Mateo 22 - Biblia Dc en Mixe de Quetzaltepec

Ja nyi''ijxpät ma ja ja'ay kyäytyën y'uuktën ko pën pyiky

¹ Tääts ja Jesús ojts tmëtyaktsoony jatëkok ja ijxpäjtën ets y'ënëmaayëtë:

² Jëtu'un ja tsajpjotmëpë kuttujkën ijxtëm ja yajkutujkpë xyëëwtunyën ko ja myaank tyajpëka'any.

³ Ets ja tyuunpë tkejxy ets ja ja'ay twowtëty, e ja ja'ayëty ka'ap myinantë.

⁴ Tääts ja wiinkpë ja tyuunpë ojts tkexy ja'aywyoopë ets t'ënëmaay: Nëjkx ënëëmëtë ja ja'ayëty ko ja kääky apaatë y'owxijnë. Tëës ni'ënä'ämë ets ja tsajpkaa y'ookëty: tsajpkaa ayääkë ets ni'kxëtypë. Apaatë y'ijtaaynyë, wä'än min tkaytyë.

⁵ E ja ja'ayëty mëti'ipë ojts jyayajwowtën ka'ap ja myiintë kääpyë. Tuu'k, ni'ikyë ojts nyijkxy kyamjotm, tu'uk ajuupyë ato'kpë ojts nyijkxy,

⁶ ets ja wiinkëtypë ni'ikyë ojts tmatstë ja yajkutujkpë ja tyuunpëtëjk ets tyaj'o'ktë.

⁷ Ënet ja yajkutujkpë ojts yajxon jyoot'anpëky ets tkejxy ja tsyiptuunpëtëjk ets tyaj'o'kta'atëty ja yajja'ay'o'kpëty ets tnaxkuno'okëtyë ja nyaax kyajpn.

⁸ Tä t'ënëmaay ja tyuunpëtëjk: Tap y'owxijnë ja ka'ayën ukën, tääpë ja'ayëty mëti'ipë të jyayajwowtën ka'ap nyitëkëtë myintëty.

⁹ Nëjkx mjëtitë në'ëjoty tu'ujoty ets xywowtëty tu'kë'ëyë ja'ay mëti'ipë mpatëpën wä'än min tkaytyë t'uuktë.

¹⁰ Tääts ja tuunpëtëjk tsyo'ontë ets ojts twoowmujkta'atë mëti'ipëjaty pyatën, wä'än t'oyjyä'äy tka'oyjyä'äyëty. Jëtu'unts ja tëjk y'ujtsy mëët ja ja'ay woypyë witsypë.

¹¹ Ko ja yajkutujkpë tyëjkëy ets tkajpxpo'kxa'any ja mayjyä'äy mëti'ipë ënety të yajwowtën, ënät t'ijxy tu'uk ja ye'etyëjk mëti'ipë ka'ap xyoxyëtyën mëët ja wit mëti'ipë ja'ay pyëjktaktëpën ko pën pyëjkpë nikay.

¹² Tää t'ënëmaay: Mëku'uk ¿Wi'ixën të mtëjkënë yaa, kajts ja mwit xymyëët'aty mëti'ipë ja'ay pyëjktaktëpën ko pën pyëjkpë nikay? E ja ye'etyëjk amonyë y'ity.

¹³ Ënet ja yajkutujkpë t'ënëmaay ja tyuunpë: Kë'ëtsumtë tekytsymtë ets xypyëjkta'aktëty jap tëja'p akootstuuy, ma ja'ay jyë'ëtëty ya'axtëtyën ets nyätyëtskääpëtëtyën.

¹⁴ Jä'ä ko nimay ja ja'ay jyayajyaxtsowtë, wäänë wyinkëtä'äky mëti'ipë win'ixëtyën.

Ko ja Jesús tnimëtyä'äky ja kukëpäjtën

¹⁵ Ënet ja fariseë ja'ayëty ojts tkäjpxy'atë wi'ix ja Jesús jeexyë kyajpxtëkoyën ets tni'ëënëja'antë.

