Mateo 17 - Biblia Dc en Mixe de Quetzaltepec

Ko Jesús tyëkatsy

¹ Ënet ja Jesús tpawooy ja Pedro, Santiago mëët ja y'uty Juan ets ojts pya'tëkëtë ma tu'uk ja kopkën.

² Ma ënety jam jëtu'un yajpaatën ënät ojts ja Jesús tyëkatsy. Ajajp atë'kxp ja wyiin jyëjp ijxtëm ja xëëw y'änyën ets ja wyit ojts pyoopë ijxtëm ja ajajkën.

³ Tääts t'ijxtë ja Moisés ets ja Elías ko mëët myëtya'aktë ja Jesús.

⁴ Ënet ja Pedro t'ënëmaay ja Jesús: Wintsën, oy koos yaa nyajpaatë. Pën mtsojkpy, minës tëkëëk yë ujts'aaytyëjk n'ëk kojy: tu'uk mijts mjä'ä, tu'uk yë Moisés yë jyä'ä ets tu'uk yë Elías yë jyä'ä.

⁵ Tam ënety ja Pedro jëtu'un kyäjpxy ko ja yoots mëti'ipë ajajpën nyiju'uxëtë ets jap yootsjoty yajmëtooy tu'uk ja ayuk mëti'ipë ënaanpën: Ya'atës n'U'unk'ajtyp, mëti'ipës ni'ik ntsojkpyën. Ntukxoontäkpyës yë'ë. Mëtoow'itë, mëti'ipë nyikäjpxypën.

⁶ Ko ja Jesús ja y'ijxpëjkpëtëjk tmëtoowtë, ënät nyäkyoxtënaaytyakëtë naaxkëjxy mëët ja mëktsë'ëkë.

⁷ Tääts ja Jesús myëwinkoonëtë, ojts kyë'ënixajëtë ets y'ënëmaayëtë: Pëtë'ëktë këtii mtsë'ëkëtë.

⁸ Ko y'ijxë'ktëy ka'ap ojts ma pën t'ëk'ijxnëtë, nätyu'uk ja Jesús jamnë.

⁹ Tam ënety kyëta'aktë Kopkwinm ko ja Jesús ojts y'ënë'ëmxëtë: Ka'ap pën xytyuk'ëwaanëtëty ko jëtu'un të xy'ixtë, jäänëm koos njuukpyëkëty, ëjts, naaxwiinyëtë ja'ay y'U'unk.

¹⁰ Tääts ja y'ijxpëjkpëtëjk yajtëëwëtë: ¿Tii ko yë tsajptëkotyëtë yaj'ijxpëjkpëtëjk y'ëna'antë ko ja Elías jëwyiin myina'any?

¹¹ Ets ja Jesús y'ëtsooy: Mëtëy yë'ë ko Elías jëyëjp myina'any ets tyaj'o'oyëtya'ajëty tu'kë'ëyë winë.

¹² Je'eyëp koos jëtu'unës n'ëna'any ko ja Elías tëë ja myiny ets yë'ë ka'ap të t'ixkaptë, ni'ikyë ëxëëk të tuntë ijxtëm ja jyot wyinma'anyëtyën. Näyjyëtu'un ja naaxwiinyëtë ja'ay ja y'U'unk ëxëëk tuna'antë mëët ja kyë'ë y'aawëty.

¹³ Ënet ja y'ijxpëjkpëtëjk tja'akyujkëtyë, ko Jesús yë'ë tyijpy ja Juan Yajnëëpäjtpë ko y'Eliiësëty.

Ma ja Jesús tyajtso'okyën tu'uk ja yujkyeeky ëna'k ku'oypyëmëëtpë

¹⁴ Ko ojts jya'të ma ja mayjyä'äyën, ënät tu'uk ja'ay myiiny ma ja Jesúsën ets nyäkyoxtënaaytyakë tääts y'ënëmaayë:

¹⁵ Wintsën, pa'ëyoowkës ja n'u'unk. Mootyë pa'am myëët'ajtyp, nëkooyë y'ëyoownë. Jëna'ajëty y'akëtawë jëënjoty, ets jëna'ajëty nëëjoty.

