Marcos 4 - Biblia Dc en Mixe de Quetzaltepec

Ja nipë nyi''ijxpät

¹ Ënet jatëkok ja Jesús yaj'ijxpëjktso'ony mejypyë'am. Jä'ä ko ja ja'ay nëkooyë nyimay'ajnëtë mëti'ipë ojts ye'eymyuktën ma ja Jesús jamën, ënät tyëjkëy kepy nëëwinye'epyëjoty mëti'ipë ënety japën nëëjoty. Ënet nyaaxwe'tsy ets ja mayjyä'äy wyë'ëmtaaytyë jam nëëpë'am.

² Jamts tyaj'ijxpëjky kanaakjëjp winë mëët ja ijxpäjtën. Ma yaj'ijxpëkyën jëtu'un ja mayjyä'äy t'ënëmaay:

³ Mëtowtë. Tu'uk ja ja'ay tsyo'ony tsajpmok wëjpë.

⁴ Ko ja tsajpmokpajk ojts twëjjëtity, tu'kpëky ojts kyä'äy tu'ujotm. Ënet ja joon myiintë ets tpiiwmujktë.

⁵ Jatu'kpëky ja tsajpmokpajk ojts kyä'äy tsaajotm ma ja naax ka'ap oy myäjpxyëtyën; yë'ë tsojk mujx jä'ä ko ka'ap ja naax myäjpxyëty.

⁶ Ko y'aantäky, tääts ojts xyootsy ets ja tyitsy jä'äkyëjxm ko ja tyikts kyakëkëty.

⁷ Jatu'kpëky ja tsajpmokpajk ojts kyä'äy äpny akujky. Ko ja äpny ojts yontë ojts nyi'a'ampety ets ja tsajpmok yon tyitsy, kä'äp tyëëmpejty.

⁸ Jatu'kpëky ja tsajpmokpajk ojts kyä'äy jë'kxynyaaxjoty; jä'ä ojts oy yony ets tyëëmpejty. Tam mëti'ipë tyëëm yajkën i'px majk ja tu'ukpë ja tsajpmok yajnipyën, tam mëti'ipë tëkë'px tëëmpäjtën ets tam mëti'ipë mëko'pxën.

⁹ Ko ja Jesús myëtyaktaay, tääts y'ënëmaayëtë ja mayjyä'äy: Pën ja tyatsk tyukmëtoopy, wä'än tmëtoowkukë.

Tii ko ja Jesús myëtyä'äky mëët ja ijxpäjtën

¹⁰ Ko ja Jesús ënety jam yajpaaty mëët ja nimajkmäjtskpë ja y'ijxpëjkpëtëjk ets mëët ja wiinkëtypë mëti'ipë ënety ja Jesús myëwinkon'ajtëpën, ënät tyajtëëwtë ja Jesús wi'ix nyiwijyën ja ijxpäjtën.

¹¹ Tääts ja Jesús y'ënëmaayëtë: Miitsëty tëë ja Dios mtuknijawëtë mëti'ipë ijty kayajnija'apën; temë mëti'ipë jëkäm yajpatëpën mëët ja ijxpäjtën winë yajtukmëmëtya'aktë.

¹² Jëtu'un ka'ap tja'akyukëtëty oy tii tja'ixtëty, oy tii tjamëtowtë, ka'ap tmëtoowkukëtëty; këtiipë jyootwinpitëty ma Tiosën ets ka'ap ja pyoky yajnimä'kxtëty.

Ko ja Jesús tkajpxtë'kxy ja nyi''ijxpät ma ja'ay nyi'ipyën

¹³ Tääts ja Jesús tyajtëëy: ¿Ka'ap xyjyä'äkyukëtë ya'atë ijxpäjtën nyimëtyä'äkyë? ¿Wi'ix wiinkpë mëtyä'äky ijxpäjtënmëëtpë xyjyä'äkyukëja'antë?

