Lucas 19 - Biblia Dc en Mixe de Quetzaltepec

Jesús ets ja Zaqueo

¹ Tääts ja Jesús jyä'äjty jam Jericó ets tukye'eynyäjxy ja kajpn.

² Jam ënety tu'uk tsyëënë ja kumeenyjyä'äy, yajkukëpäjtpë wintsën, Roma kajpn myëtuumpy, Zaqueo xyëëwajtyp.

³ Yë'ë ënety jya'ixäämpy ja Jesús je'eyëp ko ka'ap tjëkyepy t'ixëty jä'ä ko nëkooyë ja mayjyä'äynyë ets ja Zaqueo kon ijty tyänë.

⁴ Tääts ojts pëyi'ikyë nyijkxy jëwyiin ma ja Jesús nyaxa'anyën ets pyejty ma tu'uk yë kepyën jam tku'ijxnaxa'any ja Jesús ko nyaxëty.

⁵ Ko ja Jesús nyäjxy, tääts pya'at'ijxy ets t'ënëmaay: Zaqueo, tsojk jënak. Mtëjkwintumës njajta'aka'any.

⁶ Tääts ja Zaqueo ënätyë jyënäjky ets akujk jotkujk ja Jesús tyajja'ajtäky ma tyëjkën.

⁷ Ko jëtu'un t'ijxtë, ënätyë tyëjkëtyë kajpxpë ets ni'ojëtë ja Jesús, ko të jyajtä'äky ma ja pokyjyä'äy ja tyëjkën.

⁸ Ënet ja Zaqueo wya'kujkëy ets t'ënëmaay ja Wintsën: Wintsën, tyamës nmo'ojëty ja ëyoopëja'ay kujkwä'kxy mëti'ipës nmëët'ajtypyën; pën tëëjës pën nmeetsy tyamës nyajwinpijtëty taxk jëtu'un.

⁹ Tääts ja Jesús y'ënëmaayë: Tyam tëë jyä'ty ja Dios ja nyitsokën ma ya'atë tëjkën, jä'ä ko ya'atë Zaqueo nän Abraham yë'ë y'u'unk y'ok.

¹⁰ Yë naaxwiinyëtë ja'ay yë y'U'unk, yë'ë të niminy ets t'ixta'aja'any, tyajtso'oka'any mëti'ipë tëkoy'ijtpën.

Majkpë ja meeny ja nyi''ijxpät

¹¹ Tam ënety ja ja'ay tmëtoow'itë mëti'ipë ja Jesús nyimëtyäkpyën, ënät tu'uk ja ijxpät nimëtyaktso'ony, tim ja'tanëtëp ënety jam Jerusalén ets ja ja'ay myäytyë tyajtë ko tim wiinkoonp ja Dios ja kyutujkën.

¹² Tääts ja Jesús y'ënäny: Jää ijty tu'uk ja ja'ay jyuuky'äty jotkujkja'aypyë ets kumeenypë; ënät ojts nyijkxy jëkäm ëpëkykyajpn ets t'ëxajëja'any ja kyutujkën ets awinpity yajkutuka'any.

¹³ Tääts ja tyuunpë nimajk tyajmiiny ko ënety tsyoonanë ets nitu'ukjaty këëktu'uk tmooy ja myeeny mëti'ipë tsoowpatpën ets t'ënëmaay: Yaj'u'unk'atë ya'atë meeny koonëmës nwinpitëty.

¹⁴ E jam ma kyajpnën may ja ja'ay jam myëtsip'atyë, paaty tkäjxtë ja kukäjpxy ets nëëmëtëty: ka'apës ntsoktë ets ya'atë ja'ay yë'ë xy'ënä'ämtëtyës.

¹⁵ E ja jotkujk ja'ay ojts ja kyutujkën yajmo'oy ets yë'ë y'ënä'ämëty. Ko wyimpijnë, tääts ja tyuunpë tnikäjxëy mëti'ipë ënety ja meeny të tmo'oy ets nijawëja'any jënu'un të tyaj'u'unk'atë.

