën ma yë'ë yajkutukyën jam Babilonyë; okës ojts jatëkok n'ënëëmë ja yajkutujkpë, etsës xy'ëwatsëtyës ja ntu'u,

⁷ koos nwinpita'any jam Jerusalén. Ënätës nija'awëy ko ja Eliasib tëkatsy ënety ja winma'any tmëtëkë ko tëjkmoopyë yë Tobías ma Wintsën yë tyëjk yë nyitëja'aw yajpaatyën.

⁸ Ojtsës xyajjoot'anpëky, paatyës ojts njantyjyëpijpëtsëëmtaayë yë y'apëjk y'atu'unën mëti'ipë jap yajtuumpyën yë Tobías ma y'ityën.

⁹ Etsës ni'ënä'ämëy wä'än yajxon tpujtë tjä'ätstë ets wä'än twatsta'ay tääts jatëkok jap yajpëjkta'akëty ma jap y'ityën ets jatëkok jap tpëjkta'aktëty yë ayajk ako'onën, ja poom ets mëti'ipëjaty yajktëpën ja ja'ayëty.

¹⁰ Ojts näjyëtu'un nijawë ko ja Leví ja'ayëty ka'ap yajmo'otë ja jyi'kxy pyikyëty ijxtëm jyapaatë'atëtën, paatykyëjxm may ja Leví ja'ayëty ets ëëpë xuxpëty, ëëpë yaxpëty ojts kyäknëtë ets nyëjkxnëtë jatëkok ma ja nyaax kyajpnëtyën.

¹¹ Ënet ntuk'ënëmaayës ja kutuunktëjkëty wi'ix ko ënety jëtu'un ja tja'atyëkooynyëtë ja tsajptëjk. Ënet jatëkok nyajmujktaayës ja Leví ja'ayëty ets ja teetytyëjkëty ets tjëjpwa'këtyë jatëkok ja tyuunkëty,

¹² tä ja Judá ja'ayëty tmëye'eymyujktë ja jë'kxy pëky mëti'ipë tu'kpëkyjyäty yajyajkpën ma ja majk pëkpyë yajyäkyën, ijxtëm yë tsajpmokën, tsatsymnyëëjën mëti'ipë yaj'ukpën ets onën.

¹³ Ets ntuknipëjktës yë teety Selemías ets jääpyë Sadoc ets tu'uk yë Leví ja'ay mëti'ipë xyëëwajtën Pedaías; ets yë'ë t'ixtëty tuntëty jam ma nyipetyën ja jë'kxy pëky ets pënjaty yäjkpyën; ojtsës näjyëtu'un mpëjktä'äky jam yë Hanán, yë Zacur yë myaank, y'ok'u'unk yë Matanías ets jam pyutëkëtëty, jä'ä ko yë'ëjëty oy ja jot winma'any ënety tmëët'atë. Yë'ë yajtuknipëjktë ets tyajwa'kxtëty ja jë'kxy pëky ma ja jyiikytyëjk myëku'uktëjkëtyën.

¹⁴ Mijts Wintsën, ma mijts n'ëwtatyën, tun mëyajtën ni''ijxkëtakës ets mijts kë'ëm m'ixëp mtunëp pën oy yam jëtu'un nmëtuny tä yam winë ntunyësën, këtii xyjyä'äytyëkoyëty mëti'ipëjatyës yam oy ntuunpyën ma mtsajptëjkën ets ma myaj'ëy myajwinkajpxtä'äkyën.

¹⁵ Jä'ä xëëw näjyëtu'un n'ijxyës ko jam ma Judá kajpnën tam ijty ja'ay mëti'ipë po'kxënxëëwëtë nëjkx y'uvë winteenyën mëti'ipë tsatsym nyëë yajpëtsëëmpyën, tam mëti'ipë nëjkxpën muum kamjotm tsajpmoktsëëmpë, tam mëti'ipë jyëyujk yajnëjkxypyën tsatsym tsyëëmpë, higo tsëëmpë ets tiijaty jam tyukpatsëëmtëp ets nän po'kxënxëëwëtë jam winë tsëëmnëjkxnëtë Jerusalén. Ënet ntuk'ënëmaaytyës ets ojts ntuk'ojtës wi'ix jä'ä po'kxën xëëw tyo'ktëpë yajktëpë.

¹⁶ Yë'ëpaat yë Tirë ja'ayëty, mëti'ipë jam tsënaaytyëpën ijty jam nyëjkxnëtë nëë jëyujk to'kpë ets tyiijëty tkuto'kënyëtë jam ma Jerusalén kajpnën po'kxënxëëwëtë.

¹⁷ Ënet ntuk'ënëmaayës ja kutuunktëjkëty jampë Judá yajpaatën ets n'ënëmaayës: ¿Wi'ix ko jëtu'unpë ja nëë poky xytyimmëtëjkënyëtë ma naax kajpnën ko ja po'kxënxëëw ka'ap xy'ëk'ëmaay'ajnëtë?

¹⁸ Ya'atë jëtu'unpës jëtu'un ojts ja aptëjk tuuntëkoytyë, ets ja Wintsën tyukjoot'anpëjkëtë ets ëxëëk ojts njajtëm nkëpäjtëm ets näjyëtu'un ja naax'ajt nkajpn'ajtëm, mëët yë'ëkyëjxm ko ojts nkamëjja'awëm ja po'kxënxëëw.

