Mateo 24 - Biblia Dc en Mixe de Quetzaltepec

Ko ja Jesús tnikäjpxy ko ja mëjtsajptëjk kyutëkoyä'äny

¹ Tso'omp ënety ja Jesús ma ja mëjtsajptëjkën. Ko ja y'ijxpëjkpëtëjk myëwinkoonëtë ets tyuk'ixa'anëtë ja mëjtsajptëjk ko ja nyipotsy janty'oy kyëxë'ëky.

² Ënet ja Jesús y'ënëmaayëtë: ¿M'ijxtëp ya'atë tu'kë'ëyë? Tëy n'ënëëmëtë ko ya'atë tsaapotsy nitu'uk kyawë'ëma'any, tu'kë'ëyë jyijta'aja'any.

Mëti'ipë yajtuk'ixaanpën ko ja naaxwiinyëtë ënäty kyukëxë

³ Tam ënety ja Jesús y'u'unyë Olivos kopkwinm, ko ja y'ijxpëjkpëtëjk nyimiinëtë ets yajtëëwëtë aak ayi'iyë: Tuk'ëwa'anëtëkës jëna'a jëtu'un jyata'any kyëpäta'any ets tii ijxwë'ëmën yajtuk'ixëp ko ënety mijts miny ets ko ja naaxwiinyëtë ënety kyukëxë?

⁴ Ënet ja Jesús y'ëtsoowëtë: Näkyëwent'atëtë ets ka'ap pën mwin'ëënëtëty.

⁵ Jä'ä ko may ja ja'ay myina'any ijxtëm jeexyë ëjtsën ets y'ëna'ana'any: Ëjts jëtu'un ja Kristë ets may ja ja'ay twin'ëëna'any.

⁶ Ko miits xymyëtoy'atëty ja tsip xii yaa ets ko ja ja'ay tsyiptuntëty, ka'ap mtsë'ëkëtëty, kopkpëky ko jëtu'un tyunëtëty jyatëtëty, je'eyëp ko ka'anëm ënety tpaaty ets ja naaxwiinyëtë kyukëxëty.

⁷ Jä'ä ko tsiptunantëp ja naax kajpn nixim niyam naaxwiinyëtë apëtsëmy. Itaanp ja yuu xëëw ets ja naaxwiinyëtë yu'kxa'any xiitsow yaatsow.

⁸ Ko jëtu'un tyunëtëty jyatëtëty, je'eyë ënety ja ëyo'on tsyo'ontä'äkynyëm.

⁹ Ënet miits myajkë'ëyaktëty ets myajtsaatytyuntëty ets ja ja'ay myaj'ookëtëty. Tu'kë'ëyë ja'ay nëjkx m'ëxëëk'ixëtë jä'äkyëjxm ko ënety ëjts xymyëpëktë.

¹⁰ Nimay nëjkx ja ja'ay jää t'ëxmatstë ja myëpëjkën ets nyäkyë'ëyakëtëty ets nyämyëtsip'atëtëty nixim niyam.

¹¹ May nëjkx nyätyijëtë Dios kyäjpxynyajxpë ets may ja ja'ay nëjkx twin'ëëny.

¹² Jä'äkyëjxm ko ënety ja ëxëëkpë ku'oypyë myëjtëkë, paaty may ja ja'ay ka'ap oy t'ëkmëët'atanëtë ja nätsyokë.

¹³ Temë pën xymyëpëjkpës mapaat jyëjpkëxyën, yë'ë nëjkx nyitso'oky.

¹⁴ Ets ya'atë aaw ayuk oypyë ma Dios kyutujkën yajnimëtyä'äkyën, nëjkxëp yajkajpxwä'kxy ma tu'kë'ëyë naaxwiinyëtën ets nëjkx ja ja'ay tnija'awëtya'atë, täänëm ja naaxwiinyëtë kyukëxëty.

¹⁵ Ojts ja käjpxynyajxpë Daniel tkuja'ay ja ëxëëkpë ja tuuntëko'oyën. Ko miits xy'ixtëty ma ja wa'atspë ja itën, mëti'ipë nokykyajpxpën wä'än tja'akyukë,

¹⁶ ënät nëjkx kyä'äktë ja ja'ayëty mëti'ipë yajpatëpën jam Judea ets nëjkx kyäktso'oktë jam kopkëjxm;

¹⁷ ets pën ënety të pyetyën tyëjkëjxm jä'ä xëëw, ka'ap y'ëkjënajknëty ets tii tyajpëtsëma'anëty jap tyëkoty;

¹⁸ ets pën ënety kyamjotm, ka'ap nyäkwyimpitëty ets ja wyit twitsëty.

