Mateo 21 - Biblia Dc en Mixe de Quetzaltepec

Ko Jesús tyëkë ma ja Jerusalén kajpnën

¹ Ko ënety ja Jesús mëët ja y'ijxpëjkpëtëjk jam tmëwinkoonëtë ja Jerusalén kajpn ets jyajtë Betfagé, ma ja Olivos Kopkën. Tääts ja Jesús ja y'ijxpëjkpëtëjk nimäjtsk tkejxy,

² ets t'ënëmaay: Nëjkxtë xim ma kajpnën. Jam xypyaata'antë kutsumy tu'uk ja krukts to'oxy mëët tu'uk ja y'u'unk. Mmëkäjëtë ets xyajmintëty nimäjtsk.

³ Ets ko pën wi'ix y'ëna'anëty, jëtu'un xy'ënëëmëtëty: yë'ë Wintsën yajmëyäjtyp, ko tyajtuunta'ajëty tääts jatëkok tyakankojnëpë.

⁴ Paaty jëtu'un tyuunë jyajtë ets y'atëwëty ja aaw ayuk mëti'ipë ja Dios tyukkajpxnajxën ja kyäjpxynyajxpë, ko y'ënäny:

⁵ Ënëëmëtë yë Jerusalén ja'ayëty: Tää myajkutujkpë mniminëtë yujypyë naxymyëpë, kruktskëjxy y'u'unyë, tu'uk yë jëyujk u'unk mëti'ipë tsëmy pyatsëëmpyën.

⁶ Tääts ja Jesús ja y'ijxpëjkpëtëjk ojts nyëjkxtë ets tuuntë jëtu'un tä ënety të yaj'ënä'ämtën.

⁷ Ojts tyajnëjkxtë ja krukts to'ox mëët ja y'u'unk ets wyit tukniyä'ptë ets ja Jesús tukwä'tspejty.

⁸ May ënety jam ja ja'ay, tam mëti'ipë ja wyit yä'ptëëwtëpën tu'ujoty ets tam mëti'ipë ja kepy'ääy tyuk'oytyuuntëpën ja tu'u ets oy kyëxë'ëkëty.

⁹ Tääts ja ja'ay wintuuy jëxkë'ëy tyëjkëtyë yaxpë jojkpë: Hosana. Mëj jaanty yë yajkutujkpë David y'u'unk y'ok. Dios kënu'kxëtëp mëti'ipë të kyexyën yë Wintsën. Hosana. Mëj jaanty yë Dios.

¹⁰ Ko ja Jesús tyëjkëy ma ja Jerusalén kajpnën, jëtu'un ja ja'ay y'ëkmujk y'ëkxu'umnëtë ets may mëti'ipë yajtëëwtëpën: ¿Pën ja'ay tääpë?

¹¹ Ets ja ja'ay y'ëtsoowtë: Käjpxynyajxpë Jesús yë'ë, jam Nazaret tsyoony, Galilea y'itjotm.

Ko ja Jesús twojpëtsëmy ja to'kpëtëjkëty ma ja mëjtsajptëjkën

¹² Ënet ja Jesús tyëjkëy tsajptëkoty ets twojpëtsëëmtaay ja ja'ay mëti'ipë ënety jap to'ktëp yajktëpën ets ojts ja ja'ay ja tyo'kpäjn tijjë'ktaayë mëti'ipë ja meeny wyinkukoontëpën, ets ja tyo'kpäjnëty mëti'ipë pak to'ktëpën;

¹³ ets t'ënëmaay: Jëtu'un kuja'ay myiny: Yë ntëjkës jä'ä yajtijëty Dios mëkajpxtakn e miitsëty jä'ä të xyaj'awinpijnëtë mä'tstakn.

¹⁴ Ënet myiintë jap tsajptëkoty ja wiintstëjk ets tekymya'atëjk ma ja Jesúsën ets ojts ja Jesús tyajtsokta'ay.

¹⁵ E ko ja teety wintsëntëjk ets ja yaj'ijxpëjkpëtëjk, mëti'ipë ja ënä'ämën tëyajtën nyija'awëtëpën, ko jëtu'un t'ijxtë ko ja Jesús ja mëj'ajtën tuny ets tmëtoowtë ko ja pi'k ëna'k mëk y'ëna'antë Hosana, Hosana, yajkutujkpë David yë y'U'unk, tääts jyoot'anpëjktë,

¹⁶ ets t'ënëmaaytyë ja Jesús: ¿Mmëtoopy wi'ix tääpë ja'ay y'ëna'antënë? Tääts ja Jesús y'ëtsooy: Nmëtoopyës ¿e këtiinëm xykyajpxtë ja noky ma kuja'ay myinyën ko jëtu'un jyata'any kyëpäta'anyë? Ma y'ënä'änyën: mëët ja pi'k ëna'k ja y'iyëty, ja mëxu'unkëty mëti'ipë tsi'tstëpën, tëë xymyo'oy ja mëk'ajtën ets y'ëwtëty ya'axtëty.

