Mateo 5 - Biblia Dc en Mixe de Quetzaltepec

Ja aaw ayuk mëti'ipë ja Jesús kyajpxën jam kopkkëjxm

¹ Ko ja Jesús t'ijxy ja mayjyä'äy, ënät pya'tëjkëy jam kopkkëjxm ets ojts nyaaxweetsy. Jamts ja y'ijxpëjkpëtëjk myëwinkoonë.

² Ënet yaj'ijxpëjktso'ony ets y'ënäny:

Mëti'ipë tsoowpatpën ma Tiosën

³ Jotkujk yë ja'ay yajpaatë mëti'ipë jyot wyinma'any jëtu'un yajmaay yajtajtëpën tä ëyoopëja'ayëtyën, jä'ä ko yë'ë jyä'ä'atantëp ja tsajpjotmëpë kuttujkën.

⁴ Jotkujk yë ja'ay yajpaatë mëti'ipë jëëytyëp yaxtëpën, jä'ä ko yë'ë Dios yajjotkujk'atanëtëp.

⁵ Jotkujk yë ja'ay yajpaatë mëti'ipë yu'unk naxymëtyën, jä'ä ko yë'ë naaxwiinyëtë kyuma'ayën'atantëp mëti'ipë të yajtukwinwanëtën.

⁶ Jotkujk yë ja'ay yajpaatë mëti'ipë tsyojkën'ajtëp ja tëypyë nipaye'eyën, jä'ä ko ku'uxyë y'ita'antë mëët ja jëtu'unpë.

⁷ Jotkujk yë ja'ay yajpaatë mëti'ipë pa'ëyoowtëpën, jä'ä ko Dios näjyëtu'un pya'ëyowa'anëtë.

⁸ Jotkujk yë ja'ay yajpaatë mëti'ipë wa'ats yë y'aaw jyot myëët'ajtëpën, jä'ä ko yë'ë y'ixantëp yë Dios.

⁹ Jotkujk yë ja'ay yajpaatë mëti'ipë tsyojktëp ets jyää'atëty ja jotkujk'ajtën, jä'ä ko yë'ë Dios u'unkniwa'ananëtëp.

¹⁰ Jotkujk yë ja'ay yajpaatë mëti'ipë yaj'ixjëtijtp yajpaajëtijtëpën mëët ko mëtëy tii tnipaye'eytyë, jä'ä ko yë'ë nëjkx tjä'ä'atë tsajpjotmëpë kuttujkën.

¹¹ Jotkujk miitsëty myajpaatëty ko ja'ay m'ojëtëty mya'axëtëty ets m'ixjëtit mpajëtitëtëty ets mnipëtë'ëkëtëty ets mni'antaakëtëty mëët ëjtskyëjxm.

¹² Xi'iktë xontë ets jotkujk yajpaatë, jä'ä ko mëj ja Dios mkumaya'anëtë; jä'ä ko näjyëtu'un ojts t'ixjëtit tpajëtitë ja Dios kyäjpxynyajxpëtëjk mëti'ipë tëëyëp juuky'ajtëpën ma ënety miitsëty ka'ap mjuuky'atënëm.

Kaan ets të'kxën jajën

¹³ Kaanën miitsëty yaa naaxwiiny myajpaatë. Ko ja kaan ja tya'amtsajtën tyëkoy, ka'ap y'ëk'o'oyënë ets jatëkok y'awinpitëty ta'amts. Ka'ap y'ëktuunnë, yaj'ixko'op tu'ujoty ets ja ja'ay y'ateeny tyukteenyë.

¹⁴ Kutë'kxpë kujajpë miitsëty yaa naaxwiiny myajpaatë. Ko tu'uk ja kajpn tunkëjxm, wa'ats kyëxë'ëky, ka'ap yu'utsy y'ity.

¹⁵ Ko ja'ay jëën tyajtooypyiky, ka'ap jap tpëjktä'äky kajjoonpa'tkë'p, këjxm yajpëjktä'äky ets tkutë'kxëty mëti'ipë jap tëkotyën.

¹⁶ Näyjyëtu'un miitsëty, tuk'ixtë ja ja'ay ja m'oyjä'äy'ajtënëty. Jä'äts ja ja'ay y'ixtëp ets tmëjjawëtëty tjaantyjawëtëty ja Dios Teety mëti'ipë tsajpjotmën.

Wi'ix ja Moisés ja y'ënä'ämën tyunyën

¹⁷ Ka'ap miits mmaytyëty mtajtëty koos yë'ë të niminy ets ja Moisés ja y'ënä'ämën nyaj'atëkoyanë ëkë ets ja käjpxynyajxpëtëjk ja tyuunk mpëjkëja'anyës; ëjts yë'ëjës të niminy etsës nyajtsoowpaata'any ni'ik.