¹⁶ Paaty ojts tkäxtë ja y'ijxpëjkpëtëjk mëët ja Herodes jyä'äy ets ja Jesús t'ënëmaaytyë: Wintsën, nija'awëtyëp ëëtsëty ko mijts mëtëy winë xykyäjpxy ets ko mijts mëtëy ja ja'ay xytyuk'ijxpëky ja Dios ja nyë'ë tyu'u oy pën tëkatsy mnikäjpxy mnimëtyä'äkyë, jä'ä ko ka'ap yë'ëkyëjxmëty winë oy xytyuny ets ja ja'ay m'oyjyawëtëty.

¹⁷ Tuk'ëwa'anëtyëk ëëts: ¿Paat'ajtëp koos ja yajkutujkpë César nmëkëpätëty ëkë ka'apë?

¹⁸ Jesús ojts t'ixy ko je'eyë wyinma'any'ixtë, paaty t'ënëmaay: Oyjyä'äy mnätyijëtë, ¿tii ko miits xyajkajpxtëkoya'antës?

¹⁹ Tuk'ijxtëkës ja meeny mëti'ipë myajtuuntëp ko myaktë mkëpätë. Tääts ojts tu'uk ja meeny tyajmintë mëti'ipë tyijtëpën denario meeny

²⁰ ets ja Jesús yajtëëwëtë: ¿Pën ya'atë wyiin jyëjp nikojtu'uty ets pën ya'atë xyëëw këxja'ay?

²¹ Tääts y'ëtsoowtë: Ja yajkutujkpë. Ënet ja Jesús y'ëtsoowëtë: Mo'otë yë yajkutujkpë mëti'ipë jyä'ä'ajtypyën ets mo'otë Dios mëti'ipë paat'ajtëpën.

²² Ko jëtu'un tmëtoowtë, mëjmëtoy ojts tjawëtë, ënät tpuwa'ktutë ets ojts nyëjkxtë.

Ko ja ja'ay tyajtëwtë pën juukpyëkantëp ja o'kpë

²³ Näy jä'ä xëëw ja Jesús nyimiinëtë ja satuceos ja'ayëty, mëti'ipë ënantëpën ko ja o'kpë ka'ap jyuukpyëktë ets tyajtëëwtë ja Jesús:

²⁴ Wintsën, ja Moisés ja y'ënä'ämën jëtu'un y'ënä'äny: ko tu'uk yë ja'ay y'ookëty ets ka'ap pën y'u'unk, yë myëkä'äx yë'ë nëjkx tpuwa'akë ja to'oxytyëjk mëti'ipë ënety nyi'o'ktutypyën ets jëtu'un'äämpy ja y'äjty tmëët'atëty ja y'u'unk y'ëna'k.

²⁵ E yë'ëts yam ntukmëmëtya'akantëp ko yaa ma ëëtsëtyën tää ijty tëëyëp ja'ay tsyëënëtë, niwëxtujk ijtyëty aak tu'kä'äxëty. Ja kä'äxkopk ojts pyiky ets y'o'ky. Nitu'uk ja y'u'unk kyaka'ty, paaty ja tyo'oxytyëjk ojts jä'ä ja y'uty tukmëwë'ëmy.

²⁶ Ja y'uty ojts ja ku'ookytyo'oxy tpëky ets ojts y'ooky, näjyëtu'un jyäjty ja mëtëkëëkpë ets aakjëtu'un niwëxtujk jyajtaaytyë.

²⁷ Ko ni'ëmukë y'o'ktaatyëy ja ye'etyëjkëty, tääts ja to'oxytyëjk ojts näjyëtu'un y'o'knë.

²⁸ E ko ja o'kpë nëjkx jyuukpyëktë, ¿pën nëjkx to'oxytyëjk'aty ya'atë ja to'oxytyëjk? niwëxtujkëty tëë ënety tpëjk'apëtsëëmta'atë.

