Marcos 9 - Biblia Dc en Mixe de Quetzaltepec

¹ Näyjyëtu'un ja Jesús y'ënëmaayëtë: Tëy miits n'ënëëmëtë ko tää yaa wyë'ëmtë mëti'ipë ka'ap y'ooka'antën koonëm t'ixtëty ko ja Dios ja kyutujkën ënety myiny mëët ja mëk'ajtën.

Ko Jesús tyëkatsy

² Komtëtujk xëëw ja Jesús mëët ja Pedro, Santiagë ets ja Juan pya'tëjkëtë ma tu'uk ja kopkën mëti'ipë këjxmën. Jamts ja Jesús ojts tyëkatsy ja wyiin jyëjp.

³ Yajxon ojts ja wyit y'atë'kxnë janty poop yaj'ixy, ni pën ja'ay jëtu'un ja wyit kyapoopëty oy jënu'un të tjapujy.

⁴ Ënet ja y'ijxpëjkpëtëjk t'ijxtë ja Elías mëët ja Moisés tmëëtmëtya'aktë ja Jesús.

⁵ Tääts ja Pedro t'ënëmaay ja Jesús: Wintsën, oy koos yaa nyajpaatë. Minës n'ëk'oytyuntë tëkëëk yë aaytyëjk, tu'uk mijts yë mjä'ä, tu'uk yë Moisés yë jyä'ä ets tu'uk yë Elías yë jyä'ä.

⁶ Paaty ja Pedro ojts jëtu'un y'ënä'äny jä'ä ko tëë ënety tsyë'ëkëtë, ka'ap y'ëkwinma'anypyatnëtë wi'ix t'ënëëmëtëty ja Jesús.

⁷ Ënet ja yoots ojts myiny ma ënety jamëtyën ets ojts ja yoots yajnitëkoyëtë; jap yootsjoty yajmëtooy tu'uk ja ayuk mëti'ipën ënanën: Ëjts ya'atë n'u'unk, mëti'ipës ntsojkpy nja'apën, mëtoow'itë ets mëmëtowtë wi'ix y'ënä'änyën.

⁸ Ko ënätyë y'ijx'ëwëtijtë, ni pën ojts maa tka'ëk'ijxnëtë mëët ja Jesús, yi'iyë ja Jesús näty'uknë.

⁹ Ko kyëtaknëtë, tsyo'onëtë jam kopkëjxm, ënät ja Jesús y'ënëmaayëtë ets ka'ap pën tuk'ëwaanëtëty mëti'ipë të t'ixtën, koonëm jyuukpyëkëty jatëkok.

¹⁰ Paaty ja y'ijxpëjkpëtëjk kyuyu'tsëtë, je'eyë aak ayi'iyë nyäyajtëëwëtë tii jëtu'un jyatijäämpy ko jyuukpyëka'any jatëkok.

¹¹ Tääts tyajtëëwtë ja Jesús: ¿Tii ko yë tsajptëkotyëtë yaj'ijxpëjkpëtëjk y'ëna'antë ko ja Elías jëwyiin minaanp?

¹² Ënet ja Jesús y'ëtsooy: Mëtëy yë'ë, jëwyiin yë Elías myina'any ets tu'kë'ëyë tyaj'o'oyëtya'aja'any winë. ¿E tii ko ja Dios ja y'ayuk y'ënä'äny koos ëjts n'ëyo'onpaata'any ets ko ka'apës nyajkupëka'any?

¹³ E jëtu'un miits n'ënëëmëtë ko ja Elías tëë ja myiny, ets ja ja'ayëty ëxëëk ojts tuntë ijxtëm ja jyot wyinma'anyëtyën, jëtu'un ijxtëm ja Dios ja y'aaw y'ayuk y'ënä'änyën wi'ix ënety jyata'anyën.

Ko Jesús tyajtso'oky ja yä'äy ëna'k mëti'ipë myëët'ajtypyën ja ku'oypyë

¹⁴ Ko wyimpijtë ma ënety jam ja ijxpëjkpëtëjkëtyën ënät t'ijxtë ko ja mayjyä'äy ënety të nyapikëtë ets ja tsajptëkotyëtë yaj'ijxpëjkpë jä'ä ënety jam mëët nyätyij nyäkyotëtë aawkëjxm ayukkëjxm.

¹⁵ Ko t'ijxtë ja Jesús, ni'ëmukë ja ja'ay nyëjkxtaaytyë pëyi'ikyë ets ojts tkajpxpo'kxtë mëët ja xoontakën.

¹⁶ Tääts ja Jesús yajtëëwëtë: ¿Ti myajkäjpxykyojtëp mëët yë n'ijxpëjkpëtëjkës?