¹⁴ Mëti'ipë ja tsajpmokpajk wyijpyën, jëtu'un yë'ë ijxtëm ja ja'ay mëti'ipë ja Dios ja y'aaw y'ayuk kyajpxwä'kxypyën.

¹⁵ Ja tëëmt mëti'ipë ka'ajën tu'ujotm, jëtu'un jä'ä ijxtëm ja ja'ayën mëti'ipë y'amëtoow'ijtëpën ja Dios ja y'aaw y'ayuk. Ko tmëtowtë, ënät ja mëjku'u ënätyë nyiminëtë ets pyëjkxëtë ja Dios ja y'aaw y'ayuk mëti'ipë të tjamëpëktën.

¹⁶ Ja tsajpmokpajk mëti'ipë ka'ajën tsaajotm, jëtu'un jä'ä ijxtëm ja ja'ay mëti'ipë y'amëtoow'ijtëpën ja Dios ja y'aaw y'ayuk ets akujk jotkujk tkupëky.

¹⁷ Jëtu'un jä'äjëty ijxtëm ja tsajpmokyonën mëti'ipë ka'ap tyiktsk kyëkëtyën. Ka'ap jeky y'ity jä'äkyëjxm ko ja Dios ja y'aaw y'ayuk tku'ëyo'onpatëtë ëkë yajpajëtijta'aktë ets ënätyë t'ëxmatstë mëti'ipë ënety të tja'amëtoow'itën.

¹⁸ Ja tsajpmokpajk mëti'ipë ka'ajën äpny akujky, jëtu'un jä'ä ijxtëm ja ja'ay mëti'ipë ja Dios y'aaw y'ayuk myëtoowtëpën,

¹⁹ je'eyëp ko jä'ä myëmaay myëtajtëp wi'ixjaty yaa naaxwiiny ja ëyo'on jotmayën, ets ja meeny yajtukwin'ë'ëntë ets y'aaktsojktaaytyëp winë. Jëtu'unts ja Dios ja y'aaw y'ayuk ka'ap tyajwinkëxë'ëktë.

²⁰ E ja tsajpmokpajk mëti'ipë ka'ajën jë'kxynyaaxjoty, jëtu'un jä'ä ijxtëm ja ja'ay mëti'ipë ja Dios ja y'aaw y'ayuk y'amëtoow'ijtëpën ets tkupëktë ets tyajwinkëxë'ëktë ijxtëm ja tsajpmokpajkën tu'ukpë tyëëmpetyën i'px majk, tëkë'px ets mëko'px.

Ja kutë'kxn nyi''ijxpät

²¹ Ënet ja Jesús jyaak'ënany: Ko ja'ay ja kutë'kxn tyajtooypyiky, këjxm tyujkony ets jam kyutë'kxëty; ka'ap jap tpëjktä'äky kajjoonpa'tkë'p, ëkë maapäjn pa'tkë'p.

²² Näyjyëtu'un, ka'ap tii yu'utsy'ity ka'apë yajnijawëtyën, të'kxy winë yajnija'awëtyä'äy.

²³ Pën myëët'ajtypyën yë tyatsk, wä'än tukmëtoy.

²⁴ Ets jyaak'ënany: Mëmay mëtajtë yajxon pën tii mmëtoowtëp. Pën wi'ix ënety miits ja'ay xytyuntë, näjyëtu'un ja Dios mtuna'anëtë.

²⁵ Pën tii myëët'ajtyp, jaaktimyajmo'ojaanp, ets pën tii wäänë myëët'ajtyp, jaaktimyajpëjkëjaanp.

Tsajpmokpajk nyi''ijxpät mëti'ipë mujxpën ets yoonpën

²⁶ Näyjyëtu'un y'ënäny: Jëtu'un ja Dios ja kyutujkën ijxtëm ja ja'ay jyäjtyën ko ja tsajpmokpajk ojts twëjy naaxkëjxy.

