Lucas 4 - Biblia Dc en Mixe de Quetzaltepec

Ko ja mëjku'u tjayajpokytyunany ja Jesús

¹ Tääts ja Jesús tsyo'ony jam Jordán mëjnëë ëkë'ëm. Ojts ja kënu'kxymyëk'ajtën tyukja'tyë ets yajnëjkxë jam të'ëts'itjotm.

² Jamts ojts y'ity wëxtyikxy xyëëw ets ja mëjku'u jyayajpokytyunanë. Ka'ap tii tkaay ets ojts ja yuu pyäätyë.

³ Tääts ja mëjku'u y'ënëmaayë: Pën Dios mijts m'u'unk'ajtëp, ënëëmë ya'atë tsaa ets tsajpkääky y'awinpitëty.

⁴ Ënet ja Jesús y'ëtsooy: Jëtu'un ja Dios ja y'aaw y'ayuk kyëxja'ayëty: ka'ap ja'ay yi'iyë tsajpkääky timtyukjuuky'atëty.

⁵ Tääts ja mëjku'u ojts wyoownëjkxyë ma ja kopkën ets poj'am tyukni''ijxëtyääyë tu'kë'ëyë ja kuttujkën yaa naaxwiiny,

⁶ ets y'ënëmaayë: Ëjts mijts nmooytya'ajäämpy tu'kë'ëyë ja naax kajpn mëët ja myëj'ajtën kyutujkën. Jä'ä ko ëjtsës të nyajmooytyä'äyës ets nmo'ojëpës pën ënety nmo'ojäämpyës.

⁷ Pën xywyinkuxtënääpyës, aakmijts mjä'ä'atëp.

⁸ Tääts ja Jesús y'ëtsooy: Jëtu'un ja Dios ja y'aaw y'ayuk kyëxja'ayëty: Mwintsë'ëkëp yë Wintsën ets yë'ë tu'ukyë m'ëwtatëp ets mmëtunëp.

⁹ Ok ja Jesús ja mëjku'u yajnëjkxë jam Jerusalén ets jam tsajptëjkkëpajkm yajpäjtë ets y'ënëmaayë: Pën tëy, ko Dios mijts m'u'unk'atyë, ënät ëkjantykyupujnax yaa.

¹⁰ Jä'ä ko jëtu'un ja Dios ja y'aaw y'ayuk kyëjxyja'ayëty: Dios kyäxäämpy ja y'anklëstëjk ets mkëwent'atëtëty ets m'akëëytyuk m'axajtukëtëty.

¹¹ Majts'itanëp ma mkë'ëjën këtiipë mkunäpëty ma tsaajën.

¹² Tääts ja Jesús y'ëtsooy: Näjyëtu'un ja Dios ja y'aaw y'ayuk y'ënä'äny: Këtii ja Wintsën xywyinma'any'ixëty.

¹³ Ko ja mëjku'u ka'ap y'ëkwinma'anypyatnë wi'ix ja Jesús tyajpokytyunëtyën, tääts ojts t'ëxmatsy.

Ko ja Jesús tyajtso'ontä'äky ja tyuunk jam Galilea

¹⁴ Tääts ja Jesús ojts nyëjkxkojnëpë jam Galilea y'itjotm, mëk'äämpy ja Kënu'kxymyëkajtën ënety tmëët'ajnë. Aakyë'ë ja ja'ay nyikajpx nyimëtyaktëp oymyaajëty.

¹⁵ Kajpnkajpn ijty yaj'ixpëky maajëty ja tsajptëjkën ets ni'ëmukë ja ja'ay tmëjjaw tjaantyjyawëtë.

Ko Jesús jam Nazaret yaj'ixpëky

¹⁶ Ja Jesús ojts nyijkx jam Nazaret, ma ënety të yeeky të pyetyën. Ko tpaty ja po'kxënxëëw, ënät ojts tyëkë jap tsajptëkoty, ijxtëm ijty tuunk'atyën, tääts wya'kujkëy ets ja Dios ja y'aaw y'ayuk ojts tkajpxë.

