Lucas 14 - Biblia Dc en Mixe de Quetzaltepec

Ko Jesús tyajtso'oky tu'uk ja ja'ay ki'ix pa'am mëëtpë

¹ Po'kxënxëëwjoty ja Jesús ojts nyijkxy kääpyë ma tu'uk ja fariseë wintsën ja tyëjkën, tam wiinkpë ja fariseë ja'ayëty je'eyë y'ixtë tyuntë.

² Tam näjyëtu'un tu'uk ja ja'ay ënety yajpaaty mëti'ipë ki'ix pa'am pëjkëpën.

³ Ënet ja Jesús tyajtëëy ja tsajptëkotyëtë yaj'ijxpëjkpë ets ja fariseë ja'ayëty: ¿Mëpaat'ajtp jëtääjë ets ja pa'amja'ay tsyo'okëty po'kxënxëëwjoty ëkë ka'apë?

⁴ Ni pën kya'ëtsooy, amonyë y'itë. Tääts ja Jesús ojts tkë'ënixajy ja pa'amja'ay ets tyajtsoky ets t'ënëmaay ko nyëjkxëty.

⁵ E ja fariseë ja'ayëty jëtu'un t'ënëmaay: ¿Pën jëtää ja y'u'unk ëkë tsyajpkaa ka'ap tjuutëty jutjoty ko po'kxënxëëwjoty jap kyënaxëty?

⁶ Näy ka'ap y'ëtsoowtë.

Mëti'ipë të yajwowtën mëkääpyë

⁷ Jam ja Jesús t'ijxy ko ja mëkääpyëtëjk aakyë'ë wyin'ijxtëp ja u'unyääypyäjn mëti'ipë wiinkonën ma ja kaaypyäjnën. Tääts ojts tmëtyä'äky ya'atë wijymyëtyä'äky:

⁸ Ko pën mwowëtëty kääpyë ukpë ma ja'ay pyikyën, këtii yë'ë xytyimwinkuwä'tsëkyojtëty ja kaaypyäjn; jä'ä ko tsojk wiinkpë ja'ay myinëty mëti'ipë mëj'äämpyën ets mijts myajëkäxëty,

⁹ ets ja kujëën kutëjk myinëty ets mnë'mxëtëty: Jëwääts jää wä'än ya'atë ja'ay yë'ë jää t'u'unyë. Tääts mijts tsëtyu'unmëët mpëtë'ëktëty ets jam muum jëxkë'ëm mjaaknaaxwäätsëty.

¹⁰ Ko pën mwowëtëty nikë oy ko ix'am mnaaxwäätsëty, kë'ëmnëm ja kujëën kutëjk mnë'ëmxëtëty jëjp'am u'unyë: Ënet mijts mwintsë'ëkëtëty yë ja'ay mëti'ipëty ënety jam mëët m'u'unyën ma ja kaaypyäjnën.

¹¹ Pën nämyëjpëjktakëp kë'ëm, yë Dios mutsk yajnaxa'anyë, pën yu'unk naxym näpyëjktakëp, mëj'äämpy yë Dios yajnaxa'anyë.

¹² Tääts ja Jesús t'ënëmaay näjyëtu'un ja ja'ay mëti'ipë ënety kääpyë të wyoyën: Ko pën xyajkaya'anëty, ka'ap yë'ë xywowëty mëti'ipë mëët mnämyäyën, ni ja mmëku'uktëjk, ni kumeenyjyä'äytyëjk mëti'ipë mmëjëën'ajtyp mmëtëjk'ajtypyën; jä'ä ko pën yë'ë mwoopy, nëjkxëp näjyëtu'un mwoyë kääpyë ets yë'ë xykyuma'ayën'atëty.

¹³ Ko tii xëëw xytyuknipëjktaakëty, nikë yë'ë mwowëp ëyoopëja'ay, kë'ëma'at tekymya'atpë ets ja wiintspë jëtu'un jotkujk myajpaatëty.

¹⁴ Jä'ä ko yë'ëjëty ka'ap myäyëtë tkujuytyëty mëti'ipë ënety të xymyo'oyën; je'eyëp ko mijts nëjkxëp ja mkuma'ayën xy'ëxajë ko ënety jyuukpyëktë ja wa'ats ja'ayëty.

Ja nyi''ijxpät ja mëj a'ux

¹⁵ Ko ya'atë tmëtoowtë, tu'uk mëti'ipë ënety jam yajpatpën t'ënëmaay ja Jesús: Akujk jotkujk ja'ay yajpaaty mëti'ipë kääpy ukpën ma Dios ja kyutujktaknën.

¹⁶ Ënet ja Jesús y'ënëmaayë: Ojts tu'uk yë ja'ay nipëjktaakë mëj a'ux, may ja ja'ay twoowmujky.

