Marcos 13 - Biblia Dc en Mixe de Quetzaltepec

Ko ja Jesús tnikäjpxy ko ja mëjtsajptëjk kyutëkoyä'äny

¹ Tso'omp ënety ja Jesús ma ja mëjtsajptëjkën, ënät ja y'ijxpëjkpë tu'uk y'ënëmaayë: Wintsën, ix xiipë tsaa ets tëjk janty oyëty.

² Tääts ja Jesús y'ëtsooy: ¿M'ijxyp ko myëjëty ets y'oyëtyë? Nitu'kjënu'unën ya'atë tsaa kyawë'ëma'any, tu'kë'ëyë jyijta'aja'any.

Ijxpäjtën ko ënäty ja naaxwiinyëtë kyëxanë

³ Ënet ojts nyëjkxtë jam ma Olivo kopkën ma nyäwyin'ijxpetyën mëët ja tsajptëjk, jam ojts yë Jesús nyaaxweetsy ets ja Pedro, Santiagë, Juan ets ja Andrés tyajtëëwtë:

⁴ Jëna'a nëjkx jëtu'un jyäty kyëpety, ets tii ijxwë'ëmën nëjkx yaj'ixy ko ënety jëtu'un jyata'any.

⁵ Tääts ja Jesús y'ëtsooy: Näkyëwent'atëtë, ijxkëm pën mwin'ëënëtë.

⁶ Nimay ja ja'ay nëjkx myintë etsës xy'atuunnaxa'antë ets y'ëna'ana'antë: Ëjts yë Kristë, ets may ja ja'ay nëjkx twin'ëëntë.

⁷ Ko miits xymyëtoy'atëty ko tsip tyunyë ets tyuna'anyë, këtii mtsë'ëkëtëty. Kopkpëky ko jëtu'un tyunëtëty jyatëtëty. E ka'anëm ënety tnapaaty ets naaxwiinyëtë kyëxëty.

⁸ Nëjkxëp ja ja'ay xim yam tsyiptuntë, naax kajpn nyänyipëtë'ëkëtëty mëj mutsk. Minaanp ja mëj ujx xii yaa, minaanp ja yuu. Ya'atë yë'ë jëtu'un ënety tyuktso'ontäkpy ja ëyo'on.

⁹ Yajxon mnäkyëwent'atëtëty, jä'ä ko myajkë'ëyakantëp miits ma kutuunkëtyën ets nëjkx myajwoptë tsajptëkoty. Myajmënëjkxantëp ma ja yajkutujkpëtëjkën ets ma wintsëntëjkëtyën mëët ëjtskyëjxm, jëtu'un ënety miits xyajnikëxë'ëktë ma yë'ëjëtyën koos të mymyëpëktë.

¹⁰ Ets yajkajpxwa'kxëp jëyëjp ja oy aaw oy ayuk ka'anëm ënety kyukëxë ja naaxwiinyëtë.

¹¹ Ets këtii maytyëty mtajtëty ko ënety myajtukwinkuwowëtë ja kutuunktëjk. Jëtu'un m'ëna'antëty wi'ix ënety ja Kënu'kxymyëkajtën jää myaj'ayukpaatëtën, ka'ap nëjkx myiitsëty mkajpxtë, Kënu'kxymyëkajtën nëjkx myajkajpxëtë.

¹² Nimay ja ja'ay tu'kmëkä'äxpë nyäkyë'ëyaka'anëtë ets y'ooktëty. May ja u'unkteety, u'unktaak ja y'u'unk y'ëna'k nëjkx tmëtsipëktë ets tkë'ëyaktë. Näyjyëtu'un ja u'unk ëna'k ja tyaak tyeety nëjkx tmëtsipëktë ets tyaj'ooktë.

¹³ M'aakmëtsip'atëtëp ja ja'ay koos ënety ëjts xymyëpëktë, e mëti'ipë ta'tspëky tënääpyën, yë'ë nitso'okaanp.

¹⁴ Ko xy'ixtëty ja ëxëëkpë ma ka'ap pyaat'atyën. Pën ya'atë noky kyäjpxypën wä'än tja'akyukë, wä'än ja ja'ay tkä'äktë mëti'ipë tsënaaytyëpën jam Judea nyaaxjotm ets nyëjkxtëty tunjot kopkjotm.

¹⁵ Pën ënety të pyety tyëjkëjxm jä'ä xëëw, ka'ap tyëkëty tyëkotm ets tii tyajpëtsëma'anëty;

¹⁶ ets pën ënety jam kyamjotm, ka'ap y'ëkwinpijnëty ma ja wyit ënety të t'ëxmatsyën.

¹⁷ Yë'ë tëy ja to'oxytyëjk yajpa'ëyoowtëp mëti'ipë ënety u'unk nyëkëjxm'ajtëpën ets mëti'ipë yaj'u'unktsi'tstëpën jä'ä xëëw.

