Nehemías 12 - Biblia Dc en Mixe de Quetzaltepec

Ja teetytyëjkëty ets ja Leví ja'ayëty

¹ Ya'atë jëtu'un ojts tyeety'atë ets Leví ja'ayëty mëti'ipë jatëkok winpijtën jam Jerusalén mëët Zorobabel, myaank yë Salatiel ets mëët yë Josué: Jä'ä ja teetytyëjkëty mëti'ipë txëëwajtëpën: Seraías, Jeremías, Esdras,

² Amarías, Maluc, Hatús,

³ Secanías, Rehúm, Meremot,

⁴ Idó, Guinetón, Abías,

⁵ Mijamín, Maadías Bilgá,

⁶ Semaías, Joiarib, Jedaías,

⁷ Salu, Amoc, Hilquías ets Jedaías. Ya'atë ja'ayëty yë'ëjën nyikopk'ajtë myëku'uktëjkëty ets ja teetytyëjkëty ma ja Josué jyuuky'äjtyën.

⁸ Ja Leví ja'ayëty mëti'ipë xyëëwajtëpën: Josué, Binuy, Cadmiel, Serebías, Judá ets Matanías ets mëët ja myëku'uktëjkëty mëti'ipë ënety nyikopk'ajtëpën ja ëëpëtëjkëty;

⁹ ets ja Bacbuquías ets Uni, mëti'ipë ja ëy ijty nyi'ëtsoowtëpën ets mëët ja myëku'uktëjkëty mëti'ipë ojts mëët tyuntë ets oy ja tyuunk tyajtu'uye'eytyëty.

¹⁰ Josué yë'ë y'u'unk'ajt Joiacim, Joiacim yë y'u'unk'ajt Eliasib, Eliasib yë'ë y'u'unk'ajt Joiadá,

¹¹ Joiadá yë'ë yu'unk'ajt Johanán, e Johanán yë'ë y'u'unk'ajt Jadúa.

¹² Ma ja Joiacim jyuuky'äjtyën yë'ë ojts tyeety'atë mëti'ipë kyutënaaytyën ja y'u'unk y'ëna'këty y'u'unk tyo'oxytyëjkëty mëti'ipë yaa yajnikajpxantëpën: ma ja Seraías ja jyiiky myëku'ukën yë ojts jam nyikopk'atëtë yë Meraías; ma ja Jeremías ja jyiiky myëku'ukën yë'ë ojts nyikopk'atëtë yë Hananías;

¹³ Ma ja Esdras ja jyiiky myëku'ukën yë'ë ojts jam nyikopk'atëtë yë Mesulam; ma ja Amarías ja jyiiky myëku'ukën yë'ë ojts jam nyikopk'atëtë yë Johanán;

¹⁴ ma ja Melicú ja jyiiky myëku'ukën yë'ë ojts jam nyikopk'atëtë Jonatán; ma ja Sebanías ja jyiiky myëku'ukën yë'ë ojts jam nyikopk'atëtë José;

¹⁵ ma ja Harim ja jyiiky myëku'ukën yë'ë ojts nyikopk'atëtë Adná; ma ja Meraiot yë jyiiky myëku'ukën yë'ë ojts nyikopk'atëtë yë Helcai;

¹⁶ ma Idó jyiiky myëku'ukën, yë'ë ojts Zacarías nyikopk'atëtë; ma Guinetón yu jyiiky myëku'ukën yë'ë Mesulam ojts nyikopk'atëtë;

¹⁷ ma Abías jyiiky myëku'ukën yë'ë Zicri ojts nyikopk'ajtëtë; ma Miniamín yë jyiiky myëku'ukën; ma Moadías yë jyiiky myëku'ukën yu'ë Piltai ojts nyikopk'atëtë;

¹⁸ ma ja Bilgá ja jyiiky myëku'ukën yë'ë ojts Samua nyikopk'atëtë; ma Semaías yë jyiiky myëku'ukën yë'ë ojts yë Jonatán nyikopk'atëtë;

¹⁹ ma Joiarib yë jyiiky myëku'ukën yë'ë ojts yë Matenai nyikopk'atëtë; ma Jedaías yë jyiiky myëku'ukën yë'ë ojts nyikopk'atëtë yë Uzí;

²⁰ ma ja Salai myëku'ukën yë'ë wintsën'ajt yë Calai; ma ja Amoc myëku'ukën yë'ë wintsën'ajt Éber;

²¹ ma ja Hilquías ja jyiiky myëku'ukën yë'ë ojts nyikopk'atëtë yë Hasabías; e ma ja jyiiky myëku'ukën ja Jedaías, yë'ë ojts nyikopk'atëtë yë Natanael.

²² Ma ja Eliasib jyuuky'äjtyën, yë Joiadá, Johanán ets Jadúa ets mapaat yajkutujkyën yë Darío ja persaja'ay, yë Leví ja'ayëty yë'ë ojts ja jyiiky myëku'uk tnikopk'atë ets näjyëtu'un ja teetytyëjkëty.

