Marcos 3 - Biblia Dc en Mixe de Quetzaltepec

Ma Jesú tyajtso'okyën tu'uk yë pa'amja'ay sápëdë xëëw

¹ Tääts ja Jesús jatëkok tyëjkëy tsajptëkoty. Tap ënety tu'uk ja ye'etyëjk mëti'ipë kyë'ëjën ooky tu'k'atu'um.

² Tap ja ja'ayëty mëti'ipë y'ijxtaaytyëpën ja winma'any pën tii y'ëktukni'ë'ënëtyëp ja Jesús, jä'ä nyijawëjantëp pën y'ëkyajktsokpy ja pa'amja'ay po'kxënxëëwjoty.

³ Tääts ja Jesús t'ënëmaay ja ja'ay mëti'ipë kyë'ëjën ooky: Pëtë'ëk, tänë jää itkujky.

⁴ Tääts ja Jesús tyajtëëy mëti'ipë ënety jamëtyën: ¿Mëpaat'ajtp po'kxënxëëwjoty ntu'unmëty ja oypyë ëkë ja ëxëëkpë, ko ja ja'ay nyajtsokmëty ëkë ko ja ja'ay nyaj'o'kmëtyë? Amonyë ja ja'ay wyë'ëmtaaytyë.

⁵ Tääts ja Jesús wyintë'kxëtë mëët yë joot'an ets moonp tujkp jä'äkyëjxm ko juun ja jyot wyinma'anyëty tpëjkta'aktë. Paaty t'ënëmaay ja ye'etyëjk mëti'ipë ënety ja kyë'ëjën ooky: Xajtëw. Tääts ja ye'etyëjk xyajtëëy ets ja kyë'ë tsyoky.

⁶ Ënet ye'epyëtsëëmtë ja fariseë ja'ayëty tsajptëkoty ets ënätyë tmëëtmëtyaktë ja Herodes ja jyä'äyëty ets tkäjpxy'ajtë wi'ix ja Jesús tyaj'ooktëtyën.

Ko Jesús tyajtso'oky ja mayjyä'äy mejypyë'am

⁷ Tääts ja Jesús tsyo'ony mëët ja y'ijxpëjkpëtëjk ets ojts nyijkx mejy ëkë'ëm. Ënet may ja Galilea ja'ay pyanëjkxëtë.

⁸ Ko tnija'awëtyë ja'ay mëti'ipë tyuunpy kyäjpxypën ja Jesús, tääts may ojts ninëjkxtë. Tam mëti'ipë tso'ontëpën Judea, Jerusalén, Idumea; tam mëti'ipë tso'ontëpën nëë'awinm ma Jordán mëjnëë nyäxyën ets tam mëti'ipë tso'ontëpën Tirë ets Sidón.

⁹ Jä'ä ko ja ja'ay nyimayëty, paaty ja Jesús ojts t'ënëëmë ja y'ijxpëjkpëtëjk ets t'ëxta'atëty tu'uk ja kepy nëëwinye'epyë këtiipë mayjyä'äy y'atijmukëtëty,

¹⁰ Jä'ä ko tëë ënety kanaak tyajtso'oky ja ja'ay; jëtu'unts ni'ëmukë ja pa'amja'ay myäymyiintë, mëpaatëp ja Jesús tyajkëtaawnëtë ko tona'antë.

¹¹ Ko ja ëxëëk poj t'ijxtë ja Jesús, ënät twinkuxtënaaytyë ets mëk ya'axtë jyoktë: Dios U'unk Mijts.

¹² Tääts ja Jesús ojts mëktä'äky y'ënë'ëmxëtë ets ka'ap pën tuk'ëwaanëtëty pën yë'ë.

Ko Jesús twinwitsy nimajkmäjtsk ja y'ijxpëjkpëtëjk

¹³ Tääts ja Jesús pya'tëjkëy kopkëjxm ets ja ja'ay twoowtsooy mëti'ipë y'oyjya'apën. Tam ënety ni'ëmukë yajpaatë.

¹⁴ Ets twinwijtsy nimajkmäjtsk mëti'ipë xyëëwmooyën ijxpëjkpëtëjk, jëtu'unts y'itëty yë'ë mëët ets nyëjkxtëty Dios y'aaw y'ayuk kajpxwa'kxpë,

¹⁵ ets ja kuttujkën tmëët'atëty ets t'ixkäxtëty ja ku'oypyë.

