Lucas 8 - Biblia Dc en Mixe de Quetzaltepec

Ja to'oxytyëjktëjkëty mëti'ipë ja Jesús ijty pyutëjkëtyëpën

¹ Ko jëtu'un y'ëkjajty y'ëkkëpejty, ënät ja Jesús jyëtijty kajpn kajpn mëët ja y'ijxpëjkpëtëjk nimajkmäjtskpë ets ojts tkajpxwä'kxy ja oy aaw oy ayuk mëti'ipë nyikäjpxypën ja Dios ja kyutujkën.

² Näy tam ja to'oxytyëjk jënaakën mëti'ipë ja Jesús ënety të yajtso'okëtën, Maria, mëti'ipë yajtijpën Magdalena, mëti'ipë ja ku'oypyë ënety niwëxtujk të tmëët'atyën;

³ näjyëtu'un ja Juana, Cuza tyo'oxytyëjk, mëti'ipë jam tuunpën ma ja Herodes y'ëne'emyën; ja Susana ets nimay ja to'oxytyëjkëty ijty pyutëkëtë.

Ja nyi''ijxpät ja nippë

⁴ May ja Jesús ojts nyiminyë ja ja'ay mëti'ipë tso'ontëpën kajpn kajpn. Ko ja ja'ay nimay myujktë ënät ja Jesús tu'uk tukmëmëtyaktso'ony ja ijxpäjtën ets y'ënäny:

⁵ Tu'uk ja ja'ay tsyo'ony tsajpmok wëjpë, ko ja tsajpmokpajk twëjjëtijty, ojts tu'kpëky kyä'äy tu'ujotm, ënät yajnaaxkutä'änëy ets ja joon myiintë ets tpiiwmujktë.

⁶ Jatu'kpëky ja tsajpmok ojts kyä'äy tsaajoty. Ko yoony, ënät tyëëtsë'ky jä'äkyëjxm ko ja naax jam kyaxookëty.

⁷ Jatu'kpëky ja tsajpmok ojts kyä'äy äpnyjoty ets mëët yoony ja äpny ets nyiyoonpäjtë tääts tyitsy.

⁸ Jatu'kpëky ojts kyä'äy jë'kxynyaaxjoty, jä'ä ojts yony ets tyëëmpejty, mëko'px ojts pyajk'aty tu'ukpë ja tsajpmok yajnipyën. Ko ja Jesús myëtyaktaay, tääts mëktä'äky y'ënäny: Pën ja tyatsk tyukmëtoopy, wä'än tmëtoowkukë.

Tii ko Jesús myëtyä'äky ijxpäjtën mëët

⁹ Ënet yajtëëwëtë ja y'ijxpëjkpëtëjk wi'ix nyiwijyën mëti'ipë ënety të tmëtyä'äkyën ijxpäjtën mëët.

¹⁰ Tääts ja Jesús y'ëtsoowëtë: Miits ja Dios të mtuknijawëtë mëti'ipë yu'utsy'ijtpën ma ja kyutujktaknën. E ja wiinkëtypë ja ja'ay, ijxpäjtën mëët yajtukmëmëtya'aktë këtiipë tja'akyukëtëty oy tja'ixtëty, ets ka'ap tmëtoowkukëtëty oy tjamëtowtëty.

Ko Jesús tkajpxtë'kxy ja tsajpmok wëjpë nyi''ijxpät

¹¹ Yë ya'atë ijxpäjtën jä'ä nyiwijy: Jëtu'un yë tëëmt ijxtëm ja Dios ja y'aaw y'ayukën.

¹² Ja tsajpmokpajk mëti'ipë ojts kyä'äyën tu'ujotm, jëtu'un yë'ë ijxtëm ja ja'ayëty mëti'ipë ja Dios ja y'aaw y'ayuk jyamëtoow'ijtëpën; ënät ja mëjku'u pyëjkxëtë ja Dios ja y'aaw y'ayuk ets ka'ap tmëpëktëty, jëtu'un ka'ap nyitso'oktëty.

¹³ Ja tëëmt mëti'ipë ojts kyä'äyën tsaajotm, jëtu'un yë'ë ijxtëm ja ja'ayëty mëti'ipë y'amëtoow'ijtëpën ja Dios ja y'aaw y'ayuk ets jotkujk myëpëjkojtë. Ko ënät wi'ix tkujatëtë tääts t'ëxmatstë. Yë'ë jëtu'un jajtp ijxtëm ja tsajpmokyonën mëti'ipë ka'ap tyiktsk kyëkëtyën.

