Nehemías 11 - Biblia Dc en Mixe de Quetzaltepec

Ja Jerusalén ja'ayëty

¹ Ja kutuunktëjkëty ojts jam jya'të Jerusalén; ja naax kajpn ojts twin'ixtë ja ja'ay pënjaty nëjkxëpën jam Jerusalén, ets tu'ukjaty yajwinju'të ma tu'ukja'aypyën ets nëjkx jam tsyënaaytyaknpëky Jerusalén, ma ja kajpnën mëti'ipë kënu'kxyën ets wa'atsën, e ja nitaxtujkpëty jam ywë'ëmtëty kajpntum ma ja kajpn mutskëtypyën.

² E ja naax kajpn tkënu'kxtaaytyë ja ja'ayëty mëti'ipë kë'ëm ënantën ko nyëjkxa'antë tsënääpyë jam Jerusalén.

³ E tsyaats yajnikäjpxy ja kopktëjkëty pënjaty ojts nyijkxy jam Jerusalén tsënääpyë. Ma ja Judá ja nyaaxjot kyajpnjotmën yë'ë ojts jam tsyënaaytyaknpëktë yë teetytyëjkëty, Leví ja'ayëty, ja päätë'k ja'axë'kpëty mëti'ipë jam tuuntëpën ma tsajptëjkën ets y'u'unk y'okëty ja ja'ayëty mëti'ipë jam päätë'k ja'axë'ktën ma ja Salomón ja y'u'unk y'okëtyën, nitu'ukjaty pyataaytyë ja kyajpn ets ja nyaax kyamtëjk.

⁴ Ojts yë Judá jyä'äy ets Benjamín jyä'äy jam Jerusalén tsyënaaytyaknpëktë yë'ë Judá kyutënääpyë, tä ja mëti'ipë txëëwajtëpën: Ataías, Uzías yë myaank, myaank yë Zacarías, myaank yë Amarías, myaank yë Sefatías, myaank yë Mahalalel, y'u'unk y'ok yë Fares;

⁵ ets Maaseías, myaank yë Baruc, myaank yë Colhoze, myaank yë Hazaías, myaank yë Adías, myaank yë Joiarib, myaank yë Zacarías, myaank yë Siloni.

⁶ Jä'ä nyiwinë'atë yë y'u'unk y'ok yë Fares mëti'ipë tsënaaytyaknpëjktën jam Jerusalén taxk mëko'px ja tëkë'px tuktujk aak ye'etyëjktëjk mëti'ipë tsip'ixyëtyën.

⁷ E ja Benjamín ja jyä'äy jä'ä xyëëwajtë: Salu, myaank yë Mesulam, myaank yë Joed, myaank yë Pedaías, myaank yë Colaías, myaank yë Maaseías, myaank yë Itiel, myaank yë Jesaías;

⁸ ets ja myëkä'äxtëjkëty Gabai ets Sali. Jä'ä nyiwinë'ajtë taxtujk mëko'px ja i'pxtuktujk.

⁹ Yë'ë nikopk'ajtëtë Joel, Zicri myaank ets Judá, Senua myaank, mëti'ipë mutsk kutuunk'ajtën jam kajpnjotm.

¹⁰ Ja teetytyëjkëty jä'ä mëti'ipë xyëëwajtën: Jedaías, myaank yë Joiarib, Jaquín,

¹¹ ets Seraías, myaank yë Hilquías, myaank yë Mesulam, myaank yu Sadoc, myaank yë Meraiot, myaank yë Ahitub, mëti'ipë jap tsajptëkoty ijtëpën yajpatpën, ma ja nTios'ajtëmë ja tsyajptëjkën.

¹² Näyjyëtu'un ja jyiikytyëjk myëku'uktëjk mëti'ipë jap mëët nyäpyutëkëtyën jëënjoty tsajptëkoty jä'ä nyiwinë'ajtë tuktujk mëko'px ja i'px tëkëëk; ets ja Adaías, myaank yu Jeroham, myaank yë Pelalías, myaank yë Amsí, myaank yë Zacarías, myaank yë Pashur, myaank yë Malquías.

¹³ Yë jyiiky myëku'ukëty, mëti'ipë nyikopk'ajtëpën ja y'u'unk y'ëna'këty, jä'ä nyiwinë'ajtë mäjtsk mëko'px ja wëxtyikxy mäjtsk; ets ja Amasai, myaank ja Azarel, myaank ja Ahzai, myaank ja Mesilemot, myaank ja Imer.

¹⁴ Ja jyiikytyëjk myëku'uktëjk, aak tsip'ixyëty, jä'ä nyiwinë'ajtë mëko'px ja i'pxtuktujk ets nikopk'ajtëtë yë Zabdiel, myaank yë Guedolim.

