Lucas 7 - Biblia Dc en Mixe de Quetzaltepec

Ko Jesús tyajtso'oky tu'uk ja tsiptuumpë, Roma ja'ay

¹ Ko ja Jesús jëtu'un tmëëtmëtyaktaay ja mayjyä'äy, ënät ojts nyijkxy jam Capernaúm.

² Jamts ënety tu'uk ja tsiptuunpë wintsën mëti'ipë ja tyuunpë mëk tsyojkpyën, pëjkëp ets ookanëp ënätynyë.

³ Ko ja tsiptuunpë wintsën tmëtoy'äjty ja Jesús, ënät tkejxy ja jutiis mëjja'aytyëjk ets ja mëyajtën tuk'amëtowa'any ets ja Jesús myinëty tyajktso'okëty ja tyuunpë.

⁴ Tääts ojts tninëjkxtë ja Jesús ets t'amëtoowtë ja mëyajtën mëk'äämpy t'ënëmaaytyë: Jyëkyejpy ets xypyutëkëty ja tsiptuunpë wintsën,

⁵ jä'ä ko tsyojkpy yë nkajpnëtyës ets yë'ë kë'ëm të tkojy yë tsajptëjk.

⁶ Ënet ja Jesús ojts mëët nyëjkxtë ets ko ënety jam jya'tanëtë ma ja tëjkën, tääts ja tsiptuunpë wintsën ojts tjëjpye'eytsyoy ja Jesús ets t'ënëmaay: Wintsën, ka'apës xypyaat'aty ets mtëkëty maas yë ntëjkën,

⁷ paatyës kë'ëm të nkanëjkxy ma mijts myajpaatyën. Jyëkyejpy je'eyë m'ëna'anëty ko ja ntuunpës tsyo'okëty ets tso'okëp yë'ë.

⁸ Jä'ä koos nän ëne'emyës n'ity, ëpëky, tamës yë ntsiptuunpëjk mëti'ipës näjyëtu'un n'ëne'empyën. Koos nitu'uk n'ënëëmë nëjkx, tääts nyijkxy; koos wiinkpë n'ënëëmë min, tää myiny; ets koos ja ntuunpë tii ntuk'ëne'emy, tyuunpy.

⁹ Mëjmëtoy ja Jesús tmëtooy ko ja tsiptuunpë wintsën jëtu'un y'ënä'äny ets wya'akwinpijty, tääts t'ënëmaay ja ja'ay mëti'ipë ënety yajpatëpën: Jëtu'un miits n'ënëëmëtë ko ni tu'ukës ja'ay jëtu'unpë të nkapaaty ma Israel kajpnën ijxtëm ya'atë ye'etyëjkën, mëk tmëëtëty ja mëpëjkën.

¹⁰ Ko ja ja'aywyoopë wyimpijnëtë tëjkwintum ma ja pa'amja'ayën, tëë ënety ja pa'amja'ay nyiwijnë.

Ko ja Jesús tyajjuukpyiky tu'uk ja yä'äy'ëna'k

¹¹ Tääts ja Jesús ojts nyijkx ma ja Nain kajpnën mëët ja y'ijxpëjkpëtëjk ets may ja ja'ay.

¹² Ko tmëwinkoony ja kajpn, ënät ojts t'ijxpaaty ko tu'uk ja o'kpë yajmënëjkxy ets tyajnaaxtëkëja'antë. Tu'kpajkpë tmaank'atyën tu'uk ja ku'ookytyo'oxy. May ja ja'ay jam pyanëjkxyë.

¹³ Ko ja Jesús t'ijxy ja to'oxytyëjk ja ku'ookpyë jyi'iy yä'äxy, tääts t'ënëmaay: Amonyë, këtii myä'äxy.