¹⁷ Ja Dios ja kyäjpxynyajxpë Jeséas nyoky ënety të yajmo'oy ets tkajpxëty. Ko ojts t'apëtijtwä'kxy, yë'ë pyat ma kyëxja'ayëtyën:

¹⁸ Ja Dios ja Jyot jya'awën ëjts nmëët'ajtëp, etsës të xypyëjktä'äky ma ja ëyoopëja'ayën etsës ntuk'ëwaanëtëty ja oy aaw oy ayuk, tëëjës xykyexy etsës n'ëwaanëty wi'ix tu'ukyë y'itëty mëti'ipë ijtëpën ijxtëm ja ja'ay pujxn tëkotypyën, ets y'ijxë'ëktëty ja kupi'its kukootspë, ets y'ëwaatsëpëtsëmtëty mëti'ipë yajtëytyuun yajtsaatsytyuuntëpën.

¹⁹ Jëtu'un yajtuk'ëwaanëtëty ko tëë tpaaty ja xëëw po'o ma ja Wintsën tuna'anyën ja mëyajtën.

²⁰ Tääts ja Jesús ja noky t'apëtijty ets tmooy ja tsajptëjk tuunpë ets nyaaxwe'tsy. Aak wintë'kxëtëp ja ja'ay mëti'ipë japëtyën tsajptëkoty.

²¹ Ënet ja Jesús kyajpxtso'ony: Tyam tëë tyuny jyätyë miits mwintuuyëty ya'atë Dios yë y'aaw y'ayuk këxja'aypyë.

²² Oy tsuj ja ja'ay tnikajpxtë ja Jesús, mëjmëtoy tjawëtë ko tii janty tsuj tmëtyä'äky ets xim yam nyäyajtëëwëtë: ¿Këtii yë'ëjëty ya'atë José myaankë?

²³ Tääts ja Jesús y'ëtsoowëtë: Njëjp'ijxypës ko miits ya'atë ayuk xykyajpxa'antë: Tsooyëpë, näyajtso'okët kë'ëm. Ets xynyëëmëja'antës näjyëtu'un: Mëti'ipë ëëts të nmëtowtën të xytyuny jam Capernaúm, tun yaa näjyëtu'un ma mkë'ëmkajpnën.

²⁴ Ets jyaak'ënany: Tëy miits n'ënëëmëtë ko nitu'uk ja Dios ja kyäjpxynyajxpë oy kyayajkupëky ma nyaax kyajpnën.

²⁵ Tëyës n'ëna'any ko tää ënety may ja to'oxytyëjk ja ku'ookpyë yaa Israel ko ja Dios ja kyäjpxynyajxpë Elías jyuuky'äjty, ko ojts kä'äp tyu'uy tëkëëk jëmëjt ja kujkm, ënät ja yuu y'ijty oymyakajpnëty.

²⁶ E ja Dios kä'äp tkejxy ja Elías ma ja to'oxytyëjk ja ku'ookpyën jam Israel, yë'ë yajktuknikäjxtë mëti'ipë ënety tsënaaytyëpën jam Sarepta, ma tu'uk ja kajpn yajpaatyën jam Sidón y'itjotm.

²⁷ Näy nimay ënety ja ja'ay ja pu'uts pa'am pyëkëtë yaa Israel ko jyää'ajty ja Dios ja kyäjpxynyajxpë Elisejë ets nitu'uk ojts kyatso'oktë ja pyu'uts, ja Naamán ojts yi'iyë ja pyu'uts nätyu'uk tsyo'oky, mëti'ipë jam Sirië kukajpn'ajtpën.

²⁸ Ko tmëtoowtë ya'atë aaw ayuk, tääts jyoot'anpëjktë jënu'un ënety jap tsajptëkotyëtyën.

²⁹ Tääts tnipëtë'ktë ja Jesús ets tyajpëtsëëmtë jam kajpnjotm. Yë Nazaret kajpn, kopkëjxm yajpaaty. Tääts ja Jesús ojts jam tyajnëjkxtë ma ja kääts aawën ets jam tjakutijnaxantë.

³⁰ E ja Jesús ojts tkë'ëkäktu'uty ja ja'ay ets mayjyä'äy itkujky nyäjxy.

