Mateo 7 - Biblia Dc en Mixe de Quetzaltepec

Këtii mmëku'uk pyoky xytyukwinmëtowëty

¹ Këtii mmëku'uk pyoky xytyukwinmëtowtëty, këtiipë Dios yë mpoky mtukwinmëtowëtëty.

² Jä'ä ko yë Dios näjyëtu'un yë mpoky mtukwinmëtowa'anëtë tä ja mmëku'uk ënety ja pyoky të wytyukwinmëtowtën; jëtu'un tä ja mmëku'uk xytsyoktën jyä'äy'atëty näjyëtu'un miitsëty ja'ay'atë.

³ ¿Këtii yi'iyë xy'ix'ix xypya'ixtëty ja mmëku'uk ja pyu'uxm wyiinjotypë yajpaatyën, yë'ë ix ja mëj kepy mëti'ipë japën mwiinjoty?

⁴ N'ëkpëjktakmëty tu'uk ja ijxpäjtën: Pën mijts jap ja mëj kepy xymyëëtëty mwiinjoty, ¿wi'ix ja mmëku'uk xy'ënëëmëja'any? Ka'ap tjëkyepy pyu'uxm xyjyu'tëty.

⁵ Winma'anytyuk. Jëyëjp ja mëj kepy juut ma mwiinën, täänëm ja mmëku'uk ja pyu'uxm xyjyu'tëty jap wyiinjoty.

⁶ Këtii uk xymyo'otëty mëti'ipë tëë yajkënu'kxyën, këtiipë mnipëtë'ëkëtëty ets mtukwëtsëtëty. Näyjyëtu'un yë ëtsëm këtii xymyo'otëty mëti'ipë tsowëtyën, këtiipë je'eyë tnaaxtäänëty.

Amëtowtë, ixta'atë ets pijkxnoktë ja tëjk'aaw

⁷ Amëtowtë ets myajmo'otëty; ixta'atë ets xypyaatëty; pijkxnoktë ja tëjk'aaw ets m'ëwatsxëtëty.

⁸ Jä'ä ko pën tii y'amëtoopy, yajmoopy; ko pën tii t'ixta'ay, pyätyp; ets pën pyijkxnojkpy ja tëjk'aaw, ëwatsxëyëp.

⁹ ¿Wä'än jëtää miitsëty yë m'u'unk xymyo'otëty yë tsaajë pën tsajpkääky m'amëtoowëtëpë?

¹⁰ ¿Ëkë xymyo'otëty yë tsa'anyë pën nëë jëyujk m'amëtoowëtëpë?

¹¹ Oy miits m'ëxëëk ja'ay'atë, mjajtëp ja m'u'unk xymyo'otëty mëti'ipë oyën, ¿ets wi'ixts ja mTeety tsajpjotmëpë tkamo'ojëtëty ja oypyë mëti'ipë m'amëtoowtëpën?

¹² Ijxtëm miits xytsyoktë ja'ay mëtunëtëty, jëtu'un ja mmëku'uk mmëtuntë, yë'ë jëtu'unpë tuunk ojts t'antijtë ja käjpxynyajxpëtëjkëty ets ja ënä'ämën tëyajtën.

Ja najxtakn xu'utspë

¹³ Jap mtëkëtëty ma ja najxtaknën xu'utspë, jä'ä ko mëj ja najxtakn ets ja tu'u mëti'ipë nëjkxpën ëyoowtaknjoty. May ja ja'ay jap tyëkëtë.

¹⁴ Temë ja najxtakn ets ja tu'u mëti'ipë nëjkxpën ma ja juukyajtën xëmëkyëjxmëpë, xu'uts jä'ä ets wäänë ja ja'ay tpaatë ets jap tyëkëtë.

