Lucas 22 - Biblia Dc en Mixe de Quetzaltepec

Ko tkäjpxy'atë wi'ix ja Jesús tmatsa'antën

¹ Ëmaayxyëëw ënety tyimpatyp ma ja tsajpkääky yajkayën mëti'ipë ka'ap tii levadura tmëëtëtyën.

² Ja teety wintsënëty ets ja tsajptëkotyëtë yaj'ijxpëjkpëtëjk jä'ä y'ixtaaytyëp ja winma'any wi'ix ja Jesús tyaj'ooktëtyën, je'eyëp ko tsyë'këtëp ja mayjyä'äy.

³ Tääts ja Judas mëti'ipë ijty tyijtëpën Iscariote, tu'uk mëti'ipë mëët nyimajkmäjtskëtën ja Jesús ja y'ijxpëjkpëtëjk, yë'ë ja mëjku'u ojts tyuktëkëty.

⁴ Tääts ojts tninëjkxy ja teety wintsëntëjk ets ja mëjtsajptëjk këwent'ajtpë wintsënëty ets t'ënëmaay wi'ix ja Jesús tkë'ëyaka'anyën.

⁵ Yajxon ja ja'ay xyoontaktë ets ja Judas ja meeny yajtukwinwa'anëy.

⁶ E yë'ë ojts tkupëky ets tuknipëjktakëy jëna'a ja Jesús tkë'ëyaka'anyë, ma ka'ap nëkooyë ja ja'ayën.

Wintsën y'a'ux

⁷ Tääts ja xëëw tpaty ma ja tsajpkääky yajkayën mëti'ipë ka'ap tii levadura tmëëtëtyën, ets ma tyaj'ooktën ja kupixyny ets tukwintsë'ëkëtë ja ëmaayxyëëw.

⁸ Ënet ja Jesús tkejxy ja Pedro mëët ja Juan ets t'ënëmaay: Nëjkxtë ja ëmaayxyëëw a'ux nipëjktaakëtë ets nkä'ämyëty n'ukmëty.

⁹ Tääts tyajtëëwtë: ¿Maa xytsyoky etsës nipëjktaakëtëty?

¹⁰ Tääts ja Jesús y'ëtsoowëtë: Ko jam kajpnjotm mja'tëty jam tu'uk ja ja'ay xypyaata'antë, tsiiyë tyuknëëko'onëp, yë'ë mpanëjkxtëp. Ma tyëkën, jam mtëkëtëty,

¹¹ ets ja kutëjk xy'ënëëmëtëty: Jëtu'un ja Wintsën y'ënä'äny, mëti'ipë tëkot myäjkpy maas n'a'ux'atëtyën mëët ja n'ijxpëjkpëtëjkës, ma yajmëjjawëja'anyën ja ëmaayxyëëw.

¹² Yë'ë mtukni''ixëjanëtëp tu'uk yë tëkot jap ma tëjk mäjtsk nikë'ëpën ets jap ja a'ux tyunëtëty. Jap xynyipëjktaakëtëty tiijaty tunaanpën.

¹³ Tääts ojts nyëjkxtë ets tpatë ijxtëm ja Jesús y'ënëmaayëtën. Ets jam ni''ijxëtyë ja ëmaayxyëëw a'ux.

¹⁴ Ko ja horë tpaty, ënät ja Jesús nyaaxwe'tsy ma ja kaaypyäjnën mëët ja y'ijxpëjkpëtëjk.

¹⁵ Tääts ja Jesús t'ënëmaay ja y'ijxpëjkpëtëjk: Yë'ës ënety mëk ntsojkpy ets tyam nkayä'änyës ja ëmaayxyëëw a'ux ma ka'anëm n'ookynyëmës.

¹⁶ Tëyajtën nëëmëtë ko ka'ap n'ëk'a'ux'atanës mëët miitsëty, jäänëm tëy ko ënety nyajpatëmë ma ja Dios ja kyutujktaknën.

¹⁷ Tääts ja Jesús tu'uk tkoonë'ky ja a'ukën ets ja Dios tkukajpxëy ets y'ënäny: Ëxajëtë ya'atë ets xy'uukwa'kxtëty.

¹⁸ Jëtu'un miits nëëmëtë ko ka'apës yë tsatym nyëë n'ëk'uukanë koonëm ja Dios ja kyutujkën jyää'atëty.

¹⁹ Tääts ja tsajpkääky tkoonë'ky ets näjyëtu'un ja Dios ojts tkukajpxë, tääts ojts tujkwä'kxy ets tmooy ja y'ijxpëjkpëtëjk ets y'ënäny: Ëjts ya'atë ni'kx nkopk mëti'ipës nyäjkpyën ets miits xytyuk'oy'atëty, yë'ë tuntë ets xytyukja'amyätstëtyës.