¹⁴ Ja tëëmt mëti'ipë ojts kyä'äyën äpny akujky, jëtu'un yë'ë ijxtëm ja ja'ayëty mëti'ipë y'amëtoow'ijtëpën ja Dios ja y'aaw y'ayuk ets tmëpëktë, je'eyëp ko yë'ëty, yë'ë myëjpëjktaktëp ja nyaax kyamëty yaa naaxwiiny ets ja myeenyëty, xiktëp xoontëp; jëtu'unts yë'ë nyaxtë ijxtëm ja tsajpmokyonën mëti'ipë tëtspën ets ka'ap tyëëm'aty.

¹⁵ Ja tëëmt mëti'ipë ojts kyä'äyën jë'kxynyaaxjoty, jëtu'un yë'ë ijxtëm ja ja'ayën mëti'ipë ja Dios ja y'aaw y'ayuk y'amëtoow'ijtëpën ëmuumtu'ukjot ets tpatuntë, jëtu'unts ja jyuukyajtën tyajtu'uye'eytyë ijxtëm ja Dios tyukmëtsokëtën.

Kutë'kxn nyi''ijxpät

¹⁶ Ka'ap pën yë jëën tyajtooypyiky ets tnipe'eny, ëkë maapäjnpa'tke'p tpëjktä'äky. Këjxm ja jëën yajkëxkony ets tkutë'kxëty mëti'ipë tëjkëtëpën.

¹⁷ Näyjyëtu'un, ka'ap tii yu'utsy y'ity mëti'ipë ka'ap yajnijawëtyën, ka'ap tii yajpëjkë'ëky xëmë mëti'ipë ka'ap yajpaatëtyën.

¹⁸ Mëtowtë yajxon. Pën may tii myëët'ajtyp, wäänëni'ik jyaak timyajmo'oja'any; pën yiin wäänë tii myëët'ajtyp, yajpëjkëjaanp tu'kë'ëyë mëti'ipë ënety jyamëët'ajtypyën.

Jesús ja tyaak ets ja myëkä'äxtëjk

¹⁹ Ënet ja Jesús ja tyaak ets ja myëkä'äxtëjk jyajtë ma ënety jamën, kä'äp tpatë winkon jä'ä ko ënety ja ja'ay jam jyatëtë.

²⁰ Tääts ja Jesús yajtuk'ëwa'anëy: Tap tëjk ëkë'p ja mtaak ets ja mmëkä'äxtëjk tyänëtë, mijtsëk m'ixanëtëp.

²¹ Ets ja Jesús y'ëtsooy: Yë'ëjës ntaak'ajtyp ets nmëkä'äx'ajtyp mëti'ipë y'amëtoow'ijtëpën ja Dios ja y'aaw y'ayuk ets tpatuntë.

Ko Jesús tyajnaxy ja mëkpoj ets ja nëë tyajkëëy'awë

²² Tëkok ja Jesús ja y'ijxpëjkpëtëjk t'ënëmaay: Oy nja'amëty jamtsow mejypyë'am. Ënet tyëjkëtyë kepy nëëwinye'epyëjoty ets ojts nyëjkxtë.

²³ Jam ënety mejy itkujkm nyëjkxtë ko ja Jesús myaanajxy ets ja mëkpoj myiiny ets ja nëë jap kepy nëëwinye'epyëjoty kyujä'tsëy, mëpaatëp kyiinëtë.

²⁴ Tääts tyujxtë ja Jesús ets t'ënëmaaytyë: Wintsën. Wintsën. Tam nki'ina'anëmë. Ënet ja Jesús pyëti'ky ets mëk'äämpy twinkukajpxëy ja mëkpoj, ënät ja nëë ets ja mëkpoj myoony ets ja nëë kyiiy'a'awëy.

²⁵ Ets t'ënëmaay ja y'ijxpëjkpëtëjk: ¿Tii ko mkamëpëktë? Tsë'këtëp ënety ni'ik ja y'ijxpëjkpëtëjk, ets mëjmëtoy tja'awëtë paaty xim yam nyäy'ënanëtë: ¿Pën ja'ay tëy ya'atënë? Pojpaat mejypyaat myëmëtoowënë ko t'ëne'emy?