¹⁹ Mëk nëjkx y'ëyowtë ja to'oxytyëjkëty mëti'ipë ënety ja u'unk nyëkëjxm'ajtëpën ets mëti'ipë ënety yaj'u'unktsi'tstëpën jä'ä xëëw.

²⁰ Amëtowtë pëjktsowtë ja Dios ets ka'ap jëtu'un jyatëty jä'ä xëëw ma ënety pyotmëtyën, ëkë säpëtë xëëwën.

²¹ Mëk nëjkx ja ëyo'on jotmay yaj'ixy, mëti'ipë ka'ap nijëna'a yaj'ixynyëmën maju'unëm ja naaxwiinyëtë tsyo'ontä'äkyën ets ka'ap jëtu'un ok y'ëkyaj'ixanë.

²² Ko jeexyë ja Dios ja ëyo'on jotmay tkayajkëxy tkayajnaxy, tsip jeexyë ets ja ja'ay tmëmëta'aktë, paaty tyajkëxa'any tyajnaxa'any jä'ä ko tsoky tjawë ja y'u'unk y'ëna'k mëti'ipë të twin'ixyën.

²³ Ets ko pën jää m'ënë'ëmxëtëty: Ixtë, tyaa ja Kristë, ëkë y'ëna'antëty: Ixtë, xim jä'ä, këtii xymyëpëktëty.

²⁴ Jä'ä ko minantëp ja ja'ayëty mëti'ipë nëjkx nyätyijëtën Kristë ets mëti'ipë nätyijëtëpën Dios kyäjpxynyajxpë; nëjkxëp tyaj'ixëtë ja mëj'ajtën ets wi'ix kawi'ixëty nëjkx winë tuntë ets yë'ëpaat nëjkx yajwin'ëëntë mëti'ipë ënety ja Dios të twin'ixyën.

²⁵ Tëë yam ntuk'ëwaanëtë mëti'ipë tunan jatanëpën.

²⁶ Paaty, ko pën m'ënë'ëmxëtëty: Ixtë, xim jä'ä të'ëts'itjotm, këtii jam mnëjkxtëty; ëkë oy mja'ënë'ëmxëtëty: Ixtë, tyap jä'ä tëkoty, këtii xymyëpëktëty,

²⁷ Jä'ä ko jëtu'un ja naaxwiinyëtë ja'ay ja y'U'unk myina'any ijxtëm ja wëtsuk yaj'ixyën xëëwpëtsëmy ets xëëwkëtä'äky.

²⁸ Ma ënety jam tii të y'ookyën, jam ja majkwejkxy myuka'antë.

Wi'ix wyimpita'anyën ja naaxwiinyëtë ja'ay ja y'U'unk

²⁹ Ko ënety të nyäxy ja ëyo'on jotmay, jää nëjkx ja xëëw wyinkootsë ets ka'ap ja po'o y'ana'any. Ka'ata'ajaanp ja matsa'a tsajpwinm ets ja ënä'ämpëtëjk yajkutujkpëtëjk nëjkxëp yu'kxpëjkta'atë.

³⁰ Ets yaj'ixa'any jam tsajpwinm ja ijxpäjtën ko ja naaxwiinyëtë ja'ay ja y'U'unk myina'any yootsjoty, mëët ja mëk'ajtën kuttujkën ets oy'ajt mëj'ajtën,

³¹ ets tkäxa'any ja anklëstëjk mëët ja pujxnxuxn mëti'ipë mëk tyukxu'uxantëpën ets myujkta'aja'antë xiitsow yaatsow ja ja'ayëty mëti'ipë ënety të yajwin'ixtën, tyso'onta'akëty ma xëëw pyëtsimyën ets jampaat ma kyëtä'äkyën.

³² Jatë ya'atë nyi''ijxpëjkën ja higo kepy: ko xye'entyjiitsy ets ja y'ääy pyëtsimy, yë'ë yajtuknija'ap ko myiny wyinkony ja xëkopk'ajtën.

³³ Näy timjëtu'un ko xy'ixtëty ja ëyo'on tyunyë jyätyë, yë'ë mtuknijawëtëp ko tëjk ëkë'ëyën ja naaxwiinyëtë ja'ay ja y'U'unk yajpatnë.

