Lucas 23 - Biblia Dc en Mixe de Quetzaltepec

Jesús yajpaaty jam Pilato wyintum

¹ Ënet ja tsajptëkotyëtë yajjuntë'ajtpë pyëtë'ktaaytyë ets ja Jesús ojts tyajnëjkxtë jam Pilato wyintum.

² Jamts tni'ë'ënëtyë ets y'ënantë: Tëës ya'atë ja'ay nkupaatëtë ko t'akajpxë ja naax kajpn. Jëtu'un y'ënä'äny ets ka'ap yajmo'ojëty ja këpäjtën ja yajkutujkpë kopk César ets nän ënaanp ko yë'ëty Kristë, yajkutujkpë.

³ Tääts ja Pilato tyajtëëy: ¿Mijts ja jutiis yajkutujkpë? Ënet ja Jesús y'ëtsooy: Mijts jëtu'un m'ënaanp.

⁴ Ënet ja Pilato t'ënëmaay ja teety wintsënëty ets ja ja'ayëty: Ka'apës tii poky npaaty ma ya'atë ye'etyëjkën.

⁵ E ja mayjyä'äy mëktä'äky y'ënaan'ëtë'ëtstë: Yë'ë ja'ay y'akajpxëtyääpy mëët yë y'ijxpëjkën. Galilea tyajtso'ontäky ets näjyëtu'un yaa Judea yaj'ixpëky.

Jesús yajpaaty jam Herodes wyintum

⁶ Ko ja Pilato jëtu'un tmëtooy, tääts tyajtëëy pën Galilea ja'ay ja Jesús.

⁷ Ko yajtuk'ëwa'anëy ko jyä'äjëty, ënät ojts tuknikexy ja Herodes, mëti'ipë ënety yajkutujkpën jam Galilea, mëti'ipë ënety jam Jerusalén yajpatpën ko ëmaayxyëëw tyunyë.

⁸ Ko ja Herodes t'ijxy ja Jesús tääts jyotkujkëy, jä'ä ko mëk ënety oy tja'ixa'any. Tëë ënety tmëtoy'äty ko mëj'ajtën tyaj'ixyë ets jyëjp'ijxyp ënety ja Jesús tunëty tu'uk ja mëj'ajtën.

⁹ Kanaakpëky ja Herodes tyajtëëy tyajtëtäky winë, je'eyëp ko ja Jesús ka'ap y'ëtsooy ni tuk'aaw.

¹⁰ Näy tam ënety ja teety wintsënëty ets ja tsajptëkotyëtë yaj'ijxpëjkpëtëjk mëti'ipë mëktä'äky ë'ëntëpën.

¹¹ Ënet ja Herodes mëët ja tsyiptuunpëtëjk nëxik tukxiktë ja Jesús, ka'ap tmëj'ixtë ets ja wit tukxojxtë ijxtëm ja yajkutujkpë wyitën. Tääts jatëkok tuknikejxy ja Pilato.

¹² Jää ojts nyämyë'oypyëkëtë ja Pilato mëët ja Herodes, nämyëtsip'ajtëtëp ijty.

Ko ja Jesús nyikutukë ets y'ookëty

¹³ Ënet ja Pilato twoowmujktaay ja teety wintsën, kutuunktëjkëty ets ja naax kajpn,

¹⁴ ets t'ënëmaay: Miits ya'atë ja'ay xytyuknimiintëpës ets m'ëna'antë ko yë'ë t'akajpxë ja naax kajpn. Tëës npaye'ey, nyajtëy nyajtëtä'äky miits mwintuuyëty, ka'apës tii poky të npaaty ma yë'ëjën mëti'ipë miits mtukni'ë'ënëtëpën.

¹⁵ Näyjyëtu'un ja Herodes ka'ap tii pyoky të tpatë, paaty jatëkok të tmëjkexy ma ëjtsën. Tääts xy'ixtëty ko ka'ap tii të tuuntëkoy mëti'ipë jeexyë kyu'o'këpën.

¹⁶ Tyamës je'eyë ntëytyuna'any ets n'ëxmatsa'anyës ëwaatsëtum.

¹⁷ Ja Pilato kopkpëky ko jää xëëwjoty tu'uk ja pokyjyä'äy t'ëxmatsy ëwaatsëtum.

¹⁸ Tääts ni'ëmukë ja ja'ay tyëjkëtyë yaxpë jojkpë: Yajjëwa'ak yë tääpë. Yaj'ëwa'atsëpëtsëm yë Barrabás.

¹⁹ Ja Barrabás, yë'ë ënety të yajtuktsumy ko tnipëtë'ëky ja yajkutujkpë ets ko ënety të yaja'ay'ooky.

