Lucas 10 - Biblia Dc en Mixe de Quetzaltepec

Ko Jesús tkäjxwä'kxy ja nitëkë'px majkmäjtskpë ja ja'ay

¹ Ko jëtu'un y'ëkjajty y'ëkëpejty, ënät ja Wintsën Jesús twinwijtsy nitëkë'px majkmäjtsk ja ja'ay ets tkejxy nimäjtskjaty kajpn kajpn.

² Ets t'ënëmaay: Janty may ja pëjktä'äky pyëtë'ëka'any, je'eyëp ko ka'ap ja tuunpë myäyëty. Paaty miits xy'amëtowtëty ja pëjktä'äky ja nyiwintsën ets nyëjkxtëty ja tyuunpë ets ja pëjktä'äky pyëtë'ëkëty.

³ Nëjkxtë. Ëjts miits nkäjxtëp ijxtëm ja kupixyny nyëjkxtë pa'uk akujky.

⁴ Këtii xywyitstëty yë mxuumy, meeny apëjkën, ni wiinkpë mkë'ëk; ets ka'ap pën mëët jeky mëtya'aktëty ko pën xykyajpxpo'kxtëty tu'ujoty.

⁵ Ko muum mja'ajtakn xy'amëtowtëty, jëtu'un ja ja'ay xykyajpxpo'kxtëty: Wä'än jotkujk'ajtën tyajpaaty ma ya'atë tëjkën.

⁶ Pën jap ja ja'ay yajpaaty akujk jotkujk, akujk jotkujk mëët mwë'ëmtëty; pën ka'ap, mëwë'ëmtë ja akujk'ajt jotkujk'ajtën.

⁷ Jam wë'ëmtë ma tääpë tëjkën, mkaytyëp m'uuktëp pën tii ja ja'ay mmooyëtëp, jä'ä ko ja tuunpë paat'ajtëp myëju'uyën. Ka'ap winjëën wintëjk mjëtitëty.

⁸ Ko oymyakajpn mja'tëty ets myajkupëktëty, mkaytyëp m'uuktëp pën tii jam myajmooytyëp.

⁹ Yajtso'oktë ja pa'amja'ay mëti'ipë jamëtyën ets xynyëëmëtëty: Tää ja Dios ja kyutujkën mmëwinkonëtë.

¹⁰ Ko ma kajpn mja'tëty ma ka'ap myajkupëktën, pëtsëmtë jam ets m'ëna'antëty:

¹¹ Yë'ëpaat yë pu'uxm mëti'ipë jam ma ëëts yë ntekyëtyën nwinxitës ets xymyëwë'ëmtëty ja mpokyëty. E nijawëtë ko winkon ja Dios ja kyutujkën yajpaaty ma miitsëtyën.

¹² Jëtu'un miits n'ënëëmëtë ko nëjkx ja naaxwiinyëtë ja'ay yajpaye'eytyë, wäänë mëk yë ja'ay jëtu'unpë nëjkx yajtëytyuntë këtiinëm ja ja'ayëty mëti'ipë jam Sodomë kukajpn'ajtën.

Kajpn mëti'ipë ka'ap kyäjpxykyupëktën

¹³ Miitsëty, Corazín ja'ayëty mon tuk myajpaatë ets miits Betsaida ja'ayëty mon tuk myajpaatë. Jä'ä ko jeexyë mëj'ajtën të yajtuny jam Tirë ets Sidón ijxtëm të yajtunyën ma miitsëtyën, wintiixyëp jeexyë ja u'kxywyit tmë'u'unyäänyëtë kuyjaamjoty, jëtu'unts jeexyë të tyajknikëxë'ëktë ko të jyootwinpitë.

¹⁴ Ko nëjkx ja naaxwiinyëtë ja'ay yajpaye'ey, wäänë mëk miits nëjkx myajtëytyuntë këtiinëm ja Tirë ja'ayëty ets ja Sidónja'ayëty.

¹⁵ Ets mijts Capernaumëtë ja'ay, ¿jëtu'un may mtajy ko tsajpjotm myajmënëjkxa'anyë? Niwi'ix'äämpy, wäänë pa'tkë'p mijts mnëjkxa'any ëyoowtaknjoty.

