Lucas 1 - Biblia Dc en Mixe de Quetzaltepec

Teófilo ya'atë noky yajktuknija'ayëy

¹ May ja ja'ay të tjatuknipëjktaakë tja'aja'antë mëti'ipë të tyuny të jyätyën ma ëëtsajtëmën,

² jëtu'un ijxtëm ojts xytyuk'ëwa'anëmën ja mëti'ipë y'ijxtën nyija'awëtyën wi'ix tsyo'onë'ky tsyo'ontäkyën mëti'ipë tuunën jajtën, mëti'ipë ojts yajtuknipëktën tkajpxwa'kxtëty ja Dios ja y'aaw y'ayuk.

³ Ëjts näjyëtu'un, jëëky mëku'uk Teófilë, tëëjës nyajtëy nyajtëtä'äky wi'ixjaty winë tyuunë jyajtën ko tsyo'onë'ky tsyo'ontäky. Oyës të nmëmay të nmëtajy ya'atë ko mijts ntuknijayë në'ëwitsy tu'uwitsy

⁴ ets xyjyaaktimnyijawëty ko tyiyëty jyääntyëty mëti'ipë të myajtukni''ixën.

Ko Juan Yajnëëpäjtpë myina'any naaxwiiny

⁵ Jää it ma ënety ja Herodes yajkutukyën jam Judea, jam ënety tu'uk ja teety mëti'ipë xyëëwajtypyën Zacarías, yë'ë ijty mëët tyuny ja teety mëti'ipë yajtijtëpën Abías. Isabel ja tyo'oxytyëjk xyëëwajtyp, teety Aarón ja y'oknëëx.

⁶ Nimäjtskëty oy ijty yë Dios tmëtuntë, pyatuuntëp ja Wintsën ja y'ënä'ämën ets ka'ap tii poky tmëët'atë.

⁷ Je'eyëp ko ka'ap ijty pën y'u'unkëty, jä'ä ko ja Isabel ka'ap tjëkyepy y'u'unk'ixëty, jëtu'un ojts myëj ja'ayënëtë nimäjtskëty.

⁸ Tëkok ja teety Zacarías mëët ja jyä'äy ojts tyuka'ayë ets wyë'ëmtëty jap ma ja mëjtsajptëjkën.

⁹ Ënet t'ijxpëtsëëmtë pën tuka'ajëp ets tyëkëty jap tsajptëkoty poomno'kpë. Ja Zacarías ojts tyuka'ayë.

¹⁰ Ko tpaty ja poomno'k, ni'ëmukë ja mayjyä'äy ja Dios tja'amyäjtstë mëjtsajptëjkwinm.

¹¹ Ënet ja Zacarías ojts ja Dios ja y'anklës t'ijxpaaty, jap tyänë aka'any'äämpy ma ja wintsë'këntyaknën, ma poom tyoyën.

¹² Ko ja Zacarías t'ijxy ja tsajpjotmëtë kukäjpxy jëtu'unyë ojts tyimwë'ëmy ets tsyë'këy.

¹³ Tääts ja tsajpjotmëtë kukäjpxy y'ënëmaayë: Zacarías, këtii mtsë'ëkë, tëë ja Dios tmëtoy ko xyjyä'äymyetsy, pyatäämpy ja mto'oxytyëjk Isabel tu'uk ja y'u'unk mëti'ipë mtukxëëwatëpën Juan.

¹⁴ Mtukxoonta'akäämpy yë'ë ets may ja ja'ay nëjkx tukxoonta'aktë ko myina'any jya'ta'any naaxwiiny.

¹⁵ Yë'ë ko mëj'äämpy ja m'u'unk y'ita'any Wintsën wyintuuy. Ka'ap yë tsatsym nyëë nëjkx t'uuky, ni wiinkpë mëknëë. Naamka'anëm ënety myiny yaa naaxwiiny ets ja Kënu'kxymyëkajtën myo'ojëtëty ja winma'any ets ja mëk'ajtën.

¹⁶ Yë'ë yajjootwinpitëp may ja Israel ja'ay ma ja Wintsënën.

¹⁷ Ya'atë Juan, yë'ë nëjkx jëwyiin nyijkxy, mëët ja jyot jya'awën ja käjpxynyajxpë Elías. Yë'ëts ja u'unktaak u'unkteety nëjkx tyajnämyë'oypyikyë mëët ja y'u'unk y'ëna'k ets tjatëty wi'ix ja Dios tmëmëtowtëtyën. Jëtu'unts ja ja'ay tnipëjktaakëty ets tjëjp'ixtëty ja Wintsën.

