Lucas 11 - Biblia Dc en Mixe de Quetzaltepec

Jesús tyukni''ixë wi'ix mëpaat ja Tios yajmëpëjktsoyën

¹ Tëkok ja Jesús tmëpëjktsooy ja Dios. Ko tyajjëjpkuwatsëy, ënät ja y'ijxpëjkpë tu'uk y'ënëmaayë: Wintsën, tukni''ijxëtëkës yë Dios mëpëjktso'owën, ijxtëm ja Juan ja y'ijxpëjkpëtëjk tukni''ijxëyën.

² Tääts ja Jesús y'ëtsooy: Ko Dios xymyëpëjktsowtëty, jëtu'un m'ëna'antëty: Dios Teety, kënu'kxy ja mxëëw nyaxëty. Wä'än tminy ja mkutujkën.

³ Mooytyëkës ja ka'ayën ukën mëti'ipës winjëpom nyajmëyajtëpën.

⁴ Nimä'kxtëkës ja npoky nkëtyey, jä'ä ko tëëjës nimä'kxtë mëti'ipës xymyëtëkooytyëpën. Ka'apës mëpaat ja ëxëëkpë xymyëmëta'aktë.

⁵ Tääts ja Jesús näjyëtu'un y'ënëmaayëtë: Jëtu'un npëjktakmëty ijxtëm nitu'uk pën nyijkxyën mëj tsu'um'it ma myëku'uk yë tyëjkën ets nëëmëty: Mëku'uk, tukkoontsoowkës tëkëëk yë tsajpkääky, ok nkëpäjtmëty.

⁶ Yë'ë ko tam të jyä'ty tu'uk ja nmëku'ukës ets ka'ap tii nmëëtëtyës, tiis nmo'ojëp.

⁷ Ets ja tu'uk wintimpë jäpyë t'ëtsoy ja myëku'uk tyëkoty ets nëëmëty: Këtii nëkoo xynye'emyës, ëtuky yë tëjknë, maanëtëpës yap mëëtës ja n'u'unk n'ëna'k, paaty ka'ap tjëkyepy nipëtë'ëkëty ets tii nmo'ojëty.

⁸ Jëtu'unts miits nëëmëtë, oy ja kyapëtë'ëka'any, myooytya'ajëp tii ja myëku'uk y'amëtoopy, ka'ap yë'ëkyëjxmëty ko mëët nyämyäyë, yë'ë ko tsyojkpy ets ka'ap ja myëku'uk yajjotkëxëtëty.

⁹ Paaty miits nëëmëtë ets xy'amëtowtëty ets myajmo'otëty; ixta'atë ets xypyaatëty; pijkxnoktë ja tëjk'aaw ets y'ëwa'atsëty.

¹⁰ Yë'ë ko ja'ay tii t'amëtoy, yajmoopy yë'ë; ko pën tii t'ixta'ay, pyätyp; ets pën pyijkxnojkpy ja tëjk'aaw, ëwatsxëyëp.

¹¹ Ma miits u'unkteety mxëëw'atën, ¿wä'än jëtää m'u'unk tsa'any xymyo'otëty ko m'amëtowëtëty ja nëë jëyujkë?

¹² ¿Ëkë ko m'amëtowëtëty ja këtseytsyaa, kä'py mmo'otëpë?

¹³ Oy miits ëxëëk mjaja'ay'atë, mjajtëp ja m'u'unk xymyo'otëty mëti'ipë oyën, ets wi'ix ja mteety tsajpjotmëpë tkamo'ojëty ja Kënu'kxymyëkajtën mëti'ipë amëtoowëpën.

Ma ja Jesús yaj'ënëëmën ko ja mëjku'u ja myëk'ajtën tmëët'ajtë

¹⁴ Jam ja Jesús ënety t'ixkexy ja ku'oypyë ma tu'uk ja ja'ayën uumpë; ko ja ku'oypyë y'ëxmajtsë, tääts ja ja'ay kyajpxë'ky. Janty mëj'ixy ja ja'ay t'ijxtë.

¹⁵ E tam mëti'ipë ënantëpën: Mëjku'u yë myëk'ajtën yajtuunëp paaty t'ixkëxy yë ku'oypyë.