¹⁶ Ënet ja Jesús t'ënëmaay ja y'ijxpëjkpëtëjk: Pën myëtoow'ijtëp mëti'ipë miits mnimëtyaktëpën, nän ëjts ënety xymyëtoow'ijtëp; pën kyamëtoow'ijtyp mëti'ipë ënety miits mnimëtyaktëpën, nän ëjts ënety xykyamëtoow'ijtp; pën xykyakupëjkpës, näjyëtu'un ja nteetyës ka'ap tkupëky mëti'ipës të xykyexyën.

Ko wyimpitë ja nitëkë'px majkmäjtskpë ja'ayëty

¹⁷ Tääts ja nitëkë'px majk mäjtskpë ja'ay ojts jotkujk jya'ajnëtë ets y'ënantë: Wintsën, ku'oypyë paatës të xymyëmëtowtë mijts mxëëwkyëjxm.

¹⁸ Ets ja Jesús y'ënëmaayëtë: Jëtu'un, tëëjës n'ixy ko ja mëjku'u kyuka'anaxy tsajpwinm ijxtëm ja wëtsuk nyaaxkëtä'äkyën.

¹⁹ Ëjts miits të nmo'otë ja kuttujkën ets ka'ap wi'ix mjatëty oy xyjyatukwa'kpätëty ja tsa'any ëkë ja kä'py ets xymyëmëta'aktëty miits ja mmëtsip, ka'ap wi'ix mjatëty.

²⁰ Je'eyëp ko këtii yi'iyë xytyukxoonta'aktëty ko ja ku'oypyë mmëmëtowëtëty, yë'ë mtukxoonta'aktëp ko ja Dios të tuny ja mëyajtën ko mxëëw jap kuja'ay y'ijnëtë tsajpjotm.

Yi'iyë Jesús nyija'ap pën Teety'ajtp

²¹ Näy jää it ma ja Jesús ënety jotkujk nyäjyawëtyën mëët ko ja Kënu'kxymyëkajtën ënety të tyuktëkëty, ënät y'ënäny: Dios Teety, Wintsën tsajpjotmëpë ets naaxwiinypë, nmëjja'ap njaantyjya'ap mijts, jä'äkyëjxm ko ja ja'ay mëti'ipë yu'unk naxym ja'ay'ajtëpën, tëë xytyuk'ixy xytyuknijawë mëti'ipë të xytyukwinkuyu'tsyën ja wijyjyä'äytyëjk. Jëtu'un, Dios Teety, jä'ä ko jëtu'un mijts të xytsyoky.

²² Tääts ja Jesús y'ënäny: Aak ëjts ja Dios Teety të xymyooytyä'äy tu'kë'ëyë winë. Ka'ap pën tnijawë pën Dios u'unk'ajtp, Dios Teety nätyu'uk nyija'ap; ni pën tkanijawë pën ja Dios Teety, Dios U'unk nätyu'uk nyija'ap ets tyuknijawëp ja ja'ay mëti'ipë ënety tyuknijawëjäämpyën.

²³ Tääts ja y'ijxpëjkpëtëjk twin'ijxpejty ets t'ënëmaay aak ayi'iyë: Akujk jotkujk ja ja'ay yajpaatë mëti'ipë y'ijxtëpën ja tyampë miits xy'ixtën.

²⁴ Jä'ä ko jëtu'un miits n'ënëëmëtë, may ja Dios ja kyäjpxynyajxpë ets may ja yajkutujkpë tja'ixantë mëti'ipë miits tyam m'ijxtëp mmëtoowtëpën ets kä'äp t'ijxtë tmëtoowtë.

Samaariëtë ja'ay, oyjyä'äypyë

²⁵ Tu'uk ja tsajptëkotyëtë yaj'ijxpëjkpë wya'kujkëy ets tkäjpxywyitsa'any ja Jesús ets tyajtëëy: Wintsën, ¿tiis ntunëp ets npaatëtyës ja juukyajtën xëmëkyëjxmëpë?

²⁶ Ets ja Jesús y'ëtsoowinpijtë: ¿Wi'ix ja Moisés ja y'ënä'ämën kyëxja'ayëty? ¿Wi'ix jap xykyäjpxy?