¹⁶ Tääts tu'uk jëyëjp myiiny, ets y'ënäny: Wintsën, majkpëkyës ja meeny të nyaj'u'unk'aty ja tu'kpëkpyë.

¹⁷ Tääts ja yajkutujkpë y'ëtsooy: Oy jëtu'un, oy mijts të mtuny. Jä'äkyëjxm ko oy yiin wään tii të myajmo'oy tëë oy xyajtuunkpaaty; tyam mijts ntuknipëky ets myajkutukëty majk kajpn.

¹⁸ Tääts ja wiinkpë myëjwä'ky ets y'ënäny: Wintsën, mëkoxkpëkyës të nyaj'u'unk'aty ja tu'kpëkpyë.

¹⁹ Näyjyëtu'un ya'atë yaj'ëtsooy: Mëkoxk ja kajpn xy'ënä'ämëty.

²⁰ Tääts ja tu'uk myëjwä'ky ets y'ënäny: Wintsën, tyaa ja meeny, pëjke'ekyës të nmëët'aty paayëwintsumy,

²¹ jä'ä ko mijts ntsë'këp, mijts ëxëëk mja'ay'äty; jam winë xyajmuky ma ka'ap tii të xyäkyën, ets myajpëtë'kpy ja pëjktä'äky ma ka'ap të mpeny të mkojyën.

²² Tääts ja yajkutujkpë y'ënëmaayë: Mijts, ka'apë oy mtuny; m'aaw m'ayuk kë'ëm mnätyukpano'këp. Pën mnija'ap koos ëxëëk nja'ay'äty, ets ko nyajmujkpyës winë maas ka'ap tii të nyäkyën ets nyajpëtë'kpyës ja pëjktä'äky maas ka'ap të mpeny të nkojyën,

²³ ¿tiixë ko ja nmeeny të xykyamënëjkxy ma jeexyë jam y'u'unk'atyën, ets jeexyë ëjts yë nmeeny u'unk të xymyo'oy koos të nwinpity ma tëjkën?

²⁴ Tääts t'ënëmaay ja mëti'ipë ënety jamëtyën: Pëjkëtë meeny ets xymyo'otëty mëti'ipë të tyaj'u'unk'atyën majkpëky.

²⁵ Tääts y'ëtsoowtë: Tii koo, tamts ëpëky majkpëky tmëëtëty

²⁶ ets ja wintsën y'ëtsooy: Jëtu'un yam miits n'ënëëmëtë, pën tii myëët'ajtyp may, may jyaak timyajmo'oja'any; e pën tii yiin wäänë myëët'ajtyp, jaakyajpëjkëjaanp mëti'ipë ënety myëët'ajtypyën.

²⁷ E ja nmëtsipës mëti'ipë ka'ap të tsoktën etsës ëjts nyajkutukëty, yaa yajmintë ets xyaj'ooktëty ëjts nwintuuyës.

Ko Jesús tyëkë jam Jerusalén

²⁸ Ko Jesús jëtu'un myëtyaktaay, ënät ye'eytsyo'ony jatëkok ets ojts nyijkxy jam Jerusalén.

²⁹ Tim wäänë ënety kyaja'ty jam Betfagé ets Betania ma ja Olivos Kopkën, ënät tkejxy nimäjtsk ja y'ijxpëjkpë,

³⁰ ets t'ënëmaay: Nëjkxtë jam xim, ma mutsk kajpn yaj'ixyën; ko jam mja'tëty, jam xypyaata'antë tu'uk yë krukts kutsumy mëti'ipë ka'ap pën tuk'u'unyënëm. Mëkäjëtë ets xyajmintëty.

³¹ Ko pën myajtëwëtëty tii ko xymyëkäjëtë, jëtu'un xy'ënëëmëtëty yë Wintsën yajmëyäjtyp.

