Marcos 10 - Biblia Dc en Mixe de Quetzaltepec

Ma ja Jesú nikäjpxy nimëtyä'äkyën ko ja'ay tsyënaaywyä'kxy

¹ Tääts ja Jesús tsyo'ony jam Capernaúm ets ojts nyijkx Judea y'itjotm, awinmtsow ma ja Jordán mëjnëëjën ets tukjëtijtëy ja itjot mëti'ipë wë'ëmpën xëëwpëtsëmtsyow. Ënet ja ja'ay nimay myujktë jatëkok ma ënety jamën ets ojts tyaj'ijxpëjktsoony, ijxtëm xëmë yaj'ijxpëkyën.

² Tääts ja fariseë ja'ayëty ojts jënaakën tninëjkxtë ja Jesús, ets je'eyë twinma'any'ixa'antë, tyajtëëwtë: ¿Kutujkp ets ja ye'etyëjk tyo'oxytyëjk t'ëxmatsëtyë?

³ Tääts ja Jesús y'ëtsooy: ¿Wi'ix ja Moisés tni'ënä'ämë?

⁴ Ënet y'ëtsoowtë: Yajkutujkpy ja Moisés ets ja ye'etyëjk t'ëxmatsëty ja tyo'oxytyëjk pën myoopy jëyëjp ja noky mëti'ipë yajnikëxë'ëkpyën ko tëë t'ëxmatsy.

⁵ Tääts ja Jesús y'ëtsooy: Jä'äkyëjxm ja Moisés jëtu'un tyajkutujky ko ka'ap mja'akyukëtë.

⁶ Ko ja Dios tyajkojtso'ontäky winë, ye'etyëjk ets to'oxytyëjk ojts tpëjktä'äky.

⁷ Paaty ja ye'etyëjk y'ëxmatsäämpy ja tyaak tyeety ets ja tyo'oxytyëjk tpuwa'akëja'any,

⁸ jëtu'unts nimäjtsk tu'ukyë y'itëty. Ka'ap ëpëkyjyäty yajpaatë, tu'ukyë yajpaatë.

⁹ Paaty ka'ap tjëkyepy ja ja'ay tyajkwa'kxëty mëti'ipë ja Dios të tyajnämyukyën.

¹⁰ Ko ënety jap tëkoty yajpaatë, ënät ja Jesús ja y'ijxpëjkpëtëjk yajtëëwëtë mëti'ipë ja Jesús ënety të tmëtyä'äkyën.

¹¹ Tä ja Jesús y'ënäny: Pën ja tyo'oxytyëjk y'ëxmajtsyp ets wiinkpë tpëky, ja tyo'oxytyëjk ënety myëtëkoopy ja mëjëwyiimpë të tpëkyën.

¹² E ko ja to'oxytyëjk ja nyiye'etyëjk t'ëxmatsy ets ja wiinkpë ye'etyëjk tpëky, nän yajwintsë'këntëkoopy ënety ja pëjkën ukën.

Ko Jesús tkënu'kxy ja pi'k ëna'k

¹³ Ënet ja Jesús ojts tukninëjkxtë ja pi'k ëna'k ets tkënu'kxëty e ja y'ijxpëjkpëtëjk ojts t'ojtë ja ja'ay mëti'ipë ja pi'k ëna'k wyoowmiintëpën.

¹⁴ Ko ja Jesús jëtu'un t'ijxy, ënät jyoot'anpëjky ets y'ënäny: Ixmatstë yë pi'k ëna'k, wä'än xynyimintës, ka'ap xy'ëtuktëty, jä'ä ko yë'ë jëtu'unpë ja'ay nyäpyëjktä'äkyën tä pi'k ëna'kën yë'ë Dios tsyokpy ma kyutujktaknën.

¹⁵ Tëy miits n'ënëëmëtë, pën ja Dios ja kyutujkën ka'ap tkupëjkë ijxtëm ja pi'k ëna'kën, ni wintim nijëna'a kyatëkëty jam ma Dios kyutujktaknën.

¹⁶ Ënet ja Jesús ojts ja pi'k ëna'k tmëjwoy, ets ojts tkënu'kxy, je'eyë ja kyë'ë tuknikony.

Ko ja yä'äy'ëna'k kumeenypë tmëëtmëtyä'äky ja Jesús

¹⁷ Ko ja Jesús ënety jam tsyoona'any, ënät tu'uk ja ja'ay pëyi'ikyë nyimiinë ets nyäkyoxtënaaytyakë ma yë'ëjën. Tääts y'ënëmaayë: Oypyë Wintsën, ¿tiis mëpaat ntuny etsës npaatëty ja juukyajtën xëmëkyëjxmëpë?

¹⁸ Ënet ja Jesús y'ëtsooy: ¿Tiis ko jëtu'un xytyijy oypyë Wintsën? Yi'iyë Dios tu'uk oy.

¹⁹ Mnija'ap ja Dios ja y'ënä'ämën, mëti'ipë ënaanpën: ka'ap myajja'ay'ookëty, ka'ap xyajwintsë'këntyëkoyëty ja pëjkën ukën, ka'ap mmäätsëty, ka'ap pën xynyi'antaakëty, mwintsë'ëkëp ja mtaak mteety.