¹⁸ Jä'ä ko jëtu'unës yam n'ëna'any, maanëm jyää'atyën yë tsajp ets naaxwiinyëtë, ka'ap nitu'uk yajjëpëkëty yë letrë, yë puntë komë, mëti'ipë japën ënä'ämënjoty, koonëm yajkuuytyuunta'ajëty.

¹⁹ Pën yë ënä'ämën ka'ap tpatuny yiinpë wäänpë ets ka'ap pën tuk'ëwaanë wi'ix tpatunëtyën, mutsk nëjkx nyäxy ma ja tsajpjotmëpë kutujkënën; pën yë ënä'ämën pyatuumpy ets ja ja'ay tukni''ixë ets tpatuntëty, yë'ë mëj naxaanp ma ja tsajpjotmëpë kutujkënën.

²⁰ Tëy miits nëëmëtë, pën ka'ap wäänëni'ik ja Dios xymyëmëtowtë këtiinëm ja tsajptëkotyëtë yaj'ijxpëjkpë ets ja fariseë ja'ayëty, nijëna'a miits mkatëkëtëty ma ja tsajpjotmëpë kutujkënën.

Ma Jesús tnimëtyä'äkyën ja joot'an

²¹ Tëë miits xymyëtoy'atë ko ja m'aptëjk yajnëmaaytyë: ka'ap myajja'ay'ookëty. Pën yaja'ay'o'kp, nëjkxëp nyitukë.

²² E ëjts jëtu'un yam miits nëëmëtë, pën ja myëku'uk tyukjoot'anpëjkpyën nëjkxëp nyitukë. Pën ja myëku'uk y'ojpyën, yë'ë paye'eyëtëp ja tsajptëkotyëtë yajuntë'ajtpë. Pën ja myëku'uk tyijpyën kutsuu, jap nëjkx yajnajtskäxë ëyoowtaknjoty.

²³ Paaty ko m'ayajk m'ako'onën xymyënëjkxëty wintsë'kën wintum ets jam xyjyä'ämyätsëty ko ënety ja mmëku'uk mëët mnämyëtsip'atyë,

²⁴ jam xy'ëxmatsëty ja m'ayajk m'ako'onën ma ja wintsë'këntyaknën ets nëjkx jëwyiin ja mmëku'uk mëët xykyajpx'oyë. Ënätnëm mwinpitëty ma ja wintsë'këntyaknën ets xypyëjkta'akëty ja m'ayajk m'ako'onën.

²⁵ Pën jää pën mni'ëënëty ets myajnëjkxa'anyë kutuunk wintum, nikë timkajpx'oyë mëët nimäjtsk naamtamnëm tu'ujotm myajpaatë ets këtiipë myajnëjkxëtëty ma ja kutuunkën. Pën ka'ap, mkë'ëyakëtëp ja kutuunk ma ja tajk mayuutën ets myajtsumëty.

²⁶ Tëyës n'ëna'any ko jäänëm mpëtsëmëty ko xykyëpäjta'ajëty ja mnu'kxy.

Ko ja'ay tyajtëkoy ja pëjkën ukën nyiwintsë'kën

²⁷ Tëë miits xymyëtoy'atë ko ja m'aptëjkëty yaj'ënëmaaytyë: ka'ap xyajtëkoytyëty ja nyiwintsë'kën ja pëjkën ukën.

²⁸ E ëjts jëtu'un miits nëëmëtë, pën ja to'oxytyëjk y'ixk'ajtyp, tëë ënety tyajtëkoy ja wintsë'kën ma ja pëjkën ukën jyootjoty wyinma'anyjoty.

²⁹ Pën myajpokytyuunëp ja m'aka'anywyiin, juut ets xy'ixka'atsëty. Ni'ikyë oy tu'kpëky mtëkoy'ajtxëtëty mëti'ipë jamën ma mni'kx mkopkën ets këtii ko tu'kë'ëyë mni'kx mkopk yajpëjkta'akëty ëyoowtaknjoty.

³⁰ Ets näjyëtu'un, pën myajpokytyuunëp ja m'aka'anykyë'ë, katspux ets xy'ixjëpipëty tu'uk. Nikë oy ko tu'kpëky mtëkoy'ajtxëtëty mëti'ipë jamën ma mni'kx mkopk ets këtii ko yajpëjktakta'ajëty ëyoowtaknjoty.

Ko pëkpyë ja'ay nye'ëxmatsëtë

³¹ Näy ojts tëëyëp yajnikäjpxy: Pën ja tyo'oxytyëjk y'ëxmatsäämpyën, jëwyiin tmo'ojëty ja noky ma y'ënä'änyën ko ka'ap t'ëkto'oxytyëjk'atanë.