¹⁶ Yë'ë ojts ya'atë yajwinwitstë: Simón, mëti'ipë Jesús ojts tyajxëëpetyën Pedro,

¹⁷ Santiagë mëët ja y'uty Juan, Zebedeo y'u'unk y'ëna'k, jä'ä yajxëëmooytyë Boanerges, jä'ä nyiwijy ënääw u'unk,

¹⁸ Andrés, Felipe, Bartolomé, Mateo, Tomás, Santiagë, mëti'ipë Alfeo y'u'unk'ajtypyën, Tadeo, Simón mëti'ipë ja zelotë winma'any tyuk'ijtëpën,

¹⁹ ets Judas Iscariote, mëti'ipë ja Jesús kyë'ëyajkën.

Ko Jesús yaj'ënëëmë ko mëjku'u myëk'ajtën tmëëtëty

²⁰ Tääts ja Jesús tyëjkëy tëkoty. Ënet ja mayjyä'äy ënätyë myujkpäjtë, ka'apaat ja Jesús y'ëkkaaynyë mëët ja y'ijxpëjkpëtëjk.

²¹ Ko ja Jesús ja myëku'uktëjk tnija'awëtyë, ënät nyimiinëtë ets yajtsoona'anëtë jä'ä ko jëtu'un ënety myäytyë tyajtë ko tëë lyokëjaty.

²² Ja tsajptëkotyëtë yaj'ijxpëjkpëtëjk mëti'ipë tso'ontëpën Jerusalén, jëtu'un y'ëna'antë: Beelzebú tääpë ja'ay myëët'ajtyp, ja ku'oypyë wintsën yë mëk'ajtën mooyëp, paaty yë ku'oypyë t'ixkexy.

²³ Tääts ja Jesús tmëkajpxmujky ja ja'ay ets tkajpxwatsy mëët tu'uk ja ijxpäjtën ets y'ënäny: ¿Wi'ix jëtää tu'uk ja mëjku'u t'ëk'ixkäxëty ja myëmëjku'u?

²⁴ Ko tu'uk ja naax kajpn nyäpyëjkwa'kxëtëty, ka'ap oy ja mëk'ajtën tmëët'atëty,

²⁵ näjyëtu'un jyäty ko ja'ay tu'kjëën tu'ktëjk tsyiptuny, ma'tp ja tsëna'ayën.

²⁶ Näyjyëtu'un yë ku'oypyë, pën nayajwa'kxëp ets aakyë'ë nyänyipëtë'ëkëtë, tëë ënety ya'atë kuttujkën y'atëkoy, ka'ap tjëkyepy wi'ix y'ijt'ëtë'ëtsëty.

²⁷ Ni pën kyatëkëty ma ja ja'ay ja tyëjkën ets tmäätsa'anëty tii jap myëët'ajtyp tyëkoty pën ka'ap jëyëjp tkë'ëxotsy tekyxyotsy.

²⁸ Tëy miits n'ënëëmëtë, yajpokymyä'kxantëp yë ja'ay tu'kë'ëyë yë pyokyëty ets kyajpxtëko'oyënëty,

²⁹ je'eyëp ko nijëna'a kyayajpokymyä'kxëty pën ja Dios ja myëjaaw myëk'ajtën myëkajpxtëkooyëp.

³⁰ Paaty ja Jesús jëtu'un y'ënä'äny ko ënety të yaj'ënëëmë ko ku'oypyë tmëëtëty.

Jesús ja tyaak ets ja myëkä'äxtëjk

³¹ Tääts ja Jesús ja myëkä'äxtëjk jyajtë ets ja tyaak, jap ojts tëjk ëkë'p wyë'ëmtë, je'eyë ojts tmëkajpxpëtsëmtë ja Jesús,

³² ënät ja Jesús ja ja'ay ojts tyuk'ëwa'anxëty mëti'ipëty ënety jap winkon mëët y'u'unyën: Tap ja mtaak tëjk ëkë'p m'owëxityë mëët ja mmëkä'äxtëjk. Mijtsëk mmëkajpxanëtëp.

³³ Tääts ja Jesús y'ëtsooy: ¿Pën ntaak'ajtypës ets pën nmëkä'äx'ajtypës?

³⁴ Ënet ja Jesús twin'ijxë'ky ja ja'ay mëti'ipë winkon win'u'unyääyëtëpën ets t'ënëmaay: Ya'atë ja'ayëty ntaak'ajtypyës ets nmëkä'äx'ajtypyës.

³⁵ Pën tyuunpy mëti'ipë ja Dios tsyojkpyën, yë'ë jëtu'un ëjts nmëkä'äx'ajtyp ets ntaak'ajtypyës.