Mateo 11 - Biblia Dc en Mixe de Quetzaltepec

Ja Juan Yajnëëpäjtpë kyexyye'epyë

¹ Ko Jesús tukmëmëtyaktaay ja majkmäjtskpë y'ijxpëjkpë mëti'ipë tyuntëpën, ojts nyijkxy yaj'ijxpëjkpë, tkajpxwä'kxy ja Dios ja y'aaw y'ayuk maajëty ja kajpnën mëti'ipë jam yajpatpën ma Galilea y'itjotmën.

² Jap ënety yë Juan pujxn tëkoty ko tnija'awëy wi'ix ja Kristë winë tunyën, ënät tkejxy ja y'ijxpëjkpëtëjk ma ja Jesúsën,

³ ets tyajtëwtëty: ¿Mijts jëtu'un mëti'ipë minaanpën, ëkë njaak'ëwxijtëp ëëts ja wiinkpë?

⁴ Tääts ja Jesús y'ëtsooy: Nëjkxtë ets tuk'ëwaanëtë ja Juan mëti'ipë m'ijxtëp mmëtoowtëpën.

⁵ Tukmëmëtya'aktë ko ja ja'ay wiintspë y'ixë'ëktë, ko ja pajk ma'atpë ye'eytyë, ko ja pu'uts mëëtpë tsyo'oktë, ja natpë tëë myëtoowpëktë, ja o'kpë tëë jyuukpyëktë ets ko ja ëyoopëja'ay ja oy aaw oy ayuk yajtuk'ëwaanëtë.

⁶ Ets akujk jotkujk ja'ay yajpaaty mëti'ipë ka'ap y'anäp y'atä'pxën maas ëjtsën.

⁷ Tëë ënety tsyo'onëtë ja Juan ja kyexyye'epyë, ko ja Jesús tnimëtyaktëjkëy ja Juan, jëtu'un y'ënäny: ¿Tii ojts xynyinëjkxtë jam të'ëts'itjotm ets wi'ix ojts xy'ixtë? ¿Ojts xy'ixtë ja tsajpkäpyny tëëpë wyimpojtaaynyënë?

⁸ Ets pën ka'ap, ¿tii ojts xynyinëjkxtë ets tii ojts xy'ixtë? ¿Tu'uk ja ja'ay janty tsujpë xyoxyëtyënë? Mnija'awëtëp miits mëti'ipë janty tsuj näxyojxëtëpën, jam ja y'itë ma ja yajkutujkpë tsyëënëtën.

⁹ Pën ka'ap jyëtu'unëty, ¿tiits ko m'ojtstë? ¿Yë'ë ojts xy'ixtë tu'uk ja Dios kyäjpxynyajxpë? Jëtu'un, mëtëy yë'ë ets jä'ä mëti'ipë ni'ik mëj'äämpyën këtiinëm ja Dios kyäjpxynyajxpë.

¹⁰ Yë'ë Juan yajnimëtyakp ma ja Dios ja y'aaw y'ayuk myinyën kuja'ay, ko y'ënä'äny: Tyamës jëwyiin nkexy tu'uk ja nkäjpxynyajxpës ma mijtsën, ets ja mnë'ë mtu'u tnipëjktaakëty.

¹¹ Tëy miits n'ënëëmëtë ko ni pën jëtu'un kyamëjjëty ijxtëm yë Juan Yajnëëpäjtpën. Jä'ä ko jam ma tsajpjotmëpë kuttujkën mëj'äämpy yë ja'ay nyäxy mëti'ipë mutsk näyajnajxëpën yaa naaxwiiny.

¹² Ma jyuuky'ätyën yë Juan Yajnëëpäjtpë ets tyampaat, yë tsajpjotmëpë kuttujkën mëk tsyippaaty. Mëti'ipë kumëjaaw näjya'awëyëtëpën ëxëëk tjanty ixtë ets tyim yajkutëkoyantëp.

¹³ Yë Dios yë kyäjpxynyajxpëtëjk ets Moisés yë y'ënä'ämën tyiyajtën je'eyë ojts t'akajpxtë ko ënety myiny wyinkony ja tsajpjotmëpë kuttujkën, koonëm myiiny ja Juan yajnëëpäjtpë;

¹⁴ ets pën mkupëjktëp, yë Juan jëtu'un ojts myiny tä yë Elías kyutëkatsën.

¹⁵ Pën ja tyatsk mëtoopy, wä'än tmëtoowkukë.

¹⁶ Ti ntukmë'ijxkijpxmëp ja tyampë ja'ayëty. Tsojk jëtu'un mpëjktakëm tä pi'k ëna'këtyën mëti'ipë kajpn itkujky ëyë'ktëpën ets ja myëku'uk tmëkajpxmuktë ets t'ënëëmëtë:

¹⁷ Tëës yë xuxn njatukxu'uxtës, miitsëty ka'ap të m'ätstë, tëëjës nja'ëwtë mon tuk, miitsëty ka'ap të mya'axtë.