¹⁶ Ets tam jënaakën mëti'ipë je'eyë wyinma'any'ixantëpën ja Jesús, yë'ë y'amëtoowtë ets tyuk'ixëtëty ja mëj'ajtën mëti'ipë tso'onpën tsajpjotm.

¹⁷ Wa'ats ja Jesús tnijawë wi'ix ja ja'ay myäytyë tyajtën, tääts t'ënëmaay: Oymyëti'ipë kajpnëty, ko nyäpyëjkwa'kxëtëty, ka'ap tmëët'atëty ja kuttujkën; ets ko ja'ay tu'kjëën tu'ktëjk tsyiptunëty, ma'taanp ja tsëna'ayën.

¹⁸ Näyjyëtu'un ja ku'oypyë, pën näpyëjkwa'kxëtëp mäjtskpëky, ¿wi'ix ja kyutujkën tmëët'atëty? Paatyës jëtu'un n'ëna'any jä'ä ko miits m'ëna'antë koos ëjts mëjku'u nmëët'aty paatyës n'ixkexy yë ku'oypyë.

¹⁹ Pën janty tëy ¿pën yë mja'ay yë kuttujkën mooyëtëp ets ku'oypyë t'ixkäxtëty? Yë'ëjëty nyija'awëtyëp ko yë'ë Dios mooyëtëp yë kuttujkën, paaty yë'ëjëty nëjkxëp mpoky'ixëtë.

²⁰ Näyjyëtu'unës ëjts, Dios yë myëk'ajtën mëët n'ixkexyës yë ku'oypyë, jëtu'un xyjyä'äkyukëtëty ko ja Dios ja kyutujkën të tyajtso'ontä'äky ma miitsëtyën.

²¹ Ko tu'uk ja ye'etyëjk jotmëk nyäpyëjktä'äkyë ets tam tmëëtëty mëti'ipë nätyukuwanëpën, kyëwent'ajtyp ja tyëjk, jëtu'unts ja pyëjktä'äky ijx'ity këwent'aty tyaj'ity.

²² E ko ënät tu'uk myiny wäänë mëkpë ets myëmëtä'äkyë, tu'kë'ëyë pyëjkta'ayxyëty mëti'ipë tyukuwäämpyën ets tyukjotkujk'ajtypyën ets ja pyëjktä'äky yajkniwaanta'ay mëti'ipë myëët'ajtypyën.

²³ Pën xykyapukajpxëpës, ëjts xymyëtsip'ajtp; pën ka'ap tyuunmuky pyëjkmuky mëët ëjts, je'eyë winë t'ixko'owta'ay.

Ku'oypyë mëti'ipë jatëkok winpijtpën

²⁴ Ko tu'uk ja ku'oypyë ja ja'ay t'ëxmatsy ets nëjkx jyëtity të'ëts'itjotm, t'ixta'ay ja po'kxtakn ets ko nimaa tkapaaty ets myäy tyäjy: Wimpitëpës ënät jatëkok maas ja ntëjkën maas të ntsoonyën.

²⁵ Ko wyimpity, jëtu'un ja ja'ay yajpaaty ijxtëm ja tëjkën pe'etypë jaaxypyë, oytyuny yajxon.

²⁶ Ënet tsyoony ets nëjkx tjaak woy ja myëmëjku'u niwëxtujk ets ënät tuktëkëtë ja ja'ay; tsënaaytyakn twa'antë ets ja ja'ay wäänë ëxëëk jyajnë ka'ap jyëtu'unëty ko ijty tu'uk ja ku'oypyë tmëëtëty.

Mëtëypyë jotkujk'ajtën

²⁷ Tam ënety ja Jesús jëtu'un y'ënä'äny ko tu'uk ja to'oxytyëjk mayjyä'äyjoty tyëjkëy yaxpë jojkpë: Akujk jotkujk yajpaaty ja to'oxytyëjk mëti'ipë mijts të myajmëxu'unk'atyën ets të myajtsi'ityë.

²⁸ Tääts ja Jesús y'ëtsooy: Yë'ë wäänëni'ik akujk jotkujk yajpatp mëti'ipë ja Dios ja y'aaw y'ayuk myëtoow'ijtëpën ets tpatuntë.

