Nahúm 2 - Biblia Dc en Mixe de Quetzaltepec

¹ Nínive, tää mniminyë mëti'ipë myajkutëkoyanëpën. Pëjkta'ak yë mkëwent'ajtpë ma këwent'ajtaknën. Kwent'at yë tu'u. Nätyukmoxwëënët yë mtëypyujxn. Yajmujkta'a yë mtsiptuunpëtëjk.

² Jä'ä ko yë Wintsën yajjotkujkta'akäämpy jatëkok yë Jacob, mëti'ipë yë Israel mëj'äämpy yajnajxëpën ets jatëkok jotkujk tyaj'awinpita'any tä ijty tëëyëpën ma ënety ka'anëm jëtu'un jyätynyëmën tä yë tsatym kyepyën tëëpë xye'enty yajnëwäjxta'ayën.

³ Tsapts y'ixëty yë tsyiptuunpëtëjk yë y'akëëytyukëty ets tsapts y'ixëty yë wyit tyujkxyëty. Jëjp'ixy tyimyajpaatë ets tsyiptuna'antë. Jëënën yaj'ixy yë pyujxnwintëkäämpë; janty najx janty tëjkëtyëp yë këwaayëty.

⁴ Yë pyujxnwintëkäämpë janty najx janty tëjkëtyëp tu'k në'ë tu'ktu'u, janty winpijt janty atëjtëp jap kajpnjoty, jëtu'un yaj'ijxnë tä yë jëëntooytyuk yeenyën ets tä yë wëtsuk tyi'kxyën.

⁵ Tääts ja yajkutujkpë tmëkajpxmujkta'ay ja jyotmëkja'aytyëjk ets ko myintë mëpaatëp nyäkyutäänëtë, jam potsykyëjxm pyäjta'atë ma jam tjëjp'ixa'antë ja myëtsipëty.

⁶ Ënet y'ëwatsta'ay ja nëë apojtsë'ëkypë ets jëtu'unyë wyimpajë'ëty ja kutujkëntëjk.

⁷ Tsum matsy tyajnëjkxtë wiink naax wiink kajpn ja to'oxytyëjk mëti'ipë yajkutujkpën; tam pyanëjkxyë ja mëti'ipë pujëtu'unëyëpën, je'eyë jyë'ëtë ya'axtë pakën ets jyänty nyäkyätsykyoxëtë.

⁸ Yë Nínive kajpn jëtu'un tä tu'uk yë potsyën jutpë ma nëë y'apojtsë'ëkyëtyën ets nëë jap nyäxy. Jëtu'un yë Nínive ja'ay kyäkta'aja'antë. Owxitë. Wimpitë jëtu'un jyayaj'ënëëmëtë ets ni pën kyawinpity.

⁹ Mä'tsta'atë yë poop pujxn. Mä'tsta'atë yë pu'ts pujxn. Nëkooyë myäy'ajnë ja wit meeny jam Nínive.

¹⁰ Yë Nínive kajpn jä'ä yajpaaty aanë'ëk tëëtsë'ëk, mon tuk ets jë'ë ya'ax. Aak tsë'këtyëp yë ja'ay ets aak je'eyë myontë tyuktë, jëtu'un yaj'ijxnëtë tëë yowë myëjaawkukëjxënëtë ets aak tsuxk wi'ixnë yaj'ijxnëtë.

¹¹ ¿Tii jam jaakwë'ëmëp ma kaa y'aankën, ma kaa u'unk y'itën? Yë kaa mëët yë y'u'unk y'ëna'k janty jotkujk ënety jam nyäyjyawëtë, nitii tkatsë'ëkëtë.

¹² Yë kaateety je'eyë nëjkx muum jyëyujk matsy ets tyajwä'kxy ma kaato'oxyën mëët ja y'u'unk y'ëna'k, ujts tyaj'ity ja y'aank mëët ja jëyujk ooky.

Ma ja Nínive kajpn kyutëkoyën

¹³ Jëtu'un yë Wintsën y'ënä'äny mëti'ipë maaytyääyëpën winë: Tyaajës nyajpaaty ets mijts ëxëëk ntuna'any: Nino'kta'ajäämpyës yam yë mpujxn wintëkäämpë etsës jëënjok je'eyë nyaj'awinpita'any; nya'ookäämpyës yë m'u'unk ets ntimy yajkutëkoyä'änyës ja to'onën mä'tsën ma mnaax mkajpnën ets ka'ap nëjkx nijëna'a y'ëkyajmëtoownë ja y'aaw y'ayukëty ja nkäjpxynyajxpëtëjkës.