²⁷ Tääts ja tsajptëkotyëtë yaj'ijxpëjkpë y'ëtsooy: Tsok ja Wintsën mëët tu'kë'ëyë ja mja'awën, mëët tu'kë'ëyë ja mjot mwinma'any, mëët tu'kkë'ëyë ja mmëkajtën ets tsok yë mmëku'uk ijxtëm kë'ëm mnätsyokyën.

²⁸ Ënet ja Jesús y'ënëmaayë: Tëy m'ëna'any. Pën mpatuunpy jëtu'un, mpaatëp ja juukyajtën xëmëkyëjxmëpë.

²⁹ E ja tsajptëkotyëtë yaj'ijxpëjkpë mëj nyäyajnaxa'anyë paaty tjaaktimyajtëëy ja Jesús: ¿E pën jëtu'un nmëku'uk'ajtypës?

³⁰ Tääts ja Jesús y'ëtsoowë: Tu'uk ja ja'ay ënety tsyoony Jerusalén ets jya'ta'any Jericó. Jamts ënety kyëtä'äky tu'ujotm, ko ja mä'tspë pyätë ets tu'kë'ëyë winë yajmä'tstaay, wyitpaat ojts yajpëjkë ets yajwinwojpy yajjëjpwojpy, o'ktso'oky yaj'ëxmajtsy.

³¹ Ënet jam nyäjxy tu'uk ja teety, oy tja'ixy, je'eyë ojts tnaye'ey ets nyäjxy.

³² Näyjyëtu'un tu'uk ja Leví ja'ay jam myiiny. Ko t'ijxy, ojts tnaye'ey ets nyäjxy.

³³ E ko tu'uk ja samaariëtë ja'ay kyëtäky ets t'ijxy, tääts tpa'ëyooy.

³⁴ Ënet ojts tmëwinkony ja tsëtyutja'ay ets tyajtsooypyejty mëët ja olivë on mëët ja tsatsym nyëë, tääts tnimojtsy. Ënet ojts tyajpety jyëyujkëjxm ets ojts tyajnëjkxy ma tu'uk ja ja'ajtaknën ets jam tpa'am'ijxy.

³⁵ Komjëpom, ko ja samaariëtë ja'ay tsyoonanë ets tju'ty mäjtsk ja denario meeny ets ja kutëjk tmooy ets t'ënëmaay: Kwent'at ya'atë ja'ay, mo'o pën tii y'amëtoopy; pën ka'ap yë meeny myëtä'äky mëti'ipë yam nmoopyën, yajtun mkë'ëm meeny, jääjës nkëpätëty koos nwinpitëty jatëkok.

³⁶ E nikajpx, ¿pën mijts mnajtsja'ap myëku'uk'ajtyp mëti'ipë ja mä'tspë yajtsëtyujtaayë?

³⁷ Tääts ja tsajptëkotyëtë yaj'ijxpëjkpë y'ëtsooy: Jä'ä mëti'ipë pa'ëyoowën. Ënet ja Jesús y'ënëmaayë: Nëjkx ets näjyëtu'un xytyunëty.

Jesús yajpaaty ma Marta ets Maria tyëjkën

³⁸ Tääts ja Jesús jyëtijty ets jyä'äjty ma tu'uk ja kajpnën. Jamts ja to'oxytyëjk tu'uk, mëti'ipë Marta xyëëwajtypyën, yë'ë ojts yajja'tyë ma tyëjkën.

³⁹ Ets ja myëkä'äx tu'uk, Maria xyëëwajtyp; yë'ë ojts Jesús wyintum nyaaxweetsy ets tmëtoow'ity wi'ix y'ënä'änyën.

⁴⁰ E ja Marta yë'ë jam y'oytyuunpy ja kääky tojkx ets tnimiiny ja Jesús ets t'ënëmaay: Wintsën, ¿këtii xy'ixy koos yë n'uty nätyu'uk xytyuktuunta'ay ya'atë tuunkë? Ënëëmë etsës xypyutëkëty.

⁴¹ E ja Jesús jëtu'un y'ëtsooy: Marta, Marta, yë maypyë tuunk mijts mmëmääpy mmëtäjpy.

⁴² Je'eyep ko tu'ukyë je'eyë mëti'ipë kopkpëkyën. María yë'ë të twin'ixy mëti'ipë ni'ik kopkpëkyën ets ka'ap tjëkyepy pën pyëjkxëtëty.