¹⁴ Ënet ja Jesús twinkuwa'këy ja o'kpë ets ja këëypyäjn toony ets ja o'kpë këëpyë wya'k'oyëtë, ënät ja Jesús t'ënëmaay ja o'kpë: Mexy, ëjts mijts n'ënëmääpy, Pëtë'ëk.

¹⁵ Tääts wyä'tskujkëy ja mexy mëti'ipë ënety të y'ookyën ets kyajpxpëjky. Ënet ja u'unktaak yajtukë'ëtëjkëy ja y'u'unk.

¹⁶ Ko jëtu'un t'ijxtë, tääts ni'ëmukë tsyë'këtyë ets ja Dios tmëjja'aw tjaantyjya'awëtyë ets y'ënantë: Tu'uk ja Dios kyäjpxynyajxpë të kyëxë'ëky ma ëëtsajtëmën. Näyjyëtu'un y'ënantë: Tëë ja Dios tniminy tnija'ty ja jyä'äy.

¹⁷ Yajknija'awëtyääy jënu'un ja ja'ay tsyëënëtën jutiis ja'ayëty y'itjotm ko ja Jesús ënety të tyajjuukpyiky ja o'kpë.

Ja Juan Yajnëëpäjtpë ja kyexyye'epyë

¹⁸ Ko ja Juan Yajnëëpäjtpë ja y'ijxpëjkpëtëjk tyukmëmëtyakëtë mëti'ipë ja Jesús tyuunpyën, ënät ojts tmëkäjpxy nimäjtsk ja y'ijxpëjkpëtëjk,

¹⁹ ets tuknikejxy ja Wintsën ets tyajtëwtëty pën janty yë'ë ënety ja Dios të kyexyë mëti'ipë minaanpën, ëkë wiinkpë yajjëjp'ijxpë.

²⁰ Tääts ja Juan ja kyäjpxynyajxpë ojts nyëjkxtë ets t'ënëmaaytyë ja Jesús: Ja Juan Yajnëëpäjtpë ëëts të xykyäxtë ets nyajtëwtëty pën janty mijts ja Dios të mkexyë mëti'ipë minaanpën ëkë njëjp'ixtëpës ja wiinkpë.

²¹ Tääts nän jää it ja Jesús tyajtsoky may ja ja'ay mëti'ipë pëjkëtëpën ets tyajpëtseemy ja ku'oypyë ma ja'ayën ets nimay ja ja'ay wiintspë tyaj'ijxë'ky,

²² ets y'ëtsoowinpijty: Nëjkxtë ets xytyuk'ëwaanëtëty yë Juan wi'ix yaa të xy'ixtën. Tukmëmëtya'aktë ko ja ja'ay wiintspë y'ijxpëktë, ko tekymya'atpë ye'eyë'ëktë, ko pu'uts mëëtpë tsyo'oktë, ko natpë myëtoowpëktë, ko o'kpë jyuukpyëktë ets ko ëyoopëja'ay ja oy aaw oy ayuk yajtuk'ëwaanëtë.

²³ Ets akujk jotkujk ja ja'ay mëti'ipë ka'ap ja myëpëjkën tyajtëkoyën ma ëjtsën.

²⁴ Ko tsyo'ontë ja Juan Yajnëëpäjtpë ja kyukäjpxy ma ja Jesús ënätyën, ënät ja Jesús nimëtyaktso'ony ja Juan, tukmëmëtyä'äky ja ja'ayëty: ¿Tii miits ojts xynyinëjkxtë ets xy'ixtë jam të'ëts'itjotm? ¿Ja tsajpkäpyny mëti'ipë pojmiinp pojxëjpënë?

²⁵ E pën ka'ap, ¿tii ojts xynyinëjkxtë ets xy'ijxtë? ¿Tu'uk ja ja'ay janty oypyë xyoxyëtyënë? Mnija'awëtëp miits mëti'ipë ja ja'ay oy ja wyit nätyukxojxëtëp ets janty'oy nyäyaj'itëtë, jam yajpaatë ma yajkutujkpë tyëjkën.