¹⁸ Ja'amyätstë ets amëtowtë ja Dios këtiipë jëtu'un jyatëty kyëpätëty jää it ma ënety tyityk'atyën,

¹⁹ jä'ä ko jää nëjkx ja mëj ëyo'on tyunyë jyätyë mëti'ipë ka'anëm yaj'ixynyëm, mëti'ipë ni wintiinëm jëtu'un kyajaty kyakëpetyën maju'unëm ja Dios tyajtso'ntä'äkyën yë naaxwiinyëtë ets nijëna'a jatëkok nëjkx jëtu'un kya'ëkjajnë.

²⁰ Ets ko ja Wintsën jeexyë tka''akajpxtuky ja ëyo'on, ka'ap jeexyë pën ja nitsokën tpaaty; tëë ja Wintsën tyaj'akony ja ëyo'on jä'äkyëjxm ko jam jyuuky'atë ja ja'ay mëti'ipë të twin'ixyën.

²¹ Ko pën m'ënë'ëmxëtëty: Ixtë, tyaa ja Kristë, ëkë ko myaj'ënëëmëtëty: Ixtë, xim jä'ä, ka'ap xymyëpëktëty.

²² Jä'ä ko minantëp mëti'ipë nätyijanëtëp Kristë ets mëti'ipë nätyijanëtëp Dios käjpxynyajxpë, yaj'ixëtëp näjyëtu'un ja ijxpäjtën ets mëj'ajtën, ets yë'ëpaat yajwin'ëëna'any mëti'ipë ja Dios të wyin'ixyën.

²³ Näkyëwent'atëtë miits, tëë n'ëwaanëtë jëwyiin jëyëjp.

Wi'ix wyimpita'anyën ja Kristë

²⁴ Ko ënety ja ëyo'on jotmay të nyäxy, ënät ja xëëw wyinkootsëja'any ets ka'ap ja po'o y'ana'any,

²⁵ ka'ajaanp ja matsa'a tsajpwinm ets yu'kxaanp ja mëk'ajtën jam tsajpkëjxm.

²⁶ Tääts ja ja'ay t'ixtëty koos yootsjoty ënety nminy mëët ja mëk'ajtën ets ja mëj'ajt oyajtën.

²⁷ Yë'ë kyäxäämpy ja anklëstëjk ets ja ja'ay twoowmujkta'ajëty mëti'ipës të nwinwitsyën tu'ktsajp'akëtä'äky, mapaat yë naaxwiinyëtë tsyo'ontä'äkyën ets mapaat yë tsajp jyëjpkëxyën.

²⁸ Ja'aykyukëtë ya'atë higo kepy yë nyimëtyä'äky: Ko ja higo kepy ja xye'enty y'u'unk'aty ets ja y'ääy pyëtsimy, jëtu'un xynyijawëtë ko tsojk ja anpë myina'any.

²⁹ Näyjyëtu'un ko xy'ixtëty ko tyunëtëty jyatëtëty mëti'ipës të nkäjpxyën, jëtu'un xynyijawëtëty ko tim wiinkoonp ja naaxwiinyëtë ja'ay ja y'U'unk.

³⁰ Tëy miits n'ënëëmëtë, ko tunan jatanëp jëtu'un naamka'anëm ënety ja ja'ay y'o'kta'atë mëti'ipë jää tyam juuky'ajtëpën.

³¹ Këxaanp naxaanp yë naax tsajp, e yë n'aaw n'ayukës nijëna'a kyakëxa'any kyanaxa'any.

³² Ka'ap pën nijawë tii xëëw tii mëtëy jëtu'un jyata'any, ni ja anklëstëjk tsajpjotmëpë ets ni ëjts nkanijawë; Dios Teety tu'uk nyija'ap.

³³ E näjyëjp'ixëtë miits xëmë ets ja'amyätstë ja Dios, jä'ä ko ka'ap xynyijawëtë jëna'ajës nwinpita'any.

³⁴ Jëtu'un ijxtëm tu'uk ja ye'etyëjkën mëti'ipë jëkäm nëjkxpën. Ko tsyoony, y'ëne'empy ja tyuunpë ets tuunkmooytyä'äy ja tyuunpëtëjk ets t'ënëëmë ja tëjk ijxpë ets tkëwent'atëty.

³⁵ Näyjyëtu'un miitsëty, xëmë mjëjp'ixtëty, jä'ä ko ka'ap xynyijawëtë jëna'a jya'ta'any ja wintsën mëti'ipë kutëjk'ajtpën; ajotkumonë nëjkx jyä'ty: Wä'än ux jajmony, ëkë tsu'um, ëkë tsu'umnaxy, ëkë tsajp'okpu'uy.

³⁶ Ka'ap tii nija'awën jëna'a nëjkx jyä'ty. Ajotkumonë myina'any ma ënety të mmaanaxtën.

³⁷ Mëti'ipë miits yam ntuk'ëwa'anëtëpën, nän tëëjës yë ja'ay ntuk'ëwa'anëtya'atë: Juuky itë.