Miqueas 6 - Biblia Dc en Mixe de Quetzaltepec

Tii ko ja Tios tukjoot'anpëkyën ja Israel kajpn

¹ Mëtoow'itë wi'ix ja Dios y'ënä'änyën: Pëtë'ëk ets tukmëmëtya'ak ja tun kopk ja m'amay mjotmay, wä'än tmëtoow'itë ja m'aaw myo'kn.

² Mëtoow'itë miitsëty tun kopk, mëti'ipë ja naaxwiinyëtë tsyëëm'ijtëpën ta'tspëky; yë Wintsën yë'ë pyaye'eyäämpy ja tyuuntëko'oy kyajpxtëko'oyën ja nyaax kyajpn, näy'ojjanëtëp mëët ja Israel kajpn.

³ Ya'atë Dios të tkäjpxy: Ëtsoowinpijtkës nnaax nkajpnës, ¿Wi'ix të ntuny ëkë tii të ntukmëtuuntëkoy?

⁴ Ëjts mijts nju't jap Egiptë ets ojts nyaj'ëwaatsëpëtsëmy ma ënety mmëtuny m'ëyoyën mëët ja näwyop näkya'atsë; ojts nkexyës yë Moisés, Aarón ets Maria ets mtu'uwinwowëtëty.

⁵ Nnaax nkajpnës, ja'amyäts wi'ix ojts yë Balac tjatuknipëjktaakën, jampë yajkutukyën Moab ets wi'ix y'ëtsoowinpijtyën ja Balaam, Beor yë myaank. Ja'amyäts ko mnajxy jam Sitim ets mja'ajty Guilgal, mëjpëjkta'ak wi'ix ojts yë Wintsën myëtä'äkyën tsipjotm.

Mëti'ipë ja Wintsën jyëjp'ijxypyën jeexyë naaxwiinyëtë ja'ay tuny

⁶ ¿Tii mëët yë Wintsën Ni'ik këjxmëpë nwinkuwa'akëtyës koos ënety n'ëwtata'any? ¿Yë'ëjës mëët nwinkuwa'akëty yë tsajpkaajë tu'kjëmëjtpë jyëmëjtën mëti'ipës ntukwintsë'ëkëpënë?

⁷ ¿Tyukxoonta'akëp jëtää yë Wintsën koos ntukwintsë'ëkëty tu'uk mil yë tsajppax ayääkë ëkë may olivë onë? ¿Ëkë ko ntukwintsë'ëkëtyës yë nmaankës kä'äxkopk ets yë'ë ntukkunaxëtyës yë n'ëxëëk winma'anyës ets nnëë npokyësë?

⁸ Tëë yë Wintsën m'ënë'ëmxëty mijts naaxwiinyëtë ja'ay, mëti'ipë oyën ets tii y'ëwxijtypyën jeexyë xytyuny: oy winë xypyaye'eyëty, mëtëy mja'ay'atëty ets mwinkutsë'ëkëp, yu'unk naxym ja Dios xymyëtunëty.

Ja aaw ayuk ma yajni'ojën ko ja'ay ka'ap tëyajtën tii tuny ets ko wyin'ëëny

⁹ Yë'ë yë Wintsën myëkäjpxyp yë naax kajpn, wijyajtën ënety yajmëët'ajtp ko yaj'amëtoow'itëty mëët yë winkutsë'kën. Mëtoow'itë miitsëty naax kajpn ets miitsëty näs'ë'ëw mnaskajpxëtë.

¹⁰ Ma ëxëëk ja'ay yë jyëën tyëjkën tam wit meeny yajpaaty mëti'ipë të tony të tmeetsyën, jä'ä ko ka'ap tii mëtëy të tkijpxy.

¹¹ ¿Wi'ixës npokymyä'kxëty mëti'ipë ka'ap tii mëtëy tkijpxyën?

¹² Yë kumeenyjyä'äyëty mëti'ipë yajpatëpën ma ya'atë kajpnën aak tsyuu'ijxtëp yë myëku'uk ets je'eyë tyajmëtuntë ja'ay ka'ap tmëjuytyë; aak antaktëp ets aak win'ë'ëntëp ja'ayëty mëti'ipë yajpatëpën ma naax kajpnën.

¹³ Paaty të ntuknipëjktaakës ets ntëytyuna'any ets njo'otsa'any mëët ko të mpokytyuny.

¹⁴ Mjakayëp, je'eyëp ko ka'ap mku'uxëtëty, je'eyëm myuu'ookëtëty; mjayajmukëp mjë'kxy mpëky, je'eyëp ko ka'ap nëjkx tii xypyääty ets oy ënety tii të xyjyapaaty ko ja tsip tyunëtëty jää nëjkx tyëkooytyä'äy.

¹⁵ Mjani'ip mjakojëp, je'eyëp ko ka'ap nëjkx ja pëjktä'äky xyajpëtë'ëky; mjanijëtsëp yë aceitunas, je'eyëp ko ka'ap nëjkx yë y'on xyajtuunë; mjawintäänëp yë tsatsym, je'eyëp ko ka'ap nëjkx xy'ukë yë nyëë.

¹⁶ Jä'ä ko mijts yë'ë të xypyanëjkxy ets të xytyuny ja Omri ja y'ënä'ämën ets ja Ahab ja jyiiky myëku'uk; jëtu'un winë të xytyuny tä yë'ëjëtyën. Paaty mijts ets mnaax mkajpn atsë'ëk ajawë jyata'antë ets je'eyë nëjkx yajnëxi'ik yajtukxi'iktë, ja nnaax nkajpnës ja tsyëtsyu'un jam nëjkx kyëtakta'ay ma mijtsën.