²⁰ Näyjyëtu'un tuuny ko y'a'ux'ajtaay ets tkoonë'ky ja a'ukën ets y'ënäny: Ëjts ya'atë nne'pny mëti'ipë miits mtuk'oy'atantëpën ets ja Dios ja käjpxytyu'unën tyaj'ëtukëty.

²¹ Mëti'ipës xykyë'ëyakaanpën, tyaajës ja mëët nkay ma ya'atë kaaypyäjnën.

²² Ëjts, naaxwiinyëtë ja'ay y'U'unk, yë'ëjës ntuunpy mëti'ipës të nyajtuknipëjktaakën. E o'ktëy jyata'any tääpë ja'ay mëti'ipës xykyë'ëyakaanpën.

²³ Ënet ja y'ijxpëjkpëtëjk aak ayi'iyë nyäyajtëëwëtë pën jëtää kë'ëyakanëp.

Pën ni'ik mëj'äämpy ijtp

²⁴ Tääts xim yam nyäyajtëëwëtë ja Jesús ja y'ijxpëjkpëtëjk pën jëtu'un ni'ik mëj ijtp.

²⁵ Tääts ja Jesús y'ënëmaayëtë: Yë yajkutujkpëtëjk mëti'ipë ka'ap jyutiis'atë, janty mëk ja nyaax kyajpn t'ënä'ämtë ets mëti'ipë tii nyikopk'ajtëpën, yë'ë yajtijtëp ko oy winë tuntë.

²⁶ E ma miitsëtyën, ka'ap mëpaat jëtu'un mja'ay'atë. Pën mëj itaanp, yë'ë mëpaat mutsk nyäyajnaxyë; pën ënä'ämaanpën, yë'ë mëpaat nyäyajnaxyë mëtuunpë.

²⁷ ¿Yë'ë ko pën jëtää ni'ik mëj, mëti'ipë ënyääpyën ma ja kaaypyäjnën, ëkë mëti'ipë wiinkëëpy kujkëëpyënë? Yë'ë mëti'ipë kaaypyäjn wyin'u'unyääpyën, ¿këtiijë? E ëjts jëtu'unës yaa ma miitsëtyën ijxtëm ja ja'ayën mëti'ipë wiinkëëpy kujkëëpyën.

²⁸ Miitsëty xëmë të myajpaatë mëët ëjts oyës ëxëëk të njaty të nkëpety.

²⁹ Paaty miits nmo'otë tu'uk ja kuttujkën, ijxtëmës ja Dios Teety näjyëtu'un të xymyo'oyën,

³⁰ Ets jam mkaytyëty m'uuktëty maas ja nkaaypyäjnën mëti'ipë yajpatpën maas yë nkutujktaknën, ets mnaaxwäätstëty ma ja kutujktaknën ets xypyaye'eytyëty ja majkmäjtsk pëkpyë ja Israel ja y'u'unk y'ok.

Ma ja Jesús nikäjpxyën ko ja Pedro kyuyu'utsa'anyë

³¹ Näyjyëtu'un ja Wintsën y'ënäny: Simón, Simón, tëë yë mëjku'u m'amëtowëtë ets myajwinxitëty ijxtëm ja'ay yë tsajpmoktë'ëts twinxityën,

³² je'eyëp ko tëëjës ja Dios nmënu'kxtä'äky ets ja mmëpëjkën ka'ap tyëkoy'atëty ets ko mjootwinpitëty mëët ëjts, jotmëkwinkajpxë ja mjëëky mmëku'uk.

³³ Tääts ja Simón y'ënäny: Wintsën, ko mijts myajtsumëty, näjyëtu'unës ntëkëty pujxn tëkoty, pën m'o'kp, näjyëtu'unës n'ookëty.

³⁴ Ënet ja Jesús y'ënëmaayë: Pedro, jëtu'un mijts t'ënëëmë, tyam naamka'anëm ënety ja këtseynyë'aaw yaaxë'ëky ko mijts tëkëëk ok xykyuyu'utsëtyës, ko mijts m'ëna'anëty ko ka'ap xy'ixy'ätyës.

Wiinkoonp ja ëyo'on

³⁵ Tääts ja Jesús yajtëëwëtë: Ko miits ojts nkäxtë ets ja Dios ja y'aaw y'ayuk xykyajpxwa'kxtëty, ko ja mxuumy ka'ap xywyitstëty, ni meeny apëjkën, ni mkë'ëk. ¿Tii ojts mtëkoy'ajtxëtë? Tääts y'ëtsoowtë: Ka'ap tii tyëkoy'äjty.