¹⁵ Ma ja Leví ja'ayëtyën jä'ä mëti'ipë xyëëwajtën: Semaías, myaank yë Hasub, myaank yë Azricam, myaank yë Hasabías, myaank yë Buní;

¹⁶ Sabetai ets Jozabad, yë'ë nikopk'ajtëtë Leví ja'ayëty, yë'ë tyim'ijx tyimtuuntë ja tuunk ëyo'on mëti'ipë jam'ajtën ma ja tsajp jëënpa'a tsajptëjkpa'a yaj'oytyuna'anyën;

¹⁷ Matanías, myaank yë Micaías, myaank yë Zabdí, myaank yë Asaf, mëti'ipë tyu'uwinwoopyën ja ëy ko ja kajpxta'ak y'ity jap tsajptëkoty; Bacbuquías ja mëmäjtskpë yajpaatyën ma ja tu'kjëëky tu'kmëku'ukpën ets ja Abdá, myaank yë Samua, myaank yë Galal, myaank yë Jedutún.

¹⁸ Jä'ä nyiwinë'ajtë ja Leví ja'ayëty mëti'ipë tsënaaytyaknpëjktën ma ja Jerusalén kajpnën mëti'ipë kënu'kxyën mäjtsk mëko'px ja majkta'px majktaxk.

¹⁹ Ja mëti'ipë ja tsajptëjk'aaw këwent'ajtëpën jä'ä xyëëwajtë: Acub, Talmón ets ja myëku'uktëjkëty jä'ä nyiwinë'atë mëko'px ja tëkë'px mäjtsk.

²⁰ Ja nimayjyä'äyëty nimaypyë ja Israel ja'ayëty jam ojts ëpëky tsyënaaytyaknpëktë ma ja kajpnëtyën ka'apë yam yanikäjpxyën, nitu'ukjaty aak ojts tpata'atë ja nyaaxëty kyamëty;

²¹ ja ja'ayëty mëti'ipë patë'k ja'axë'ktën jam ma tsajptëjkën ets mëti'ipë nikopk'ajtëtën tä ja Sihá ets Guispá jam tsyënaaytyaknpëjktë Ofel.

²² Mëti'ipë ja Leví ja'ay nikopk'ajtëtën jä'ä xyëwatyp Uzí, myaank yë Paní, myaank yë Hasabías, myaank yë Matanías, myaank yë Micaías, mëti'ipë y'u'unk'ajtyp y'ok'ajtypyën yë Asaf, mëti'ipë ja ëy tyu'uwinwoowtëpën jap tsajptëkoty ko kajpxta'ak y'ity.

²³ Yë yajkutujkpë tëë ënety tyajwë'ëmy ja ënä'ämën wi'ix ja ëëpëtëjk tyuntëtyën.

²⁴ Ja ja'ay mëti'ipë kyutënääpyën ja naax kajpn ma ja mëj yajkutujktaknën jampë Persië y'ëne'emyën yajkutukyën ets tyajnaxy ja naax kajpn ja y'amay jyotmay jä'ä mëti'ipë txëëwajtpën Petahías, myaank yë Mesezabel, yë'ë y'u'unk y'ok yë Zérah, myaank yë Judá.

Ja naax kajpn wiinkëtypë, ëpëky yë Jerusalén kajpn, ma tsënaaytyaknpëjktën yë Israel ja'ayëty

²⁵ Ojts mëti'ipë Judá ja'ayëty tsyënaaytyaknpëktë jam Quiriat-arbá, Dibón, Jecabseel,

²⁶ Josué, Moladá, Bet-pelet,

²⁷ Hasar-sual, Beerseba,

²⁸ Siglag, Meconá,

²⁹ En-rimón, Zorá, Jarmut,

³⁰ Zanóah, Adulam, Laquis ets Azecá, mëët ja nyaax kyajpn kyamtëjk ets ja nyiyuutakn nyituuntakn. Jam ojts tsyënaaytyaknpëktë tyimtso'ony jam Beerseba ets tyimjajty jam Hinom.

³¹ E ja jyä'äy ja Benjamín jam tsyënaaytyaknpëjktë Gueba, Micmás, Aías, Betel mëët ja nyinaax nyikamtëjk;

³² Ets nän Anatot, Nob, Ananías,

³³ Hazor, Ramá, Guitaim,

³⁴ Hadid, Seboím, Nebalat,

³⁵ Lot, Onó ets ma kojpëtëjk tsyënaaytyaknpëjktë jam joyjyotm.

³⁶ Ëpëky ojts yë Leví ja'ayëty yajmooytyëpë nyaax kyajpnëty jam ma nyaaxjotëtyën yë Judá ets Benjamín.