Mateo 8 - Biblia Dc en Mixe de Quetzaltepec

Ko ja Jesús tyajtso'oky ja ja'ay pu'uts mëëtpë

¹ Ko ja Jesús kyëtäky jam kopkwinm, may ja ja'ay ojts pyatsoonyë.

² Tääts ja ja'ay ojts tu'uk nyiminyë mëti'ipë pu'uts pa'am pëjkëpën ets nyäkyoxtënaaytyakë Jesús wyintuuy ets y'ënäny: Wintsën, pën mtsojkpy, yajtsokës ets yajwatskës.

³ Tääts ja Jesús ojts tony ets t'ënëmaay: Ntsojkpyës ets mtso'okëty ets mwa'atsëty. Tso'ok ets wë'ëm wa'ats. Je'eyë ja Jesús jëtu'un y'ënäny ets ja ja'ay ja pyu'uts ënätyë tsyokaay ets wyatstaay ja nyini'kx.

⁴ Tääts ja Jesús jyaak'ënany: Ix, ka'ap pën xytyuk'ëwaanëty. Nëjkx ma teety wyintsënën ets xytyuk'ixëty ko tëë mtso'oky ets mënëjkxëp ja mwintsë'kën mëti'ipë ja Moisés nyi'ënä'ämëyën, jëtu'un ja ja'ay nijawëtëty ko tëë mtso'oky ets të mwa'atsy.

Ko ja Jesús tyajtso'oky tu'uk ja tsiptuunpë wintsën ja tyuunpë

⁵ Ko Jesús tyëjkëy Capernaúm ets tu'uk ja Romë tsiptuunpë wintsën nyimiinë, tääts myënu'kxtakë:

⁶ Wintsën, tapës tu'uk ja ntuunpë pya'amko'knë tëkoty, mujkp xujxp ets nëkooyë y'ëyoownë mëët ja pëjkën ijxën.

⁷ Tääts ja Jesús y'ëtsoowë: Oyës nëjkx nyajtso'oky.

⁸ Ets ja tsiptuunpë wintsën y'ëtsooy: Wintsën, ka'apës xypyaat'aty ets mtëkëty ntëkotyës, je'eyë xynyi'ënä'ämëty etsës ja ntuunpë tsyo'okëty.

⁹ Jä'ä ko ëne'emyës näjyëtu'un n'ity maas ja nwintsënënm, ets ëjts nän tamës yë ntsiptuunpëjk mëti'ipës n'ëne'empyën. Koos nitu'uk t'ënëëmë nëjkx, tääts nyijkxy; ets koos nitu'uk n'ënëëmë min, tääts myiny; ets koos ja ntuunpë tii ntuk'ëne'emy, tyuunpy jä'ä.

¹⁰ Ja Jesús mëjmëtoy ojts tjawë ko jëtu'un y'ënä'äny ja ja'ay, paaty t'ënëmaay ja mëti'ipë jam pajëtijtëpën: Tëy miits nëëmëtë ko ni tu'ukës ja'ay jëtu'unpë të nkapaaty yaa Israel ijxtëm ya'atë ye'etyëjkën, mëti'ipë mëj këjää tyuk'ijxpejtypyën yë Dios.

¹¹ Tyam miits n'ënëëmëtë ko may ja ja'ay nëjkx myintë xëëwpëtsëmy ets xëëwkëtä'äky ets nyaaxwäätstëty kääpyë ukpë mëët ja Abraham, Isaac ets ja Jacob ma ja tsajpjotmëpë kutujktaknën.

¹² E mëti'ipë japaat'ajtëtëp jeexyë yajpaatë ma ja kyutujktaknën, nëjkxëp yajpëjkta'aktë akootstuuy tëja'p. Tääts tyëkëtëty jëëpyë yaxpë ets ka'ap nëjkx tmëmëta'aktë.

¹³ Tääts ja Jesús t'ënëmaay ja tsiptuunpë wintsën: Nëjkx ma mtëjkën, wä'än jëtu'un tunyë tjatyë ijxtëm të xymyëpëkyën. Näy jää mëtëy ja tsiptuunpë wintsën ojts ja tyuunpë tsyo'oky.

Ko Jesús tyajtso'oky ja Simón Pedro ja tyaak më't

¹⁴ Tääts ja Jesús ojts nyijkxy ma Pedro tyëjkën. Jam ojts tpaaty ja Pedro ja myë't to'oxytyëjkpë maapäjnkëjxy, jëënpëjkëp.

¹⁵ Tääts ja Jesús toony ja to'oxytyëjk ja kyë'ë ets ja jëënpa'am nyiwatsë. Tääts ja to'oxytyëjk pyëti'ky ets yajkaay yaj'uukëtë.

Ko Jesús tyajtso'oky may ja pa'amja'ay

¹⁶ Ko tsyu'ujënë, tääts ja Jesús ojts tukninëjkxtë may ja ja'ay mëti'ipë ku'oypyë myëët'ajtëpën. Tu'k'aawkäjpxyëty ojts t'ixkexy ja ku'oypyë ets näjyëtu'un tyajtsoky ni'ëmukë ja pa'amja'ay.