³⁶ Ënet y'ënëmaayëtë: Tyam tëy, pën jam wyit myeeny wä'än tpakony; pën jam ja kyääky wä'än tpapëky; pën ja tyiypyujxn ka'ijtpën wä'än yë nyijän tooky ets tjuyëty tu'uk.

³⁷ Jëtu'un miits nëëmëtë ko kopkpëky jëtu'un tyunëtëty jyatëtëty ijxtëm ja Dios ja y'aaw y'ayuk xynyikäjpxyënës: Ko jëtu'un ojts yaj'ixy ijxtëm jeexyë y'ëxëëk ja'ayëtyën. Kojy jëtu'un tyunëtëty jyatëtëty ijxtëm myinyën kuja'ay.

³⁸ Tääts y'ënantë: Wintsën, tyaajës ja tëypyujxn mäjtsk nmëët'atë. Ets ja Jesús y'ëtsooy: Amonyë itë.

Ko ja Jesús Tios mëkäjpxy jam Getsemaní

³⁹ Tääts ja Jesús tsyo'ony ets ojts nyijkx Olivo kopkwinm, ijxtëm ijty tuunk'atyën; ets ja y'ijxpëjkpëtëjk pyatso'onë.

⁴⁰ Ko jam jyajtë ets ja Jesús y'ënëmaayëtë: Ja'amyätstë Dios ets ka'ap ja ku'oypyë mnätyukmëmëta'akëtëty.

⁴¹ Tääts ja Jesús ojts nyijkx ëpëky, tu'kjamën ko tu'uk yë tsaa naska'tsëmëty. Jamts ojts nyäkyoxtënaaytyä'äkyë ets ja Dios tja'amyejtsy:

⁴² Dios Teety, pën mijts m'ënaanp, tun yë mëyajtën ëts xyajkutukëty etsës ka'ap nmë''ëyowëty ya'atë jotmay, mëti'ipë jëtu'un tä ta'amnëëjën; je'eyëp ko ka'ap y'ëjtsëty njä'a tyunëty, yë'ë yajtun wi'ix mijts të xytyuknipëjktaakën.

⁴³ Jää ja tsajpjotmëtë kukäjpxy tu'uk nyimiinë mëti'ipë tsajpjotm tso'onpën ets jyotmëkmooyë.

⁴⁴ Ma ja Jesús y'ëyoyën ets ja Dios mëktä'äky tja'amyetsyën, nëkoo ja pyëxyik nyajtsxä'kxënë ijxtëm ja ne'pynyën.

⁴⁵ Ko ja Dios tmëkajpxtaay, tääts pyëti'ky ets ja y'ijxpëjkpëtëjk ojts tniminy; maatëp ënety ko ojts tpaaty, yë'ë mëmëtakëtëp ja jotmay.

⁴⁶ Tääts ja y'ijxpëjkpëtëjk t'ënëmaay: ¿Tii ko mma'atë? Pëtë'ëktë. Ja'amyätstë Dios ets ka'ap ja ku'oypyë mnätyukmëmëta'akëtëty.

Ko Jesús yajmatsy

⁴⁷ Tam ënety ja Jesús kyäjpxynyëm ko jyajtë ja mayjyä'äy. Ja Judas tu'uwinwoop; tu'uk mëti'ipë ja Jesús y'ijxpëjkpë'ajtypyën mëti'ipë mëët nyimajkmäjtskëtën. Tääts tmëwinkoony ja Jesús ets ojts tsu'kxy.

⁴⁸ Ënet ja Jesús y'ënëmaayë: Judas, ¿jëtu'un xykyë'ëyäky ja naaxwiinyëtë ja'ay ja Y'u'unkë, mëët tu'uk ja tsu'kxyë?

⁴⁹ Ko ja Jesús ja y'ijxpëjkpëtëjk jëtu'un t'ijxtë, tääts tyajtëëwtë: Wintsën, ¿nätyukuwa'anëm yë tëypyujxnë?

⁵⁰ Tääts nitu'uk ja ijxpëjkpë ojts tyajtsëtyuty ja teety wintsën ja tyuunpë ets tnëpujxë ja y'aka'anytyatsk.

⁵¹ Ets ja Jesús y'ënëmaayë: Ixmatstë, wä'än jëtu'un. Ets ja Jesús ja teety wintsën ja tyuunpë tatskmëxajëy ets tyajtsoky.

⁵² Tääts y'ënëmaayëtë ja teety wintsëntëjk, ja mëjtsajptëjk këwent'ajtpë ets ja mëjja'aytyëjkëty, mëti'ipë ënety jam të myintën ets yajtsoona'anëtë: ¿Tii ko miits xynyimintës mëët yë tëypyujxn ets mëët yë kepy, ijxtëm jeexyë nmä'tspëtyës?