Ko ja pokyjyä'äy t'amëtowtë ja mëj'ajtën

²⁹ Ni'ikyë ja ja'ay jyänty nyiye'epyätë ko ja Jesús yaj'ijxpëjktso'ony ets y'ënäny: Ja ja'ayëty ja tyampë jyuuky'atën ëxëëk ja jyot wyinma'anyëty, oy tja''amëtowtë ja mëj'ajtën, ka'ap yajmo'oja'antë wiinkpë mëj'ajtën; yi'iyë tëy mëti'ipë tuunën jajtën ko ja Jonás jyuuky'äjty.

³⁰ Jëtu'un ijxtëm ja Jonás y'ijxpäjtën'ajtyën ma ja Nínive ja'ayëtyën, näjyëtu'unës ya'atë naaxwiinyëtë ja'ay y'u'unk nëjkx xy'ijxpäjtën'atë.

³¹ Ko nëjkx ja naaxwiinyëtë ja'ay yajpaye'eytyë, minaanp ja yajkutujkpë to'oxytyëjkpë mëti'ipë ëpa'tkë'ëmtsow tsoonaanpën ets tëytyuna'any ja ja'ay, jëtu'un ijxtëm tëëyëp ojts ja Salomón nyiminyën ja to'oxytyëjk mëti'ipë jëkäm tso'onpën ets tmëtoow'ita'any ja Salomón ja wyijajtën; e mëti'ipë tyam yaa yajpatpën wäänë mëj'äämpy yë ni'ik këtiinëm ja Salomón.

³² Näyjyëtu'un ja Nínive ja'ayëty juukpyëkantëp ko ënety yajpaye'eytyë ja ja'ayëty ja nyëë pyokyëty mëti'ipë tyam juuky'ajtëpën ets nëjkx nyitukëtë; jä'ä ko ja Nínive ja'ayëty ojts ja Dios tmëpëktë ko tmëtoowtë ja Jonás myëtyä'äky, e ja tyampë ja ja'ay ni'ik mëj'äämpy yë'ë këtiinëm ja Jonás.

Kutë'kxnën mëti'ipë ni'kx kopk kyutë'kxypyën

³³ Ka'ap pën ja kutë'kxn tyajtooypyiky ets tpëjktä'äky yu'utsy ëkë kajjoonpa'tkë'p; këjxm yajkëxkony ets tkutë'kxëty mëti'ipë jap tëkoty tëjkëtëpën.

³⁴ Jëtu'un yë mwiin ijxtëm ja kutë'kxnën, yë'ëts kyutë'kxyp ja mni'kx mkopk. Pën oy ja mwiin, näjyëtu'un mni'kx mkopk oy yajkutë'kxy.

³⁵ Näkyëwent'atëtë këtiipë pyi'itsëty ja kutë'kxn mëti'ipë mmëët'ajtëpën.

³⁶ Pën ja mni'kx mkopk kutë'kxy y'ity ets ka'ap y'akootstuuyëty, të'kxy wa'ats winë xy'ixa'any, jëtu'un ijxtëm jeexyë myajkutë'kxyën.

Ko Jesús t'ojy ja fariseë ja'ayëty ets tsajptëkotyëtë yaj'ijxpëjkpëtëjk

³⁷ Ko ja Jesús kyajpxtaay, ënät tu'uk ja fariseë ja'ay ojts wyoyë mëkääpyë ma tyëjkën. Ko tyëjkëy jap, tääts nyaaxwe'tsy ma ja kaaypyäjnën.

³⁸ Ja fariseë ja'ay wiink ojts t'ixy ko ka'ap ja Jesús kyë'ëpujy ijxtëm ja ja'ay tuunk'atën ko kyäya'antë.

³⁹ Tääts ja Jesús y'ënëmaayë: Miitsëty fariseë ja'ayëty, myajwatstëp nëkëjxy ja apëjk atu'unën. Jëtu'un miits mnäpyëjkta'akëtë ijxtëm jeexyë m'oyjyä'äy'atën, je'eyëp ko miitsëty ka'ap wya'ats'atë jä'ä ko je'eyë mtontë määtstë ets ja ëxëëkpë xytyuntë xykyajpxtë.

⁴⁰ Winma'anytyukëty. ¿Këtii xynyijawëtë ko ojts yaj'oytyuny ja oypyë näjyëtu'un yaj'oytyuuny ja jootjotypë?

