Marcos 2 - Biblia Dc en Mixe de Quetzaltepec

Ko Jesús tyajtso'oky ja kë'ëxujxpë tekyxyujxpë

¹ Komjeky, ënät ja Jesús tyëjkëy jatëkok Capernaúm ets ja ja'ay tnija'awëtyë ko ënety të jyä'ty jam tëjkwintum.

² Tääts ja ja'ay may myujktë, a'ujtsnajx ja tëjk, ni ma kya'ëwaatsëty ma tëjk'aawën. Ja Jesús jä'ä nyikäjpxyp nyimëtyäkpy ja Dios ja y'aaw y'ayuk,

³ Ënet jyajtë nimajktaxk mëti'ipë kyiiyjmyiintëpën tu'uk ja ja'ay kë'ë xuxypyë tekyxyuxypyë.

⁴ E komë nëkooyë ënety ja ja'ay nyimay'ajnë, ka'ap tjëkyepy wi'ix ja Jesús tmëwinkontëty. Ënet ojts tyaj'ëwa'atstë jap tëjkkëjxy. Japts ja pa'amja'ay tkutëëynyajxtë mëët ja myaapäjn.

⁵ Ko ja Jesús t'ijxy ko myëët'ajtëp ja mëpëjkën, ënät ja pa'amja'ay t'ënëmaay: U'unk maay, pokymye'kxy mijts mwë'ëmy.

⁶ Tam ënety ja tsajptëkotyëtë yaj'ijxpëjkpë y'u'unyëtë, ënät myäytyë tyajtë:

⁷ ¿Tii ko ya'atë ja'ay jëtu'un y'ënaanpë? Dios yë myëkajpxtëkoopy, Dios tu'ukyë pokymyä'kxp.

⁸ Näy ënätyë ja Jesús tnija'awëy ko ja ja'ay jëtu'un myäytyë tyajtë ets t'ënëmaay: ¿Ti ko miits jëtu'un mmaytyë mtajtë?

⁹ ¿Mëti'ipë ka'ap tsyipëty? ¿koos yë pa'amja'ay n'ënëëmëty: npokymye'kxyp mijts ëkë koos n'ënëëmëty. Pëtë'ëk, këëyë'ëk yë maapäjn ets mye'eyëty?

¹⁰ Paatyës jëtu'un n'ëna'any ets xynyijawëtëty ko ja naaxwiinyëtë ja'ay ja y'U'unk myëët'ajtyp ja kuttujkën ets tmä'kxëty ja poky. Tääts t'ënëmaay ja kë'ëxujxpë tekyxyujxpë:

¹¹ Mijts nëmääpy: Pëtë'ëk, këëyë'ëk yë maapäjn, ets nëjkx ma mtëjkën.

¹² Pëtë'k ja pa'amja'ay ets ja myaapäjn tkëëyi'ky ets tsyo'onë mayjyä'äyjotm. Paaty ja ja'ay ni'ëmukë mëj'äämpy t'ijxtë ets ja Dios tmëjja'awëtyë tjaantyjya'awëtyë ets y'ënantë: Nijëna'a ëëts ya'atë jëtu'unpë nka'ixynyëm.

Ko Jesús tmëkäjpxy ja Leví

¹³ Tso'on ja Jesús jatëkok ets ojts nyijkx nëë'akëyë pa'ajën, mayjyä'äy ojts nyiminyë ets tyaj'ijxpëjky.

¹⁴ Najxp ënety ja Jesús ko t'ijxpaty ja Leví, Alfeo y'u'unk. Tam ënety y'u'unyë ma yajkukëpetyën. Tääts ja Jesús t'ënëmaay ja Leví: Patso'onkës. Ënet ja Leví ënätyë wya'kujkëy ets ja Jesús tpatso'ony.

¹⁵ Mëkääpy ënety ja Jesús jam ma Leví tyëjkën mëët ja y'ijxpëjkpëtëjk ets ja yajkukëpäjtpëtëjk ets ja ja'ayëty mëti'ipë yajtijtëpën pokyjyä'äy, jä'ä ko may ënety ja ja'ayëty mëti'ipë Jesús pajëtijtëpën.

¹⁶ Ja fariseë ja'ayëty, mëti'ipë tuk'ijxpëjktëpën ja jutiis ja y'ënä'ämënëty, ko t'ijxtë ko ja Jesús ënety tmëëtkay ja yajkukëpäjtpëtëjk ets mëti'ipë yajtijtëpën pokyjyä'äy, ënät tyajtëëwtë ja Jesús y'ijxpëjkpëtëjk: ¿Tii ko yë mwintsën tmëëtkay yë yajkukëpäjtpëtëjk ets pokyjä'äytyëjk?