²³ Yë Leví ja'ayëty mëti'ipë jyiiky myëku'uk kyutënaaytyën jap yajkëxjaaytyë xyëëwëty ma ja nokyën ma myintën këxja'ay xyëëwëty mëti'ipë ja'ay ijtëpën mapaat jyuuky'äjtyën yë Johanán, Eliasib y'ok'u'unk.

²⁴ Yë Leví ja'ay yë kyopktëjkëty jä'ä xyëëwajtë: Hasabías, Serebías, Josué, Binuy ets Cadmiel ets ja myëku'uktëjkëty jam ijty tyimyajpaatë ma ja tyuunkëtyën ets yë'ë twin'ëw twinya'axtë ja nWintsën'ajtëmë mëti'ipë nTeety'ajt nKoonk'ajtëmën ko tyuka'ajëtë, jëtu'un tä tni'ënä'ämëyën ja David, mëti'ipë myëtuunën Wintsën.

²⁵ E ja ja'ayëty mëti'ipë ijty y'atënaaytyëpën ja tëjk'aaw jä'ä xyëëwajtëp: Matanías, Bacbuquías, Abdías, Mesulam, Talmón ets Acub.

²⁶ Ya'atë ja'ayëty jää jyuuky'ajtë ma yajkutujkyën yë Joaquim, myaank yë Josué ets yë'ë Josadac y'ok'u'unk; ets ma yajkutujkyën yë Nehemías ets ma ja teetyën ets yaj'ijxpëjkpë Esdras jyuuky'äjtyën.

Ma yajnixëëwtunyën ja mëjpotsy mëti'ipë ënäty të kyoj'apaatën

²⁷ Ko tpaty ja xëëw po'o ma ënety yajkënu'kxa'anyën ja potsy mëti'ipë ja Jerusalén kajpn nyapots'ajtypyën, wa'ats t'ixtaaytyaktaaytyë ja Leví ja'ayëty ets tninëjkxtaaytyë maajaty ënety tsyëënëtën jyuuky'atën, tääts twoowmiintaaytyë jam Jerusalén ets tkënu'kxtëty ja naax kajpn mëët ja xikën xo'onën ets ja ëy yä'äxy, xuxpë wojpë, ëëpë koopë.

²⁸ E ja ëëpëtëjkëty mëti'ipë Leví ja'ayëtyën wa'ats nyëjkxtaaytyë jam Jerusalén, tëkokyë mëti'ipë ënety jam winkon tsënaaytyëpën ets mëti'ipë jam Netofá tsyënaaytyëpën,

²⁹ miintaaytyë ja ja'ayëty mëti'ipë jam tso'ontëpën Guilgal, näjyëtu'un ma ja y'itjotmën ja Gueba ets Azmávet; jä'ä ko may ënety ja ëëpëtëjkëty jam të tsyënaaytyaknpëktë ma Jerusalén ja pya'ajën.

³⁰ Ojts ja näypyuj näjyä'ätsë tpata'atë jëyëjp ja teetytyëjkëty ets ja Leví ja'ayëty ets ja naax kajpn ets ja jëën tëjkëty.

³¹ Ënet ja kutuunktëjkëty n'ënëmaaytyës ets jam pyätëty potsykyëjxm ets ojts ni'ënä'ämës yajma'kxëty mäjtsk tu'u yë ëëpë yaxpëty. Ja mëtu'ktu'upë jä'ä nëjkxtëp a'oytsyow ma ja Pujxm ijty yajko'oyën.

³² Jam ix'am yë'ë jam nëjkxtëp yë Osaías, mëët nikujkwä'kxy ja kutuunktëjkëty jampë Judá tsyoontën, jä'ä jëtu'un yaj'antijtëp,

³³ ja Azarías, Esdras, Mesulam,

³⁴ Judá, Benjamín, Semaías ets Jeremías.

³⁵ E ja teetytyëjkëty, jä'äts pyanëjkxtëp mëët ja xuxpë wojpë, mëti'ipë xyëëwajtëpën: Zacarías, Jonatán yë myaank, mëti'ipë ja y'aptëjk xyëëwajtën Semaías, Matanías, Micaías, Zacur ets Asaf;

³⁶ ëpëky ja jyiiky myëku'ukëty mëti'ipë xyëëwajtëpën Semaías, Azarel, Milalai, Guilalai, Maai, Natanael, Judá ets Hananí, mëti'ipë ijty tyukxuxtëpën ja xuxn mëti'ipë David jyä'äy'ajtën, mëti'ipë myëtuunën ja Wintsën. Jam jëjp'am jam nyijkxy ja yaj'ijxpëjkpë Esdras.

³⁷ Ynyajxtë jam këjxm ma ja tëjk'aawën mëti'ipë tyijtëpën Taxnëë ets tkuuynyëjkxtë ja mëjpotsy, pyäjtë'ktë jam ma ja David ja kyajpn yajnipäjtë'ëkyën ets nyajxë'ktë ma ja David kyutujktaknën, tyimjajtë jampaat ma ja tëjk'aawën mëti'ipë tyijtëpën Nëë'aaw, mëti'ipë ku'ijxnajxpën matsow ja xëëw pyëtsimyën.