Ma ja'ay winë tunyën yë'ë yajktujk'ijxkajp wi'ix jyä'äy'ätyën

¹⁵ Näkyëwent'atëtë ma tääpë win'ë'ëmpëtëjkëtyën mëti'ipë nätyijëtëp ko Dios myëtuuntëp. Jëtu'un janty yujy janty tëtä'äky mniminëtë kupixynyën, e jap jyootjoty jëtu'un jyä'äy'atë pa'ukën.

¹⁶ Yë'ë mtuk'ixtëp wi'ix tii tuntën. Jëtu'un ijxtëm yë tsatym tsya'amën ka'ap jyamëty yajtuky muum kepykyëjxm, ni yë'ë ja higo tëëm kyayajtuky jam muum äpnykyëjxm.

¹⁷ Jëtu'un, ja oy kepy, aak'oy ja tyëëm tyäky; ets ja ëxëëk kepy, ëxëëk ja tyëëm tyäky.

¹⁸ Ka'ap ja oy kepy ëxëëk tyëëm'aty, ets ka'ap ja ëxëëk kepy oy tyëëm'aty.

¹⁹ Tu'kë'ëyë kepy mëti'ipë tëëm'ajtpën ëxëëk, yajpujxp yë'ë ets yajnino'oky.

²⁰ Jëtu'un miits ja ja'ay xy'ixkaptëty wi'ix jyä'äy'ätyën.

Ko pën tyëkëja'anëty ma ja tsajpjotmëpë kutujkën

²¹ Ka'ap nyi'ëmukëty tyëkëja'antë ja ja'ay ma ja tsajpjotmëtë kutujkënën mëti'ipës janaam jatsojk xy'ënëmaaytyëpën Wintsën. Yi'iyë jam tëkëjantëp mëti'ipë pyatuuntëpën ja nteetyës tsajpjotmëpë ja tsyojkën.

²² Ko ja ja'ay yajpaye'etyëty, may nëjkx y'ëna'antë: Wintsën, Wintsën, mijts mxëëwkyëjxmës të nkajpxwa'kxtë ja Dios ja y'aaw y'ayuk, mijts mxëëwkyëjxmës ja ku'oypyë të n'ixkäxtë ets mijts mxëëwkyëjxmës may ja Dios ja myëj'ajtën të nyaj'ijxëtë.

²³ Ënätës n'ëtsowa'any: Nijëna'a miits të nka'ixy'atë. Winwa'ktutëkës miits pokyjä'äytyëjkëty.

Mäjtskpë potsy'ëjx

²⁴ Paaty n'ënëëmëtë, pën y'amëtoow'ijtypyën ëjts ja n'ayuk ets tpatuny mëti'ipës nkäjpxypën, jëtu'un jä'ä ijxtëm ja ja'ay wijypyë kujkpën mëti'ipë ja tyëjk kyojën ets tsaakëjxy tpojtsë'ky.

²⁵ Miin ja tuu, koom ja nëë ets ja mëkpoj y'ëtëtstäky y'ënaantäky ma ja tëjkën ets kä'äpyëm ojts kyëtäy, jä'ä ko tsaakëjxy pyojtsë'ëkyëty.

²⁶ Temë pën y'amëtoow'ijtyp ja n'ayukës ets ka'ap tpatuny mëti'ipës nkäjpxypën, jëtu'un jä'ä ijxtëm tu'uk ja tsuuja'ayën mëti'ipë ja tyëjk kyojën pu'ujoty jinjoty.

²⁷ Miin ja tuu, koom ja nëë ets ja poj myiiny ma ja tëjkën, tääts kyëtääy. Atsë'ëk ajawë wyintëkooy.

²⁸ Ko ja Jesús kyajpxtaay, mëjmëtoy ja ja'ay tja'awëtyë ko jëtu'un yaj'ijxpëjkëtë,

²⁹ jä'ä ko kuttujkën mëët yaj'ixpëky ets ka'ap jyëtu'unëty ijxtëm ja tsajptëkotyëtë yaj'ijxpëjkpëtëjkëtyën.