Malaquías 1 - Biblia Dc en Mixe de Quetzaltepec

Wi'ix yë Wintsën tsoky tjawën yë Israel ja'ayëty

¹ Ya'atë aaw ayuk ojts yë Wintsën tukmëmëtyä'äky yë Israel kajpn, mëti'ipë tyukmëtoowën yë Malaquías, käjpxynyajxpë.

² Jëtu'un yë Wintsën y'ënä'äny: Ntsojktëp nja'awëtyëp miitsëty. E miitsëty tyaa m'ëtsowtë: ¿Wi'ix ëëts nijawëtëty ko xytsyoktës xyjyawëtës? Tääts ja Wintsën y'ëtsoy: Miitsëty jëtu'un ntsoktë njawëtë tääjës ntsojkyën yë Jacob, oy ënety ja Esaú mëët jyatu'kä'äxëty

³ n'ëxëëk ijxës yë Esaú. Ja nyaax kyajpn ja Esaú, mëti'ipë ënety kopkjotmën, aanë'ëk tëëtsë'ëkës ojts nyaj'awinpity ets ja nyaax kyam mëti'ipë ënety myëët'ajtypyën yi'iyë jëyujk ëwa'anëtypë jam tënääpy.

⁴ Ko yë Edom ja'ayëty, yë Esaú y'u'unk y'ok, jeexyë y'ëna'antë: Tëë yë nkajpn'ajtëm kyutëkoy, e oy n'akojëmëty, yë Wintsën mëti'ipë maaytyääyëpën winë jëtu'un y'ëtsowa'any: Oy t'akojëtëty, je'eyëp ko nyajma'atäämpyës jatëkok. Yë nyaax kyajpnëty jä'ä nëjkx yajtijy ëxëëk kajpn ets Naax kajpn mëti'ipë xëmë yë Wintsën yajjoot'anpëktëpën.

⁵ Kë'ëm nëjkx xy'ixtë mëët yë mwiinëty ets nëjkx m'ëna'antë: Yë Wintsën yë myëj'ajtën jëkämpaat muum jyä'ty.

Ma Wintsën t'ojyën yë teetytyëjkëty

⁶ Jëtu'un Wintsën mëti'ipë maaytyääyëpën winë t'ënëmaay yë teetytyëjkëty: Yë u'unk ëna'k wyintsë'këtyëp yë tyaak tyeetyëty ets tuunpëtëjkëty wyinkutsë'këtyëp yë wyintsënëty. E ëjts, mijts xytyeety'ajtëpës, ¿tiijës ko xykyawinkutsë'ëkëtë? Pën ëjts miitsëty xyWyintsën'ajtëp, ¿wi'ixës ko xykya mëj ixtë? Miitsëty ni'ikyë xy'ixtijnëtës ets m'ëna'antë: ¿Maaxë mkayajmëj ixy?

⁷ Miitsëty yë'ë mëmiintëp maas yë nwintsë'këntyaknën ja kääky uuky mëti'ipë ka'ap wya'atsëtyën ets ni'ikyë xyajtëwtë: ¿Maatën myajmëtëkoy? Miitsëty jam xymyëtëkoytyës ma mmaytyën mtajtën ko jyëkyejpy ka'ap yajmëj ixëty yë nwintsë'këntyaknës

⁸ ets ko ka'ap kyupoky oy yë'ë Wintsën yajtukwintsë'ëkëja'anëty yë jëyujk mëti'ipë pëjkëpën mëti'ipë wiintsën, mëti'ipë tekymya'atën. Mënëjkxtë tääpë jëtu'unpë wintsë'kën, ma yajkutujkpëtëjkën ets xy'ëkjanty y'ixtëty pën kyupëjktëp tääpë jëtu'unpë wintsë'kën.

⁹ Miitsëty jyëkyejpy xy'amëtowtëty yë Dios yë pa'ëyo'owën najts'ëyo'owën. Je'eyëp tëy ko jëtu'unpë wintsë'kën xymyo'ojantëpëty ka'ap nëjkx tkupëky ets ka'ap nëjkx myaj'ëxajëtë oy. Yë Wintsën mëti'ipë maaytyääyëpën winë, jëtu'un y'ënä'äny:

¹⁰ Jääpëk jeexyë jam pën pyëtsimy ma miitsëtyën mëti'ipë tsajptëjk yaj'ëtukëpën, këtiipë pën tyajmëjëty jap yë jëën maas yë nwintsë'këntyaknën. Jä'ä ko ka'apës jotkujk näjyawëty mëët miitsëty ets ka'apës jëtu'un n'ëkupëkanë yë wintsë'kën mëti'ipë myajktëpën.

¹¹ Oymyaanaax myaakajpnëty aakyë'ë oypyë xymyooytyëpës yë wintsë'kën ets aak'oy tyaktë yë pyoomëty mëti'ipës xytyukwintooytyëpën.

¹² E miitsëty, ni'ikyës xyajjoot'anpëktë, maaytyëp mtajtëp jëtää, koos jyëkyejpy ixtijy nwë'ëmëtyës ets jyëkyejpy jä'ä nyajmo'ojëtyës ja kääky jë'kxy ka'apë pën t'ëk tsojknën.

¹³ Miitsëty jëtu'un m'ëna'antë: Tëës nmëtsipkä'äxnëtë tu'kë'ëyë ya'atë. Xy'ixtijnëtëpës. Ets ni'ikyë mmaytyë mtajtë ko ntukxoontäkpyës ko xymyëmintë ja kupixyny ëkë ja tsajpkaa mëti'ipë meetsyën ëkë tekymya'atën ets jä'ä xytyukwintsë'ëkëja'antës

¹⁴ Poky yë ja'ay wyi'imy, mëti'ipë ënaanpën ko oypyë jëyujk xytyukwintsë'ëkëja'anyës ets jä'ä xytyukwintsë'këpës mëti'ipë ka'ap y'oyëtyën myëkëtyën. Ëjts yajkutujkpë'ajtp ets aak xytsyë'këpës yë naax kajpn. Jëtu'un y'ënä'äny yë Wintsën mëti'ipë maaytyääyëpën winë.