Tu'uk ja ye'etyëjk mëti'ipë ja ku'oypyë myëët'ajtypyën

³¹ Ënet ja Jesús ojts nyijkxy jam Capernaúm, Galilea y'itjotm, po'kxënxëëw ënety ko ja ja'ay tyaj'ijxpëky.

³² Mëjmëtoy ja ja'ay tmëtoowtë ko janty'oy yaj'ixpëky, jä'ä ko mëët ja kuttujkën kyäjpxy.

³³ Jap ënety tsajptëkoty tu'uk ja ye'etyëjk mëti'ipë ja ku'oypyë myëët'ajtypyën, ënät tyëjkëy yaxpë jojkpë:

³⁴ ¿Tiijës xytyuktëytyuunp, mijts Jesús Nazaretëtë ja'ay? ¿Yë'ë të xynyiminy etsës xyajkutëkoyä'änyë? Wa'ats mijts n'ixy'äty, Dios Kënu'kxypyë mijts.

³⁵ Tääts ja Jesús twinkukajpxëy ja ku'oypyë ets t'ënëmaay: Amonyë, ëxmats tääpë ja'ay. Ënet ja ye'etyëjk yajkëtaawë ja ku'oypyë mayjyä'äyjoty ets y'ëxmajtsë, kä'äp ojts wi'ix y'ëktuunënë.

³⁶ Mëj'ixy ja mayjyä'äy t'ijxtë, ënät nyäyajtëëwëtë nixim niyam: ¿Pën tëy ya'atënë? Mëk ja ku'oypyë timmyëkäjpxy ets t'ëxmatsëty yë ja'ay, e yë ku'oypyë ënätyë jyëwä'äky ma ja'ayën.

³⁷ Aak Jesús ënety yajnikajpx yajnimëtyakp oymyaajëty.

Ko ja Jesús tyajtso'oky ja Simón Pedro ja tyo'oxtyëjkmë't

³⁸ Tääts ja Jesús wya'kujkëy ets pyëtsiimy jap tsajptëkoty, jam ojts nyijkx ma ja Simón ja tyëjkën. Pëjkëp ënety jam ja Simón ja tyaak më't, jëënpa'am myëët'ajtyp. Tääts ja Jesús tmëpëjktsoowtë ets tyajktso'okëty.

³⁹ Ënet ja Jesús nimëjwä'ky ja to'oxytyëjk ets ojts t'ojy ja jëënpa'am, tääts ja jëënpa'am nyiwatsë ja to'oxytyëjk. Ënätyë pyëti'ky ets yajkaay yaj'ukëtë.

Ko ja Jesús tyajtso'oky ja pa'amja'ay may

⁴⁰ Ko ja xëëw kyëtäky, ënät ja Jesús yajtuknimiiny ni'ëmukë ja pa'amja'ay wi'ixëty pën pyikyë, ja Jesús ojts tkë'ënixajy tu'uktu'uk ets tyajtsoktaay.

⁴¹ May ja ku'oypyë pyëtsëëmtë ma ja pa'amja'ayëtyën ets mëk jyänty ëna'antë: Dios mijts m'u'unk'ajtëp. E ja Jesús ojts twinku'ojë ja ku'oypyë ets ka'ap tkupëjky ets kyajpxtëty, jä'ä ko nyija'awëtëp ënety ko ja Jesús jyä'äjëty ja Kristë.

Ko ja Jesús tkajpxwä'kxy jam Galilea ja Tios ja y'aaw y'ayuk

⁴² Ko xyiinytyäky jyajtäky ënät ja Jesús ojts tsyoony ets nyijkx jam të'ëts itum ets ja ja'ay y'ixtaaytyakë koonëm pyätë, ka'ap y'ëxmatsa'anëtë ets muum nyëjkxëty.

⁴³ Tääts ja Jesús y'ënëmaayëtë: Näjyëtu'unës nikajpxa'any nimëtya'aka'any ma wiinkëtypë kajpnën ja Dios ja y'oy aaw y'oy ayuk, mëti'ipës të nyajtukmëkäxën.

⁴⁴ Jëtu'un ja Jesús ojts tkajpxwä'kxy ja Dios ja y'aaw y'ayuk maajaty ja tsajptëjkën jam Judea y'itjotm.