Mateo 3 - Biblia Dc en Mixe de Quetzaltepec

Ma ja Juan Yajnëëpäjtpë yajpaatyën jam të'ëts'itjotm

¹ Komjeky ja Juan Yajnëëpäjtpë ojts yajnijawë'aty jam yajpaaty të'ëts'itjotm ma Judea y'itjotmën,

² ets y'ënä'äny: Ixmatstë ja mka'oywyinma'anyëty; tää wyinkony ja kuttujkën tsajpjotmëpë.

³ Yë'ë Juan Yajnëëpäjtpë ojts yaj'antijy, mëti'ipë yë käjpxynyajxpë Jeséas ojts tnikäjpxyën ko y'ënäny: Tu'uk ja mëto'owën yä'äxy jyoky jam të'ëts'itjotm: Nipëjktaakëtë ja Wintsën ja nyë'ë tyu'u, yaj'ëwa'atstë tu'uk ja në'ë tu'u tëypyë.

⁴ Jëyujk jëku'ux ak ijty yë Juan nyixox'ajtyp, po'o wyëën'ajtyp, mu'u tsyu'tsyp ets uuxpa'ak y'ukpy.

⁵ Ninëjkxëp ja ja'ay ets y'amëtoow'ityë mëti'ipë tso'ontëpën jam Jerusalén ets Judea y'itjotm, näjyëtu'un mëti'ipë myëwinkon'ajtëpën ja Jordán mëjnëë.

⁶ Tmaaywyatstë ja pyoky ets ja Juan yajnëëpätëtë Jordán nëëjotm.

⁷ Ko ja Juan Yajnëëpäjtpë t'ijxy ko may ja fariseë ja'ayëty ets satuceë ja'ayëty nyiminyë ets tyajnëëpätëty, ënät t'ënëmaay: Tsa'any miits mteety'ajt m'ap'ajtëp, ¿pën të m'ënë'ëmxëtë ko xykyukä'äktëty ja ëyo'on mëti'ipë miimp këtakpën?

⁸ Yajxon mja'ay'atëty ets mkëxë'ëktëty ko të mjootwinpitë ma Tiosën,

⁹ këtii nëkoo mnätyukmëjjawëtëty tii ets m'ëna'antëty: Abraham ëëts nteety'ajt n'ap'ajtëp, ka'apës Dios xyaj'ëyowtëty. Tyam miits nëëmëtë ko Dios mayëtëp ets tsaa tyaj'awinpitëty Abraham y'u'unk y'ok.

¹⁰ Ja jatyë apaatë y'owxijnë ets tpujxë'ëka'any ja kepy ma tyiktsën. Pën ka'ap oy jyä'äy'äty, jëtu'un jä'ä ijxtëm ja kepy mëti'ipë ka'ap oy tyëëm'atyën; yajpujxë'ëkaanp ets yajnino'oka'any.

¹¹ Nëë miits ntukyajnëëpäjtëp, ets yajnijawëty ko tëë ja mka'oywyinma'any xy'ëxmatstë. Temë tää tu'uk xypyaminyës mëti'ipë yajnëëpätaanpën mëët ja Kënu'kxymyëkajtën ets ja jëën. Yë'ë ni'ik ja kyutujkënmëëtëty këtiinëm ëjts, ni yë'ëjës xykyapaatë'aty wi'ixës kyë'ëk mpawijtsëty.

¹² Jëtu'un ja naaxwiinyëtë ja'ay tunëty ijxtëm ja tsajpmokpajk yajwinpojy ets tëkoty nyijkxy ja wa'atspë ets ja y'ak yajnino'oky ma ja jëën nijëna'a kyapi'itsyën.

Ko ja Jesús nyëëpety

¹³ Tääts ja Jesús tsyo'ony jam Galilea ets jyä'äjty ma ja Jordán mëjnëëjën, ets ja Juan jam yajnëëpätëtëty.

¹⁴ Ka'ap ja Juan tjayajnëëpätany ja Jesús, paaty t'ënëmaay: Mijts mpaat'ajtëp ets ëjts xyajnëëpätëty ¿wi'ix koos xynyëëmës ets nyajnëëpätëty?

¹⁵ Tääts ja Jesús y'ëtsooy: Yajnëëpäjtkës jä'ä ko kopkpëky ets yajpatunëty ijxtëm ja Dios tsokyën. Ënet ja Juan tkupëjky.

¹⁶ Ko ja Jesús nyëëpäjtaay, ënät pyëtsiimy nëëjoty. Tääts ënätyë y'ëwatsy ja tsajp ets t'ijxy ja Kënu'kxymyëkajtën nyikëtä'äkyë ijxtëm tu'uk ja pakën.

¹⁷ Tääts yajmëtooy tu'uk ja ayuk tsajpjotm: Ya'atës n'U'unk'ajtyp, mëti'ipës ni'ik ntsojkpyën, ntukjotkujk'ajtypyës yë'ë.