¹⁸ Tääts ja Zacarías tyajtëëy ja tsajpjotmëtë kukäjpxy: ¿Wi'ixës ya'atë njëjp'ixëty?, ëjts tëëjës nmëjja'ayënë ets näjyëtu'un yë nto'oxytyëjkës.

¹⁹ Tääts ja tsajpjotmëtë kukäjpxy y'ëtsooy: Gabrielës ëjts, Tiosës y'ënä'ämën npatuunëp; yë'ëjës të xykyexy ets mijts n'ëwaanëty ya'atë aaw ayuk oypyë.

²⁰ E tyam, mëët ko ka'ap të xymyëpëky wi'ix të n'ënëëmën, uum mwë'ëma'any; jäänëm mkajpxë'ëkëty ko tu'kë'ëyë tyunëtëty jyatëtëty mëti'ipë yam ntukmëmëtyäkpyën.

²¹ Tap ënety ja ja'ay y'owëxitë tëja'p ets ojts nyäyajtëwëtë tii ko nëkoo tyimpoxnë ja Zacarías jap mëjtsajptëkoty.

²² Ko pyëtsiimy ja Zacarías, ka'ap tjajty wi'ix kyajpxëty. Ënet ja ja'ay tnija'awëtyë ko ënety të t'ixy ja tsajpjotmëtë kukäjpxy jap mëjtsajptëkoty. Je'eyë y'akë'ë y'axajë, jä'ä ko tëë ënety y'uumy.

²³ Ko ja Zacarías ojts tyajkä'pxy ja tyuunk, tääts ojts nyëjkxnë ma tyëjkën.

²⁴ Ko jëtu'un tyuunë jyajtë, tääts ja Isabel ojts wyi'imy u'unk mëët, mëkoxk po'o y'ijty tyëkoty, ka'ap pyëtsiimy, je'eyë tmëmay tmëtajy:

²⁵ Paatyës ja Wintsën të xypya'ëyoy etsës ja ja'ay ka'ap xypyäxëty.

Ko ja tsajpjotmëtë kukäjpxy tnikäjpxy ko ja Jesús myëxu'unk'ata'any

²⁶ Komtëtujk po'o ja Dios ja y'anklës Gabriel tkejxy jam Galilea y'itjotm ma ja kajpn txëëwatyën Nazaret,

²⁷ ets tku'ixëty ja to'oxy'ëna'k ka'apë ye'etyëjk tmëët'atynyëmën, mëti'ipë xyëëwajtypyën Maria. Ajaaymyuky ënety y'ijnë ets ja José tmëëtsëënëja'any, yajkutujkpë David y'u'unk y'ok.

²⁸ Tääts ja tsajpjotmëtë kukäjpxy tyëjkëy ma ja Maria ënety jap y'u'unyën ets t'ënëmaay: Dios mkënu'kxëtëp Maria, ni'ik mijts ja Wintsën mtsokyë, Dios mijts mëët myajpaaty.

²⁹ Ko ja Maria tmëtooy ko ja tsajpjotmëtë kukäjpxy jëtu'un y'ënë'ëmxëty, mëjmëtoy ojts tpëjktä'äky ets twinmaay twintajy wi'ix nyiwijy ja kajpxpo'kxën.

³⁰ Tääts ja tsajpjotmëtë kukäjpxy y'ënëmaayë: Maria, këtii mtsë'ëkëty. M'oyjya'awëyëp mijts yë Dios.

³¹ U'unk mëët mwë'ëma'any, mpaatäämpy tu'uk ja maank mëti'ipë mtukxëëwatëpën Jesús.

³² Mëj'äämpy nëjkx y'ity, Dios U'unk yajtija'any, ja Wintsën nëjkx pyëjktä'äkyë yajkutujkpë ijxtëm ja y'apteetyën David,

³³ ets yajkutukëty xëmëkyëjxm ma ja Israel ja'ayëtyën ka'ap kyëxa'any nyaxa'any ja kyutujkën.

³⁴ Tääts ja Maria tyajtëëy ja tsajpjotmëtë kukäjpxy: ¿Wi'ixtsën ya'atë jëtu'unpë tyuna'any jyata'anyë? kajts mëti'ipë ye'etyëjk nmëët'atynyëmës.

³⁵ Tääts ja tsajpjotmëtë kukäjpxy y'ëtsooy: Minaanp ja Kënu'kxymyëkajtën ma mijtsën, Dios ni'ik këjxmëpë myëk'ajtën myajnitukëtëp ijxtëm tu'uk ja yootsën, paaty ya'atë mëxu'unk mëti'ipë minaanp ja'taanpën, wa'ats yë'ë, Dios U'unk yë'ë.