¹⁹ Ënet ojts tu'uk ënä'ämën mpëjktä'äkyës, ko tim je'eyë xëëw kyëta'akëty ma ënety ja po'kxënxëëw tsyo'onta'aka'anyën jää ja tëjk'aaw y'atujkta'ajëty jampë yajpaatën ma ja Jerusalén kajpnën ma ja mëjpotsyën mëti'ipë nya'ëwtijtypyën ja kajpn, koonëm ja po'kxënxëëw nyaxëty. Ojts näjyëtu'un ntuk'ëne'emyës yë ntuunpëtëjkës ets kyëwent'atëty këtiipë tyajtëkëtëty ja'ay mëti'ipë juy tooky myëtëkëjäämpyën.

²⁰ Ja ajuupyëtëjkëty ets ja ato'kpëtëjkëty kanaak'ok ojts jap tsuu tyajnaxtë kajpnpë'ajp, ko ka'ap yajmooytyë najxtakn ets tyëkëtëty ma Jerusalén kajpnën.

²¹ E ojtsës näjyëtu'un ntuk'ënëëmëtë tääpë ja'ayëty ko wiink yaj'ixy ko jam ja tsuu tyajnajxnëtë jam kajpnpë'am, etsës n'ënëmaay, pën jam jatëkok myaawë'ëmtë kajpnpë'am nëjkxëp jam yajmatstë ets pujxn tëkoty yaj'atijëtëty. Jääpaat jëtu'un ye'eymyujktë ka'ap ojts y'ëkmiinëtë ma po'kxënxëëwën.

²² Näy ojtsës ntuk'ënä'ämpë Leví ja'ayëty ets näypyuj nyäjyä'ätsëtëty ets nëjkx tkëwent'atë ja tëjk'aaw ko po'kxënxëëw tpaatëty këtiipë yaj'ëxëëktunëty ja po'kxënxëëw. Wintsën, ma mijts n'ëwtatyën, xyjyä'äymyätsëpës, mja'amyätsëp mëti'ipë yam ntuunpy nkäjpxypën ets pa'ëyoow najts'ëyo'owëkës mëët ja m'oyjot m'oywyinma'any.

²³ Ojts näjyëtu'un yajnijawë ko tam ja jutië ja'ayëty mëti'ipë ënety të pyëktën mëët ja to'oxytyëjkëty jampë kyukajpn'atën Asdod, Amón ets Moab;

²⁴ nikujkwä'kxy ja y'u'unk y'ëna'këty jä'ä kyajpxtëp ja aaw ayuk mëti'ipë Asdod ja'ayëty kyajpxtëpën e ja jutië ayuk ka'ap tukjatë.

²⁵ Ojts mëëtëty yajxon näy'ojyës, ets ojtsës mpoky. Ojts pën nwopyës ets ojts mëti'ipë kyuwaay nkatswijxës ets ojts ntukupëktës ets tnikajpxtëty mëët ja nTios'ajtëmë ja xyëëw ko ka'ap tkupëka'antë ets ja y'u'unk y'ëna'k pyëktëty mëët ja jaaypyaat jaaypyo'kxy ja y'u'unkëty y'ëna'këty mëti'ipë mëët ka'ap ntu'kja'ayajtëmën. Ojtsës näjyëtu'un n'ënëëmëtë:

²⁶ Yë'ë jëtu'un ojts yë Salomón tpoky'äty mëti'ipë yajkutujkën ma Israel kajpnën. E oy nja'ijxmëty ja yajkutujkpë Salomón ka'ap pën myëpatë ijxtëm yë'ë yajkutujkyën ets ko ja nTios'ajtëmë mëk tsyojkë jya'awëy ets pyëjktakë ma ja Israel kajpnën ets jam yajkutukëty, e oy jyajëtu'un'ajty yë to'oxytyëjkëty mëti'ipë wiink naax wiink kajpn yajtso'onën yë'ëtsën ojts yajpokytyunyë.

²⁷ Paatykyëjxm ka'ap tjëkyepy yaj'ëwa'atsëty ets miitsëty ni'ikyë nTios'ajtëmë xyjyaaktimyëtëkoytyëty, ko miitsëty ni'ikyë mpëjktëpëty m'uktëpëty mëët ja to'oxytyëjktëjkëty jaaypyaatëtypë jaaypyo'kxyëtypë.

²⁸ Ojtsës nyajke'eky tu'uk yë myaank yë Joiadá, teety kyopk Eliasib yë myaank, yë'ë myë't yë Sambalat Horonaim ja'ay.

²⁹ Wintsën, ma mijts n'ëwtatyën, këtii xyjyä'äytyëkoyëty mëti'ipë të tjaamtään të tnaaxtaantën ja teetyëjk ja y'oytyu'un y'oykajpxënëty ets ja Leví ja'ayëty.

³⁰ Ojtsës nyajwatsta'ay ja naax kajpn ko yaj'ixkäjxtaay ja jyëpyaatëty jaaypyo'kxyëty ets jatëkok ntukniwijtsëtyääyës ja tyuunkëty ja teetytyëjkëty ets Leví ja'ayëty ets t'atänëtëty nitu'ukjaty mëti'ipë tuunk patëtëpën;

³¹ ets näjyëtu'un y'o'oyëtyääy ja jotmay mëti'ipë ënety jamën, ojts yajkajpxmuky wi'ix ja jëën ja'axy yajmëminëtyën ets wi'ix'äämpy ja jë'kxy pëky näjyëtu'un myukëtyën. Dios, ma mijts n'ëwtatyën: ja'amyäjtskës ets oyjya'awëkës.