Gerasa ja'ay mëti'ipë ja ku'oypyë myëët'ajtypyën

²⁶ Ënet jyajtë Gerasa y'itjotm, mëti'ipë jamtsow nëë'awinm wë'ëmpën wintuuytsyow ma Galilea yajpaatyën.

²⁷ Ko ja Jesús pyëtsiimy kepy nëëwinye'epyëjoty ënät nyimiinë tu'uk ja kukajpn mëti'ipë ku'oypyë myëët'ajtypyën. Tëëyëp ënety ja wyit t'ixjäänë, ni kyatsëënë tëkoty, jam tsyëënë ma o'kpë yajpëjkë'ëktën.

²⁸ Ko t'ijxpaty ja Jesús ets twinkoxtënaay, tääts y'ënäny ayaxp ajojkp: Jesús, Dios ni'ik këjxmëpë y'u'unk, ¿tii mtsojkpy mëët ëjts? Tun ja mëyajtën, këtiis xyajjotkëxy.

²⁹ Yë'ë kyu'ëna'anëp ko ja Jesús ja ku'oypyë t'ëne'emy ets ja ja'ay t'ëxmatsëty. Kanaak'ok ënety ja ku'oypyë të tsyäätsytyunyë. Ko ja pujxntejpxy jyayajtuktsumy ma kyë'ëjën ma tyekyën ets ka'ap maa nyëjkxëty, yë'ë tyukpojtëtyääpy ënätyë ets nyijkxy jam muum të'ëts'itjotm.

³⁰ Ënet ja Jesús tyajtëëy: ¿Tii mxëëw'ajtyp? Ets y'ëtsooy: Legionkës nxëëwajtyp. Paaty jëtu'un y'ënäny, jä'ä ko nimay ënety ja ku'oypyë jap të tyëkëtë ma ja ja'ayën.

³¹ Ënet ja ku'oypyë t'ënëmaaytyë ja Jesús ets ka'ap kyäxëtëty ma ja ëyoowtaknën.

³² Jamts ënety ja may ëtsëm yuunpëtë kopkwinm ets ja ku'oypyë nyu'kxtaktë ets ja ëtsëm tuktëkëtëty. Yajkutujk ja Jesús.

³³ Tääts ja ku'oypyë pyëtsëëmtë ma ja ja'ayën ets tuktëjkëtyë ja ëtsëm. Ënet ja may ëtsëm kyupëyë'knajxtaaytyë ja'awjoty ets nëëjoty kyëtaktaaytyë. Japts jyi'kxtaaytyë.

³⁴ Ja ja'ayëty mëti'ipë ënety jam ëtsëm këwent'ajtëpën, ko jëtu'un t'ijxtë tyunyë jyätyë, ënät kyäktaaytyë ets ojts nyëjkxtë jam kajpntum ets nimëtyaktë.

³⁵ Ojts ja ja'ay tnitsoontë ets t'ixa'antë tii të tyuny të jyätyë; ko jyajtë ma ja Jesús jamën ets t'ijxpatë ko tam ja ja'ay y'u'unyë mëti'ipë ënety ja maykyu'oypyë të tmëët'atyën, wijy kejy, xoxy pëky; ënät ojts tsyë'ëkëtë.

³⁶ Ets ja ja'ay mëti'ipë ënety të t'ixtën, yë'ë nyimëtyaktë wi'ix ënety ja ja'ay ja ku'oypyë të y'ëxmatsyën.

³⁷ Jä'äkyëjxm ja Gerasa ja'ayëty ni'ëmukë tmëpëjktsoowtë ja Jesús ets jam tsyoonëty, tsë'këtëp ja ni'ik. Ënet ja Jesús kepy nëëwinye'epyëjoty tyëjkëy ets tsyo'ony.

³⁸ Ja ja'ay mëti'ipë ënety ja ku'oypyë të y'ëxmatsyën, ojts mëk'äämpy tmënu'kxtä'äky ja Jesús ets mëët nyëjkxëty kepy nëëwinye'epyëjoty. E ja Jesús jëtu'un y'ënëmaayë ets wyë'ëmëty::

³⁹ Nëjkx ma mtëjkën, jamts xynyimëtya'akëty wi'ix ja Dios të mputëkëtyën. Ojts ja ja'ay nyijkxy ets nimëtyäky wi'ix ënety ja Jesús të yajtso'okyën.