³⁶ Näy pyatäämpy ja mtsëkuu Isabel tu'uk ja u'unk, oy tëë jyamëjja'ayënë; mëti'ipë ijty tyijtëpën ko ka'ap tjëkyepy y'u'unk'ixëty, tam tyam ja mëxu'unk tnëkëjxm'aty mëtuktujk tyam ja pyo'o.

³⁷ Dios, ka'ap tii tyajtsiptä'äky.

³⁸ Tääts ja Maria y'ënäny: Wintsënës ëjts nmëtuumpy, wa'an jëtu'un tunyë tjatyë ijxtëm ja Dios të tuknipëjktaakën ma ëjtsën, ijxtëm të xynyëëmënës. Ënet ja tsajpjotmëtë kukäjpxy ojts nyëjkxnë.

Ko ja Maria tku'ixë ja Isabel

³⁹ Ko jëtu'un jyäjty kyëpejty, ënät ja Maria tsyo'ony ets ojts nyijkx tunjotm kopkjotm jam Judea itjotm.

⁴⁰ Ënet jyä'äjty ma ja Zacarías ja tyëjkën ets ojts tkajpxpo'kxy ja Isabel.

⁴¹ Ko ja Isabel tmëtooy ja Maria kyajpxpo'kxyë, tää ojts ja y'u'unk tjawë y'ëti'itsy jyootjoty ets ja Isabel ja Kënu'kxymyëkajtën ojts tyukëtä'äkyë.

⁴² Ënet mëk y'ënäny: Tëë mijts ja Dios wäänëni'ik mkënu'kxyë këtiinëm ja to'oxytyëjk ni'ëmukë ets näjyëtu'un ja m'u'unk tëë yajkënu'kxy.

⁴³ Tim pën ëjtsnë ets ja Wintsën ja tyaak xykyu'ixëtyës.

⁴⁴ Je'eyës yë mkajpxpo'kxën të njamëtoy, ënätyë yë n'u'unkës të njawë y'ëti'itsy mëët ja xoontakën njootjotyës.

⁴⁵ Akujk jotkujk mijts ko të xymyëpëky ets jëtu'un tyunëtëty jyatëtëty wi'ix ja Wintsën të mnë'mxëtyën.

⁴⁶ Tääts ja Maria y'ënäny: Nmëjja'aw njaantyjya'apës yë Wintsën,

⁴⁷ ets xoontakpës ja njot nja'awën mëët ja nTiosës mëti'ipës xyajnitsokpën.

⁴⁸ Tëës ja Dios xynyi''ijxkëtä'äky, ëjts yë tyuunpë yu'unkpë naxymyëpë. Tyam ënät ëjts xëmë ja ja'ay ni'ëmukë xytyijnëty ko n'akujk njotkujkëtyës.

⁴⁹ Yë'ë ko ja Dios mëti'ipë maaytyääyëpën winë mëj këjää ja mëyajtën të tuny maas ëjtsën. Wa'ats ets kënu'kxy yë xyëëw nyaxëty.

⁵⁰ Xëmë tpa'ëyoy mëti'ipë wiinkutsë'këyëpën.

⁵¹ Tëë ja myëk'ajtën tyaj'ixyë, tëë tyaj'atëkoy mëti'ipë ënety të tjatuknipëjktaakëtën ja mëjpë këjxmëpë jyä'äy'atën.

⁵² Tëë tpëjkë ja yajkutujkpëtëjk ja kyutujkën, ets të tyajmëjnaxy ja ayoopë ja'aytyëjk.

⁵³ Tëë ja ayuupë axëëwpë tmo'oy ja nyaax kyam, ets awa'ats kë'ëwa'ats të tpëjktä'äky ja kumeenyjyä'äytyëjk.

⁵⁴ Tëë ja Israel ja'ay tputëkë, mëti'ipë tyuunpë'ajtypyën ets ka'ap të tja'atyëkoy ja pya'ëyo'owën,

⁵⁵ Ja n'ap'ajtëmë Abraham mëët ja y'u'unk y'ok, jëtu'un ënety të yajtukwinwanëtë.

⁵⁶ Tääts ja Maria ojts mëët wyi'im ja Isabel tëkëëk po'o. Ok ojts wyimpijnë ma ja tyëjkën.

Ko Juan Yajnëëpäjtpë myiny jyä'ty naaxwiiny

⁵⁷ Ko ja nyixëëw tpaty jëna'a ja Isabel ja y'u'unk myëxu'unk'ata'anyën, jää ojts myëxu'unk'aty.

⁵⁸ Ënet ja myëjëën myëtëjk ets ja myëku'uktëjk nyimiinëtë ets tyukxoontakëtë ko ja Wintsën ja mëjmëyajtën të tuny ma yë'ëjën.