¹⁷ Ënet y'ëxmajtsëtë ets ojts ja Jesús nyijkxy jam Betania. Jamts ja tsuu tyajnajxy.

Ko ja Jesús tkajpxpoky ja higo kepy

¹⁸ Jopyëp, jam ënety kajpntum nyëjkxtë, tääts ja Jesús ja yuu pyätë.

¹⁹ Ënet ojts t'ijxpaaty tu'uk ja higo kepy jam tu'upë'am ets tmëwinkoony. Nitu'uk ja tyëëm kyaka'ty, ujts aay je'eyë jam. Ënet t'ënëmaay ja higo kepy: Nijëna'a mkanäkytyëëm'atëty. E ja higo kepy ënätyë ja tyitsy.

²⁰ Ko ja Jesús ja y'ijxpëjkpëtëjk jëtu'un t'ijxtë, tääts mëk tja'awëtyë ets tyajtëëwtë: ¿Wi'ix ko tääpë higo kepy ënätyë të tyi'itsy?

²¹ Tääts ja Jesús y'ëtsoowëtë: Tëy miits n'ënëëmëtë, pën mmëpëjktëp ets ka'ap yë mjot mwinma'any xyajtëkatstë, ka'ap yi'iyë xytyuntëty tääpë xy'ixtën koos yë higo kepy nyajtë'ëtsy. Yë'ëpaat ya'atë kopk jyëkyejpy xy'ënëëmëtëty: jëwa'ak yaa, nëjkx jap mejyjoty ets jatëp jëtu'un.

²² Pën mmëpëjktëp, myajmo'otëp tu'kë'ëyë tii m'amëtoowtëp ko Dios xymyëkajpxtëty.

Jesús kyutujkën

²³ Tääts ko ja Jesús tyëjkëy ma ja tsajptëjkën. Tam ënety yaj'ixpëky ko nyimiinëtë ja teety wintsëntëjkëty mëët ja mëjja'aytyëjkëty, mëti'ipë jutiis ja'ayëtyën ets yajtëëwëtë: ¿Tiikutujkën mëët ya'atë xytyuny? ¿Pën yë kuttujkën mmooyëp?

^24-25 Tääts ja Jesús y'ëtsoowëtë: Yë'ë näjyëtu'un nyajtëwäämpyës ma miitsëtyën. ¿Pën ojts yë Juan kyexyë ets yajnëëpätëty, Dios ëkë naaxwiinyëtë ja'ayë? Pën xy'ëtsoowinpijtëpës, ënät ntuk'ëwaanëtëty pën xymyoopyës yë kuttujkën koos jëtu'un winë ntuny.

²⁶ Ka'ap tjëkyepy n'ëna'anmëty ko ja'ay ojts kyexyë, jä'ä ko tsojk ja'ay wi'ix xytyu'unmëty, y'aaknija'awëtëp yë ja'ay ko Juan Dios kyäjpxynyajxpë ijty.

²⁷ Paaty ja Jesús t'ënëmaaytyë: Ka'apës nijawëtë. Ënet ja Jesús y'ëtsoowëtë: Nen ka'ap yam ntuk'ëwaanëtëty pën yë kuttujkën xymyoopyës.

Ja nyi''ijxpät ja nimäjtskpë ja u'unk ëna'k

²⁸ Tääts ja Jesús yajtëëwëtë: ¿Wi'ix miits ya'atë xyjyä'äkyukëtë? Tu'uk ja ja'ay, nimäjtsk ja myaank. Tu'uk ojts t'ënëëmë: U'unk, nëjkx jam mtuny kamjotm, ma tsatym kyamën.

²⁹ Tääts ja y'u'unk y'ëtsoowë: Ka'apës nnëjkxa'any, ok ojts wyinmaaytyëkatsy ets ojts nyijkxy tuunpë.

³⁰ Tääts wiinkpë ja myaank näjyëtu'un t'ënëmaay. E jä'ä tëyë ojts y'ëtsoyë: Oy, tyamës nëjkxëty, ets ka'ap ojts nyijkxy.

³¹ ¿Pën ojts tpatuny mëti'ipë ja tyeety ojts tyuk'ëne'emyën? Ets y'ëtsoowtë: Ja mëjëwyiimpë. Ets ja Jesús y'ënëmaayëtë: Tëy miits n'ënëëmëtë, pën mtëjkëtëp ma ja tsajpjotmëpë kuttujkën, jëwyiin nëjkx tyëkëtë ja yajkukëpäjtpëtëjkëty ets ku'into'oxytyëjkëty, oknëm miitsëty.