¹⁷ Ko ja a'ux tpaty, tääts tu'uk ja tyuunpë tkejxy ets nëëmëty ja ja'ay: Mintë mkaytyë, tëë ja a'ux jam y'apaatë.

¹⁸ E tu'kë'ëyë ja ja'ayëty je'eyë ja mä'kxën tpëjktsoowtë. Tam mëti'ipë ënanën: Naaxës të njuy, yë'ëjës nëjkx n'ixa'any, mëpaat xynyamä'kxëty.

¹⁹ Tääts ja wiinkpë y'ënäny: Tsajp kaas të njuy nimëkoxk yuutakn, yë'ëjës nëjkx nyajyuumatsa'any, mëpaat xynyamä'kxëty.

²⁰ Ets wiinkpë y'ënäny: Tim naanpëjkpës jam, ka'apës nmëta'akëty nëjkxëty.

²¹ Tääts ja tuunpë wyimpijty ets tuk'ëwa'anëy ja wyintsën wi'ixëty ënety të y'ëtsowtën ja ja'ayëty. Ënet ja wintsën jyoot'anpëjky ets ja tyuunpë ojts t'ëne'emy: Nëjkx në'ëjoty tu'ujoty, m'aye'eytya'ajëp yë kajpn ets xywyoowminëty yë ëyoopëja'ay, yë kë'ëma'atpë tekymya'atpë ets wiintsëtypë.

²² Ko ja tuunpë wyimpijty ets ja wyintsën t'ënëmaay: Wintsën, tëëjës ntuny ijxtëmës mijts të xytyuk'ëne'emyën, je'eyëp ko tapnëm ja u'unyääypyäjn ëwaatsëpë.

²³ Tääts ja wintsën ja tyuunpë t'ënëmaay: Nëjkx mjëtity kajpnpa'a kajpn nux ets xywyoowminëty yë ja'ay atsip koonëmës yë ntëjk y'utsëty.

²⁴ Tëy miits nëëmëtë, ko ja mëjëyëjpës të njawoyën nijëna'a nëjkx tkakaytyë ja a'ux mëti'ipës të ntuknipëjktaakën.

Wi'ix tsyipëtyën ko Jesús npanëjkxa'anmëty

²⁵ May ja ja'ay ja Jesús ënety pyajëtityë oymyaajëty. Tääts niwa'akwinpijty ets t'ënëmaay:

²⁶ Pën jää ja'ay mëti'ipë ja ënaanpën koos xypyamina'any ets yë'ë ni'ik tsyojkyp ja tyaak tyeety, y'u'unk tyo'oxytyëjk, myëkä'äx, myëku'uktëjk, ëkë kyë'ëm juukyajtën ets këtiinëm ëjts; jëtu'unpë ja'ay ka'ap tjëkyepy n'ijxpëjkpë'atëtyës.

²⁷ Pën ka'ap ja kyëruuts tsëëmë'ëky ets ka'apës xypyaminy; jëtu'unpë ja'ay ka'ap tjëkyepy n'ijxpëjkpë'atëtyës.

²⁸ Pën jam pën tkoja'any tu'uk yë mëjpotsy, ¿ka'ap jëtää jëwyiin tmëmay tmëtajy pën mëta'akëp ets tkoj'apätëtyë?

²⁹ Jä'ä ko pën je'eyë tpojts tsoony ets ka'ap tyaj'apety, mëti'ipë ënety jëtu'un y'ijxtëpën je'eyë nëjkx tyukxi'ikyë,

³⁰ ets y'ëna'antëty: Ya'atë ja'ay tëë nëkoo jyapojtstsoony ets ka'ap të tyaj'apety.

³¹ Näyjyëtu'un tu'uk ja yajkutujkpë, pën tsiptunaanp mëët wiinkpë yajkutujkpë, ¿Ka'ap jëtää jëwyiin tmëmay tmëtajëty pën mëpaat twinkuwa'akë ja myëtsip mëti'ipë myëët'ajtypyën i'px mil ja tsyiptuunpë, ets yë'ë je'eyë tmëët'aty nimajk mil?

³² Pën ka'ap nyäy'a'ixëty, pojën tkäxëty ja tyuunpë naamka'anëm ënety tyukja'atyënëm ja myëtsip ets nëëmëty ko ka'ap y'oyëty yë tsip.

³³ Näyjyëtu'un miitsëty pën ka'ap xy'ëxmatstë tu'kë'ëyë winë, ka'ap tjëkyëpy n'ijxpëjkpë'atëty.

Ko ja kaan ja tya'amtsajtën tyëkoy

³⁴ Yë kaan oy yë'ë. Ko ja tya'amts'ajtën tyëkoy ¿wi'ix tii t'ëkyajta'amtsëty?

³⁵ Nitii kyawa'anëty, këtii tyaj'u'unkta'akëty. Je'eyë tëy tyimyaj'ixko'ownëty. Pën ja tyatsk tyukmëtoopyën, wä'än tmëtoowkukë.