⁴¹ Putëkëtë ja ëyoopëja'ay ëmuumtu'ukjot ets jëtu'un ja mjot mwinma'any wya'atstëty.

⁴² Miits fariseë ja'ayëty mon tuk myajpaatë, ko tu'pëky xyjyajëpëktë ma ja majk pëkpyën ets ja Dios xyjyatukwintsë'ëkëtë; tä ja menta, rudë ets wiinkëtypë aay ujts mëti'ipë tojkx tsooy'ajtpën; je'eyëp ko ka'ap xymyëjpëjkta'aktë ja mëtëypyë ja nipaye'eyën ets ja Dios ja tsyojkën jya'awën.

⁴³ Mon tuk myajpaatë miitsëty fariseë ja'ayëty mëti'ipë jap tsajptëkoty jëjp'am tim u'unyëjantëpën ets xytsyoktë ets ja'ay mwintsë'ëkëtëty.

⁴⁴ Miits fariseë ja'ayëty ets näjyëtu'un miits tsajptëkotyëtë yaj'ijxpëjkpë mon tuk myajpaatë, jä'ä ko jëtu'un miitsëty ijxtëm ja o'kpëjutën ka'apë yaj'ixyën ets kutsë'ëkë ko ja'ay tuktäänëty.

⁴⁵ Tääts ja tsajptëkotyëtë yaj'ijxpëjkpë tu'uk y'ëtsooy: Wintsën, ko mijts jëtu'un m'ëna'any, jëtu'unës njawëtë ëjts yowë xywyinkajpxpäjtëp.

⁴⁶ Tääts ja Jesús y'ënäny: Miits tsajptëkotyëtë yaj'ijxpëjkpë mon tuk myajpaatë, jä'ä ko miits xytyukpatsëmtë ja ja'ay mëti'ipë ka'ap miits xypyatsëma'antën ets ka'apë xymyëmëta'aktëtyën, nitu'ukën yë mkë'ëwa'axy xykyatukpaata'antë.

⁴⁷ Ëxëëk mjata'antë, miitsëty mëti'ipë o'kpë jut mtajtëpën ets jam nyaaxtëkëtëty ja Dios ja kyäjpxynyajxpë mëti'ipë ja m'aptëjk yaj'o'ktën.

⁴⁸ Jëtu'un xyajnikëxë'ëktë ko m'oyjya'awëtëp mëti'ipë tyuuntën ja m'aptëjkëty; jä'ä ko yë'ë yaj'o'ktë ets miits xynyitajëtë.

⁴⁹ Paaty ja Dios mëët ja wijyajtën të y'ënä'äny: Ntuknikäxantëp ja nkäjpxynyajxpës ets ja n'ijxpëjkpëtëjkës, je'eyëp ko nëjkxëp xyaj'ooktë ets xy'ixjëtit xypyajëtitë.

⁵⁰ Paaty ja Dios tpaye'etya'aja'any ma ja ja'ayëtyën, ja jyot nye'pnyëty ja käjpxynyajxpëtëjk mëti'ipë të tyemy të jye'etsyën ko ja naaxwiinyëtë tsyo'ontäky,

⁵¹ tyimtso'ontä'äky ma ja Abel y'o'kyën ets jyëjpkëxy ma ja Zacarías y'o'kyën jap tsajptëkoty ma ja wintsë'këntyaknën. Paaty n'ënëëmëtë ko Dios pyaye'eyäämpy tii ko y'o'ktën tääpë ja'ayëty ma ja'ayëtyën tyampë jyuuky'atën.

⁵² Miitsëty tsajptëkotyëtë yaj'ijxpëjkpë mon tuk myajpaatë, mëti'ipë tëë xyjyä'äniwa'antën ja nija'awën; je'eyëp ko ka'ap mtëkëtë tëkoty ets ni xykyayajnaxtë ja wiinkpë.

⁵³ Ko ja Jesús jap pyëtsiimy, ënät ja tsajptëkotyëtë yaj'ijxpëjkpëtëjk mëët ja fariseë ja'ayëty ojts jyoot'anpëktë, paaty ja Jesús tjanty yajtsipkä'äxtë mëët ja yajtë'ëwën,

⁵⁴ ets jä'ä yajtëëwtëp wi'ix mëpaat ja Jesús kyajpxtëkoyën ets tni'ëënëja'antë.