³² Tääts ja y'ijxpëjkpë nimäjtsk ojts nyëjkxtë ets tpatë jëtu'un ijxtëm ja Jesús ënety të y'ënë'ëmxëtën.

³³ Tam ënety tmëkäjëtë ja krukts ko ja kujëyujk y'ënëmaayëtë: ¿Tii ko xymyëkäjëtë?

³⁴ Tääts y'ëtsoowtë: Yë Wintsën yajmëyäjtyp.

³⁵ Ënet ja nyijän jam tkëxwijtstë krukts këjxm ets ojts tukninëjkxtë ja Jesús ets jam tyajkëxwä'tstë.

³⁶ Ko ja Jesús jam tyu'uye'ey, tääts ja ja'ay tjanty nyaxmëyä'äpëtë ja wyit tu'ujoty ma ja Jesús nyäxyën.

³⁷ Ko tmëwinkoontë ja Olivo kopk, ënät ja mayjyä'äy tyëjkëtyë yaxpë jojkpë, tukmëjjawëtë ja Dios ko ja Jesús ënety të tyuk'ixëtë ja mëj'ajtën.

³⁸ Tääts y'ënantë: Kënu'kxy mëjjawë ya'atë Yajkutujkpë mëti'ipë myëmiinpyën yë Wintsën yë xyëëw. Wä'än tjam'aty ja jotkujk'ajtën tsajpjotm ets yaa naaxwiiny.

³⁹ Tam ja fariseë ja'ayëty ënety mayjyä'äyjotm, ënät ja Jesús t'ënëmaaytyë: Wintsën, oj yë mja'ay.

⁴⁰ Tääts ja Jesús y'ëtsooy: Tyam miits nëëmëtë pën yë'ë amoontëp, tsaa ya'axan jokantëp.

⁴¹ Ko t'ijxpaty ja Jerusalén kajpn jam winkon, tääts ja Jesús niyäxy,

⁴² ets y'ënäny: Jëtu'unpëk jeexyë ya'atë xëëw xyjyä'äkyukë ko mjayajtukniminy ja jotkujk'ajtën. Je'eyëp ko ka'ap jyëtu'unëty, yu'utsy yajpaaty ma mijtsën ets ka'ap xy'ijxpaatëty.

⁴³ Pyaatäämpy ja xëëw ko ja mmëtsip myajnatukëtëty na'ëwtity,

⁴⁴ ets myajkutëkoyëtëty. Nëjkxëp tyaj'ooktë ja mja'ay, jyijta'ajantëp ja mpotsy, jä'ä ko ka'ap ojts xymyëjpëjkta'aktë ja Dios ko mjanimiinëtë.

Ko Jesús twojpëtsëmy ja to'kpë yajkpë ma ja mëjtsajptëjkën

⁴⁵ Tääts ja Jesús jyä'äjty ma ja mëjtsajptëjkën ets t'ëxwojppëtseemy ja ja'ay mëti'ipë ënety jap to'ktëp yajktëpën.

⁴⁶ Tääts t'ënëmaay: Jëtu'un ja Dios ja y'aaw y'ayuk y'ënä'äny: Jä'äjës ja ntëjk wya'anëty Dios ja'amyäjtstakn, e miitsëty jä'ä të xyaj'awinpijnëtë mä'tstakn.

⁴⁷ Jëpom jëpom ja Jesús ijty yaj'ixpëky ma ja mëjtsajptëjkën; ets ja teety wintsënëty, tsajptëkotyëtë yaj'ijxpëjkpëty ets mëti'ipë ja kajpn nyiwintsën'ajtëpën, yajxon ja winma'any tjajanty'ixta'atë wi'ix ja Jesús tyaj'ooktëtyën.

⁴⁸ Ka'ap wyinma'anypyatë wi'ix tuntëtyën, jä'ä ko ja mayjyä'äy oy tmëtowtë wi'ix ja Jesús yaj'ijxpëkyën.