¹⁷ Paaty ya'atë jëtu'un tyuunë jyajtë ets y'atëwëty ko ja Dios ja kyäjpxynyajxpë Jeséas ojts y'ënä'äny: Yë'ë yajnëjkxtaay tu'kë'ëyë ëëts ja mpa'am'ajtëm ets ja n'ëyo'on'ajt njotmay'ajtëm.

Wi'ix ja Jesús yajpanëjkxëty

¹⁸ Ko ja Jesús t'ijxy ko ja mayjyä'äy nyapikëty, tääts ja y'ijxpëjkpëtëjk ojts t'ënëëmë ets nyëjkxtëty jamtsow nëë'awinm meynyëë awinaxy.

¹⁹ Tääts tu'uk nyimiinë ja tsajptëkotyëtë yaj'ijxpëjkpë ets y'ënëmaayë: Wintsën, mpanëjkxäämpy mijts pën maa mnëjkxy.

²⁰ Tääts ja Jesús y'ëtsooy: Nikë tää wax ja jyut ets joon yë pyä'än; e ëjts, naaxwiinyëtë ja'ay y'U'unk, ni yë'ëjës tkamëët'aty maas yë nkëpajk nkëxkonëtyën.

²¹ Tä wiinkpë ja y'ijxpëjkpë y'ënäny: Wintsën ëxmajtskës, nëjkxës jëwyiin ja nteety n'ëkyajnaaxtëkë.

²² Tääts ja Jesús y'ëtsoowë: Patso'onkës, wä'än aak o'kpë tnäyajnaaxtëkëtë.

Ko Jesús ja mëkpoj tyajnaxy

²³ Tääts ja Jesús tyëjkëy kepy nëëwinye'epyëjoty mëët ja y'ijxpëjkpëtëjk.

²⁴ Ënet ja mëkpoj ajotkumonë myiiny jam mejyjyotm. Ojts ja kepy nëëwinye'epyë y'ujtsta'ay mëët ja nëë. Maap ënety ja Jesús.

²⁵ Ënet ja y'ijxpëjkpëtëjk yujxëtë ets y'ënëmaayëtë: Wintsën, yaj'ëwaatsëpëtsëëmtëkës. Tyamës nëëji'kxnëtë.

²⁶ Tääts ja Jesús y'ëtsooy: ¿Tii ko mtsë'ëkëtë, wäänë miits ja mëpëjkën xymyëët'atë? Ko jëtu'un y'ënäny, tääts tyënaakyujkëy ets ojts twinkukajpxë ja poj ets ja mejy ets pyojmoony.

²⁷ Mëj'ixy ja ja'ay t'ijxtë ets nyäyajtëëwëtë: ¿Pën ya'atë ja'aynyë? Pojpaat mejypyaat myëmëtoowënë.

Gadara ja'ayëty mëti'ipë ja ku'oypyë myëët'ajtëpën

²⁸ Ko ja Jesús jyä'äjty jamtsow nëë'awinm mejy ëkë'ëm, Gadara naaxjoty, jam nimäjtsk pyëtsëëmtë ja'ay ku'oypyëmëëtpë mëti'ipë tsënaaytyëpën ma o'kpë nyaaxtëkëtën ets ja Jesús tmëwinkoontë. Nëkooyë ijty tsyiptunanëtë ka'ap tjëkyepy jam pën nyaxëty ma ja tu'ujën.

²⁹ Ets tyëjkëtyë yaxpë jojkpë: Këtii nëkoo yaa miny ma ëëtsëtyën etsës xymyëmayëtëty, Dios mijts m'u'unk'ajtëp. ¿Ëkë yë'ë mnimiimpy ets xyaj'ëyowa'antësë? Tyam ka'ap ja xëëw po'o tpaatynyëm.

³⁰ Tam ënety jëkämtëkë ja may ëtsëm jyë'kxtë.

³¹ Ënet ja ku'oypyë tmëpëjktsoowtë ja Jesús: Pën xy'ixkäxantëp ëëts, ëxmajtstëkës etsës jap ntëkëtëty ëtsëm jootjoty.

³² Tääts ja Jesús y'ënëmaayëtë: Nëjkxtë. Tääts ja ku'oypyë t'ëxmajtstë ja pa'amja'aytyëjk ets tuktëjkëtyë ja may ëtsëm. Ja ëtsëm jap kyupëyë'knajxtaatyë ja'awjoty ets nëëjoty kyëtaktë. Japts jyi'kxtaaytyë.

³³ Ja ëtsëm këwent'ajtpë, ojts kyäkta'atë ets ko jya'ajtë ma ja kajpnën, ënät tnimëtyaktaaytyë tii ënety të tyuny të jyätyën, näjyëtu'un wi'ix ënety të jyatën ja ja'ay mëti'ipë ja ku'oypyë myëët'ajtëpën.

³⁴ Tääts ja ja'ay jam ni'ëmukë tsyo'ontaaytyë kajpnjotm ets ojts nyëjkxtë ma ja Jesúsën ets ko jëtu'un t'ijxtë, ënät ja Jesús tmëpëjktsoowtë ets pyëtsëmëty jam y'itjotmëty.