⁵⁹ Kom tuktujk xëëw ja mëxu'unk ojts tyajnëjkxtë ets yajnatsujk'ëwëtitëty ja ye'etyëjkajtën, näjyëtu'un ojts tjatukxëëwata'antë Zacarías ijxtëm ja tyeety txëëwatyën.

⁶⁰ E jëtu'un ja tyaak y'ënäny: Ka'ap, Juan xyëëwatëp.

⁶¹ Tääts ja Isabel yaj'ëtsooy: Ka'ap pën yë mmëku'uk jëtu'un txëëwaty Juan.

⁶² Tääts ja Zacarías tyajtëëwtë tii ja y'u'unk xyëëwatëp.

⁶³ Tääts ja u'unkteety t'amëtooy tu'uk ja pu'uy tsyetsy. Jam tkëxjaay: Juan xyëëwatëp. Ni'ëmukë ja ja'ay mëjmëtoy tmëtoowtë.

⁶⁴ Näy jää ja Zacarías ojts jatëkok kyajpxpëky ets ja Dios tmëjja'aw tjaantyja'awëy.

⁶⁵ Ni'ëmukë ja myëjëën myëtëjk ojts mëjmëtoy tmëtowtë ets ja ja'ay tnija'awëtyääytyë jam Judea y'itjotm, tunjotm kopkjotm, wi'ix ënety të tyuny të jyätyën.

⁶⁶ Mëti'ipë myëtoowtën, ojts nyäyajtëwëtë jaxim jayam: ¿Tii jëtää tyunäämpy ko yääkëty? Jä'ä ko ënety ja Wintsën ja myëk'ajtën tyaj'ixyë ma yë'ëjën.

Ko ja Zacarías ja Tios tmëjjaw tjaantyjyawë

⁶⁷ Tääts ja Zacarías ja Dios yajkajpxë ko ja Kënu'kxymyëkajtën tyuktëjkëyë, ets y'ënäny jëtu'un tä tu'uk ja käjpxynyajxpën:

⁶⁸ Kënu'kxy mëjjawë yë Wintsën nyäxy, mëti'ipë ja Israel ja'ay Tyios'ajtëpën, Jä'ä ko tëë tniminy ja nyaax kyajpn ets tyajnitso'oka'any.

⁶⁹ Tëë xytyuknikäjxëm tu'uk ja mëj yajnitsokpë, David yë y'u'unk y'ok, mëti'ipë ijty ja Dios myëtuumpyën.

⁷⁰ Yë'ë ja Dios ojts twinwanë mëët ja kyäjpxynyajxpëtëjk,

⁷¹ ko xyaj'ëwa'atspëtsëma'anëm ma ja nmëtsip'ajtëmën mëti'ipë xykya'oy'ijxëmën,

⁷² ko tpa'ëyowa'any ja n'ap'ajtëmë, ets ko ka'ap tja'atyëkoyä'äny ja käjpxytyu'unën.

⁷³ Ya'atë ojts yajtukwinwanëtë ja n'ap'ajtëm Abraham,

^74-75 ko xytyukmëmëta'aka'anëm ja nmëtsip'ajtëmë, ka'ap ntsë'këmëty, wa'ats aaw wa'ats jot n'ijtmëty ets nyajpatmëty xëmë ma yë'ëjën mapaat njuuky'ajtëmën.

⁷⁶ E mijts, u'unk maay, jä'ä nëjkx myajtijy: Dios ni'ik këjxmëpë kyäjpxynyajxpë, jä'ä ko jëyëjp mnëjkxa'any ma ja Wintsënën ets xynyipëjktaakëja'any ja nyë'ë tyu'u,

⁷⁷ jëtu'unts ja ja'ay nijawëtëty ja nitsokën ets ja pyoky yajnimä'kxtëty.

⁷⁸ Yë'ë ko ja nTios'ajtëmë myëët'ajtyp ja pa'ëyo'owën, paaty jam tsajpwinm të tyajjajtä'äky ja xëëw ets ja jempyë xëëw të xytyuk'ijxëmë,

⁷⁹ ets tkutë'kxa'any mëti'ipë tsënaaytyëpën jam akootstum ma o'ktaknën, jëtu'unts xytyu'umo'omyëty ets jotkujk nyajpatmëty.

⁸⁰ Jëtu'un ja Juan ye'ky pyejty ets myëkpëjky mëët ja Kënu'kxymyëkajtën, jam tsyënaay ma ja të'ëts itjotmën koonëm ojts nyänyikëxë'ëkyë ma ja Israel ja'ayëtyën.