¹⁷ Ko ja Jesús tmëtooy, ënät y'ënäny: Mëti'ipë ja'ay oy mëkën, ka'ap yë tsooy tyajm'ëmaaytyä'äky; yë'ë tsooy yaj'ëmaaytyäkpy mëti'ipë pëjkëpën. Ëjts ka'apës yë'ëjëty të niminy wa'ats ja'aytyëjk, pokyjya'ayës të niminy.

Ko tyajtëwtë ja Jesús tii ko ja'ay y'ayuu'atë

¹⁸ Tam ënety ja Juan y'ijxpëjkpëtëjk y'ayuu'atë mëët ja fariseë ja'ayëty y'ijxpëjkpëtëjk. Ënet ja ja'ay tnimiintë ja Jesús ets t'ënëmaaytyë: ¿Tii ko yë Juan Yajnëëpäjtpë y'ijxpëjkpëtëjk y'ayuu'atë ets ja fariseë ja'ayëty y'ijxpëjkpëtëjkëty näjyëtu'un, e mijts yë m'ijxpëjkpëtëjk ka'ap y'ayuu'atë?

¹⁹ Tääts ja Jesús y'ëtsoowëtë: ¿Mëpaat jëtää ja ja'ay y'ayuu'atë tëëpë yajwow yajwitstën ma pëjkën ukën y'ityën ets pën jam ja ye'etyëjk mëti'ipë pëjkpën? Pën jam ja ye'etyëjk yajpaaty mëti'ipë pëjkpën ka'ap tjëkyepy pën y'ayuu'atëty

²⁰ E pyatäämpy ja xëë po'o ko ja ye'etyëjk mëti'ipë pëjkpën yajpëjkëtëty, jäänëmts tëy y'ayuu'atëty.

²¹ Ka'ap pën ja pakwit t'akëyë mëët ja jemwyit; jä'ä ko yë jemwyit nyëmuky ets jyaak najtskëëtsë ja pakwit.

²² Näyjyëtu'un ka'ap ja jemy tsatsym nyëë jap pën t'atämë ma ja pak po'ojën, jä'ä ko yë jempyë ja tsatsym nyëë nyajtskë'tsëp ja pak po'o ets wyintëkoy ja tsatsym nyëë mëët ja pak po'o. Paaty ja tsatsym nyëë jempyë jap yaj'atämë ma ja po'o jempyën.

Ko ja Jesús ja y'ijxpëjkpëtëjk twijxë'ëktë ja tsajpmok yon po'kxënxëëwjoty

²³ Po'kxënxëëw ënety, ko ja Jesús ojts nyäxy tsajpmok yon kamjotm mëët ja y'ijxpëjkpëtëjk. Tääts ja y'ijxpëjkpëtëjk ojts twijxë'ëktë ja tsajpmok yon ko jam nyajxtë.

²⁴ Ko ja fariseë ja'ayëty t'ijxtë ko jëtu'un y'ëtë'ëtstë, tää t'ënëmaaytyë ja Jesús: Mëtow, ¿tii ko yë m'ijxpëjkpëtëjk tuntë po'kxënxëëwjoty mëti'ipë ka'ap kyutukyëtyën?

²⁵ Tääts ja Jesús y'ëtsooy: ¿Këtii xykyajpxtënëm tii ja David tyuunën mëët ja myëku'uktëjk ko ja yuu pyatëtë, ko ënety nitii tkamëët'atë?

²⁶ Tsajptëkoty ojts ja tyëkëtë, ma ja Abiatar ënety tyeetywyintsën'atyën, ënät tkaaytyë ja tsajpkääky kënu'kxypyë mëti'ipë ënety ka'ap kyutukyëtyën pën tkayëty, teety yi'iyë kyääytyëp, ojts näjyëtu'un tmo'oy ja myëku'uktëjk.

²⁷ Tääts ja Jesús jyaak'ënany: Yë'ëkyëjxm yë po'kxënxëëw yajpëjktäky ets ja ja'ay yajputëkëty, ka'ap yë'ëkyëjxmëty ets ja ja'ay jää ni'ikyë y'ëyoowtëkëty.

²⁸ Paaty ja naaxwiinyëtë ja'ay ja y'U'Unk tmëët'aty ja kuttujkën ets tii tunëty sápëtë xëëw.