²⁶ Pën ka'ap yë'ëkyëjxmëty ojts xynyinëjkxtë, ¿tii ojts xynyinëjkxtë ets xy'ijxtë? ¿Tu'uk ja Dios ja kyäjpxynyajxpë? Tëy miits n'ënëëmëtë ko wäänë mëj ja Juan këtiinëm ja Dios ja kyäjpxynyajxpë mëti'ipëty të nyaxtën.

²⁷ Ja Juan jëtu'un yajtijp ko ja Dios ja y'aaw y'ayuk y'ënä'äny: Tyamës nkexy yë nkäjpxynyajxpë ma miitsëtyën ets ja tu'u tnipëjktaakëty ma mnaxa'anyën.

²⁸ Jëtu'un miits n'ënëëmëtë ko ni pën ja'ay jëtu'un kyamëjjëty ijxtëm yë Juankën. Oy jyajëtu'unëty, ja ni'ik mutskpë ma ja Dios ja kyutujktaknën, wäänë mëj jä'ä këtiinëm yë Juan.

²⁹ Ko ja mayjyä'äy ets ja yajkukëpäjtpëtëjk jëtu'un tmëtoowtë ja Jesús y'ënä'äny, ënät ojts tkupëktë ko Dios ja jyä'ä ko y'oyëty jä'ä ko tëë ënety ja Juan yajnëëpätëtë.

³⁰ E ja fariseë ja'ayëty ets ja tsajptëkotyëtë yaj'ijxpëjkpëtëjkëty, ka'ap tkupëjktë mëti'ipë ja Dios ënety të jyatukmëtsokëtën, jä'ä ko ka'ap ënety të tkupëktë ets ja Juan yajnëëpätëtëty.

³¹ ¿Pën ntukmë'ijxkijpxmëp ja ja'ay mëti'ipë tyam juuky'ajtëpën, tiijën kyëxë'ëky?

³² Jëtu'un jä'äjëty ijxtëm ja u'unk ëna'k y'u'unyëtën maayjoty ets mëk nyämyëya'ax nyämyëjokëtë: Tëës njaxu'uxy, kä'äp miits të m'ätstë; tëëjës nja'ëy jë'ë ya'ax, ka'ap të mya'axtë.

³³ Näyjyëtu'un ko ja Juan myiiny, ka'ap kyäy y'uuk ijxtëm ja ja'ay kyäytyën y'uuktën ets miits m'ëna'antë ko ku'oypyë myëët'ajtyp,

³⁴ etsës të njamiinpë ëjts, kääp ukpës ijxtëm ja ja'ay kyäytyën y'uuktën e miits jëtu'un m'ëna'antë ko nëkoos nkax'ajnë ets ko yë'ëjës mëët nnämyäyë ja yajkukëpäjtpëtëjkëty ets ja pokyjä'äytyëjk.

³⁵ Oy jyajëtu'unëty, ja wijyajtën kejyajtën mëti'ipë Dios yäjkpyën, jam ja nyikëxë'ëky ma ja ja'ayën mëti'ipë myëët'ajtypyën.

Ko Jesús jam yajpaaty ma ja Simón ja tyëjkën, mëti'ipë Farisejë ja'ayën

³⁶ Tu'uk ja fariseë twooy ja Jesús ma tyëjkën mëkääpyë ets ja Jesús tyëjkëy ma ja fariseë ja tyëjkën ets ja kaaypyäjn twinkuwä'tsëy.

³⁷ Ënet ja to'oxytyëjk tu'uk myiiny mëti'ipë pokyjyä'äyën, jam kajpnjotm tsyëënë. Ko tnija'awëy ko ja Jesús ënety të myiny mëkääpyë ma ja fariseë ja tyëjkën, ënät ojts tmëminy tu'uk ja pa'akxu'kpë nëë, poop tsaa apëjkënjoty.