²⁰ Ja Pilato y'ëxmatsäämpy ënety ëwaatsëtum ja Jesús. Tääts ja mayjyä'äy ojts jatëkok tmëkäjpxy.

²¹ Wäänë mëk ja ja'ay tyëjkëtyë yaxpë jojkpë: Yajkruutspät, yajkruutspät.

²² Tääts ja Pilato mëtëkëëk'ok t'ënëmaay ja ja'ay: ¿Tii ko nyajkruutspätëtyës, tii tyuuntëkoopy? Ëjts ka'apës tii pyoky npatë ets tku'ookëty, je'eyës ntëytyuna'any etsës n'ëxmatsa'any ëwaatsëtum.

²³ Wäänëni'ik ja ja'ay yaax'ëtë'ëts jyojk'ëtë'ëtstë janty mëk ets nëëmëtë ja Pilato wä'än ja Jesús kyëruutspety. Ko ni'ik yaxnëtë jyojknëtë ja mayjyä'äy, tääts tpatë mëti'ipë tsyojktëpën.

²⁴ E ja Pilato tyiytyuun ets pyaye'ey ja ijxtëm ja mayjyä'äy ënety të t'amëtowtën,

²⁵ ets tyaj'ëwaatsëpëtsëëmy ja ja'ay mëti'ipë tsumy myëët'ajtypyën ko tsyiptuny ets ko yaja'ay'ooky ets mëti'ipë ja ja'ay ënety të t'amëtowtën. Jëtu'unts tkë'ëyäjky ja Jesús ijxtëm ja mayjyä'äy ënety tsoktën.

Ko Jesús kyëruutspety

²⁶ Ko ja Jesús ënety jam tyajnëjkxtë ets tyajkruutspäta'antë, ënät tmajtstë tu'uk ja Cirenë ja'ay, Simónk'ajtp, Cirenë kyukajpnëty, kamjotm ënety tsyoony ets atsip tukpatsëëmtë ja Jesús ja kyëruuts ets ix'ok ye'ey ja Jesús.

²⁷ Janty nimay ja ja'ay tpanëjkxtë ets may ja to'oxytyëjk tnijë'ë tniya'axtë.

²⁸ Tääts ja Jesús wya'akwinpijty ets y'ënëmaayëtë: Miits, Jerusalenkëtë to'oxytyëjkëty, këtiis ëjts xynyiya'axtë, miits kë'ëm nänyiya'axëtë ets ja m'u'unk m'ëna'këty.

²⁹ Pyatäämpy ja xëëw ko m'ëna'antëty: Akujk jotkujk ja to'oxytyëjk mëti'ipë ka'ap y'u'unkpaatën ets mëti'ipë ka'ap yaj'u'unktsi'itstën.

³⁰ Ënet nëëmëja'antë ja kopk: Tukkëtaawpäjtëkës ets nëëmëja'antë ja tun: Yu'tstëkës.

³¹ Pën tsuxk kepy jëtu'un tyuuntëp ¿wi'ixpë jëtää ja të'ëts kepy tkatuntëty?

³² Näy tam ënety nimäjtsk tyajnëjkxtë mëti'ipë mëjpoky të tuntën ets tyajkruutspäta'antë mëët ja Jesús.

³³ Ko jyajtë ma ja it txëëwatyën O'kpë Këpajk, jam tyajkruutspäjtë ja Jesús mëët ja nimäjtskpë pokytyuunpë, tu'uk aka'any'äämpy ets tu'uk anajnytsyow.

³⁴ Tääts ja Jesús y'ënäny: Dios Teety, nimä'kx, jä'ä ko ka'ap tnijawëtë tii tyuuntëp. Tääts ja tsiptuunpëtëjkëty tni'ëyë'ktë ja Jesús ja wyit ets aak ayi'iyë ojts twijtswa'kxtë.

³⁵ Tam ja mayjyä'äy t'ixtë, kutuunkpaat ja Jesús nëxiktë tukxiktë ets y'ëna'antë: Tëë yë wiinkpë tyajtso'oky, wa'an ënät tyam kë'ëm näyajtso'okyë; pën yë'ë janty Kristë, mëti'ipë Dios të wyin'ixyën.

³⁶ Näyjyëtu'un ja tsiptuunpëtëjkëty nyëxik tyukxikëtë ja Jesús, winkon tninëjkxtë ets tuk'uuka'antë ja tsatsym nyëë xun,

³⁷ jëtu'un t'ënëmaaytyë: Pën mijts janty jutiis yajkutujkpë, näyajnitso'okët kë'ëm.