⁵³ Ko të nyajpaatyës ma ja mëjtsajptëjkën winjëpom, ka'ap ijty miits xymyatstës; tyam ënät të myëpaat'aty ets winë xytyuntëty jëtu'un ijxtëm ja akootstuuypyë yajpaatën.

Ko Pedro tkuyu'utsy ja Jesús

⁵⁴ Ënet tmajtstë ja Jesús ets tyajnëjkxtë ma ja teety wintsën ja tyëjkën. Tääts ja Pedro ojts tpatsoony, jëkäm tpaye'ey.

⁵⁵ Ets ja ja'ay ja jëën tyajmëjëtyë jam tëja'aw itkujky, jamts xyamtë ets ja Pedro nän jam nyaaxwe'tsy ja'ay itkujky ma jam xyamtën.

⁵⁶ Ënet tu'uk ja to'oxytyëjk mëtuunpë t'ijxy ko ja Pedro jam xyämy jëënpë'am ets y'ënäny: Ya'atë ja'ay, yë'ë ijty mëët yë Jesús jyëtity.

⁵⁷ Ka'ap ja Pedro tkupëjky ets y'ënäny: To'oxytyëjk, ka'apës tääpë ja'ay n'ixy'äty.

⁵⁸ Wäänë y'ijty ko wiinkpë y'ijxpatë ets y'ënëmaayë: Mijts yë'ë ijty mëët mjëtity yë Jesús, ¿këtiijë? Tääts ja Pedro y'ëtsooy: Ye'etyëjk ja'ay, ka'ap y'ëjtsëty.

⁵⁹ Tëë ënety tu'khorën nyäxy ko wiinkpë jyaak timy'ënäny: Tëy yë'ë ko tyaapë ja'ay yë'ë ijty mëët jyëtity yë Jesús. Galilea ja'ayts yë'ë.

⁶⁰ Tääts ja Pedro y'ëtsooy: Ye'etyëjk ja'ay, ka'apës nijawë tii mëtyäkpy. Tam ënety kyakajpxta'aynyëm ko ja këtseynyë'aaw tu'uk yaaxë'ky.

⁶¹ Tääts ja Wintsën tni''ijxwinpijty ja Pedro. Ets ja Pedro tja'amyejtsy wi'ix ënety ja Jesús të nyë'ëmxëtyën: Tyam, naamka'anëm ënety ja këtseynyë'aaw yaaxë'ëky ko mijts xykyuyu'utsa'anyës tëkëëk ok.

⁶² Tääts ja Pedro pyëtsiimy yaxp mon tuk.

Ko Jesús yajnëxi'iky yajtukxi'iky

⁶³ Ënet ja ja'ayëty mëti'ipë ënety ja Jesús jam kyëwent'ajtëpën nëxik tukxiktë, twinwojp tjëjpwojptë.

⁶⁴ Ojts twinkutsumëtë ets tsi'ktë tkojxtë wiinkëjxm jëjpkëjxm ets t'ënëmaaytyë: Najtsjawë pën të mkoxyë.

⁶⁵ Ets ëxëëkjaty t'ënëmaaytyë mëët yë näy'oj näya'axë.

Ko Jesús jam yajpaaty ma tsajptëkotyëtë yajjuntë'ajtpën

⁶⁶ Ko xyiinytyäky ënät ja mëjja'aytyëjk, tsajptëkotyëtë yaj'ijxpëjkpëtëjk ets ja teety wintsënëty myujktë. Jamts ja Jesús ojts tyajnëjkxtë ets tyajtëëwtë:

⁶⁷ Tuk'ëwa'anëtëkës, ¿mijts jëtu'un mKristë'ajtpë? Tääts ja Jesús y'ëtsooy: Ko miits njanëëmëtëty ko ëjts, ka'ap xymyëpëktëty.

⁶⁸ Koos tii njayajtëwëty, ka'ap xy'ëtsowtëty.

⁶⁹ Näy tyämyë ënät ja naaxwiinyëtë ja'ay ja y'U'unk nyaaxwäätsëty ma Dios ja y'a'oykyë'ëjën, mëti'ipë maaytyääyëpën winë.

⁷⁰ Tääts ni'ëmukë tyajtëëwtë: ¿Paaty mijts jëtu'un Dios m'u'unk'ajtëpë? Tääts ja Jesús y'ëtsooy: Miits jam kë'ëm jëtu'un m'ënantëp.

⁷¹ Tääts ja ja'ay y'ënantë: ¿Tii ko ja ë'ëmpë njaaktimtsyojkmëty? Tëë kë'ëm nmëto'owëmë wi'ix y'ënä'änyën.