¹⁸ E ko myiiny ja Juan ka'apë kyäy y'uukyën ijxtëm ja ja'ay kyäytyën y'uuktën, miitsëty jëtu'un m'ënantë ko ku'oypyë myëët'ajtyp.

¹⁹ Ets ënät ja naaxwiinyëtë ja'ay y'U'unk të jyamiinpë, mëti'ipë kääpy ukpën ijxtëm ja ja'ay kaxpën, miitsëty jä'ä m'ëna'antë koos nkäxëty koos n'ajëënëty ets ko yë'ëjës mëët oy nämyäyë ëxëëkja'aytyëjk ets yajkukëpäjtpëtëjk mëti'ipë Roma myëtuuntëpën. Temë jää nyikëxë'ëky ja Dios ja wyijy'ajtën kyejyajtën ma winë yajtunyën.

Ma yajtuk'ojtën ja naax kajpn ko ka'ap myëpëktë

²⁰ Tääts ja Jesús t'ojtso'ontäky ja naax kajpn ma ënety kanaak ja Dios ja myëj'ajtën të tyaj'ijxën, jä'ä ko ka'ap ënety të tmëpëktë ja Dios. Ënet ja Jesús y'ënäny:

²¹ Mon tuk myajpaatë miitsëty Corazín ja'ayëty ets Petsayëtë ja'ayëty, mëët ko të mkamëpëktë ets ko të xykyayaj'oyëtë mjot mwinma'anyëty. Ko jeexyë ja Dios ja myëj'ajtën të tyuny të jyätyë jam Tirë ets Sidón ijxtëm të tyuny të jyätyën ma miitsëtyën, tëëyëp ja nyajjootwinpijnëtë ets tëëyëp ja u'kxypyë wit natuktëjkënëtë, ets ja kuyjaam nyanätyukniwëjënëtë.

²² Temë jëtu'un miits n'ënëëmëtë, ko nëjkx ja naaxwiinyëtë ja'ay yajpaye'ey ja nyëë pyoky, wäänë mëk nëjkx miits myajtëytyuntëty këtiinëm ja ja'ay mëti'ipë tsënaaytyëp jam Tirë ets Sidón.

²³ Ets miitsëty Capernaumëtë ja'ayëty, ¿tsajpjotm miits xytyijy myajmënëjkxa'antë? Niwi'ix'äämpy. Wäänë pa'tkë'p mnëjkxtëty ëyoowtaknjoty, jä'ä ko kooxyëp jeexyë ojts jëtu'unpë ja mëj'ajtën jam y'ëktunyë ma ja Sodomë kajpnën, tääpë kajpn tam jeexyë tyampaat yajpaaty.

²⁴ Jëtu'un miits n'ënëëmëtë ko wäänë mëk nëjkx myajtëytyuntë këtiinëm ja Sotomëtë ja'ayëty.

Ëjts nimiintëk ets po'kxën xypyaatëty

²⁵ Näy jä'ä xëëw ja Jesús y'ënäny: Tatë, nmëjja'ap nkënu'kxyjya'ap mijts; tsajpjotmëpë ets naaxwiinypë Wyintsën'atyën, jä'ä ko tëë ja ja'ay yu'unkpë naxymyëpë jyuuky'atën xytyuknijawë ja winma'any tsippëpë, ja winma'any mëti'ipë të xytyukwinkuyu'utsyën ja ijxpëkyjyä'äytyëjkëty ets wijyjyä'äytyëjk.

²⁶ Jëtu'un Dios Teety, jä'ä ko jëtu'un mijts të xytsyoky.

²⁷ Tääts ja Jesús jyaak'ënany: Aak ëjts ja nTeetyës të xymyooytyä'äy tukë'ëyë winë. Ka'ap pën tnijawë ja u'unk, yi'iyë ja Teety nyija'ap; ets ka'ap pën tnijawë ja Teety, yi'iyë ja u'unk nyija'ap ets nyijawëtëp ja ja'ay mëti'ipë ja u'unk tyuk'nijawëjäämpyën.

²⁸ Nimiintëkës ni'ëmukë mëti'ipë të y'ënu'kxëtën mëët ja tuunk ets ja tsëmy kë'ëy, ëjts miits nyajpo'kxantëp.

²⁹ Kupëktë ëjts ja n'ijxpëjkën ets jatë ëjts ja ntu'unën, mä'kxtujkpës, ets yujy tëtä'äkyës ja nwinma'any, jëtu'unts xypyaatëty ja po'kxën.

³⁰ Yë ijxpëjkën mëti'ipë miits tyam ntuk'ëwa'anëtëp, ka'ap tsyipë; etsës ja ntu'unën, jëtu'un jä'ä ijxtëm tu'uk ja tsëmy mëti'ipë ka'ap jye'emtyëtytyën.