²⁰ Tääts ja ja'ay y'ëtsooy: Wintsën, mutsknëm tääpë tu'kë'ëyë mpatuunta'ayës.

²¹ Ënet ja Jesús wyintë'kxpäjtë mëët tu'uk ja oyjyot oywyinma'any ets y'ënëmaayë: Tu'uk mjaaktëkoy'ajtxëty. To'kta'a mëti'ipë mmëët'ajtypyën ets mo'o ja ëyoopëja'ay. Ënet ja Dios ja kuma'ayën mmo'ojëtëty tsajpjotm. Täänëm xypyaminëtyës.

²² Ko ja ja'ay jëtu'un tmëtooy, ënät tyëjkëy kuma'ay kutajëpë, jä'ä ko kumeenyjyä'äy ënety.

²³ Ënet ja Jesús y'ijx'ëwëtijty ets t'ënëmaay ja y'ijxpëjkpëtëjk: Tsip ni'ik ets ja kumeenyjyä'äy tyëkëty ma ja Dios ja kyutujktaknën.

²⁴ Tääts ja y'ijxpëjkpëtëjk mëk tja'awëtyë ko ja Jesús jëtu'un y'ënäny. Ënet ja Jesús y'ënëmaayëtë jatëkok: U'unk ëna'këty, tsip ni'ik ets ja kumeenyjyä'äy tyëkëty ma ja Dios ja kyutujktaknën.

²⁵ Nikë ka'ap tsyipëty ets tu'uk ja jëyujk jëku'ux nyaxëty xu'uny jutjoty ets këtiinëm ko tu'uk ja kumeenyjyä'äy tyëkëty ma Dios ja kyutujktaknën.

²⁶ Ko ja y'ijxpëjkpëtëjk jëtu'un tmëtoowtë, janty mëk ojts tjawëtë ets jaxim jayam nyäy'ënanëtë: ¿Pën ëkmayëtëp ets ja nitsokën tpaatëty?

²⁷ Tääts ja Jesús ojts wyintë'kxëtë ets y'ëtsoowëtë: Yë ja'ayëty tsip yë tjawëtë, yë Dios ka'ap tiitsip tjawë; jä'ä ko yë'ë maaytyääyëp winë.

²⁸ Ënet ja Pedro y'ënäny: Tëës tu'kë'ëyë n'ëxmajtsta'atë mëti'ipës ijty nmëët'ajtëpën ets mijts të myajpatsoony.

²⁹ Tääts ja Jesús y'ëtsooy: Tëy miits n'ënëëmëtë, pën të t'ëxmatsy ja tyëjk, myëkä'äxtëjk, tyaak tyeety, y'u'unk y'ëna'k, ëkë nyaax mëët ko të tja'akyukë ja oy'aaw oy ayuk ets koos të xymyëpëky,

³⁰ wäänëni'ik t'ëxajëja'any winë tyam ma jyuuky'ätyën, pyatäämpy mëko'px'am ja tyëjk, y'uty, y'äjty, tsyë'ë, tyaak, y'u'unk y'ëna'k ets nyaax. Oy yajpajëtijta'aktëty, ok nëjkx jyuuky'äty xëmëkyëjxm ko ënety tpaaty ja nyixëëw nyijëmëjt.

³¹ Je'eyëp ko may mëti'ipë tyam jëyëjp'ajtëpën, ix'ok nëjkx nyaxtë; ets may mëti'ipë tyam ix'okën, jëyëjp nëjkx nyaxtë.

Ko ja Jesús nimëtyä'äky mëtëkëëk'ok ja y'o'kën

³² Jam ënety pya'tëkëtë Jerusalén, ja Jesús jëyëjp nëjkxp ets ja y'ijxpëjkpëtëjk ix'ok, tääts ja y'ijxpëjkpëtëjk myäytyë tyajtë ets ja mëti'ipë ix'am miintëpën tsë'këtëp. Ënet ja Jesús ëpëky twoowpëtsëëmy ja nimajkmäjtskpë ja y'ijxpëjkpëtëjk ets tukmëmëtyäky wi'ix ënety jyata'anyën.

³³ Ets t'ënëmaay: Jerusalén tyam npa'tëjkëmë, ma ja Naaxwiinyëtë ja'ay ja y'U'unk yajkë'ëkyaka'anyën ma ja teety wintsëntëjkëtyën ets tsajptëkotyëtë yaj'ijxpëjkpëtëjkëtyën; yë'ë yakutukantëp ets y'ookëty ets tukë'ëkëja'antë ja ja'ay mëti'ipë ka'ap jyutiisëty.

³⁴ Ets nëxi'ika'an tukxi'ika'antë, twintsuj'an tjëjptsuja'antë, ets tyaj'ooka'antë; je'eyëp ko, kom tëkëëk xëëw jyuukpyëka'any.