³⁸ Tam ja letrë ënety të tkëxja'atë kyëpäjky, griego, latín ets hebreo ayuk mëti'ipë ënaanpën: Ya'atë ja jutiis yajkutujkpë.

³⁹ Tu'uk ja pokyjyä'äy mëti'ipë ënety jam kutëyën, jä'ä ojts wyinkajpxpetyë: Pën mijts mKristë, näyajnitso'okët kë'ëm ets yajknitsoktëk ëëts näjyëtu'un.

⁴⁰ Tääts tu'uk ja myëpokyjyä'äy ojts wyinkukajpxëty ets y'ënëmaayë: ¿Ka'ap mijts yë Dios xytsyë'ëkë? Tamts näjyëtu'un m'ëyoy?

⁴¹ Ëëts'ajtëm, xynyitëjkëm ets n'ëyo'owmëty, xypyaat'ajtëm ëëts nkëpäjtmëty mëti'ipë të ntuuntëko'oyëmën; ya'atë ja'ay ka'ap tii të tuuntëkoy.

⁴² Ok jyaak'ënany: Jesús, xyjyä'ämyätsëpës ko myajkutujktsoonëty.

⁴³ Tääts ja Jesús y'ëtsooy: Tëy mijts n'ënëëmë ko tyämyë mëët ëjts myajpaata'any ma ja Dios ja y'ijtaknën.

Ko ja Jesús y'ooky

⁴⁴ Jää ënety kujkyxyëëwën ko ja it ojts kyootsëtyëkoy, jeky koots y'ijty, mëj jënäkyxyëëw ojts jatëkok jyajtä'äky.

⁴⁵ Ka'ap ja xëëw nyäky'äny ets ja wit atëëytyuk mëti'ipë jap ma mëjtsajptëjkën ojts kujkm kyë'ëtswä'kxy.

⁴⁶ Tääts ja Jesús mëk yujk'ënany: Dios Teety, mijts ntukë'ëtëjkëp yë njot nja'awënës. Ko jëtu'un y'ënaantaay, tääts y'o'ky.

⁴⁷ Ko ja tsiptuunpë wintsën t'ijxy wi'ix ënety të tyuny të jyätyën, tääts ja Dios tmëjja'awëy ets y'ënäny: Tëytyëm jëtu'un ko ka'ap ya'atë ja'ay pyokymyëëtëty.

⁴⁸ Ni'ëmukë ja mayjyä'äy mëti'ipë ënety jamëtyën t'ijxtë wi'ix ja Jesús jyäjty kyëpejtyën, tääts nyëjkxnëtë ma tyëjkëtyën tyam nyäkyätsykyoxëtë mëët ja jotmay

⁴⁹ Ni'ëmukë ja ja'ayëty mëti'ipë ja Jesús y'ixy'ajtëpën, ja to'oxytyëjkëty mëti'ipë pyatso'ontën jam Galilea, jam jëkäm tyänëtë ets t'ixtë tii tuunëp jajtëp.

Ko Jesús nyaaxtëkë

^50-51 Jam ënety tu'uk ja ja'ay oyjyä'äypyë ets wa'ats ja'ay, José xyëëwajtyp; Arimatea tsyoony, Judea y'itjotm. Jutiis ja'ay, jap tyuny ma ja tsajptëkotyëtë yajjuntëtuunpën. Tyaapë José jyëjp'ijxyp ënety jëna'a wyinkony ja Dios ja kyutujkën; ka'ap ojts oy t'ixy ko ja wintsëntëjk tyaj'o'ktë ja Jesús.

⁵² Ënäty ojts tninëjkxy ja Pilato ets t'amëtooy ja Jesús ja nyi'kx kyopk.

⁵³ Tääts ojts tyajjënäky jam kruutskëjxm ets tukwinpijty ja linë wit ets tpëjktäky ma tu'uk ja o'kpë tsaajutën ma ka'anëm jap pën nyaaxtëkënëm.

⁵⁴ Jä'ä xëëw ma ja po'kxënxëëw yajnipëjktaakën, mëti'ipë tso'onta'akaanpën.

⁵⁵ Ja to'oxytyëjkëty mëti'ipë ënety të tsyoontën mëët ja Jesús jam Galilea, yë'ë ojts nyëjkxtë mëët ja José ma ja Jesús nyaaxtëjkëyën ets t'ijxtë wi'ix jap tpëjktaktë ja Jesús ja nyi'kx kyopk.

⁵⁶ Ënet ojts nyëjkxnëtë ma tyëjkëtyën ets ja pa'akxu'kpë nëë tnipëjktakëtyë. Tääts t'ëmaay'ajtë ja po'kxënxëëw, jëtu'un ijxtëm ja ënä'ämën myinyën.