¹⁷ Ënet tu'uk ja ja'ay y'ëtsooy: Wintsën, tyaajës tu'uk yë nmaank ku'oypyë myëët'ajtypyën mëti'ipë ka'ap yajkäjpxyën.

¹⁸ Ko yë ku'oypyë myätsyë ënätyë yajkëtayë ets o'pky jyänty pyëtsimy ma y'aawën, tä ënät yë tyëts tjanty y'akä'pmuky ets jëtu'unyë wyi'imy tu'k'ityë. Tëës yë m'ijxpëjkpëtëjk njanëëmë ets jeexyë tyajpëtsëmtë ja ku'oypyë ma yë'ëjën e yë'ëjëty ka'ap të myäyëtë.

¹⁹ Tääts ja Jesús y'ëtsooy: Miits ka'ap mmëpëktë. ¿Wi'ix ko miitsëty ka'ap tii xytyuntë, jä'ä xytyimtsoktë aak'ëjts winë ntunëty? Yajmintë yaa ya'atë yujkyeeky ëna'k.

²⁰ Tääts ja Jesús ojts tukninëjkxtë ja yä'äy ëna'k. Ko ja Jesús ja ku'oypyë y'ijxpatë, ënätyë ja yä'äy ëna'k ojts jyëpijpkëtä'äky ets tyëjkëy yäjtspë pojpë tyam ja o'pky jyänty pyëtsimy ma y'aawën.

²¹ Ënet ja Jesús tyajtëëy ja u'unkteety: ¿Jëna'a jëtu'unpë pa'am pyäätyë? Tääts ja u'unkteety y'ënäny: Mutsknëm.

²² Kanaak ok ja ku'oypyë jëënjoty ets nëëjoty të yajkukëtawëty ets yaj'ooka'anyë. Pën mëpaat xyajtso'oky, pa'ëyoowtëkës ets putëjkëtëkës.

²³ Tääts ja Jesús y'ënäny: ¿Tii ko jëtu'un m'ëna'any pën mëpaat xyajtso'oky? Aak oy yë ja'ay pyëtsë'ëmxëtë winë mëti'ipë Dios mëpëjktëpën.

²⁴ Ënet ja yä'äy ëna'k ja tyeety mëk y'ënäny: Nmëpëjkpyës; putëjkëtëkës ets njaaktimmyëpëkëtyës.

²⁵ Ko ja Jesús t'ijxy ja mayjyä'äy ko pyëyë'kmuktë, ënät mëk twinkukajpxëy ja ku'oypyë: Ku'oypyë, uumpë natpë, tyam n'ëne'emy ets xy'ëxmatsëty tyaapë yä'äy ëna'k ets ka'ap nëkoo xy'ëkmëwanëty.

²⁶ Tääts ja ku'oypyë mëk y'ayaxtuty ets ja yä'äy ëna'k ojts tjaakyajmooty. Ënet ja ku'oypyë ojts pyëtsimy, jëtu'un yaj'ixy tëë yowë tyaj'ooky ja yä'äy ëna'k. Jëtu'un may ja ja'ay y'ënantë ko tëë y'ooky.

²⁷ Tääts ja Jesús ojts twijtsë'ëky ets ja yä'äy ëna'k pyëti'ky.

²⁸ Ok ja Jesús wyimpijty ets jyä'äjty ma tu'uk yë tëjkën, Tä ja y'ijxpëjkpëtëjk yajtëëwëtë ma ënety jap aakyë'ë yajpaatën: ¿Tii koos ja ku'oypyë ka'ap të xymyäytyë etsës n'ixkäxtëty?

²⁹ Tääts ja Jesús y'ënäny: Ya'atë jëtu'unpë ku'oypyë ënät yë pyëtsimy ko Dios yajpëjktsoy mëk'ajtën.

Ko ja Jesús nimëtyä'äky mëmäjtsk ok ja y'o'kën

³⁰ Ko ojts tsyo'onëtë, tääts nyajxtë jam Galilea ets ja Jesús ka'ap pën tjatuknijawëjany ko ënety jam yajpaaty,

³¹ jä'ä ko aak ayi'iyë ënety ja y'ijxpëjkpëtëjk jam tyaj'ijxpëky, ets t'ënëmaay: Yajkë'ëyakaanpës ma naaxwiinyëtë ja'ayëtyën ets xyaj'ooka'antës, je'eyëp ko kom tëkëëk xëëw jatëkok njuukpyëka'anyës.

³² Ka'ap ja y'ijxpëjkpëtëjk tja'akyujkëtyë ko jëtu'un yaj'ënëëmëtë ets tsë'këtëp ko tyajtëwtëty.