²⁹ Tääts ja Jesús y'ëtsooy: Mkajpxtëkooytyëp miitsëty, jä'ä ko xykyanijawëtë ja Dios ja y'aaw y'ayuk ets ni xykyanijawëtë ja myëk'ajtën.

³⁰ Ko ja o'kpë jyuukpyëktëty, ni pën nëjkx kya'ëkpëjk kya'ëk'uknë, jëtu'un nëjkx y'ijnëtë ijxtëm ja anklëstëjkëtyën.

³¹ E mëëtpë ja o'kpëtëjkëty ko jyuukpyëka'antë. ¿Këtii xykyajpxtënëm ma Dios kë'ëm y'ënä'änyën:

³² Ëjts xyTios'ajt ja Abraham, Isaac ets ja Jacob? Dios ka'ap yë'ëjëty niTios'aty o'kpë, yë'ë nyiTios'ajtyp mëti'ipë juuky'ajtëpën.

³³ Ko ja ja'ay jëtu'un tmëtoowtë, mëjmëtoy ojts tjawëtë ko ja Jesús jëtu'un yaj'ijxpëjkëtë.

Ënä'ämën wäänë mëjpë

³⁴ Tääts ja fariseë ja'ayëty ye'eymyujktë ko tnija'awëtyë ko ja Jesús ënety tëë amonyë tyajwë'ëmy ja saduceos,

³⁵ ets nitu'uk ja fariseë ja'ayëty mëti'ipë oy nyija'awëp ja Moisés ja y'ënä'ämën, ojts tjawinma'any ixa'any ja Jesús ets tyajtëëy:

³⁶ Wintsën, ¿mëti'ipë jëtää ja Dios ja y'ënä'ämën ni'ik kopkpëky?

³⁷ Ets ja Jesús y'ëtsooy: Tsok ja Wintsën mëët tu'kë'ëyë ja mjot mja'awën, mjot mwinma'any ets mma'ayën mtajën.

³⁸ Ya'atë ënä'ämën yë'ë jëtu'un wäänëni'ik kopkpëky.

³⁹ E ja mëmäjtskpë yë'ë mëti'ipë ënaanpën: Tsok ja mmëku'uk ijxtëm kë'ëm mnätsyokyën.

⁴⁰ Ma ya'atë ënä'ämënën mäjtskpë jää ni'ëmukë tsyo'onta'ay ja ënä'ämën ets mëti'ipë ojts tkajpxtën ja käjpxynyajxpëtëjkëty.

Pën ja Kristë y'u'unk y'ok

⁴¹ Tam ënety ja fariseë ja'ayëty tu'ukmukyë yajpaatë,

⁴² ko ja Jesús yajtëëwëtë: ¿Wi'ix miits xymyëmay xymyëtajtë ja Kristë. ¿Pën jëtää yë Kristë u'unk'ajt ok'atëp? Tääts y'ëtsoowtë: David yë y'u'unk y'ok.

⁴³ Ënet ja Jesús y'ënëmaayëtë: Pën jëtu'un, ¿wi'ix ko ja David yajkajpxpëtsëmyë ja Dios ma tmëkäjpxyën ja Kristë, Wintsën. Ma y'ënä'änyën ja David:

⁴⁴ Jëtu'un ja Wintsën t'ënëmaay ja nWintsënës: U'nyë maas n'a'oytsyowën, koonëmës yë mmëtsip nmëmëta'akëty.

⁴⁵ ¿Wi'ixtsën ja David yë'ë t'u'unk'aty t'ok'aty ja Kristë, pën yë'ë kë'ëm myëkäjpxyp Wintsën?

⁴⁶ Ni tuk'aaw pën tkajajty t'ëtsoowinpitëty ja Jesús, je'eyë jëtu'un t'ëxmajtstë ka'ap ojts pën nëkoo tii t'ëkyajtëëwnë.