Lucas 3 - Biblia Dc en Mixe de Quetzaltepec

Ko ja Juan Yajnëëpäjtpë ja Tios ja y'aaw y'ayuk tkajpxwa'kxë jam të'ëts'itjotm

¹ Mëmajkmokx jëmëjt ënety y'ëne'emy ja yajkutujkpë Tiberio César ets ja Poncio Pilato yajkutuky jam Judea. Ja Herodes jam yajkutuky Galilea, ja myëkä'äx Felipe jam yajkutuky Iturea ets Traconite e ja Lisanias jam yajkutuky Abilene;

² ja Anás ets ja Caifás yë'ë ënety teetywyintsën'ajtëp. Jää jëmëjt ja Juan, ja Zacarías ja myaank ojts myëkäjpxyë ja Dios jam të'ëts'itjotm.

³ Tääts ja Juan t'aye'eytyääy ja itjot ma ja Jordán mëjnëëjën ets t'ënëmaay ja ja'ay ets jyotwinpitëty, t'ëxmatstëty ja y'ëxëëk winma'any ets nyëëpätëty, jëtu'unts yajkpokymyä'kxtëty.

⁴ Ets y'atëwëty ijxtëm ja Dios ja kyäjpxynyajxpë Jeséas y'ënänyën: Tam tu'uk mëti'ipë mëk kajpxpën të'ëts'itjotm: Yaj'oyëtë ja Wintsën ja nyë'ë tyu'u, yaj'ëwatsëtë ja nyajxtakn tëypyë.

⁵ Yajkijpxyëtya'atë ja joyjyot ets ja tun kopk, ja në'ë tu'u mëti'ipë ney xëketyën tëëwta'ajantëp ets kijpxyëtya'ajaanp.

⁶ Jëtu'unts ja ja'ay ni'ëmukë t'ixtëty ja yajnitsokpë.

⁷ Tääts ja Juan ja mayjyä'äy nyinëjkxë ets tyajnëëpätëty. Jëtu'un t'ënëmaay: Yë'ë miits mteety'ajt m'ap'ajtëp yë tsa'any. ¿Pën të m'ënë'ëmxëtë ko xykyukä'äktëty ja ëyo'on mëti'ipë miimp këtakpën?

⁸ Yajxon mja'ay'atëty ets xyajnikëxë'ëkëty ko të mjootwinpitë, këtii kë'ëm mnäy'ëna'anëtëty: Abraham ëëtsajtëm xy'u'unk'ajt xy'ok'ajtëm. Ëjts, jëtu'un yam miits nëëmëtë ko Dios jyëkyejpy yë tsaa tyaj'awinpitëty Abraham y'u'unk y'ok.

⁹ Jëjp'ixy yë pujxn y'owxijnë. Pën ka'ap oy jyä'äy'ätyën, jëtu'un yë'ë ijxtëm ja kepyën mëti'ipë ka'ap oy tyëëm'atyën; yajpuxaanp je'eyë ets yajnino'oka'any.

¹⁰ Tääts ja ja'ay tyajtëëwtë: ¿Tiijës ntuunta'aktëp?

¹¹ Ets ja Juan y'ëtsoowëtë: Pën mäjtsk myëët'ajtyp ja wyit xyox, wä'än tmo'oy tu'uk mëti'ipë jyä'ä ka'ijtpën; pën myëët'ajtyp ja jyi'kxy pyiky, wä'än tmo'oy mëti'ipë jyä'ä kaka'atpën.

¹² Tääts näjyëtu'un myiintë ja yajkukëpäjtpëtëjk nëëpäjtpë ets y'ënantë: ¿Wintsën, ¿tiijës ntuntëp?

¹³ Tääts ja Juan y'ënëmaayëtë: Ka'ap yë ja'ay tii tsowni'ik xytyukkukëpätëty.

¹⁴ Ojts ja tsiptuunpë jënaakën tyajtëwtë: E ëëtsëty, ¿tiijës ntuntëp? Tääts ja Juan y'ëtsoowëtë: Ka'ap tii pën xypyëjkëtëty atsip ets ka'ap pën tii xytyukniwaanpätëty. Yë'ë tukjotkujk'atë ja mëju'unyëty.

¹⁵ Ja mayjyä'äy jyëjp'ijxtëp ja Kristë, paaty wyinmaaytyë ko wä'änxyëp ja Juan yë'ëjëty Kristë.

¹⁶ Tääts ja Juan y'ënëmaayëtë ni'ëmukë: Nëë mëët miits nyajnëëpätë, je'eyëp ko xypyamiinpës tu'uk ja ja'ay mëti'ipë myajnëëpätanëtëp mëët ja Kënu'kxymyëkajtën. Ka'apës ëjts xypyääty etsës ja kyë'ëk n'akäjëty.