Pën ni'ik mëj'äämpy

³³ Tääts ja Jesús mëët ja y'ijxpëjkpëtëjk jyajtë jam Capernaúm. Ko tyëjkëtyë tëkoty, japts ja Jesús tyajtëëy ja y'ijxpëjkpëtëjk: ¿Tii të xynyimëtya'aktë ko të ntu'uye'eyëmë?

³⁴ Tääts ja y'ijxpëjkpëtëjk amonyë wyë'ëmtaaytyë, ka'ap wi'ix y'ënantë, jä'ä ko yë'ë ënety të tnimëtya'aktë pën ni'ik mëj'äämpy.

³⁵ Ënet ja Jesús nyaaxwe'tsy ets ja nimajkmäjtskpë ja y'ijxpëjkpëtëjk tyaxëy ets t'ënëmaay: Pën tsyojkën'ajtyp ets mëj'äämpy y'ita'any, naxym mëpaat nyäpyëjktä'äkyë ets wyinkë'ë kyujkkë'ëjëty ma ja ja'ayëtyën ni'ëmukë.

³⁶ Ënet ja Jesús tsä'änë'ky tu'uk ja pi'k ëna'k ets tpëjktäky itkujky. Tam jëtu'un tpatseeny ko y'ënäny:

³⁷ Pën kyupëjkpy yë pi'k ëna'k jëtu'un tä ëjtsën, nän xykyupëjkpës ënety ëjts; ets pën xykyupëjkpës, ka'ap y'ëjtsëty nätyu'uk xykyupëky, nän kyupëjkpy ja mëti'ipës xykyäjxpën.

Pën ka'ap xymyëtsip'ajtëm, xy'apupäjtëm ënäty

³⁸ Ënet ja Juan t'ënëmaay ja Jesús: Wintsën, tëëjës n'ixtë tu'uk ja ja'ay mëti'ipë mijts ja mmëkajtën yajtuumpyën ets ja ku'oypyë t'ixkexy. Tëës n'akajpxtuktë jä'ä ko ka'ap ëëtsajtëm xypyajëtijtëm.

³⁹ Tääts ja Jesús y'ënäny: Ka'ap xy'akajpxtuktëty. Pën mëj'ajtën tyuunpy ëjts nxëëwkyëjxmës, ka'ap pyokyëty tuny ets ka'ap tjëkyepy tëkatsy xynyimëtya'akëtyës.

⁴⁰ Pën ka'ap xymyëtsip'ajtëmë, ëëts mëët nyajpatëmë.

⁴¹ Tëyës n'ëna'any, ko pën mmo'ojëtëty ja tëtsyk nyëë tu'ktsim jä'ä ko ënety nja'ay'atë, yajmo'ojëp ja kuma'ayën.

Wi'ix kyutsë'ëkëty ko ja'ay nyajpokykya'amëty

⁴² Pën yajpokytyuunpy yë u'unk ëna'k mutskjatypë mëti'ipës xymyëpëjktëpën, nikë oy ko jeexyë ja paantaak yajtukyo'ktsumë ets mejyjoty yajkujëpipëty.

^43-44 Pën myajpokytyuunëp yë mkë'ë, katspux. Nikë oy ko kë'ëtuk xypyaatëty ja xëmëkyëjxmëpë ja juukyajtën ets këtii ko mkë'ë mëët kä'pxy myajpëjkta'akëty ëyoowtaknjoty, ma ja tënë'k nijëna'a kya'ookyën ets ja jëën nijëna'a kyapi'itsyën.

^45-46 Pën myajpokytyuunëp yë mteky, katspux. Nikë oy ko xypyaatëty ja xëmëkyëjxmëpë ja juukyajtën tekytyu'uk ets këtii ko mteky mëët kä'pxy myajpëjkta'akëty ëyoowtaknjoty, ma ja tënë'k nijëna'a kya'ooky ets ma ja jëën nijëna'a kyapi'itsyën.

⁴⁷ Ets pën yë mwiin myajpokytyuunëp, juut. Nikë oy ko wiintu'uk mtëkëty ma ja Dios ja kyutujkënën ets këtii ko mwiin mëët kä'pxy myajpëjkta'akëty ëyoowtaknjoty,

⁴⁸ ma ja tënë'k nijëna'a kya'ookyën ets ma ja jëën nijëna'a kyapi'itsyën.

⁴⁹ Tu'ktonyë nëjkx wyatsta'ay yaa naaxwiiny mëët ja kaan ets ja jëën.

⁵⁰ Yë kaan oy yë'ë, ko ja tsya'amtsajtën tyëkoyëty tii mëët winë yajtukta'amtsëty. Itë ijxtëm ja oypyë kaanën ets juuky'atë akujk jotkujk nixim niyam.