Ko ja Santiagë ets ja Juan t'amëtowtë tu'uk ja mëyajtën

³⁵ Tääts ja Santiagë mëët ja Juan, Zebedeo myaank ojts nimintë ja Jesús ets t'ënëmaaytyë: Wintsën, yë'ëjës ntsojktëp ets tu'uk yë mëyajtën xytyunëty xymyo'otëtyës mëti'ipës n'amëtowantëpën.

³⁶ Tääts ja Jesús ojts tyajtëy: ¿Tiitsën mtsojktëp ets ntunëtyës ma miitsëtyën?

³⁷ Tääts y'ënantë: Mtunëp yë mëyajtën, ko ënety xypyääty ja mëj'ajt mkutujkën, xyaj'u'unyëtëpës nitu'uk m'a'oy'äämpy ets nitu'uk m'anajny'äämpy.

³⁸ Ënet ja Jesús y'ëtsoowëtë: Ka'ap xynyijawëtë mëti'ipë m'amëtoowtëpën. ¿Mkupëktëp ja ëyo'on ijxtëmës n'ëyowa'anyënë, ets mnëëpätëty ijxtëmës nëëpäta'anyënë?

³⁹ Tääts y'ëtsoowtë: Nkupëktëpës. Ënet ja Jesús y'ënëmaayëtë: Tëy, näjyëtu'un miits m'ëyo'onpaatëty ijxtëm ëjtsën ets näjyëtu'un mnëëpäta'antë ijxtëm ëjtsën,

⁴⁰ e ko miits xy'amëtowtë ets m'u'unyëja'antë ëjts n'anajny n'aka'anyës, ka'ap y'ëjtsëty xypyaat'aty nmo'otëty, yë'ë yajmo'ojantëp pën të yajktuknipëjktaakëtën.

⁴¹ Ko jëtu'un tmëtoowtë ja nimajkpë ja Jesús ja y'ijxpëjkpëtëjk, ënät tukjoot'anpëjktë ja Santiagë ets ja Juan.

⁴² Tääts ja Jesús ja y'ijxpëjkpëtëjk tmëkajpxmujky ets t'ënëmaay: Mnija'awëtëp miitsëty ko ma ja naax kajpnën ka'apë jyutiis'atën tää yajkutujkpëtëjk mëti'ipë näjya'awëtëpën mëët ja mëk'ajtën ets y'ënä'ämëty mëk ma ja jyä'äyën, ets yë'ë ja kyutujkën tyim yajtunäämpy ma ja naax kajpnën.

⁴³ E ma miitsëtyën ka'ap tjëkyepy jëtu'un pën jyä'äy'atëty. Pën tsyojkën'ajtyp mëj y'ita'any ma miitsëtyën, myëtunëp jëyëjp ja myëku'uktëjk.

⁴⁴ E pën jëyëjp'ataanpën, myëtuunta'ajëp ja jyiiky myëku'uk.

⁴⁵ Jä'ä ko ka'ap yë'ëjëty ëjts të niminy etsës nyajmëtunëty, yë'ëjës të niminy etsës ja ja'ay nmëtunëty ets nkëpätëtyës may ja ja'ay ja pyoky ko ni'o'ktu'utëtyës, jëtu'unts may nyitso'oktëty.

Ko Jesús tyaj'ijxë'ëky ja Bartimeo

⁴⁶ Tääts jyajtë jam Jericó. Ko ja Jesús ënety të kyajpnpëtsëmy mëët ja y'ijxpëjkpëtëjk ets ja mayjyä'äy. Jam tu'u ëkë'ëm tu'uk ja ja'ay wiintspë y'u'unyë mëti'ipë xyëëwajtypyën Bartimeo, ja Timeo y'u'unk.

⁴⁷ Ko ja ja'ay wiintspë tmëtooy ko nyäxy ja Jesús, Nazaretëtë ja'ay, ënät tyëjkëy yaxpë jojkpë: Jesús, yajkutujkpë, David yë y'u'unk y'ok, pa'ëyoowkës.

⁴⁸ Tääts ja mayjyä'äy ojts y'ojyë ets y'amonëty. Ka'ap ja ja'ay ja wiintspë y'amony, ni'ikyë tyëkë yaxpë jojkpë ets y'ënä'äny: Yajkutujkpë, David yë y'u'unk y'ok, pa'ëyoowkës.

⁴⁹ Tääts ja Jesús wya'ak'o'oyëy ets ja ja'ay t'ënëmaay: Nëjkx wowtë. Tääts t'ënëmaaytyë ja wiints: Tsojk pëtë'ëk, tam myajmëkäjpxy.

⁵⁰ Ënet ja Bartimeo ja nyijän tnajtspojtsëy ets pyëti'ky, tä ja Jesús tmëwinkoony.

⁵¹ Ets ja Jesús yajtëëwë: ¿Tii mtsojkpy ets ntukmëtunëty? Tääts ja ja'ay wiintspë y'ëtsooy: Wintsën, ijxpëkaanpës.

⁵² Ënet ja Jesús y'ënëmaayë: Nëjkxnë, tëë mtso'oky, jä'ä ko të xymyëpekyës. Jëtu'un ja ja'ay wiintspë ënätyë y'ijxpëjky ets ja Jesús tpatso'ony.