³⁸ Yaxp ja Jesús twinkuwa'këy ets ja tyeky ojts tyajxo'kë mëët ja wyiin nëë ets ja wyääy tukmäxtëtsy, ets ojts tsu'kxë ja Jesús ja tyeky ets tuktekymyëtä'ämëy ja pa'akxu'kpë nëë.

³⁹ Ko ja fariseë ojts jëtu'un t'ixy ja mëti'ipë ënety të wyoyën ja Jesús kääpyë, jëtu'un myäy tyäjy: Ko jeexyë ya'atë ja'ay Dios kyäjpxynyajxpë'atyë, tëë jeexyë tnijawë wi'ix ya'atë to'oxytyëjk jyä'äy'ätyën mëti'ipë toonëp majtsëpën, yë'ë pokyjyä'äy yë'ë.

⁴⁰ Ënet ja Jesús t'ënëmaay ja fariseë: Simón, tap wäänë nmëkajpxa'any. Ets ja fariseë y'ëtsooy: Oy, Wintsën.

⁴¹ Tääts ja Jesús y'ënäny: Nimäjtsk ja ja'ayëty mëti'ipë myënu'kxy'ajtëp tu'uk ja yajmeenynyu'kxpë. Tu'uk tmënu'kxy'äty mëkoxk mëko'px denario ets tu'uk wëxtyikxy majk;

⁴² e kä'äp ojts t'ëkëpäjnëtë ja nu'kxy, paaty ja yajmeenynyu'kxpë ojts tnime'kxy ja mëti'ipë mënu'kxy'ajtëpën nimäjtskëty. Nikajpx ënät tyam, ¿pën jëtää ni'ik tsojkëp?

⁴³ Ënet ja Simón y'ëtsooy: Ëjts ënaanp ko yë'ë tsojkëp ni'ik mëti'ipë këjää mënu'kxy'ajtëpën. Tääts ja Jesús y'ënäny: Jëtu'un, tëy m'ëna'any.

⁴⁴ Ënet ja Jesús t'ijxy ja to'oxytyëjk ets t'ënëmaay ja Simón: ¿M'ijxyp ya'atë to'oxytyëjkë? Nikë tëëjës yë nteky xyajkxo'kë mëët yë wyiin nëë ets wyääy të tukmäxtë'ëtsy; e koos yaa të ntëkë ma mtëjkën, ni nëës mijts të xykyamo'oy ets jeexyë ja ntekyës të npujy.

⁴⁵ Mijts ka'apës të xytsyu'kxy; e yë to'oxytyëjk, tim je'eyës yaa të ntëkë tampaatës xytsyu'kx'ëtë'ëtsy maas yë ntekyën.

⁴⁶ Mijts ka'apës yë on olivë të xytyukkujaaxy; e yë to'oxytyëjk, tëëjës yë nteky pa'akxu'kpë nëë tukku'utsta'ay.

⁴⁷ Paaty mijts nnëëmë, ko yë to'oxytyëjk mëti'ipë ijty mëjpokymyëëtën, tëë yajkpokymye'kxy, jä'ä ko mëj ja tsojkën ja'awën tmëëtëty. Mëti'ipë wäänë yajkpokymyä'kxpën, wäänë ja tsojkën ja'awën tmëëtëty.

⁴⁸ Ets t'ënëmaay ja to'oxytyëjk: Tëë yajme'kxy yë mpoky.

⁴⁹ Ënet ja mëkääpyë nyäyajtëëwëtë mëti'ipë ënety jam mëët y'u'unyëtën: ¿Pën ja'ay jëtää ya'atë? ¿Wi'ix ko poky tme'kxy?

⁵⁰ Tääts ja Jesús tjaaknëmaay ja to'oxytyëjk: Jä'äkyëjxm të mnitso'oky ko mijts të xymyëpekyës, oy mnëjkxnëty akujk jotkujk.