Marcos 16 - Biblia Dc en Mixe de Quetzaltepec

Ko Jesús jyuukpyiky

¹ Ko ja po'kxënxëëw nyäjxy, ënät ja Maria Magdalena ets ja Santiagë tyaak, mëët ja Salomé ojts tjuytyë ja pa'akxu'kpë nëë ets ja Jesús nyi'kx kyopk tuknikuutsanëtë.

² Tääts ojts tukninëjkxtë jopyëp, tominkë xëëw, sëmaan'ëjxy, mëjjajp poopjajp,

³ tääts nyäy'ëna'anëtë: ¿Pën jëtää ja tsaa ënät jyëtijëp?

⁴ Ko y'ijx'ëwtijtë, ënät t'ijxtë ko ja mëjtsaa ka'ap maanë mëti'ipë ja jut y'akë'ë'ajtypyën, tëë ënety yajjëtijy.

⁵ Ko tyëjkëtyë tsaajutjoty, jap t'ijxtë aka'any'äämpy tu'uk ja yä'äy ëna'k jam y'u'unyë poopxoxy yaj'ixy. Tääts ja to'oxytyëjk tsyë'këtyë,

⁶ e ja yä'äy ëna'k jëtu'un y'ënëmaayëtë: Këtii mtsë'ëkëtë. Miits yë'ë m'ixtaaytyëp ja Jesús, Nazaretëtë ja'ay, mëti'ipë ojts kyëruutspetyën. Tëë jatëkok jyuukpyiky, ka'ap ja yaa pën. Oy xytyim'ixtëty ma ojts yajpëjktä'äkyën.

⁷ Nëjkx ja y'ijxpëjkpëtëjk tuk'ëwaanëtë ets näjyëtu'un xytyuk'ëwaanëtëty ja Pedro: Tam jëwyiin ja Jesús nyijkxy Galilea oknëm miitsëty, ja y'ijxpëjkpëtëjk jatëkok wyoowmukäämpy, ets xy'ixtëty jëtu'un ijxtëm ojts nikäjpxyën.

⁸ Tääts pyëtsëëmtë pëyi'ikyë jap o'kpëjutjoty, mëët ja tsë'ëkë ets ja jotmay. Ets ka'ap pën t'ëwa'anëtyë jä'ä ko tsë'këtyëp ënety.

Ko Jesús nyätyuk'ixyë ja Maria Magdalena

⁹ Ko ja Jesús jyuukpyijky, sëmaan'ëjxy jopyëp; Maria Magdalena ojts y'ixyë jëyëjp, mëti'ipë ënety tëë ja ku'oypyë niwëxtujk y'ëxmatsyën.

¹⁰ Ënet ja Maria Magdalena ojts nyijkx ets tuk'ëwa'anëy mëti'ipë ja Jesús ënety mëët të jyëtityën, mëti'ipë ënety jam moontëp tujktëpën ets jëëytyëp yaxtëpën.

¹¹ Ko tmëtoowtë ko ja Jesús jyuuky'äty ets ko ja to'oxytyëjk ënety të t'ixy, ka'ap tmëpëjktë.

Ko Jesús nyänyikëxë'ëkyë ma nimäjtsk ja y'ijxpëjkpëtëjkën

¹² Ko jëtu'un y'ëknajxy, ënät ja Jesús wiink nyänyikëxë'kë ma ënety nimäjtsk ja ja'ay tyu'uye'eytyën, kyamjotm nyëjkxtë.

¹³ Ko t'ixkajptë, ënätyë wyimpijtë ets ojts nyëjkxtë Jerusalén. Ënet ja myëku'uktëjk tuk'ëwa'anëtyë, je'eyëp ko nän kä'äp myëpëjkëtë.

Mëti'ipë ja Jesús ja y'ijxpëjkpëtëjk tyuk'ënä'ämën

¹⁴ Ok ja Jesús ojts jatëkok nyänyikëxë'ëkyë ma ja y'ijxpëjkpëtëjk ënety nimajktu'uk yajpaatën ma ja kaaypyäjnën, jamts ojts mëk y'ojëtë jä'äkyëjxm ko ka'ap tmëpëktë ko jyayajtuk'ëwaanëtë ko ja Jesús të yaj'ixy, ko tëë jatëkok jyuukpyiky.

¹⁵ Ets yaj'ënëmaaytyë: Nëjkxtë naaxwiinyëtë apëtsëmy ets ja oy aaw oy ayuk xykyajpxwa'kxtëty.

¹⁶ Pën myëpëjkpy ets nyëëpety, yë'ë nëjkx nyitso'oky; e pën kamëpëjkp, yë'ë nëjkx yajkpoky'ixy.

¹⁷ Ja ja'ay mëti'ipë mëpëjktëpën, yë'ë tyuntëp: Ëjts mëët yë nxëëw nëjkx t'ixkäxtëty ja ku'oypyë; kyajpxtëp ja wiink ayuk;

¹⁸ myatstëp ja tsa'any ets ka'ap tsyu'utsëtëty; ko ajotkumonë t'uuktëty ja ëxëëk nëë, ka'ap wi'ix jyatëty; näjyëtu'un ko ja pa'amja'ay tkë'ënixajtëty, yajtso'oktëp.

Ko ja Jesús tsyajpety

¹⁹ Ko ja y'ijxpëjkpëtëjk ojts jëtu'un tmëmëtyakta'ay, ënät ja Jesús pya'tëjkëy tsajpjotm; Dios ojts tuknipëjktaakë ets pya'tëkëty tsajpjotm ets nyaaxwe'tsy ma ja Dios ja y'a'oykyë'ëjën.

²⁰ Tääts ja y'ijxpëjkpëtëjk tsyo'ontë ets ojts tkajpxwa'kxtë ja Dios ja y'aaw y'ayuk oy tyimmaajëty. Wintsën Jesukristë ojts pyutëkëtë ets ja ja'ay tuk'ijxtëty tuknijawëtëty ko tyiyëty jyääntyëty mëti'ipë kyajpxtëpën, jä'ä ko tuntë winë mëët ja Dios ja myëj'ajtën.