³⁴ Tëy miits n'ënëëmëtë, ko ya'atë jää tyuna'any jyata'anyë maanëm ënety ja ja'ay ka'ap y'ooktënëm mëti'ipë jää tyam yajpatëpën.

³⁵ Këxaanp naxaanp yë tsajp ets naaxwiinyëtë, e yë n'aaw n'ayukës nijëna'a kyakëxa'any kyanaxa'any.

³⁶ Ni pën tkanijawë tii xëëw tii po'o jëtu'un tyuna'any jyata'anyë, ni anklëstëjk tsajpjotmëtë ets ni ëjts nkanijawë, ëjts Dios y'U'unk; Dios Teety, yë'ë tu'uk nyija'ap.

³⁷ Ijxtëm tyuunë jyaajtën ko ja Noé jyuuky'äjty, näjyëtu'un tyuna'any jyata'anyë ko ënety ja naaxwiinyëtë ja'ay ja y'U'unk myiny jatëkok.

³⁸ Jä'ä ko ka'anëm ënety ja komtuu myiny, kaaytyëp uktëp ets pëjktëp uktëp ënety ja ja'ayëty.

³⁹ Ma ënety ka'ap pën tmëmay tmëtajyën tii, jää ojts myiny ja komtuu ets tyajnëjkxtaay oy tyimtiijëty. Näyjyëtu'un nëjkx tyunyë jyätyë ko ënety ja naaxwiinyëtë ja'ay ja y'U'unk wyimpity.

⁴⁰ Jam ënety ja ye'etyëjk tyuntë nimäjtsk kyamjotm; tu'uk yajmënëjkxa'any ets tu'uk wyë'ëma'any.

⁴¹ Nimäjtsk ja to'oxytyëjk ënety jyëtstë; tu'uk yajmënëjkxa'any ets tu'uk wyë'ëma'any.

⁴² Wijy kujk mjuuky'atëty, jä'ä ko ka'ap xynyijawëtë jëna'a myina'any ja mWintsënëty.

⁴³ Yë'ë nijawëtë, ko jeexyë tu'uk ja kutëjk nijawë ko koots myina'any ja mä'tspë ma tyëjkën, ka'ap jeexyë myaanaxy këtiipë tyëkëty ja mä'tspë ma tyëjkën ets tyonëty myäätsëty.

⁴⁴ Paaty miits näjyëtu'un mnäkyëwent'atëtëty, jä'ä ko jääjës nëjkx nminy ko ënety miits ka'ap xyjyëjp'ixtës.

Ja ja'ay mëti'ipë oy mëtuunpën ets ka'apë oy myëtunyën

⁴⁵ ¿Pën jëtää ja tuunk oy y'ëkmëpëtsëmëp? ko ja Wintsën tyajwë'ëmëty tu'uk ja tyuunpë ma ja tyëjkën mëti'ipë yajja'akyäyëpën tiempëpaaty.

⁴⁶ Akujk jotkujk ja tuunpë yajpaaty mëti'ipë tukxoonta'akanëpën ja Wyintsën ko ënety pyäätyë tuunp mëtoop.

⁴⁷ Tëy miits n'ënëëmëtë, ko ja Wintsën yë'ë nëjkx tyuknipëkyë ja tuunk wä'än mëti'ipë tuunkëty ets yë'ë tniwintsën'atëty.

⁴⁸ E pën tääpë mëtuunpë ëxëëk ja jyot wyinma'any, ets myäyëty tyajëty ko ja wyintsën ka'ap tsyojkwinpita'any

⁴⁹ ets twopëty tka'atsëty ja tuunpëtëjk ets tmëëtkaay tmëët'uknëty ja ëmu'ukyë ja'ay;

⁵⁰ ma ënety ka'ap t'a'ixy tjëjp'ixyën wyimpita'any ja wyintsën, jää nëjkx ja wyintsën y'ëkëty myiny,

⁵¹ tääts nëjkx tyiytyunyë ets pyëjktä'äkyë ma ja ja'ayëtyën mëti'ipë wiinkë'ëy akë'ëy oyjyä'äy'ajtëpën. Ënet myina'any ja ëyo'on jotmay ma y'ityën ja jë'ëyën yaxën ets ma ja ja'ay ka'ap jeky ja ëyo'on tmëmëtä'äkyën.