¹⁷ Jëtu'un ja naaxwiinyëtë ja'ay tyajpokwya'atsa'any ijxtëm ja tsajpmokpajk yajwinpojyën ets nyijkx ëpëky ja wa'atspë ets ja y'ak yajnino'oky ma ja jëënën nijëna'apë kyapi'itsyën.

¹⁸ Jëtu'un ja Juan ja ja'ay tjakajpxwijy ets tkajpxwä'kxy ja oy aaw oy ayuk.

¹⁹ Ojts näjyëtu'un t'ojy ja yajkutujkpë Herodes, jä'ä ko ënety tmëëttsëënë Herodías, ja y'uty ja tyo'oxytyëjk ets näjyëtu'un ko ënety ëxëëkjaty winë tuny.

²⁰ Tääts ja Herodes ojts ja poky wiinkpë tjaaktimtyuny ko ja Juan tsuumy.

Ko ja Jesús nyëëpety

²¹ Jëtu'un ojts tyunyë jyätyë, ko ja Juan ënety jam ja mayjyä'äy tyajnëëpety, ënät ja Jesús näjyëtu'un nyëëpejty; ko ja Dios tja'amyejtsy ënät ja tsajp y'ëwatsy,

²² ets ja Kënu'kxymyëkajtën nyikëtakë ijxtëm tu'uk ja pakën ets yajmëtooy ja ayuk jam tsajpjotm: Ëjts mijts n'u'unk'ajtyp, ntsojkpy nja'ap mijts ni'ik ets ntukjotkujk'ajtyp.

Jesukristë y'aptëjk

²³ I'px majk ënety ja Jesús ja jyëmëjt ko ja tyuunk tyajtso'ontäky. Jëtu'un ja ja'ay y'ëna'antë ko Jesús yë'ë José y'u'unk ets José Elí y'u'unk,

²⁴ yë Matat y'u'unk; yë Leví y'u'unk; yë Melqui y'u'unk, yë Janai y'u'unk, yë José y'u'unk,

²⁵ yë Matatías y'u'unk, yë Amós y'u'unk, yë Nahúm y'u'unk, yë Eslí y'u'unk, yë Nagai y'u'unk,

²⁶ yë Máhat y'u'unk, yë Matatías y'u'unk, yë Semei y'u'unk, yë Josec y'u'unk, yë Joiadá y'u'unk,

²⁷ yë Johanán y'u'unk, yë Resá y'u'unk, yë Zorobabel y'u'unk, yë Salatiel y'u'unk, yë Nerí y'u'unk,

²⁸ yë Melqui y'u'unk, yë Adi y'u'unk, yë Cosam y'u'unk, yë Elmadam y'u'unk, yë Er y'u'unk,

²⁹ yë Jesús y'u'unk, yë Eliézer y'u'unk, yë Jorim y'u'unk, yë Matat y'u'unk,

³⁰ yë Leví y'u'unk, yë Simeón y'u'unk, yë Judá y'u'unk, yë José y'u'unk, yë Jonam y'u'unk, yë Eliaquim y'u'unk,

³¹ yë Meleá y'u'unk, yë Mená y'u'unk, yë Matatá y'u'unk, yë Natán y'u'unk,

³² yë David y'u'unk, yë Jesé y'u'unk, yë Obed y'u'unk, yë Booz y'u'unk, yë Sélah y'u'unk, yë Nahasón y'u'unk,

³³ yë Aminadab y'u'unk, yë Admín y'u'unk, yë Arní y'u'unk, yë Esrom y'u'unk, yë Fares y'u'unk, yë Judá y'u'unk,

³⁴ yë Jacob y'u'unk, yë Isaac y'u'unk, yë Abraham y'u'unk, yë Térah y'u'unk, yë Nahor y'u'unk,

³⁵ yë Serug y'u'unk, yë Ragau y'u'unk, yë Péleg y'u'unk, yë Éber y'u'unk, yë Sélah y'u'unk,

³⁶ yë Cainán y'u'unk, yë Arfaxad y'u'unk, yë Sem yë y'u'unk, yë Noé y'u'unk, yë Lámec y'u'unk,

³⁷ yë Matusalén y'u'unk, yë Henoc y'u'unk, yë Jéred y'u'unk, yë Mahalaleel y'u'unk, yë Cainán y'u'unk,

³⁸ yë Enós y'u'unk, yë Set y'u'unk, yë Adán y'u'unk ets Dios y'u'unk.