²⁷ Maap ja ja'ay ets pyëti'iky tsojkyë, najxp ja xëëw tsuu, mujxp ets yoonp ja tsajpmokpajk je'eyëm. Ka'ap ja ja'ay tnijawë pën wi'ix myuxy ets yony,

²⁸ jä'ä ko ja aay ujts kë'ëm yë myäyë, jëwyiin ja nyikepy pyëtsimy, jam ja tyëëm tpëjktä'äky ets myëjay.

²⁹ Ko myëjay, ënät ja ja'ay nyëjkxtë ets tyajpëtë'ëka'antë ja pëjktä'äky jä'ä ko tëë ja nyixëëw nyipo'o tpaaty ets pyëtë'ëkëty.

Mostazëpajk ja nyi''ijxpät

³⁰ Näyjyëtu'un y'ënäny: ¿Tii mëtyä'äky ntukmë'ijxkijpxmëp ja Dios ja kyutujkën?

³¹ Jëtu'un yë'ë ijxtëm ja mostazëpajkën. Nitii ujtspajk jëtu'un kyamutskëty ijxtëm yë'ëjën yaa naaxwiiny.

³² E ko yajwëjy, tsuj yony, wäänë mëj yony këtiinëm ja wiink ujts. Yajxon mëj xyo'omwä'kxy, yë'ëpaat ja joon jap nyäpye'enyë ma ja xye'entyën.

Wi'ix ko ja Jesús yaj'ixpëky mëët ja ijxpäjtën

³³ Jëtu'un ja Jesús yaj'ijxpëjky mëët ja ijxpäjtën ijxtëm ya'atën, jëtu'un ijxtëm mëpaat naje'eyë yaja'akyukën.

³⁴ E xëmë ja Jesús ja ja'ay tyaj'ijxpëky mëët ja ijxpäjtën, ok ja y'ijxpëjkpëtëjk tukmëmëtyä'äky mëti'ipë jyatijpyën.

Ko Jesús tyajnaxy ja mëkpoj ets ja nëë tyajkëëy'awë

³⁵ Ko kyootsëjanë jä'ä xëëw, ënät ja y'ijxpëjkpëtëjk t'ënëmaay: Oy nja'amëty jam nëë'awinm, mejypyë'am.

³⁶ Tääts ja ijxpëjkpëtëjk t'ëxmajtstë ja mayjyä'äy ets ja Jesús tyajtso'ontë kepy nëëwinye'epyëjoty, mëët ja wiinkëtypë ja kepy nëëwinye'epyë mëti'ipë panëjkxëtën.

³⁷ Ënet ja poj janty mëk myiiny ets ja nëë y'ëtëtstäky. Këjxm ja nëë jyänty jyä'ätsë'ëky ets kyujä'tsëy kepy nëëwinye'epyëjoty. Ujtspäjt ja kepy nëëwinye'epyë mëët ja nëë.

³⁸ Jamts ja Jesús ënety myä'äy kepy nëëwinye'epyëjoty ix'am, tëë ënety kyoy tpëjktä'äky. Ënet ja y'ijxpëjkpëtëjk ojts yuxyë ets y'ënëmaayë: Wintsën. ¿Tii këtii xyjyawë ko nki'inëmë?

³⁹ Ënet ja Jesús pyëti'ky ets twinkukajpxëy ja poj ets ja mejy t'ënëmaay: Mëtow, ka'ap myu'kxëty. Ënet ja poj myoony ets tu'k'ityë ojts wyi'im.

⁴⁰ Tääts t'ënëmaay ja y'ijxpëjkpëtëjk: ¿Ti ko mtsë'ëkëtë, tii këtii mëpëktë?

⁴¹ E ojts tsyë'ëkëtë, tääts nyäyajtëëwëtë nixim niyam: ¿Pën ja'ay tëy ya'atënë? Pojpaat ets mejypyaat myëmëtoowënë.