¹⁶ Tëës yaa njatuknimintë yë m'ijxpëjkpëtëjk ka'ap të myäyëtë tyajtso'oktëty.

¹⁷ Tääts ja Jesús y'ëtsooy: Miitsëty jä'ä mja'ay'atë mëpëjkëntuk ets je'eyë ja m'ëxëëkjot m'ëxëëk winma'anyëty. ¿Jëna'a jëtu'un xyä'äkyukëja'antë koos nyajpaaty ma miitsëtyën? ¿Maapaat jëtu'un mëk näpyëjkta'akëtëtyës ko miitsëty ka'ap mja'akyukëtë? Yaa yajmintë ja yujkyeeky ëna'k.

¹⁸ Ënet ja Jesús ojts t'ojpëtsëmy ja ku'oypyë ma ja yujkyeeky'ënakën ets ënätyë tsyoky y'akëtäky.

¹⁹ Oknëm ja Jesús ojts ja y'ijxpëjkpëtëjk myëkäjpxyë ëpëky ets yajtëëwëtë: ¿Tii ko yë ku'oypyë të xykyamaytyës etsës n'ixkäxtëty?

²⁰ Tääts ja Jesús y'ënëmaayëtë: Jä'ä ko miitsëty ka'ap oy mmëpëktë. Tëy n'ënëëmëtë, ko jeexyë mmëpëktë, oy tyim yi'inëmëty, jëtu'un tä mostasë pajkën, mnëmaaytyëp jeexyë xiipë kopk: Jëwa'ak yaa, ximtsow nëjkx ets ja kopk jëwa'kp ja jeexyë. Nitii jeexyë tsip xykyajawëtë.

²¹ Yë ku'oypyë jëwa'kp näjyëtu'un ko ja'ay Dios tja'amyetsy ets ko ja'ay y'ayuu'aty.

Ko Jesús tnikäjpxy mëmäjtsk ok ja y'o'kën

²² Tam ënety të ye'eymyuktë ja Jesús mëët ja y'ijxpëjkpëtëjk Galilea y'itjotm, ko ja Jesús y'ënëmaayëtë: Yajkë'ëyakaanp yë naaxwiinyëtë ja'ay yë y'U'unk ma mayjyä'äyën,

²³ ets tyaj'ooka'antë, je'eyëp ko kom tëkëëk xëëw jyuukpyëka'any jatëkok. Ko jëtu'un ja aaw ayuk tmëtoowtë, mon tuk ojts wyë'ëmtë.

Tsajptëjk kukëpäjtën

²⁴ Ko ja Jesús ets ja y'ijxpëjkpëtëjk jyajtë jam Capernaúm. Ja ja'ayëty mëti'ipë yajkukëpäjtëpën ma ja tsajptëjk yaj'ajuuytyukyën ojts ninëjkxtë ja Pedro ets tyajtëëwtë: Yë mwintsën ¿Këtii yë tsajptëjk yë y'ajuuytyuk tyajkë?

²⁵ Tääts ja Pedro y'ëtsooy: Kyukëpejtyp yë'ë. Ko ja Pedro tyëjkëy tëkoty yë'ë ojts ëka'any yajtëyë ja Jesús ets y'ënëmaayë: ¿Mijts Simón wi'ix m'ëna'any? ¿Pën ja yajkutujkpëtëjk ets ja yajkëpäjtpëtëjk yaapë naaxwiiny yajkëpäjtëp: ja jyä'äy ëkë jaaypyaat jaaypyo'kxyë?

²⁶ Tääts ja Pedro y'ëtsooy: Jaaypyaat jaaypyo'kxy. Tääts ja Jesús y'ënäny: Paaty n'ënëëmëtë, ko yë ja'ay mëti'ipë kunaax'ajtp kukajpn'ajtpën ka'ap kyopkpëkyëty kyëpätëty.

²⁷ Je'eyëp ko këtiipë pën tka'oyjyawëty, nëjkx mnëë jëyujk matsy jap nëë ëkë'p ets ja nëë jëyujk mëti'ipë ëka'any mxuupyën, jap y'aawjoty xypyaata'any yë meeny mëti'ipës nkëpäjtën'atëpën ets mijts yë mjä'ä, tääts nëjkx xykyujuy ja këpäjtën.