³⁸ Ja mëmäjtsktu'upë ja ëëpë yaxpë anajnytsyow ojts nyëjkxtë. Ëjts ix'ok ojts nëjkxyës mëët ja ëëpëtëjkëty jampë potsykyëjxm ye'eytyën mëët nikujkwä'kxy ja mayjyä'äy, jam ntso'ontës ma ja Tsijtktëjkën ets njajtës jam ma myëjwiinëtyën ets myäjpxypyotsyëtyën ja mëjpotsy,

³⁹ najxtës jam ma Efraín tyëjk yajwin'ijxpetyën, najxtës jam ma ja Jesaná ja tyëjkwiinën, ma ja nyitëjk'aawën ja nëë jëyujk, ma ja Hananel ja pyotyën, ma ja mëjpotsy tijtën mëko'px potsy, jampaat ma ja kupixyny jam ja nyitëjk'aawën; ets jam ojts jam wäänë mpo'kxtës ma ja tyëjk'aawëtyën ja Kwent'ajtpëty.

⁴⁰ Tääts jam nimäjtsk y'aye'eymyujktë ja ëëpë xuxpë ets jëtu'un tyëjkëtyë tsajptëkoty; etsës nän ojtsës jap ntëkë mëët nikujkwä'kxy ja yajkutujkpëtëjk mëti'ipë ënety xyjyämyëët'ajtëpën.

⁴¹ Ja teetytyëjkëty mëti'ipë ijty tyukxuxtëpën ja pujxnxuxn, jä'ä xyëëwajtë: Eliacim, Maaseías, Miniamín, Micaías, Elioenai, Zacarías, Hananías,

⁴² Maaseías, Semaías, Eleazar, Uzí, Johanán, Malquías, Elám ets Éser. Ets ja ëëpëtëjkëty xuxpëtëjkëty mëti'ipë tyu'uwinye'epyën ja Izrahías, oy ojts yajxon y'ëëwnëtë yaxnëtë tu'knax.

⁴³ Jä'ä xëëw may yajxon ja wintsë'kën jyänty yajyäjky, ets ja'ayëty aak akujk aak jotkujk ojts nyäyjyawëtë, jä'ä ko ja nTios'ajtëmë yë'ë ënety të tyajkëtä'äky ja kyënu'kxën ets jyam'atëty mëjwiin këjää ja jotkujk'ajtën ets ja xoontakën. To'oxytyëjktëjkëty ets pi'k ëna'këty aak xoontä'äky yajpatë, ja ëy yä'äxy ets ja xoontakën jëkämpaat ojts yajmëtoownë.

Ja jë'kxy pëky mëti'ipë ja teetyëjk ets ja Leví ja'ayëty jyä'äy'ajtën

⁴⁴ Jä'ä xëëw jä'ä jëmëjt ojts yajnikajpxpätë ja'ayëty mëti'ipë y'ijx'it kyëwent'atëpën ja jëën tëjk maajaty nyipetyën ja jë'kxy pëky, ja ayajk ako'onën japë tsajptëkoty myukyën ets ja pëjktä'äky mëti'ipë kyëjääjë yajpëjkp yajtuunpën ets mëti'ipë yajpupëjkpën ma ja majkjatypë yajpëjkwä'kxyën, mëti'ipë mujkpën ets yajtukniyajkëtyëpën yë teetytyëjkëty ets Leví ja'ayëty; ya'atë ja ayajk ako'onën paaty tyajktë ëmuumtu'ukjot jä'ä ko y'oyjya'awëtyëp ijty ja teetytyëjkëty ets ja Leví ja'ayëty mëti'ipë jam tuuntën.

⁴⁵ Jëtu'un yë'ëjëty ets ja ëëpë xuxpëty ets mëti'ipë kyëwent'ajtëpën ja tsajptëjk'aaw yë'ë jëtu'un ijty yajwintu'upëjktëp ja ëëwtak kajpxtakën jap tsajptëkoty ets ma ja näkyënu'kxë ets näypyuj näjyä'ätsë yajtunyën, jëtu'un tä tni'ënä'ämëyën ja David ets ja myaank Salomón.

⁴⁶ Tëëyëp ma David ets Asaf jyuuky'äjtyën, yë ëëpë xuxpëty tam ijty tmëët'atë mëti'ipë tu'uwinye'eyëtëpën, tää'ajtp ijty näjyëtu'un yë ëëpë yaxpëty ets mëti'ipë ëëwtak kajpxtaktëpën.

⁴⁷ Paatykyëjxm ko yë Zorobabel jyuuky'äjty ets ko yë Nehemías jyuuky'äjty, tëkokyë yë Israel ja'ayëty xëmë ijty tkë'ëyaktë jë'kxy pëky ma ja'ayëtyën mëti'ipë ëëwtëpën xuxtëpën, ëëwtëpën yaxtëpën, mëti'ipë ja tëjk'aaw kyëwent'ajtëpën; myooytyëp ijty näjyëtu'un yë Leví ja'ayëty mëti'ipë paatë'ajtëtëpën ets Aarón yë y'u'unk y'okëty.