³² Jä'ä ko të ja Juan Yajnëëpäjtpë mjaniminëtë ets mjayaj'ijxpëkëtë wi'ix ja Dios tsokyën mjuuky'atëty, ets kä'äpyëm të xymyëpëktë mëti'ipë yë yajkukëpäjtpëtëjkëty ets into'oxytyëjkëty ojts tmëpëktën. E miitsëty oy tu'kë'ëyë ya'atë të xyjya'ixtë, kä'äpyëm të xymyëpëktë.

Ja nyi''ijxpät ja tuunpëtëjk ka'apë oy tyuntën

³³ Mëtoow'itë ya'atë wiinkpë ijxpäjtën: Tu'uk ja ja'ay ojts tpëjktä'äky ja tsyätym kam ets tnakeemy tnapëjky, ënät t'oytyuuny tu'uk ja tsyätym mä'tstakn ets ojts tkojy tu'uk ja potsy janty këjxm ma yajkëwent'atëtyën ja kam. Tääts ja tuunpëtëjk yajtukë'ëtëjkëtyë ënu'kxy ja kam ets ojts nyijkxy ëpëky it ja wintsën.

³⁴ Ko tpaty ja nyixëëw nyipo'o ma ja tsatym yajtukyën, ënät ja tyuunpë ojts jënaakën tkexy ma ja naax kamën ets t'amëtowa'antë ja tsatym mëti'ipë ja kukam paat'ajtëpën.

³⁵ E ja tuunpëtëjkëty ojts tmatstë ja ja'ay mëti'ipë ënety ja kukam të tkexyën; tu'uk ojts twoptë, ojts tu'uk tyaj'ooktë ets tu'uk tkuka'tstë.

³⁶ Tääts ja kukam ja tyuunpë wäänë nimay tkejxy. Näyjyëtu'un ojts jyajtkojnëpë.

³⁷ Ok ojts ja y'u'unk tkexy, jä'ä ko ojts myäy tyäjy: Wyintsë'ëkëtëp ënät yë n'u'unkës.

³⁸ Ko ja tuunpëtëjk t'ixjtë ja kukam ja myaank myiny, tääts nye'ëna'anëtë: Yë'ë ya'atë ja'ay kam myëwë'ëmäämpy. Oy ntimyaj'o'kmëty ets nmëwë'ëmëty yë tsatsymkyam.

³⁹ Ënet tmajtstë ets tyajpëtsëëmtë jam kamjotm ets tyaj'o'ktë.

⁴⁰ Ko jya'tëty ja kukam, ¿wi'ix jëtää yajtuntëty ja tuunpëtëjkëty?

⁴¹ Tääts y'ëtsoowtë: Yaj'o'kta'ajëp tääpë ëxëëkja'aytyëjkëty ets ja wiinkpë tuunpëtëjk nëjkx tmo'oy ënu'kxy ja kam mëti'ipë yaktëpën ja pëjktä'äky ënätyë mëti'ipë ja wintsën patëpën.

⁴² Ënet ja Jesús y'ëtsoowëtë: ¿Ka'anëm xykyajpxtë ja Dios ja y'aaw y'ayuk mëti'ipë ënaanpën?: Ja tsaa mëti'ipë ja pojtspëtëjk ojts t'ixka'atstën, jä'ä tyam të nyäxy potsy myëtënääpyë. Ja Wintsën jëtu'un të tuny, ets ëëtsajtëm mëj'ixy n'ijxmëty.

⁴³ Paaty miits n'ënëëmëtë: Myajpëjkëjantëp ja tsajpjotmëtë kuttujkën ets yë'ë yajmo'oja'antë ja kajpn mëti'ipë ja pëjktä'äky oy yajpëtë'ëkëpën.

⁴⁴ E mëëtpë ja tsaa, pën jam ka'ap ma yë'ëjën, tukwop tuka'atsë jyata'any; ets pën ya'atë tsaa tukka'apäjtëp, way way jyata'any.

⁴⁵ Ko ja teety wintsëntëjk ets ja fariseë ja'ayëty jëtu'un tmëtoowtë, ko ja Jesús jëtu'un myëtyä'äky, ënät tja'akyujkëtyë ko yë'ë yajnimëtyaktëp.

⁴⁶ Ënet ja Jesús tjamatsantë. Ka'ap ojts tmatstë jä'ä ko yë'ë ja mayjyä'äy tsyë'këtëp, mëti'ipë myëpëjktëpën ko ja Jesús Dios käjpxynyajxpë jä'ä.