³² Temë jëtu'un miits nëëmëtë: ko pën ja tyo'oxytyëjk t'ëxmatsy ets ka'ap yë'ëkyëjxmëty ko ja to'oxytyëjk mëët wiink ye'etyëjk y'ity, jotmayjoty ja tyo'oxytyëjk tpëjktä'äky, jä'ä ko tsojk ja tyo'oxytyëjk mëët wiink ye'etyëjk nyäwyin'ëënëtëty ets pyokytyuntëty, näjyëtu'un ënät ja ye'etyëjk mëti'ipë jëtu'unpë ja to'oxytyëjk pyuwa'këpën mëti'ipë tëë yaj'ëxmatsyën nän pokytyuunp ënety.

Ko ja'ay Tios tyajkäjpxy

³³ Näy tëë xymyëtoy'atë ko ja aptëjk yaj'ënëmaaytyë: Pën tëë tii xywaantä'äky mëët ja Dios, mkuuytyunëp.

³⁴ Temë jëtu'un miits n'ënëëmëtë, ko tii xywyaanta'akëty, ka'ap Dios xyajkajpxëty. Ni tsajpjotmëpë xykyayajkajpxëty, jä'ä ko yë'ë Dios kyutujkën'ajtyp;

³⁵ ets këtii naax xykyakajpxpaatëty, jä'ä ko jää Dios wya'kpo'kxy; ni Jerusalén, jä'ä ko yë'ë yajkutujkpë kyajpn'ajtyp.

³⁶ Ni mjuukyajtën xykyakajpxpaatëty, jä'ä ko ka'ap myiits'atë xynyiwintsen'atë ja juukyajtën.

³⁷ Tëy winë xykyajpxëty: Oy'atëp ëkë ka'ap y'oy'atëty; jä'ä ko ka'ap y'oyëty ko pën tëkatsy tii tuny.

Ma Jesús yaj'ijxpëkyën ko ka'ap mëpaat ja'ay tii ëxëëk tuunwinpity

³⁸ Tëë miits xymyëtoy'atë ko ja m'aptëjkëty yaj'ënëmaaytyë: Ko pën ja mwiin tyajtsëtyutëty yajtsëtyut näjyëtu'un ja wyiin, ko pën ja mtëts tkatskoxëty katskox näjyëtu'un ja tyëts.

³⁹ Temë jëtu'un miits n'ënëëmëtë ko ka'ap xytyuunwinpitëty ko pën wi'ix mtunëtëty. Ko pën m'apojtsë'ëkëtëty ni'ikyë tuk'akë'ë wiinkpë m'apënuuky.

⁴⁰ Ko pën mni'ëënëtëty ets ja mnëxuy mpëjkëtëty, jaakmo'o mnimu'ux.

⁴¹ Ko pën atsip mtukpatsëmëtëty tsëmy kë'ëy ets xymyëye'eyëty wëxtujk mëko'px xajpk, ni'ikyë jä'ä xymyëye'eyëty tu'uk mil ja mëkoxk mëko'px xajpk.

⁴² Pën tii m'amëtoowëp, mo'o; ets pën tii tsyojkpy ënu'kxy, tuk'ënu'kx.

Wi'ix ja mëtsip yajtsokëty

⁴³ Tëë miits xymyëtoy'atë ko ja m'aptëjk yajnëmaaytyë: Tsok ja mmëku'uk ets ëxëëk xy'ixëty ja mmëtsip.

⁴⁴ E ëjts jëtu'un miits n'ënëëmëtë, tsoktë ja mmëtsipëty ets tuknija'amyätsëtë Dios pën m'ixjëtijt mpajëtijtëtëp.

⁴⁵ Jëtu'un xyajnikëxë'ëktëty ko Dios tsajpjotmëpë m'u'unk'atëtë; jä'ä ko xëëw tyajpëtsëmy tyuknijajtääpy oyjyä'äy ka'oyjyä'äy, ets ko tyajtu'uy yajnituutääpy wä'än twa'atsja'ayëty ëkë t'ëxëëkja'ayëty.

⁴⁶ Pën yi'iyë miits mtsojktëp mëti'ipë mtsojkëtëpën, ¿tii kuma'ayën mpëktëp mpaatëp? Yë yajkukëpäjtpëtëjkëty mëti'ipë Roma myëtuuntëpën yë'ë jëtu'un ëtëtstëp.

⁴⁷ Ets pën yi'iyë miits mkajpxpo'kxtëp ja mmëkä'äxëty ¿Tii oyajtën tääpë xyajnätyijëtë? Yë ja'ay ka'apë Dios tmëpëkyën yë'ë jëtu'un ëtëtstëp.

⁴⁸ Wa'ats nnäyaj'itëtë, ijxtëm yë Dios tsajpjotmëpë wa'ats nyäyaj'ityën.