Jairo nyëëx ets ja to'oxytyëjk mëti'ipë Jesús wyit tyoonën

⁴⁰ Ko ja Jesús jyä'äjty jatëkok mejypyë'am, pëk paat ja ja'ay jam jya'awëyë, janty aak ëwxijtëtëp ënety ja ja'ay jam.

⁴¹ Tääts tu'uk ja ye'etyëjk jyä'äjty mëti'ipë xyëëwajtypyën Jairo, wintsën'ajtp jam tsajptëkotm. Ënet naaxkëjxy nyäkyoxtënaaytyakë Jesús wyintuuy ets tmënu'kxtäky ets mëët nyëjkxëty ma tyëjkën.

⁴² Ookanëp ënety ja nyëëx, tu'kpajkpë t'u'unk'atyën, majkmäjtsk ënety ja jyëmëjt. Ko ja Jesús ojts nyijkx, may ja ja'ay pyanëjkxë.

⁴³ Jamts tu'uk ja to'oxytyëjk mëti'ipë majkmäjtsk jëmëjt ënätynyë ma ja pyo'omayë pyatënën ets ka'ap tyajxmony; kanu'unpë ënety meeny të tyajtuunë ko ja tsooy tjuy ets ja yajtsooypyäjtpë jyayajtsooypyetyë, ets ni pën tkajaty yajtso'okëtëty.

⁴⁴ Tääts ojts tpanëjkxy ja Jesús ets ja wyit pa'a ojts toonë ets ja pyo'omayë ënätyë tyajxmoony.

⁴⁵ Ënet ja Jesús tyajtëëy: ¿Pënës të xytyony? Ko ni pën tkakupëjky ets ja Pedro y'ënäny: Wintsën, jëtu'unyë ja'ay m'atij m'akotëty.

⁴⁶ Tääts ja Jesús y'ënäny: Tëës ja'ay xytyony, tëëjës njawë koos yë nmëk'ajtën të xytyukpëtsëmy.

⁴⁷ Ko ja to'oxytyëjk t'ijxy ko ka'ap y'oyëty tkuyu'utsëty mëti'ipë të tunyën, tääts ojts nyäkyoxtënaaytyä'äkyë ma Jesús tyeky'ëjxën ets tuk'ëwa'anëy mayjyä'äy wyintum ko yë'ë ënety të tony ja Jesús ets ënätyë të tsyo'oky.

⁴⁸ Ënet ja Jesús y'ënëmaayë: Nen, jä'äkyëjxm të mtso'oky koos të xymyëpëky. Nëjkx akujk jotkujk.

⁴⁹ Tam ënety ja Jesús jëtu'un y'ënä'änyëm ko jyä'äjty tu'uk ja ja'ay mëti'ipë tso'onpën ma ja Jairo tyëjkën, ënät t'ënëmaay ja tsajptëjk wintsën: Tëë ja mnëëx y'o'knë, këtii nëkoo xyajjotkëxy yë Wintsën.

⁵⁰ Ko ja Jesús jëtu'un tmëtooy, ënät t'ënëmaay ja Jairo: Këtii mtsë'ëkë, je'eyë mëpëk ets mnëëx tsyo'okëty.

⁵¹ Ko jyajtë ma ja Jairo tyëjkën, ka'ap ja Jesús tkupëjky ets pën pyatëkëtëty, yi'iyë wyoow ja Pedro, Santiagë, mëët ja Juan ets ja u'unktaak u'unkteety.

⁵² Nimay ja ja'ay ja kiixy u'unk tnijë'ë tniya'axtë ets ja Jesús y'ënëmaayëtë: Këtii mya'axtë, ka'ap yë kiixy u'unk të y'ooky, maap je'eyë.

⁵³ Ets ja Jesús tukxiktë, nyija'awëtëp ko tëë ja Jairo ja nyëëx y'o'knë.

⁵⁴ Tääts ja Jesús tmajtsy kyë'ëkëjxy ja kiixy u'unk ets mëk t'ënëmaay: Kiixy u'unk, pëtë'ëk.

⁵⁵ Ets jyuukpyijky. Ënätyë pyëti'ky ets ja Jesús y'ënäny ets tyajkaytyëty.

⁵⁶ Mëj ixy ja tyaak tyeety t'ijxtë. Tääts ja Jesús y'ënëmaayëtë ets ka'ap pën tuk'ëwaanëtëty ko jëtu'un të tyuny të jyätyë.